ပဲခူးတိုင်း၊ သာယာဝတီမြို့နယ်အခြေစိုက် ခလရ ၃၅ တပ်က လက်နက်အလက် ၅၀ ပျောက်ဆုံးမှုနဲ့ ပတ်သက်ပြီး ကြိတ်ဖြေရှင်းနေကြတယ်လို့ အဆိုပါ စစ်ကောင်စီတပ်တွင်း သတင်းရင်းမြစ်ထံက သိရပါတယ်။
အဆိုပါတပ်ရင်းမှာ အရင်ကတည်းက တပ်ရင်းမှူးနဲ့ အပေါင်းပါတွေက သေနတ်တွေ ရောင်းစားနေကြတာဖြစ်ပြီး လက်ရှိ လက်နက်တွေ ပျောက်နေတဲ့ကိစ္စ ခုံရုံးဖွဲ့ပြီး စစ်ဆေးခံနေရတယ်လို့ အမည်မဖော်လိုသူ တပ်တွင်းနေ ဒေသခံတယောက်က ပြောပါတယ်။
“တပ်ထဲမှာ ပြဿနာက တခုတည်းမဟုတ်ဘူး။ အရင်ရက်ကလည်း ရိုးမပေါ်က ရှေ့တန်းမှာ ၁၁ ဦးကျတယ်။ တိုက်ပွဲကျတဲ့ စစ်သည် ၁၁ ဦးရဲ့ လက်နက်ခဲယမ်းကို ပြန်မကောက်နိုင်လို့ ခလရ ၃၅ တပ်ရင်းမှူးလည်း စုံခုံအစစ်ဆေးခံနေရတယ်။ အရင်ကတည်းက တပ်ရင်းမှူးက သေနတ်တွေ ရောင်းစားနေတာကြာပြီ။ သူက လည်တယ်။ ရှေ့တန်းကိုလူလွှတ်ရင်လည်း ဖွဲ့စည်းပုံမပြည့်ဘူး။ လူ ၅၀ လောက် လွှတ်တယ်ဆိုပြီး တကယ်က ၂၀-၂၅ လောက်ပဲလွှတ် ပြီးရင် ပြန်လာရင် ပိုတဲ့ လူ ၂၅ ယောက်လောက်ကို အသေစာရင်းနဲ့ ထွက်ပြေးစာရင်းလုပ်ပြီး ပြတယ်။ အဲ့လိုပြပြီး အဲ့ဒီလူတွေရဲ့ သေနတ်တွေကို သူရောင်းစားတယ်။”
သေနတ်တလက်ကို ကျပ်သိန်း ၄၀ မှ သိန်း ၁၂၀ အထိ ပေးရပြီး တိုက်ရိုက်မဟုတ်ဘဲ အဆင့်ဆင့်ဝင်ယူနေတာ ဖြစ်ပါတယ်။ ကျည်ဆန်ကတော့ အနည်းငယ်သာပေးပြီး ထပ်လိုချင်ပါက နောက်တယောက်နဲ့ ထပ်ချိတ်ပြီးဝယ်ရကြောင်း သေနတ်သာရောင်းပြီး ကျည်ဆန်ကိုတော့ အများကြီးမရောင်းဘူးလို့ စစ်ကောင်စီခန့် အုပ်ချုပ်ရေးမှူးတယောက်က ပြောပါတယ်။
စစ်ကောင်စီတပ်တွင်းက အမည်မဖော်လိုသူတဦးက “အာဏာသိမ်းပြီးကာစလောက်ကတည်းက သာယာဝတီနယ်ဘက်က အုပ်ချုပ်ရေးမှူးတွေ၊ ပျူတွေက သူ့ထံက သေနတ်တွေ ဝယ်ကိုင်နေကြတာ။ အဲ့ဒီတုန်းက သေနတ်ကိုင်ဥပဒေလည်း မထွက်သေးဘူးလေ။ အခုတော့ အဲဒီအုပ်ကြီးတွေက ခပ်တည်တည်နဲ့ လျှောက်ကြမှာပေါ့ သေနတ်ကိုင်ဆောင်ခွင့်၊ သာယာဝတီကို ဝီရသူလာသွားတာ အတိုတွေပါတယ်။ ပုံတွေမှာကို တွေ့နေရတယ်လေ။ ဘုန်းကြီးနောက်လိုက်တချို့မှာလည်း အတိုတွေပါလာကြတယ်။ သေနတ်တွေက အပြင်မှာ အရမ်းပျံ့နေကြတာ” လို့ ပြောပါတယ်။
