ဗိုလ်ချုပ်မှုးကြီးမင်းအောင်လှိုင်ရဲ့ သားနဲ့ သမီးတို့ပိုင်ဆိုင်တဲ့ ထိုင်းနိုင်ငံ ဘန်ကောက်က ကွန်ဒိုတိုက်ခန်းနဲ့ ဘဏ်စာရင်းစာအုပ်ကို လက်နက်ပွဲစား ခရိုနီသူဌေး ဦးထွန်းမင်းလတ်နဲ့ ဆက်နွှယ်တယ်ဆိုပြီး ထိုင်းရဲတပ်ဖွဲ့က သိမ်းဆည်းထားတဲ့အပေါ် ပြန်လည်ရုပ်သိမ်းပေးဖို့ စစ်ခေါင်းဆောင်က တောင်းဆိုညှိနှိုင်းမှုတွေရှိနေတယ်လို့ ထိုင်းသတင်းမှာ ဖော်ပြပါတယ်။
ဒီအမှုကိစ္စနဲ့ ပတ်သက်ပြီး ထိုင်း Move Forward Party လွှတ်တော်အမတ် နိုင်းရန်းဆီမန်းရုန်း ကတော့ ဦးထွန်းမင်းလတ်ရဲ့ အမှုဟာသိသာထင်ရှားတဲ့အမှုဖြစ်ပြီး သူဟာ မြန်မာစစ်တပ် ခေါင်းဆောင် မင်းအောင်လှိုင်နဲ့ နီးစပ်သူဖြစ်တယ်ဆိုတာအားလုံးအသိဖြစ်တယ်၊ တောင်းဆို ညှိနှိုင်းမှုတွေလိုက်လျောပြီး သူတို့ပိုင်ဆိုင်မှုတွေပြန်ပေးလိုက်ရင် ထိုင်းနိုင်ငံရဲ့ တရားစီရင်မှု အချုပ်အခြာအာဏာကို တခြားတစ်နိုင်ငံက ဝင်ရောက်စွက်ဖက်တာကို လက်ခံလိုက်တဲ့ သဘောပဲလို့ ပြောပါတယ်။
“ဒီအမှုဟာ နိုင်ငံတကာရာဇဝတ်မှု၊ မူးယစ်ဆေးဝါးနဲ့ ငွေကြေးခဝါချမှုတွေနဲ့ ဆက်နွှယ်နေ တာဖြစ်တယ်၊ နိုင်ငံတကာကလည်း ထိုင်းနိုင်ငံဟာ မူးယစ်ဆေးဝါးနဲ့ အကြမ်းဖက်မှုတွေရှိနေတဲ့ မြန်မာနိုင်ငံနဲ့ နီးစပ်မှုရှိတာလား၊ ပတ်သက်နေတာလားဆိုပြီး မေးခွန်းထုတ်စရာရှိတယ်။ ထိုင်းနိုင်ငံရဲ့ဥပဒေအရ မိမိအချုပ်အခြာအာဏာထဲမှာ သံသယရှိတဲ့ ပိုင်ဆိုင်မှုတွေကို သိမ်းဆည်းခွင့်ရှိတယ်၊ ဥပဒေအတိုင်းဆောင်ရွက်ရမယ်”လို့ လွှတ်တော်အမတ် နိုင်းရန်းဆီမန်းရုန်းက ပြောပါတယ်။
မြန်မာခရိုနီ လက်နက်ပွဲစား ဦးထွန်းမင်းလတ်ရဲ့ Allure Group ကုမ္ပဏီနဲ့ ဆက်စပ်တယ်ဆိုပြီး တရားစွဲခံထားရတဲ့ ထိုင်းအထက်လွှတ်တော်အမတ် နိုင်းဥပကစ်ပါကျရိယန်ကွန်းရဲ့ အမှုကို တရားရုံးက သင်္ကြန်အပြီးမှာ စစ်ဆေးမယ်လို့ မူလကချိန်းဆိုထားပေမဲ့ နောက်ထပ် ရက်ရွှေ့ဆိုင်းလိုက်တဲ့အပေါ်မှာ Move Forward Party လွှတ်တော်အမတ် နိုင်းရန်းဆီမန်းရုန်း က ဧပြီ ၁၇ ရက်မှာ သတင်းစာရှင်းလင်းပွဲမှာ ဝေဖန်လိုက်သလို ဗိုလ်ချုပ်မှုးကြီးမင်းအောင်လှိုင် သားနဲ့သမီးပိုင်ဆိုင်မှုကိစ္စကိုပါ ထည့်သွင်းပြောကြားခဲ့တာပါ။
