ပဲခူးတိုင်းဒေသကြီးအနောက်ခြမ်း၊ သာယာဝတီခရိုင်၊ မင်းလှမြို့နယ်အပိုင် စစ်ကွင်းမြို့ရှိ ရဲစခန်းကို ဒီကနေ့ နေ့လယ်ပိုင်းက ကိုဗစ် ၁၉ စစ်ဆေးရာမှာ ရောဂါကူးစက်ခံရသူ ၂၇ ဦးတွေ့ရှိတယ်လို့သိရပါတယ်။
''ရဲစခန်းဝန်းအတွင်းနေထိုင်သူ ၄၄ ဦးကို RDT စနစ် ရောဂါပိုးစစ်ဆေးတော့ ရဲဝန်ထမ်း ၈ ဦး၊ အချုပ်သားအမျိုးသား ၁၃ ဦး၊ အချုပ်သား အမျိုးသမီး ၅ ဦးနဲ့ ပြင်ပက ၁ ဦး စုစုပေါင်း ၂၇ ဦး တွေ့ရှိခဲ့တယ်'' လို့ မြို့နယ်ကျန်းမာရေးဌာန တာဝန်ရှိသူတစ်ဦးက ပြောပါတယ်။
မင်းလှမြို့နယ်မှာ ဇွန်လ ၂၈ ရက်နေ့အထိ အတည်ပြုလူနာ ၁၇၅ ဦး ရှိပြီဖြစ်ပြီး စစ်ကွင်း အ.ထ.က ကျောင်းကိုလည်း ယာယီပိတ်လိုက်ပေမယ့် မင်းလှမြို့ပေါ်ရှိ အခြေခံပညာကျောင်းတွေနဲ့ ကျေးရွာတွေက မူလတန်းကျောင်းတွေကတော့ ဖွင့်လှစ်သင်ကြားနေဆဲဖြစ်တယ်လို့ ဒေသခံတွေက ပြောပါတယ်။