သာယာဝတီနယ်ထဲမှာ ခလရ ၃၅ တပ်အပြင် အမှတ် ၁၀၁၀ လေကြောင်းရန်ကာကွယ်ရေးတပ် ရှိပြီး အဲ့ဒီတပ်မှာ လုံခြုံရေး ၂ ယောက်ပဲရှိကာ စစ်တပ်အငြိမ်းစား ပင်စင်စား သက်ကြီးရွယ်အိုတွေကိုလည်း လုံခြုံရေးတာဝန် ချထားပေးပါတယ်။
ခလရ ၃၅ က တပ်မ ၆၆ လက်အောက်ခံဖြစ်ပြီး အခုဖွဲ့စည်းပုံမပြည့်တာကြောင့် တပ်မ ၆၆ လက်အောက်ခံ တပ်ရင်း ၃ ရင်းပေါင်းပြီး တပ်ရင်းတရင်းစာ စုဖွဲ့ကာ ရှေ့တန်းထွက်နေရပြီး လက်မောင်းဘတ်တံဆိပ်ကအစ အကုန်လုံး တပ်ရင်းတခုနာမည်ပဲသုံးပြီး ရှေ့တန်းထွက်နေရတယ်လို့ သိရပါတယ်။
ရှမ်းပြည်နယ်မြောက်ပိုင်း၊ နောင်ချိုမြို့နယ်မှာ အခြေစိုက်ထားတဲ့ စစ်ကောင်စီတပ် လက်အောက်ခံ ခမရ-၁၁၄ တပ်ရင်းကို ရှမ်းပြည်နယ်မြောက်ပိုင်း မဟာမိတ်တပ်ပေါင်းစုက ဖေဖော်ဝါရီ ၂၁ ရက် ညနေပိုင်းက လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့ရာမှာ စစ်တပ်အရာရှိ ၂ ဦး ထိခိုက်သေဆုံးခဲ့တယ်လို့ ပြင်ဦးလွင် PDF က ထုတ်ပြန်ပါတယ်။
PDF (Pyin Oo Lwin) ရဲ့ မဟာမိတ်ဖြစ်တဲ့ ရှမ်းမြောက်မဟာမိတ်တပ်ပေါင်းစုကနေ ဖေဖော်ဝါရီ ၂၁ ရက် ည ၁၂ နာရီခွဲလောက်က နောင်ချိုမြို့နယ်ရှိ စစ်ကောင်စီတပ်ရဲ့ တပ်မ-၅၅ လက်အောက်ခံ ခမရ-၁၁၄ တပ်ရင်းကို လက်နက်ကြီး လက်နက်ငယ်တွေနဲ့ သွားရောက်ပစ်ခတ်တိုက်ခိုက်ခဲ့ရာ ခမရ-၁၁၄ အရာရှိရိပ်သာမှာ လားရှိုးမြို့ ခလရ-၆၈ က ရောက်ရှိနေတဲ့ ဗိုလ်နှစ်ဦး သေဆုံးခဲ့ပြီး ဒဏ်ရာရရှိမှုကို စုံစမ်းဆဲလို့ ထုတ်ပြန်ချက်မှာ ဖော်ပြပါတယ်။
နောင်ချိုမြို့နယ်အတွင်းမှာ အာဏာသိမ်းစစ်ကောင်စီတပ်နဲ့ ပြည်သူ့ကာကွယ်ရေး တပ်ပေါင်းစုတွေကြား တိုက်ပွဲမကြာခဏဖြစ်ပွားလေ့ရှိပြီး နှစ်ဖက် ထိခိုက်သေဆုံးမှုတွေလည်း ရှိခဲ့ပြီး အခုပစ်ခတ်မှုနဲ့ အရာရှိ ၂ ဦးသေဆုံးမှုနဲ့ပတ်သက်လို့ စစ်ကောင်စီဘက်က သတင်းထုတ်ပြန်တာ မရှိသေးပါဘူး။