မြန်မာစစ်တပ်က လေယာဉ်ပေါ်ကနေ ဗုံးကြဲချတဲ့အကြမ်းဖက်မှုကြောင့် ကျောင်းသားငယ်လေး တွေအပါအဝင် လူပေါင်း ၁၇၀ ကျော်ထိခိုက်သေဆုံးခဲ့တဲ့ ပဇီကြီးရွာ လေကြောင်း တိုက်ခိုက်ခံရမှုနဲ့ ပတ်သက်ပြီးလည်း အဆိုပါသတင်းစာရှင်းပွဲမှာ လွှတ်တော်အမတ် နိုင်းရန်းဆီမန်းရုန်းက ပြောသွားပြီး ဗိုလ်ချုပ်မှူးကြီး မင်းအောင်လှိုင်ရဲ့တောင်းဆိုမှုကို လိုက်လျောမယ်ဆိုရင် အကြမ်းဖက်ခံရတဲ့ မြန်မာပြည်သူ တွေရဲ့မျက်နှာ ထောက်ရှုငဲ့ညာဖို့ ပြောဆိုခဲ့ပါတယ်။
ထိုင်းဗဟိုတရားရုံး ပြောရေးဆိုခွင့်ရှိသူ နိုင်းကိုးဆုတ်ဝပ် အင်ထုကျန်းရုန်းကတော့ အထက်လွှတ်တော်အမတ် နိုင်းဥပကစ်ရဲ့အမှုရက်ချိန်းကို ရွှေ့ဆိုင်းလိုက်တာဟာ - နိုင်းဥပကစ်က ဧပြီ ၃ ရက်က ဗဟိုတရားရုံးချုပ်ကို စာပို့ထားတာရှိတယ်၊ အဲဒီစာထဲမှာ မူးယစ်တရားခံတွေ ငွေလွှဲခဲ့တာဟာ Allure ကုမ္ပဏီတစ်ခုတည်းမကဘဲ တခြားကုမ္ပဏီကနေလည်း လွှဲခဲ့တယ်၊ ဘာကြောင့် သူတို့ကုမ္ပဏီကိုဘဲဦးတည်အရေးယူတာလဲ၊ သူဟာ ဝန်ကြီးချုပ်ပရာယုဒ် ကျန်အိုချားရဲ့ လူမ့်ထိုင်းဆန့်ချတ်ပါတီရုံးခန်းအတွက် မြေကွက်နဲ့ အဆောက်အဦ ထောက်ပံ့ခဲ့တယ်။ ဒါကြောင့် နိုင်ငံရေးအရ တိုက်ခိုက်ခံနေရသလားဆိုတာကို ပြန်လည်စိစစ်ပေးဖို့ တောင်းဆို ထားတယ်။
ပြီးတော့ သူပိုင်ဆိုင်တဲ့ သူနဲ့ဆက်စပ်နေတဲ့ ကုမ္ပဏီပေါင်း ၈၀ ကျော်ကို အထူးစုံစမ်းရေးကော်မတီ၊ စသုံးလုံးရဲတပ်ဖွဲ့တွေနဲ့ ပူးပေါင်းစစ်ဆေးနေတာ မပြီးပြတ်သေးလို့ အမှုရက်ချိန်းရွှေ့ထားရတာလို့ သတင်းထောက်တွေကို ပြောပါတယ်။
လွှတ်တော်အမတ် နိုင်းရန်းဆီမန်းရုန်းက “တရားရုံးအနေနဲ့ နိုင်းဥပကစ်ရဲ့ အမှုကို ပြစ်မှုထင်ရှားတဲ့ ထွန်းမင်းလတ်အမှုနဲ့ ယှဉ်တွဲလုပ်ဆောင်ရမှာဖြစ်တယ်၊ ကုမ္ပဏီပေါင်း ၈၀ ကိစ္စ နောက်မှစစ်ဆေးရမှာဖြစ်တယ်။ ဘာကြောင့်တုံ့ဆိုင်းနေတာလဲ၊ ထိုင်းမူးယစ်ဆေးဝါး တိုက်ဖျက်နှိမ်နင်းရေးရဲတပ်ဖွဲ့နဲ့ လာဘ်စားမှု၊ ငွေကြေးခဝါချမှုတိုက်ဖျက်ရေးဌာနအနေနဲ့လည်း ဒီအမှုအပေါ်မှာ ကိုင်တွယ်ဆောင်ရွက်မှုနှောင့်နှေးကြန့်ကြာနေတယ်”လို့ ဝေဖန်လိုက်ပါတယ်။
