ကရင်ပြည်နယ်၊ ဘားအံမြို့နယ်ထဲက ကေအန်ယူ တပ်မဟာ(၁)ထိန်းချုပ်နယ်မြေ ၄ နေရာမှာ တိုက်ပွဲတွေ ဖြစ်ပွားခဲ့ပြီး စစ်ကောင်စီဘက်က ၈ ဦးကျဆုံးခဲ့တယ်လို့ ကေအန်ယူပြန်ကြားရေးက သတင်းထုတ်ပြန်ပါတယ်။
စစ်ကောင်စီအကြမ်းဖက်တပ်ဖွဲ့ဝင်တွေနဲ့ သထုံခရိုင် ကရင်အမျိုး သားလွတ်မြောက်ရေး တပ်မတော်(KNLA) တပ်ရင်း(၁) တို့ ဇွန်လ ၂၁ ရက် မနက် ၇ နာရီလောက်က ထိတွေ့တိုက်ပွဲ ဖြစ်ပွားခဲ့တာပါ။
နှစ်ဘက်တိုက်ပွဲအတွင်း စစ်ကောင်စီတပ်ဖွဲ့ဝင် ၈ ဦးသေဆုံးခဲ့ပြီး ၄ ဦး ဒဏ်ရာရရှိခဲ့တယ်လို့ ကေအန်ယူ ထုတ်ပြန်ချက်မှာ ဖော်ပြထားပါတယ်။
ကေအန်ယူ သထုံခရိုင်အတွင်း ဘားအံမြို့နယ်၊ ကျိုက်ထိုမြို့နယ်၊ သထုံမြို့နယ်၊ ဘီးလင်းမြို့နယ် နဲ့ မော်စကို အထူးဒေသတို့ ပါဝင်တာပါတယ်။
DVB
ကချင်ပြည်နယ်၊ ပူတာအိုခရိုင်မှာ မတ်လ ၃၁ ရက် ဒီကနေ့ မနက်က ကေအိုင်အေ ကချင်လက်နက်ကိုင်အဖွဲ့နဲ့ အာဏာသိမ်းစစ်ကောင်စီရဲ့ တပ်တွေတိုက်ပွဲ ဖြစ်ပွားပြီး စစ်ကောင်စီ တပ်သား ၃ ယောက် သေဆုံးသွားပါတယ်။
ပူတာအိုခရိုင် ဆွမ်ပီယာန်အုပ်စု အင်စီယာန်ရွာအနားမှာ ဒီမနက် ၉ နာရီခွဲလောက်က ကေအိုင်အေ တပ်မဟာ ၁ လက်အောက်ခံ တပ်ရင်း ၇ နဲ့ ဆွမ်ပီယာန်မှာ အထိုင်တပ်ချထားတဲ့ စစ်ကောင်စီတပ် ခလရ ၁၃၈ နဲ့ ခလရ ၄၆ ပူးပေါင်းတပ်တွေ တိုက်ပွဲဖြစ်သွားတယ်လို့ ပူတာအိုဒေသံ ပြည်သူတစ်ဦးက ပြောပါတယ်။
"ဒီမနက်ပိုင်းမှာ အင်စီယာန်ရွာအထက်နားမှာ တိုက်ပွဲဖြစ်သွားတယ်။ တိုက်ပွဲမှာ အာဏာသိမ်းစစ်ကောင်စီဘက်က မအလ စစ်သား ၃ ယောက်ကျဆုံးပြီး လက်နက်ကြီး တစ်လက်အပါ၀င် လက်နက်ငယ်တွေလည်း သိမ်းဆည်းရမိတယ်"။
မတ်လ ၃၀ ရက်နေ့ကလည်း လီဒို တနိုင်းလမ်းမပေါ် ခွန်ဆိုင်ယန်မှာ ကေအိုင်အေတပ်မဟာ တပ်ရင်း ၂၀ နဲ့ စစ်ကောင်စီရဲ့ ခမရ ၈၆ တို့ တိုက်ပွဲတွေဖြစ်ပွားခဲ့ပြီး စစ်အုပ်စုဘက်က သေဆုံးဒဏ်ရာရသူတွေရှိတယ်လို့ ကေအိုင်အေကနေသိရပါတယ်။
မနေ့ညနေ ၄ နာရီလောက်မှာတော့ ကေအိုင်အေ တပ်မဟာ ၉ နယ်မြေကို အာဏာသိမ်း စစ်တပ်က ဂျက်လေယာဉ် ၂ စင်းနဲ့ လေကြောင်းကနေ ဗုံးကြဲတိုက်ခိုက်သွားပါတယ်။
