close

စစ်ကြောရေး

close

March 1, 2023

မကွေးတိုင်း ချောက်နှင့် မြိုင်မြို့တို့တွင် စစ်ကြောရေးစခန်းနှင့် စစ်ကောင်စီတပ်များ တိုက်ခိုက်ခံရ

မကွေးတိုင်း၊ ချောက်မြို့မှာ ဖေဖော်ဝါရီ ၂၈ ရက် ညက စစ်ကောင်စီရဲ့ စစ်ကြောရေးစခန်းတခု တိုက်ခိုက်ခံရပြီး နှစ်ယောက်သေဆုံးခဲ့တယ်လို့ ချောက်မြို့နယ်ပြောက်ကျားတပ်ဖွဲ့-CGF ကနေ သိရပါတယ်။

ချောက်မြို့မှာ အရင်က ရေနံမြေအရာရှိတွေ နေထိုင်ခဲ့တဲ့ နက/၆၀ မှာရှိတဲ့ စစ်ကောင်စီရဲ့ စစ်ကြောရေးစခန်းကို မနေ့ ည ၆ နာရီ ၄၅ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ပစ်ခတ်တိုက်ခိုက်ခဲ့တာလို့ CGF ရဲ့ ဒုတာဝန်ခံ ဗိုလ်ပေတက ဒီဗွီဘီကို ပြောပါတယ်။

“အဲဒီစစ်ကြောရေးစခန်းအတွင်းက အလင်းရောင်အောက်မှာ ကင်းစောင့်နေတဲ့ စစ်ကောင်စီတပ်သား ၃ ယောက်ကို ရှေ့တည့်တည့်ကနေ မျက်နှာချင်းဆိုင် ပစ်လိုက်တာဗျ။ အဲဒီမှာ သူတို့လူတယောက် လဲကျသွားပြီး ကျန်တဲ့ ၂ ယောက် ဝပ်လိုက်တဲ့အချိန်မှာ ၈ ချက်ပစ်လိုက်ပြီး သေနတ်က ဂျန်းဖြစ်သွားလို့ နောက်ပြန်ဆုတ်ခဲ့ရတယ်။ အဲဒီထဲက စစ်ကောင်စီတပ်သားတွေ ကျနော်တို့နောက်ကိုလိုက်လာလို့ သေနတ်အတိုတွေနဲ့ ပြန်ပစ်ခဲ့ရပြီး ထိခိုက်မှုရှိမရှိဆိုတာကိုတော့ ညဘက်ကြီးဖြစ်နေတဲ့အတွက် မသိရသေးဘူး။”

အဲဒီစစ်ကြောရေးစခန်းမှာ စစ်ကောင်စီရဲ့ ဒုဗိုလ်မှူးကြီးတယောက် ဦးစီးပြီး စစ်ကောင်စီတပ်သား အယောက် ၂၀ ကျော်လောက် တပ်စွဲထားကာ အပြစ်မဲ့ပြည်သူတွေကို မတရား ဖမ်းဆီးနှိပ်စက်နေပြီး အခုနှစ် ဇန်နဝါရီလနဲ့ ဖေဖော်ဝါရီလအတွင်းမှာပဲ အသက် ၄၀ ကျော်လောက်ရှိတဲ့ ဦးကျော်မိုးနဲ့ အသက် ၂၀ ကျော်အရွယ် လူငယ်တယောက် သေဆုံးခဲ့တယ်လို့ ဆိုပါတယ်။

အဲဒီတိုက်ခိုက်မှုကို ချောက်မြို့နယ် ပြောက်ကျားတပ်ဖွဲ့-CGF၊ ချောက် ပ.က.ဖ၊ Hunter Dragon Group၊ King Fighter အဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး ဒေသကာကွယ်ရေး ပူးပေါင်းတပ်ဖွဲ့ဘက်က ရဲဘော်တွေ ထိခိုက်မှုမရှိဘဲ ဘေးကင်းလုံခြုံတဲ့နေရာကို ရောက်ရှိပြီလို့ ပြောပါတယ်။