နိုင်းဥပကစ် နဲ့ ဦးထွန်းမင်းလတ်တို့ဟာ လွန်ခဲ့တဲ့ ၁၀ နှစ်ကျော်ကတည်းက တာချီလိတ်နဲ့ မယ်ဆိုင်မှာ ဟိုတယ်လုပ်ငန်း၊ ကာရာအိုကေ၊ ကာစီနိုကစားဝိုင်းနဲ့ လျှပ်စစ်ဓာတ်အား ရောင်းဝယ် ဖြန့်ဖြူးရေးတွေ အတူတကွလုပ်ကိုင်ခဲ့ပါတယ်။
အဲဒီနောက်ပိုင်း နိုင်းဥပကစ်က အဆိုပါလုပ်ငန်းတွေကို သမက်ဖြစ်သူထံ လွှဲပြောင်းပေးခဲ့ပြီး သူကတော့ နိုင်ငံရေးလောကထဲပါဝင်ကာ အထက်လွှတ်တော်အမတ်ဖြစ်လာ ခဲ့ပါတယ်။
ထိုင်းမှာ လွန်ခဲ့တဲ့ ၃ နှစ်ကျော်က မူးယစ်ဆေးဝါးဂိုဏ်းတွေဖမ်းဆီးရမိခဲ့ပြီး သူတို့ငွေစာရင်းတွေ ပြန်လည်စစ်ဆေးရာမှာ Allure ကုမ္ပဏီထဲကို ငွေကြေးအမြောက်အမြားလွှဲထားတာတွေ့ရှိလို့ ကုမ္ပဏီပိုင်ရှင် ဦးထွန်းမင်းလတ်၊ သူ့ကိုယ်ရေးအရာရှိ၊ ကုမ္ပဏီမန်နေဂျာ (နိုင်းဥပကစ်ရဲ့သားမက်)နဲ့ ကုမ္ပဏီစာရင်းကိုင်ဝန်ထမ်းတွေ ဖမ်းဆီးခံထားရပြီး ကုမ္ပဏီနဲ့ပတ်သက်သူတို့ရဲ့ ဘဏ်ငွေစုစာအုပ်၊ ကွန်ဒိုတိုက်ခန်း၊ မော်တော်ကား၊ ဟိုတယ်၊ မြေကွက်တွေပါတဲ့ ပိုင်ဆိုင်မှု ဘတ်သန်းပေါင်း ၂၀၀၀ ကျော်သိမ်းဆည်းခံထားရပါတယ်။
အဆိုပါ အသိမ်းခံထားရတဲ့ ပိုင်ဆိုင်မှုတွေထဲမှာ ဗိုလ်ချုပ်မှုးကြီးမင်းအောင်လှိုင်ရဲ့ သားဖြစ်သူ အောင်ပြည့်စုံရဲ့အမည်ပေါက် ကွန်ဒိုတိုက်ခန်းနဲ့ သမီးဖြစ်သူ ခင်သီရိသက်မွန်ရဲ့ ထိုင်းငွေစုဘဏ်စာအုပ်တွေပါ ပါဝင်နေပါတယ်။
ဦးထွန်းမင်းလတ်နဲ့ နိုင်းဥပကစ်တို့ဟာလည်း မူးယစ်ဆေးဝါးနဲ့ဆက်နွှယ်မှု၊ ငွေကြေးခဝါချမှု၊ နိုင်ငံတကာရာဇဝတ်မှုနဲ့ ပတ်သက်မှုတွေနဲ့ တရားစွဲခံထားရတာပါ။
ကိုးကား - Nation TV / Thai PBS / Workpoint News
အာဏာသိမ်း စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်မိသားစုနဲ့ ဆက်နွှယ်တဲ့ ခရိုနီ စီးပွားရေးလုပ်ငန်းစု Star Sapphire Group ဟာ မြန်မာစစ်တပ်အတွက် စစ်လက်နက်ဝယ်ယူရေးမှာ ကြားခံပွဲစားအဖြစ် အဓိက ပါဝင်ပတ်သက်နေတယ်လို့ Justice For Myanmar က စုံစမ်းဖော်ထုတ်ထားပါတယ်။
