ရခိုင်ပြည်နယ်၊ စစ်တွေမြို့မှာ ဇန်နဝါရီ ၂ ရက် နေ့လယ်ပိုင်းက စစ်ကောင်စီရဲ့ ရေတပ်ကားတစီးက ဝင်တိုက်ခဲ့တာကြောင့် အမျိုးသားတဦး သေဆုံးခဲ့တယ်လို့ သေဆုံးသူရဲ့ မိသားစုနဲ့ နီးစပ်သူတွေက ပြောပါတယ်။
အခုသေဆုံးသွားသူဟာ စစ်တွေမြို့ ဘုမေအကွက် ၁၅ က ဦးမာမိုင်းအီနူး (၆၀ နှစ်) ဖြစ်ပြီး စစ်တွေမြို့ လမ်းမတော်ရပ်ကွက်ရှိ လမ်းမကြီးပေါ်မှာ စစ်ကောင်စီရဲ့ ရေတပ်ကားတစီးက ဝင်တိုက်သွားတာလို့ မိသားစုနဲ့ နီးစပ်သူတဦးက ပြောပါတယ်။
“ဒီနေ့ နေ့လယ် ၁၂ နာရီလောက်မှာ လမ်းမကြီးက Wave Family KTV ရှေ့မှာ စစ်တပ်ကားက ဝင်တိုက်သွားတာလို့ မျက်မြင်တွေဆီက သိရပါတယ်။ တိုက်ပြီး သူတို့က ဆင်းလို့တောင် မကြည့်ခဲ့ဘူးလို့ ပြောကြတယ်။ မိသားစုတွေနဲ့လည်း လာတွေ့တာတွေ မရှိသေးဘူး။ အတိုက်ခံရတဲ့ ဦးမာမိုင်းအီနူးကတော့ နေရာမှာတင် ပွဲချင်းပြီးဆုံးသွားတာ။ အခု စစ်တွေဆေးရုံကြီး ရင်ခွဲရုံမှာ ပို့ဆောင်ထားတယ်။”
သူ့ရဲ့ရုပ်အလောင်းကို စစ်သားနှစ်ဦးနဲ့ ရဲတပ်ဖွဲ့ဝင်တွေ ဆေးရုံမှာ လာရောက်ကြည့်ရှုခဲ့ကြပြီး အသက်သေဆုံးသွားတဲ့သူတွေရဲ့ မိသားစုတွေကို နစ်နာကြေးပေးဖို့ တစုံတရာ ပြောကြားသွားတာ မရှိဘူးလို့ စစ်တွေမြို့ ပြည်သူ့ဆေးရုံကြီးနဲ့ နီးစပ်သူတဦးက ပြောပါတယ်။
ရခိုင်ပြည်နယ်မှာ ၂၀၂၂ ခုနှစ်အတွင်းက ယာဥ်မတော်တဆဖြစ်မှုကြောင့် သေဆုံးသူ ၁၂၁ ဦးနဲ့ ဒဏ်ရာရရှိသူ ၂၈၃ ဦးအထိ ရှိခဲ့တယ်လို့ ရခိုင်ပြည်နယ် ယာဥ်ထိန်းရဲတပ်ဖွဲ့ စာရင်းတွေအရ သိရပါတယ်။
ဓာတ်ပုံ- မေတ္တာရောင်ခြည်ဖောင်ဒေးရှင်း
မကွေးတိုင်း၊ ရေစကြိုမြို့နယ်မှာ ဇူလိုင် ၁၃ ရက် မွန်းလွဲပိုင်းက စစ်ကောင်စီကားတစီး မိုင်းဆွဲတိုက်ခိုက်ခံရပြီး ၃ ယောက် သေဆုံးကာ ၄ ယောက် အပြင်းအထန် ဒဏ်ရာရရှိခဲ့တယ်လို့ ရေစကြို-PDF က ပြောပါတယ်။
“ရေစကြိုမြို့နယ် ဇီးကုန်းနဲ့ ဆင်ချောင်းရွာကြားက ညောင်ပင်ဇရပ်မှာ ဇူလိုင် ၁၃ ရက် မွန်းလွဲ ၂ နာရီခွဲလောက်မှာ စစ်(...)၊ ရဲ(...)နဲ့ ပျူ(...)တွေ လိုက်ပါလာတဲ့ ပေါင်မုန့်ကားတစီးကို ဒေသကာကွယ်ရေး ပူးပေါင်းတပ်ဖွဲ့တွေက မိုင်းတလုံးခွဲလိုက်ပြီး လယ်ကြီးတံတားနားအရောက်မှာ နောက်ထပ် မိုင်း ၂ လုံးခွဲပြီး တိုက်ခိုက်ခဲ့တာ” လို့ ရေစကြို-PDF တပ်ရင်း-၁ တပ်ရင်းမှူး ဗိုလ်မှိုင်းတေဇက ဒီဗွီဘီကို ပြောပါတယ်။
အဲဒီတိုက်ခိုက်မှုကြောင့် စစ်ကောင်စီတပ်သား ၁ ယောက် အခင်းဖြစ်နေရာမှာသေဆုံးကာ အပြင်းထန် ဒဏ်ရာရသွားတဲ့ထဲက ၂ ယောက် ထပ်မံသေဆုံးခဲ့ကြောင်း၊ အဲဒီ သေဆုံးသူတွေကို ဆင်ချောင်းကျေးရွာမှာပဲ မြေမြှုပ်သင်္ဂြိုဟ်လိုက်ကြောင်း အတွင်းသတင်းရရှိတာလို့ ဆိုပါတယ်။
အဲဒီမိုင်းခွဲတိုက်ခိုက်ခံရတဲ့နေရာကို ဟင်္သာကျေးရွာဘက်က ကား ၂ စီးနဲ့ စစ်ကူတက်လာပြီး လက်နက်ကြီး လက်နက်ငယ်တွေနဲ့ ရမ်းသမ်းပစ်ခတ်ကြပေမဲ့ PDF ရဲဘော်တွေ အထိအခိုက် အကျအဆုံးမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။
အဲဒီတိုက်ခိုက်မှုကို ‘မဟာမိတ် ပူးပေါင်းစစ်ဆင်လေး(၆)’ လို့ အမည်ပေးထားပြီး ရေစကြို-PDF၊ N-YSO ပြောက်ကျားတပ်၊ KNT ပြောက်ကျားတပ်၊ MRGF(မြိုင်) နဲ့ သံမဏိသိန်းငှက် PDF(မြိုင်) တို့ ပူးပေါင်းတိုက်ခိုက်ခဲ့ကြတာလို့ ပြောပါတယ်။
ရေစကြိုမြို့နယ်မှာ ဇူလိုင် ၈ ရက် မနက်ပိုင်းကလည်း စစ်ကောင်စီစစ်ကြောင်းနဲ့ ဒေသကာကွယ်ရေးတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၅ ယောက်သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။
အခု မိုင်းခွဲတိုက်ခိုက်ခံရတဲ့ ဖြစ်စဥ်နဲ့ ပတ်သက်လို့ စစ်ကောင်စီဘက်က သေဆုံး၊ ဒဏ်ရာရရှိတဲ့ အခြေအနေကို သတင်းထုတ်ပြန်ထားတာ မတွေ့ရသေးပါဘူး။
