ကချင်ပြည်နယ်၊ ရွှေကူမြို့နယ်မှာ ဧပြီ ၁၃ ရက် ညနေပိုင်းက စစ်ကောင်စီ ရိက္ခာတင် စက်လှေတစီးကို မြို့လှ KPDF က တိုက်ခိုက်ခဲ့တယ်လို့ ဒေသခံတွေက ပြောပါတယ်။
ဒေသခံတဦးက "ညနေ ၆ နာရီခွဲလောက်က ကျောက်ကြီးကျေးရွာကို စုန်ဆင်းလာတဲ့ စက်လှေ အပစ်ခံရတာ၊ စက်လှေပေါ်မှာ တပ်ရင်းမှူးနဲ့ စခန်းမှူး နှစ်ဦးပါတယ်၊ တပ်ဖွဲ့ဝင် အားလုံး ၈ ဦးလောက်ရှိမယ်၊ အပစ်ခံရတာ စက်လှေတော့ နစ်သွားတာမရှိဘူး။ ထိခိုက်သေဆုံးတာကိုတော့ တိတိကျကျ မသိရဘူး" လို့ ပြောပါတယ်။
စစ်ကောင်စီ ရိက္ခာတင်စက်လှေ ၁ စီးအား မြို့လှ KPDF တပ်ခွဲ ၃ မှ တပ်ခွဲမှူး ဦးဆောင်တဲ့အဖွဲ့က လမ်းခုလတ် မြစ်ကမ်းတနေရာမှာ စောင့်ကြိုပစ်ခတ် တိုက်ခိုက်ခဲ့ပြီး နှစ်ဖက် အပြန်အလှန်ပစ်ခတ်မှု ဖြစ်ခဲ့တယ်လို့ မြို့လှ KPDF က ထုတ်ပြန်ထားပါတယ်။
စက်လှေ ပစ်ခတ်ခံရတဲ့နေရာကို ကျောက်ကြီးကျေးရွာမှာ တပ်စွဲထားတဲ့ စစ်ကောင်စီတပ်ကလည်း လက်နက်ကြီးနဲ့ ပစ်ခတ်ခဲ့တယ်လို့ သိရပါတယ်။
တိုက်ပွဲအတွင်း စစ်ကောင်စီဘက်က ထိခိုက်ကျဆုံးမှု ရှိနိုင်ပြီး မြို့လှ KPDF အဖွဲ့ကတော့ အကျအဆုံးမရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။
ရွှေကူမြို့နယ်မှာ စစ်ကောင်စီတပ်ရဲ့ ရိက္ခာသယ်စက်လှေနဲ့ သင်္ဘောတွေ မကြာခဏ ပစ်ခတ်တိုက်ခိုက်ခံရလေ့ရှိပြီး မတ် ၁၁ ရက်ကလည်း ဗျူဟာမှူးတယောက်နဲ့ ဗိုလ်ကြီးနှစ်ယောက် အပါအဝင် စစ်ကောင်စီတပ်ဖွဲ့ဝင် ၁၀ ယောက် ပစ်ခတ်ခံခဲ့ရပါတယ်။
ကချင်ပြည်နယ် ရွှေကူမြို့နယ်က ဆန်တက်လာတဲ့ စစ်ကောင်စီ ရိက္ခာတင် စက်လှေနှစ်စီး ဧပြီ ၇ ရက် မနက်ပိုင်းက ရေမြှုပ်မိုင်း ဖောက်ခွဲခံရတဲ့အတွက် နစ်မြုပ်သွားတယ်လို့ သိရပါတယ်။
ရွှေကူမြို့နယ် မြို့လှရွာဘက်ကို ဆန်တက်လာတဲ့ စစ်ကောင်စီ ရိက္ခာတင် စက်လှေနှစ်စီးကို ဗိုလ်မိုဃ်းကြိုး ဦးဆောင်တဲ့ မြို့လှ PDF တပ်က ကောက်ကွေ့ချောင်း တနေရာမှာ H-22 mm လက်လုပ် ရှေ့ထွက်မိုင်း ၅ လုံး၊ ရေမြုပ်မိုင်း ၁ လုံးနဲ့ ပစ်ခတ်ဖောက်ခွဲခဲ့တဲ့အတွက် ရိက္ခာတင်စက်လှေနှစ်စီး လုံးဝနစ်မြုပ်သွားခဲ့ပြီး စစ်ကောင်စီတပ်ဖွဲ့ဝင်တွေလည်း ထိခိုက်သေဆုံးမှု ရှိနိုင်ကြောင်း မြို့လှ PDF က ထုတ်ပြန်ထားပါတယ်။
ဒေသခံတဦးက "စက်လှေနှစ်စီးမှာ စစ်ကောင်စီတပ်ဖွဲ့ဝင် ၁၀ ဦးလောက် ပါလာတယ်။ နေ့လယ် ၁၁ နာရီလောက်မှာ ပထမ လက်နက်ကြီးနဲ့ လှမ်းပစ်တာ။ ပစ်ပြီးမှ ရေမြှုပ်မိုင်းဆွဲတာ၊ သင်္ဘောနှစ်စီး မြုပ်သွားတယ်။ သင်္ဘောကတော့ သိပ်မကြီးဘူး ရိက္ခာတင်သင်္ဘောပဲ။ စစ်ကောင်စီတပ်ကတော့ အထိအခိုက်ရှိနိုင်တယ်" လို့ ပြောပါတယ်။
ကချင်ပြည်နယ် ရွှေကူမြို့နယ်မှာ ဧပြီ ၃ ရက်နေ့ကလည်း ကျောက်ကြီးကျေးရွာအနီး စစ်ကောင်စီ ရိက္ခာတင် စက်လှေလေးစီး ပစ်ခတ်ခံခဲ့ရပြီး တစီး နစ်မြုပ်ခဲ့ပါသေးတယ်။
