တရုတ်-မြန်မာအရှေ့မြောက်ဒေသ အဓိကကုန်သွယ်ရာ ပြည်ထောင်စုလမ်းမမှာ စက်တင်ဘာ ၄ ရက်က စစ်ကောင်စီတပ်နဲ့ ကေအိုင်အေ တပ်မဟာ ၁၀ တို့ကြားတိုက်ပွဲ ဖြစ်ပွားခဲ့တယ်လို့ နယ်စပ်ကုန်သည်တဦးက ပြောပါတယ်။
သိန္နီမြို့ တိုးဂိတ်အကျော် သိန္နီ နဲ့ မန်ပြိန်းကြားက ကျောက်တောင်နားမှာ ဒီနေ့မွန်းတည့် ၁၂ နာရီ ကစပြီး မွန်းလွဲ ၂ နာရီလောက်အထိ တိုက်ပွဲဖြစ်ခဲ့တာကြောင့် အဝေးပြေးလမ်း နာရီပိုင်းကြာ လမ်းပိတ်သွားကြောင်း ဒေသခံတွက သိရပါတယ်။
သိန္နီဒေသခံတဦးက "ကြောက်သွားတာပေါ့။ တအားနီးတာ အသံက။ လက်နက်ကြီး ရောပါတယ်။ ဘုရားကုန်းနားမှာ ၁ လုံးပေါက်တယ်။ ဘယ်အဖွဲ့တွေဆိုတာ မသိပါဘူး။ လမ်းမကြီး ပိတ်ထားတာ၂ နာရီကျော်ထိ" ပြောပါတယ်။
ကချင်လွတ်မြောက်ရေးတပ်မတော် (ကေအိုင်အေ) တပ်မဟာ ၁၀ နဲ့ စစ်ကောင်စီတို့ အကြား တိုက်ပွဲဖြစ်ပွားတာ ဖြစ်ပြီး အထိအခိုက် မသိရသေးဘူးလို့ ကေအိုင်အေ ရှေ့တန်းသတင်းရင်းမြစ်တဦးက ပြောပါတယ်။
စစ်ကောင်စီဘက်က အင်အားဖြန့်ကျက် ထိုးစစ်ဆင်နေသလို သိန္နီမြောက်ဘက်နဲ့ မြို့အနောက်ဘက်ခြမ်းကို လက်နက်ကြီး ပစ်ကူတာရှိပြီး လားရှိုးဘက်မှ စစ်ကား ၁၁ စီး အပြင် အရပ်သားကားတွေ အသုံးပြုကာ စစ်ကြောင်း ချီလာတာကြောင့် တိုက်ပွဲတွေ ဖြစ်ပွား လာနိုင်ကြောင်း သိန္နီပြည်သူ့ကာကွယ်ရေးတပ်ဖွဲ့ (TN.PDF)၊ ပြန်ကြားရေးနှင့်ဆက်သွယ် ထောက်လှမ်းရေးတာဝန်ရှိသူတဦးက ပြောပါတယ်။
လက်နက်ကြီးတွေပါ ပစ်ခတ်ပြီး ပြည်ထောင်စုလမ်းမကြီးနဲ့ နီးကပ်နေတာကြောင့် ခရီးသွား ပြည်သူတွေ လုံခြုံရေး စိုးရိမ်ကြရကြောင်း ခရီးသွားပြည်သူတွေဆီက သိရပါတယ်။
တရုတ် - မြန်မာ အဓိကကုန်သွယ်ရာ လမ်းမကြီး တခုဖြစ်တဲ့ လားရှိုး - မူဆယ် အဝေးပြေး လမ်းမ အနီးနားတွေမှာ စစ်ကောင်စီနဲ့ တိုင်းရင်းရင်းသား လက်နက်ကိုင်တို့ကြား မကြာခဏ တိုက်ပွဲ ဖြစ်ပွားတတ်ပြီး အခုလမှာတော့ ပထမဆုံးအကြိမ် ဖြစ်ပွားတာပါ။
အဲဒီ လမ်းမကြီးအနီးနားတကြောမှာ စစ်ကောင်စီတပ်၊ စစ်ကောင်စီ လက်အောက်ခံ ပြည်သူ့ စစ်တပ်ဖွဲ့တွေ၊ KIA၊ TNLA၊ MNDAA နဲ့ PDF စတဲ့ လက်နက်ကိုင်တပ်ဖွဲ့တွေ လှုပ်ရှားသွားလာရာ နယ်မြေဖြစ်ပါတယ်။
ရှမ်းပြည်နယ်မြောက်ပိုင်း၊ ကွတ်ခိုင်မြို့၊ လွယ်ဆမ်ဆစ်တောင်ခြေ၊ မန်နောင်ရွာအနီး ယူကလစ်တောမှာ ဇူလိုင် ၂၅ ရက် မနက် ၇ နာရီဝန်းကျင်ကစပြီး စစ်ကောင်စီတပ်နဲ့ ကေအိုင်အေ တပ်မဟာ ၄၊ တပ်ရင်း ၂၉ တို့ တိုက်ပွဲဖြစ်ခဲ့ရာမှာ အသက် ၃ နှစ်အရွယ် ကလေးငယ် တဦး ဦးခေါင်းမှာ ကျည်စထိမှန် ဒဏ်ရာရသွားတယ်လို့ ဒေသခံတွေထံက သိရပါတယ်။
ဒဏ်ရာရသူကိုကူညီပေးသူ တဦးကက "၃ နှစ်အရွယ် ကလေးငယ် ၁ ဦး ခေါင်းမှာ လက်နက်ကျည်စ ထိမှန်လို့ ဆေးရုံမှာ။ အခြေအနေ စိုးရိမ်ရတယ်။" လို့ ပြောပါတယ်။
လွယ်ဆမ်ဆစ်တောင်ခြေ မန်နောင်ရွာမှာ စစ်ကောင်စီတပ်တွေရှိနေတဲ့အချိန် ကေအိုင်အေဘက်က လာပစ်တာလို့ အဲဒီဒေသခံက ဆိုပါတယ်။
တိုက်ပွဲက မနက် ၇ နာရီ ကျော်လောက်က ဖြစ်ပွားပြီး ထိခိုက်ဒဏ်ရာရတဲ့ အခြေအနေ အသေးစိတ် မသိရသေးပဲ စစ်ကောင်စီဘက်က ကား ၅ စီးလောက် လာရောက်ပြီး ပြန်လှည့် လာတာတွေ့ရတယ်လို့ ဒေသခံက ပြောပါတယ်။
"စစ်ကောင်စီတပ်က ထိခိုက်သူတွေကို သိန္နီတပ်ဘက် နှစ်ခေါက်တင်သွားပြီ။ တော်တော်တော့ ထိတယ်။" လို့ ကေအိုင်အေ ရှေ့တန်း စစ်သည်တဦးက ပြောပါတယ်။
ဇူလိုင် ၁၆ ရက်ကလည်း စီစီဝမ်တောင်အနီး နွားလဘို့ တောင်ခြေမှာ အသက် ၉ နှစ်ကျော် အရွယ် ကျွဲကျောင်းသားကလေး တယောက် မိုင်းနင်းမိ သေဆုံးခဲ့ပါသေးတယ်။
ရှမ်းပြည်နယ်မြောက်ပိုင်း မူဆယ်နဲ့ ကွတ်ခိုင်မြို့နယ်တွေထဲမှာ လတ်တလော စစ်ကောင်စီတပ် နဲ့ ကေအိုင်အေတို့ကြား မကြာခဏ တိုက်ပွဲ ဖြစ်ပွားနေပါတယ်။