အလားတူ မကွေးတိုင်း၊ မြိုင်မြို့မှာလည်း ဖေဖော်ဝါရီ ၂၈ ရက် ညနေပိုင်းက စစ်ကောင်စီရဲ့ စစ်ဆေးရေးဂိတ်တခု တိုက်ခိုက်ခံရပြီး ၃ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင် ပကဖ ကနေ သိရပါတယ်။

မြိုင်မြို့ မြောက်ဘက်မှာ တပ်စွဲထားတဲ့ စစ်ကောင်စီရဲ့ ပူးပေါင်းစစ်ဆေးရေးဂိတ်ကို မနေ့က ဖေဖော်ဝါရီ ၂၈ ရက် ညနေ ၄ နာရီ ၄၉ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ဝင်ရောက်စီးနင်း တိုက်ခိုက်ခဲ့တာလို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

နှစ်ဖက်အပြန်အလှန် မိနစ်အနည်းငယ်ကြာ တိုက်ပွဲဖြစ်ပွားခဲ့ပြီး အဲဒီတိုက်ခိုက်မှုအတွင်းမှာ စစ်ကောင်စီတပ်ဘက်က ၃ ယောက်သေဆုံးပြီး ၂ ယောက် အပြင်းအထန် ဒဏ်ရာရရှိခဲ့တယ်လို့ ဆိုပါတယ်။

“အဲဒီတိုက်ခိုက်မှုကို မြိုင် ပ.က.ဖ တပ်ရင်း-၁၊ တပ်ခွဲ-၃ နဲ့ နံသာမြေအဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က တပ်ကူတွေလိုက်လာလို့ ကျနော်တို့ဘက်က ရဲဘော်တွေ အလျင်အမြန်ပစ်ခတ်ပြီး ထိခိုက်မှုမရှိဘဲ ပြန်လည်ဆုတ်ခွာခဲ့ကြတယ်”လို့ ဗိုလ်လက်ယာက ပြောပါတယ်။

မြိုင်မြို့အနီးမှာ ဖေဖော်ဝါရီ ၂၅ ရက် မနက်ပိုင်းကလည်း ကင်းပတ်ထွက်လာတဲ့ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၁ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင်ပ.က.ဖ ကနေ သိရပါတယ်။

ပေါက်မြို့နယ်မှာတော့ ထန်းပေါက်ကုန်းကျေးရွာကနေ မြိုင်မြို့နယ် ကိုင်းတောမကျေးရွာကို ဦးတည်ပြီး အင်အား ၆၀ နဲ့ စစ်ကြောင်းထိုးလာတဲ့ စစ်ကောင်စီ စစ်ကြောင်းကို ဒေသခံပြည်သူ့ကာကွယ်ရေးတပ်တွေက အီနာဂါဗုံးသီး ၅ လုံးချ တိုက်ခိုက်ခဲ့တယ်လို့ သိရပါတယ်။

Black Cheetah People Defence Force တာဝန်ခံက “လက်ခုပ်ပင်ကျေးရွာက တောစပ်နားအရောက်မှာ ဒရုန်းနဲ့ကြဲချတာဗျ။ လက်နက်ကြီးတွေနဲ့တော့ ရမ်းထုသေးတယ်။ ကျနော်တို့ဘက်က အထိအခိုက် မရှိပါဘူး” လို့ ပြောပါတယ်။

အဲဒီတိုက်ခိုက်မှုကို Black Cheetah People Defence Force အပါအဝင် Hero New G.Z၊ ဝံပုလွေပြောက်ကျားတပ်ဖွဲ့-မြိုင်၊ ဒေသခံကာကွယ်ရေးတပ်ဖွဲ့တွေ စုပေါင်းတိုက်ခိုက်ခဲ့တာ ဖြစ်ပြီး စစ်ကောင်စီတပ်ဘက်က လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ကာ အထိအခိုက် အကျအဆုံးကိုတော့ စုံစမ်းနေဆဲဖြစ်တယ်လို့ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

