ရခိုင်ပြည်နယ်၊ မောင်တောမြို့ ၄ မိုင်ရှိ အမှတ် ၂ ရဲတပ်ရင်းရှေ့ရှိ မေယုခန်းမမှာ ဇွန် ၉ ရက် မနက်ပိုင်းကစပြီး စစ်ကောင်စီတပ်အင်အား  ၁၀၀ ကျော် တပ်စွဲထားတာကြောင့်  ပြည်သူတွေရဲ့ နေအိမ်တွေကို ဝင်ရောက်စစ်ဆေး ဖမ်းဆီးမှုတွေလုပ်မှာကို  စိုးရိမ်နေကြတယ်လို့ ဒေသခံတွေက ပြောပါတယ်။

စစ်ကောင်စီတပ်တွေ ခုလို အင်အားတိုးချဲ့ချလာတာကြောင့် ၄ မိုင်၊ မကျည်းကုန်း၊ သာယာကုန်း၊ ငွေတောင် စတဲ့ကျေးရွာ ၃ ရွာမှ ဒေသခံတွေ စိုးရိမ်နေကြတာလည်း ဖြစ်ပါတယ်။

၄ မိုင်ဒေသခံတစ်ဦးက “မေယုခန်းမထဲမှာ စစ်သား ၁၀၀ ကျော်လောက်ကို ဘူးသီးတောင်က စစ်ကား ၂ စီးနဲ့ ဒီနေ့မနက်ပိုင်းမှာ လာချပေးသွားတာ။ အခုညနေ ၄ နာရီအချိန်ထိ ခန်းမထဲမှာ ရှိနေကြတုန်းပါ။ ညပိုင်းကျတော့ နေအိမ်တွေကို ဝင်ရောက်ရှာဖွေစစ်ဆေးမှာကို စိုးရိမ်ကြောက်လန့်နေကြတာ” လို့ ပြောပါတယ်။

မေလ ၆ ရက်ကစပြီး မောင်တောဒေသရှိ နယ်ခြားစောင့်တွေကို စတင်ပြီး အပြောင်းအရွှေ့ ပြုလုပ်နေခဲ့ကြ​ပြီးနောက် စစ်အင်အားတွေ တိုးချဲ့ချထားလာတာကြောင့် ဒေသခံတွေက စိုးရိမ်နေတာကြတာလည်း ဖြစ်ပါတယ်။

မကျည်းကုန်းကျေးရွာဒေသခံတစ်ဦးက“မောင်တော ၄ မိုင်က နခခ-၂ တပ်ရင်းတစ်ခုလုံးကို လူစားလဲခဲ့ကြတယ်။ ဒီနေ့မှာတော့ ၄ မိုင် အမှတ် ၂ နယ်ခြားစောင့်တပ်က မေယုခန်းမမှာ စစ်သားတွေအပြည့် တွေ့ရတော့ ညအချိန် ကျေးရွာတွေကို ဝင်ရောက် စစ်ဆေးလာမှာကို စိုးရိမ်နေရပါတယ်”လို့ ဆိုပါတယ်။

နယ်ခြားစောင့် အမှတ် ၂ မှာ နေပြည်တော်၊ ရန်ကုန်၊ ဧရာဝတီ၊ ပဲခူး အပါအဝင် ပြည်မမှ စစ်သားတွေနဲ့ ရဲတပ်ဖွဲ့ဝင်တွေကို နယ်ခြားစောင့်အဖြစ် အသွင်ပြောင်းပြီး မောင်တောခရိုင်သို့ ပြောင်းရွှေ့ခဲ့ကြတာပါ။

စစ်ကိုင်းတိုင်း၊ ယင်းမာပင်မြို့နယ်၊ အောင်​ဇေယျကွက်သစ်မှာ စစ်​ကောင်စီတပ်ဖွဲ့တွေ တပ်စွဲလေ့ရှိတဲ့ သီတဂူကျောင်း​ဆောင် ဒီဇင်ဘာ ၈ ရက်​ မနက်က ပစ်ခတ် တိုက်ခိုက်ခံလိုက်ရတယ်လို့ သိရပါတယ်။

အဲဒီလိုတိုက်ခိုက်မှုကို ယင်းမာပင်မြို့နယ် People's Defence Army-Yinmarbin(PDA)အဖွဲ့နဲ့ ကနီမြို့နယ် PDF အဖွဲ့တို့က ပူး​ပေါင်းလုပ်​ဆောင်ခဲ့တာဖြစ်ပြီး လက်နက်ကြီး ၆ ချက်နဲ့ ပစ်ခတ်ခဲ့တာဖြစ်ပါတယ်။

ပစ်ခတ်မှုဒဏ်​ကြောင့် သီတဂူ​ကျောင်းကြီး ပြိုကျပျက်စီးသွားသလို အဲဒီအထဲမှာရှိတဲ့ စစ်​ကောင်စီတပ်ဖွဲ့ဝင်​တွေလည်း ထိခိုက်​သေဆုံးမှု  ရှိနိုင်တယ်လို့ PDF ​ခေါင်း​​ဆောင်တယောက်က ​ပြောပါတယ်။

သီတဂူ​ကျောင်း​ဆောင်ဟာ စစ်​ကောင်စီတပ်ဖွဲ့​တွေ ​အ​ခြေချ​နေထိုင်​လေ့ရှိပြီး ​ကျောင်းအနီးပတ်ဝန်းကျင်မှာလည်း လုံခြုံ​ရေးဂိတ်ထားရှိကာ လမ်းသွားလမ်းလာပြည်သူတွေကို တားဆီးစစ်​ဆေးနေသလို  ​စျေး​ရောင်း​စျေးဝယ်ခရီးသည်ကားတွေကိုလည်း ​မတရား​ငွေ​တောင်းခံနေတယ်လို့လည်း ဒေသခံတွေထံက သိရပါတယ်။

ဒါ့အပြင် ဒီဇင်ဘာ ၇ ရက် ညပိုင်းကလည်း မုံရွာ-ပုသိမ် ကားလမ်း​ဘေးမှာရှိတဲ့ အမှတ် (၂၈) ရဲတပ်ရင်းကိုလည်း လက်နက်ကြီးတွေနဲ့ တိုက်ခိုက်ခဲ့တယ်လို့ဆိုပါတယ်။

အခုလိုလုပ်​ဆောင်ရတာဟာ စစ်​ကောင်စီတပ်ဖွဲ့က လက်နက်အားကိုးပြီး မတရားအာဏာ လုယူခဲ့ကာ ပြည်သူတွေရဲ့ အသက်အိုးအိမ်​တွေဖျက်ဆီး​နေတာ​ကြောင့် လုပ်​ဆောင်တာလို့ ဒေသခံ ကာကွယ်ရေးတပ်တွေက ဆိုပါတယ်။

စစ်​ကောင်စီတပ်တွေဟာ ဒီဇင်ဘာ ၇ ရက်​​နေ့က ယင်းမာပင်ခရိုင်အတွင်း ဆားလင်းကြီးမြိုနယ် ဒုန်း​တော​ကျေးရွာက အပြစ်မဲ့ပြည်သူ ၁၅ ဦးထက်မနည်းကို ရက်ရက်စက်စက် ပစ်ခတ်မီးရှို့  သတ်ဖြတ်ခဲ့ပါတယ်။