Justice For Myanmar က ရရှိတဲ့ အချက်အလက်တွေအရ အစ္စရေးလ်နဲ့ တရုတ်နိုင်ငံတို့မှ Elibt Systems၊ Israel Shipyards၊ Israel Aerospace Industries၊ NORINCO အမည်ရှိ ကုမ္ပဏီတို့နဲ့ မြန်မာစစ်ကောင်စီအကြားမှာ Star Sapphire Group မှ အကြီးအကဲဖြစ်သူ ဒေါက်တာထွန်းမင်းလတ်က လက်နက်ဝယ်ယူရေးအတွက် ကြားခံပွဲစားအဖြစ် ဆောင်ရွက်ပေးခဲ့ပြီး မြန်မာလူထုအပေါ် ကျူးလွန်နေတဲ့ ရက်စက်ကြမ်းကြုတ်တဲ့ ရာဇဝတ်မှုတွေကို ကူညီထောက်ပံ့ပေးနေတာလို့ ဆိုပါတယ်။
ဒေါက်တာထွန်းမင်းလတ်နဲ့ မြန်မာစစ်တပ်တို့အကြားမှာ ဆယ်စုနှစ်ပေါင်းများစွာ အဆက်အဆံရှိခဲ့ပြီး အဂတိလိုက်စားမှုမှတဆင့် သူ့ရဲ့စီးပွားရေးကို တည်ဆောက်ထားကာ ဖခင်ဖြစ်သူမှာ အရင်စစ်အစိုးရလက်ထက်က ဟိုတယ်နှင့် ခရီးသွားလာရေးဝန်ကြီးဌာနရဲ့ ညွှန်ကြားရေးမှူးချုပ်ရာထူး ယူခဲ့တဲ့ ဒုဗိုလ်မှူးကြီးဟောင်း(လေ) ခင်မောင်လတ် ဖြစ်ပါတယ်။
ဖခင်ဖြစ်သူ ကိုယ်တိုင်ကလည်း ညွှန်ကြားရေးမှူးချုပ်ရာထူးနဲ့ တာဝန်ယူခဲ့စဉ် ပြီးခဲ့တဲ့ ၁၉၉၉ ခုနှစ်က ထိုင်းနိုင်ငံနဲ့ နယ်စပ်ချင်းထိစပ်နေတဲ့ တာချီလိတ်မြို့မှာ တရားဝင်မဟုတ်တဲ့ ကာစီနို လောင်းကစားရုံတခုကို Allure Resort အနေနဲ့ တည်ဆောက်ဖို့ ထိုင်းနိုင်ငံသား စီးပွားရေးလုပ်ငန်းရှင် ဥပကစ် ဖတ်ချရယန်းကွန်းနဲ့ သဘောတူစာချုပ် ချုပ်ဆိုခဲ့တာ ရှိပါတယ်။
ပြီးခဲ့တဲ့ ၂၀၁၇ ခုနှစ်၊ နိုဝင်ဘာလမှာတော့ ဟိုတယ်နှင့် ခရီးသွားလာရေးဝန်ကြီးဌာနက အဆိုပါ ကာစီနို လောင်းကစားရုံကို မြန်မာစစ်တပ်ရဲ့ စစ်ထောက်ချုပ်ရုံးကို လွှဲပြောင်းပေးအပ်ခဲ့ပါတယ်။ ဒီလွှဲပြောင်းမှုကြောင့် ပြည်ထောင်စုဘတ်ဂျက်မှ နိုင်ငံတော်က ရရှိတဲ့ အမြတ်ဝေစု ၆ ရာခိုင်နှုန်းဟာ စစ်တပ်လက်အောက်ကို ရောက်ရှိသွားပြီး လွှတ်တော်က စုံစမ်းနိုင်မှုမရှိအောင် ဖုံးကွယ်လိုက်တယ်လို့ Justice For Myanmar က ဆိုပါတယ်။
လက်ရှိမှာတော့ ထိုင်းနိုင်ငံသား စီးပွားရေးလုပ်ငန်းရှင် ဥပကစ် ဖတ်ချရယန်းကွန်း ဟာ ထိုင်းနိုင်ငံက အထက်လွှတ်တော်အမတ်တဦးလည်း ဖြစ်ပါတယ်။