B2 45

7 mins Ago

January 9, 2023

ပွင့်ဖြူတွင် လွှတ်တော်အမတ် ၂ ဦး အပါအဝင် ၁၀ ဦးကို စစ်တပ်က ဖမ်းဆီး၊ စစ်ကြောရေးတွင် ၁ ဦး သေဆုံး

မကွေးတိုင်း၊ ပွင့်ဖြူမြို့နယ်မှာ ဇန်နဝါရီ ၈ ရက် မနက်က အန်အယ်လ်ဒီ လွှတ်တော်ကိုယ်စားလှယ် ၂ ယောက်နဲ့ မိသားစုဝင်တွေ အပါအဝင် ပြည်သူ ၁၀ ယောက်လောက်ကို စစ်ကောင်စီတပ်က  ဖမ်းဆီးသွားပြီး စစ်ကြောရေးမှာရိုက်နှက်ခံရလို့ ပြည်သူတယောက် သေဆုံးခဲ့တယ်လို့ မင်းဘူးခရိုင် ပ.က.ဖ ကနေ သိရပါတယ်။

ပွင့်ဖြူမြို့နယ် ရှားတောကျေးရွာကို မနေ့မနက် ၄ နာရီလောက်မှာ စစ်ကောင်စီတပ်တွေ ဝင်လာလို့ ရွာထဲကလူတွေနဲ့ တောစပ်တွေမှာ ပုန်းနေကြတဲ့အချိန်မှာ မင်းဘူးမြို့နယ် ပြည်သူ့လွှတ်တော်ကိုယ်စားလှယ် ဦးဝင်းဝင်းတို့ မိသားစု၊ ပွင့်ဖြူမြို့နယ် ပြည်သူ့လွှတ်တော်ကိုယ်စားလှယ် ဦးထွန်းထွန်းတို့ အပါအဝင် ၁၀ ယောက်လောက် ဖမ်းဆီးခံခဲ့ရတာလို့ မင်းဘူးခရိုင် ပ.က.ဖ ဒုခေါင်းဆောင် ဗိုလ်မိုးသီးက ပြောပါတယ်။

“အဖမ်းဆီးခံရတဲ့သူတွေကို မကွေးဘက်ကို ခေါ်သွားပြီး PDF သင်တန်းဆင်းတယောက် ဖြစ်တဲ့ ရှားတောကျေးရွာက အသက် ၃၅ နှစ်အရွယ် ကိုထွန်းကို စတင်ဖမ်းမိချိန်ကစလို့ ရိုက်နှက်နှိပ်စက်လို့ မျက်နှာတွေ ဖူးရောင်နေပြီး ဒီနေ့ စစ်ကြောရေးမှာ လက်လွန်သွားလို့ သေဆုံးသွားပြီလို့ အတွင်းသတင်းပေးတွေဆီကတဆင့် သိရတယ်။”

မကွေးတိုင်းမှာ အားကိုးရတဲ့ ခေါင်းဆောင်တွေ ဖမ်းဆီးခံလိုက်ရလို့ စိတ်ထိခိုက်ရပြီး နစ်နာမှုတွေရှိတာကြောင့် ခေါင်းဆောင်ပိုင်းတွေအနေနဲ့ မြို့နဲ့နီးတဲ့နေရာတွေမှာမနေဘဲ လုံခြုံတဲ့နေရာတွေမှာ နေထိုင်ကြဖို့ ဗိုလ်မိုးသီးက တိုက်တွန်းပါတယ်။

စစ်ကောင်စီဘက်က ရွေးကောက်ပွဲကျင်းပဖို့ စီစဥ်နေပြီး မဲစာရင်းတွေ၊ သတင်းတွေကို အတိအကျ လိုက်ယူနေကာ ဒလန်လည်း အားကောင်းတာကြောင့် လုံခြုံမှုရှိတဲ့နေရာမှာ နေထိုင်ကြဖို့ လိုအပ်တယ်လို့ ဆိုပါတယ်။

