စစ်ကိုင်းတိုင်းဒေသကြီး ယင်းမာပင်ခရိုင် ကနီမြို့နယ်မှာ ဇူလိုင် ၁၉ ရက်နေ့ ညနေပိုင်းက  ချင်းတွင်းမြစ်အတွင်း စစ်ကောင်စီတပ်တွေ စီးနင်းလာတဲ့ အမြန်ရေယာဉ်တွေကို ပူးပေါင်းကာကွယ်ရေးတပ်တွေက  ကြားဖြတ်တိုက်ခိုက်ခဲ့ကြ​တယ်လို့ သိရပါတယ်။

စစ်ကောင်စီတပ်ဖွဲ့တွေက ချင်းတွင်းမြစ်အတွင်းကနေ လက်နက်ကြီး၊ လက်နက်ငယ်တွေနဲ့ တရစပ် စတင်ပစ်ခတ်ခဲ့ပေမယ့် ပူးပေါင်းကာကွယ်ရေးတပ်ဖွဲ့တွေဘက်က ထိခိုက်မှု တစုံတရာမရှိခဲ့ဘူးလို့ ဆိုပါတယ်။

ကနီမြို့နယ် ချင်းတွင်းမြစ်အတွင်း ဇူလိုင် ၁၈ ရက် နေ့လယ်ပိုင်းကလည်း  စစ်ကောင်စီတပ်ဖွဲ့ဝင်တွေ စီးနင်းလာတဲ့ အမြန်ရေယာဉ်တစီး ပစ်ခတ်ခံရတာကြောင့် နစ်မြုပ်ခဲ့တယ်လို့ ဒေသခံတွေက ပြောပါတယ်။’

ဒေသခံကာကွယ်ရေးတပ်ဖွဲ့တွေက ကနီမြို့နယ် ရွှေစာရေးဝဲအနီးမှာ  လက်နက်ကြီးတွေနဲ့ ပူးပေါင်း  ပစ်ခတ်ခဲ့ကြတာကြောင့် နစ်မြုပ်သွားတာလို့ တပ်ဖွဲ့ဝင်တဦးက ပြောပါတယ်။

“ရွှေစာရေးဝဲနားမှာ ထိတွေ့ တိုက်ပွဲဖြစ်ခဲ့ပါတယ်။ ဒေသခံကာကွယ်ရေးတပ်ဖွဲ့တွေက ပူးပေါင်းပြီး လက်နက်ကြီးနဲ့ ပစ်ခတ်ခဲ့တာတွေ ရှိပါတယ်။ ကျနော်တို့ပစ်လိုက်တဲ့ လက်နက်ကြီးကြောင့်  စစ်ကောင်စီတပ်ဖွဲ့တွေ စီးနင်းလာတဲ့ အမြန်ရေယာဉ်တွေထဲက တစီးကတော့ ထိခိုက်ပြီး မြစ်ထဲ မြုပ်သွားတယ်။ စစ်ကောင်စီတပ်ဖွဲ့တွေ သေဆုံးတာရှိ၊ မရှိ အတည်မပြုနိုင်သေးဘူး။” 

စစ်ကောင်စီတပ်တွေဟာ  အမြန်ရေယာဉ် ၁၂ စီးနဲ့အတူ စီးနင်းလာလိုက်ပါခဲ့ကြပြီး သူတို့စီးနင်းလာတဲ့ အမြန်ရေယာဉ်တွေပေါ်မှာ စားနပ်ရိက္ခာ၊ စစ်လက်နက် စတာတွေ သယ်လာခဲ့တယ်လို့ ဒေသခံတွေက ပြောပါတယ်။

ကနီမြို့နယ် ချင်းတွင်းမြစ်အတွင်းမှာ စစ်ကောင်စီတပ်တွေနဲ့ ပူးပေါင်းကာကွယ်ရေးတပ်ဖွဲ့တွေအကြား နှစ်ရက်ဆက်တိုက် ထိတွေ့တိုက်ပွဲဖြစ်ခဲ့တာလို့ သိရပါတယ်။

စစ်ကိုင်းတိုင်း ကနီမြို့နယ် ချင်းတွင်းမြစ်အတွင်း စစ်ကောင်စီတပ်ရဲ့ရေယာဉ်ကို ကနီမြို့နယ် ပြည်သူ့ကာကွယ်ရေးတပ်က ပစ်ခတ်တိုက်ခိုက်ခဲ့တယ်လို့ သိရပါတယ်။

နိုဝင်ဘာ ၂၂ ရက်နေ့ နေ့လယ် ၁ နာရီအချိန်လောက် မုံရွာ-အလုံ-မင်း ဒေါင့်ဆိပ်ကမ်းကနေ ချင်းတွင်းမြစ်ကို ဆန်တက်လာတဲ့ စစ်ကောင်စီ အမြန်ယာဥ် ၂ စီးနဲ့ စပိဘုတ် တစ်စီးကို ကနီမြို့နယ် ပြည်သူ့ကာကွယ်ရေးတပ်ဖွဲ့ (PDF) က မြစ်ဘေးဝဲယာ နေရာ (၈) ခုက‌နေ တိုက်ခိုက်ခဲ့တာလို့ တပ်ဖွဲ့ဝင်တစ်ဦးက ပြောပါတယ်။

“ကျနော်တို့ ပစ်ခတ်ခဲ့တာကတော့ ၈ နေရာကျော်ကနေ ပစ်ခတ်ခဲတယ်။ ဒါပေမဲ့ သူပစ်ကိုယ်ပစ်ပေါ့ဗျာ။ သူတို့က မော်တော်ကို သဲအိတ်တွေ၊ သံပြားတွေနဲ့ ကြိုတင်ပြင်ဆင်ခဲ့တာရှိတယ်ဗျ။ နောက်ပြီး ခေတ်မီလက်နက် အသာစီး ရှိတာတွေကြောင့် ထိထိရောက်ရောက် မလုပ်နိုင်ခဲ့ဘူးပေါ့။”

နိုဝင်ဘာ ၂၂ ရက်နေ့ တရက်တည်းမှာတင် ချင်းတွင်းမြစ်အတွင်း တိုက်ပွဲနှစ်ကြိမ်ဖြစ်ပွားခဲ့ကာ အကြမ်းဖက်စစ်ကောင်စီတပ်ဖွဲ့ဘက်က ၈ ဦးလောက် ဒဏ်ရာရရှိခဲ့ပြီး သေဆုံးသူရှိ၊ မရှိ မသိရသေးဘဲ ကနီပြည်သူ့ကာကွယ်ရေးတပ်ဖွဲ့ဘက်ကတော့ ကျဆုံးဒဏ်ရာရတာမရှိဘူးလို့ ဆိုပါတယ်။

တိုက်ပွဲအတွင်း အကြမ်းဖက်စစ်ကောင်စီတပ်ဖွဲ့ရဲ့ အမြန်ရေယာဥ်တစ်စီး ပျက်စီးသွားပြီး ကနီမြို့မှာ စခန်းချရပ်နားထားတယ်လို့ သိရပါတယ်။