ဒီသဘောတူစာချုပ်အရ ဒေါက်တာထွန်းမင်းလတ်ဟာ ထိုင်းနိုင်ငံက အထက်လွှတ်တော် အမတ်တဦးလည်းဖြစ်သူ စီးပွားရေးလုပ်ငန်းရှင် ဥပကစ် ဖတ်ချရယန်းကွန်းနဲ့ ကာစီနို လုပ်ငန်းကို တည်ထောင်လုပ်ကိုင်လျက်ရှိပြီး အကျိုးခံစားခွင့် ရရှိနေပါတယ်။
ဒါ့အပြင် ဒေါက်တာထွန်းမင်းလတ် ပိုင်ဆိုင်တဲ့ Star Sapphire လုပ်ငန်းစုမှ လုပ်ငန်းခွဲဖြစ်တဲ့ Myanmar Business Consultant Group ဟာ သဘာဝဓာတ်ငွေ့စီမံကိန်းမှာ ဟောင်ကောင်အခြေစိုက် VPower Group ကုမ္ပဏီနဲ့ တရုတ်အစိုးရပိုင် China National Technical Import and Export Corporation (CNTIC) တို့နဲ့ မိတ်ဘက် ဆောင်ရွက်နေတာ ရှိပါတယ်။
ဒီ့အတွက် Myanmar Business Consultant Group ဟာ စစ်တပ်ပိုင် ဦးပိုင်စီးပွားရေးလုပ်ငန်းစု (MEHL) ဆီ မြေငှားရမ်းခတွေ ပေးဆောင်နေရပြီး ငှားရမ်းမှုအတွက် သက်တမ်းကုန်ဆုံးပါက အဆိုပါအဆောက်အဦကို MEHL ထံ လွှဲပြောင်းပေးရမှာဖြစ်လို့ စစ်တပ်အဖို့ အကျိုးအမြတ် ကြီးမားတဲ့ အနာဂတ်ပိုင်ဆိုင်မှု တခုလည်း ဖြစ်ပါတယ်။
Star Sapphire Group စီးပွားရေးလုပ်ငန်းစုမှ ထွန်းမင်းလတ်နဲ့ ထိုင်းအထက်လွှတ်တော်အမတ်ဖြစ်သူ စီးပွားရေးလုပ်ငန်းရှင် ဥပကစ် ဖတ်ချရယန်းကွန်း တို့အကြားမှာ ထိုင်းအခြေစိုက် Listed စာရင်းဝင် United Power of Asia အမည်ရှိ ကုမ္ပဏီက လျှပ်စစ် ၂၀၀ မဂ္ဂါဝပ် ထုတ်ယူနိုင်တဲ့ ပေါင်းစပ်ဓာတ်အားပေးစက်ရုံကို တနင်္သာရီတိုင်းဒေသကြီးမှာ တည်ဆောက်လျက်ရှိတယ်လို့ Justice For Myanmar က စုံစမ်းဖော်ထုတ်ထားပါတယ်။
ဒါကြောင့် The Allure Resort နဲ့ Star Sapphire Group လုပ်ငန်းစုတို့အကြားမှာ ကျယ်ပြန့်တဲ့ စီးပွားရေးလုပ်ငန်း အကျိုးအမြတ်များနဲ့ ချိတ်ဆက်နေပြီး အဲဒီချိတ်ဆက်မှုက ငွေကြေးခဝါချမှု အပါအဝင် တရားမဝင် ငွေကြေးပံ့ပိုးတာတွေကို လုပ်ဆောင်နေတာက စိုးရိမ်စရာ ရှိနေတာပါ။
Star Sapphire Group ရဲ့ လုပ်ငန်းခွဲတခုဖြစ်တဲ့ Royal MawTaung Mining ကုမ္ပဏီဟာ ဗိုလ်ချုပ်မှူးကြီး မင်းအောင်လှိုင်ရဲ့ သမီးဖြစ်သူ ခင်သီရိသက်မွန် ပူးတွဲတည်ထောင်ခဲ့တဲ့ Star Thiri Investment ကုမ္ပဏီလည်း ဖြစ်ပါတယ်။