ခေါင်းဆောင်ပိုင်းတွေ ဖမ်းဆီးခံရပေမဲ့လည်း ကျန်တဲ့အဖွဲ့တွေနဲ့ အချိတ်အဆက်မိမိနဲ့ တော်လှန်ရေးအောင်မြင်တဲ့အထိ ဆက်လက်လုပ်ဆောင်သွားမယ်လို့ ဗိုလ်မိုးသီးက ပြောပါတယ်။

ခေါင်းဆောင်ပိုင်းတွေ ဖမ်းဆီးခံလိုက်ရတော့ ကျန်တဲ့ ဆက်နွှယ်မှုရှိတဲ့သူတွေကတော့ ကြိုတင်ရှောင်ရှာတာတွေ၊ ဖုန်းကတ်ပြောင်းတာတွေ အမြန်ဆုံးလုပ်ဆောင်သင့်ပြီး စစ်ကောင်စီနဲ့ နီးတဲ့နေရာတွေမှာမနေထိုင်ကြဖို့ လိုအပ်တယ်လို့ မင်းဘူးခရိုင် အမှတ်(၂)တပ်ရင်း က တပ်ထောက်တာဝန်ခံ တာလဘောကလည်း ပြောပါတယ်။

လွှတ်တော်ကိုယ်စားလှယ် ဦးထွန်းထွန်းရဲ့ ဇနီးဟာလည်း ထောင်ထဲမှာ အချုပ်ကျနေပြီး၊ ဦးဝင်းဝင်း ရဲ့ ဇနီးနဲ့ ကလေး နှစ်ယောက်အပါဝင် မိသားစုလိုက် ဖမ်းဆီးသွားကာ နေအိမ်တွေလည်း ချိပ်ပိတ်သိမ်းဆည်းခံထားရတာလို့ ဆိုပါတယ်။

“ကိုဝင်းဝင်းတို့ ကိုထွန်းထွန်းတို့ဆိုတာ တော်လှန်ရေးကာလ တလျှောက်လုံးမှာ အားကိုးရတဲ့ ပြည်သူ့ဘက်က ရပ်တည်ပေးတဲ့ ပြည်သူ့ကိုယ်စားလှယ်စစ်စစ်တွေဖြစ်ပြီး သူတို့ဖမ်းဆီးခံရတာဟာ မကွေးတိုင်းအတွက် အင်မတန်မှ နစ်နာဆုံးရှုံးရတယ်”လို့  တာလဘောက ပြောပါတယ်။

စစ်ကောင်စီက အစပိုင်းမှာ လွှတ်တော်ကိုယ်စားလှယ်တွေရဲ့နေအိမ်တွေနဲ့ တော်လှန်ရေးနဲ့ ပတ်သက်တဲ့ လုပ်ငန်းရှင်တွေရဲ့ နေအိမ်တွေကို ချိပ်ပိတ်ခဲ့သလို နောက်ပိုင်းမှာလည်း သူတို့နဲ့ လက်မှတ်မထိုးထားတဲ့ မပူးပေါင်းတဲ့ လွှတ်တော်ကိုစားလှယ်တွေရဲ့ အိမ်တွေကို ဆက်လက်ချိပ်ပိတ်နေတာတွေ့ရတယ်လို့ တာလဘောကပြောပါတယ်။

စစ်တပ်အာဏာစသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ အခုနှစ် ဇန်နဝါရီ ၉ ရက်အထိ နိုင်ငံတဝန်း မတရားဖမ်းဆီးခံထားရသူ ၁၃၃၂၁ ယောက်ရှိပြီး အဲဒီထဲက ၁၉၃၇ ယောက် ထောင် ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း AAPP က ထုတ်ပြန်ထားပါတယ်။

2 months Ago
Up