ချင်းပြည်နယ် ဖလမ်းမြို့နယ်မှာ ဧပြီလ ၁၀ ရက်နေ့ မနက်ပိုင်းမှာ စစ်ကောင်စီတပ်စခန်း ၁ခု သိမ်းပိုက်ခံရပြီးနောက် လေကြောင်းတိုက်ခိုက်မှုတွေပြုလုပ်ခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။
ဖလမ်းမြို့နယ်က စစ်ကောင်စီရဲ့ ဗာရ်းစခန်းကို ဧပြီ ၁၀ ရက် မနက် ၅ နာရီလောက်ကနေ စတင်တိုက်ခိုက်ခဲ့ပြီး အချိန် ၁ နာရီခွဲလောက်အကြာမှာ စခန်းတခုလုံးကို သိမ်းပိုက်မီးရှို့ဖျက်ဆီးနိုင်ခဲ့တယ်လို့ ချင်းအမျိုးသားအဖွဲ့ချုပ် CNDF/CNO ရဲ့ ပြောရေးဆိုခွင့်ရှိသူ ကိုကျူံးငိုင်းက ဒီဗွီဘီကို ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ၁၆ ယောက်လောက်သေဆုံးပြီး ၁၁ ယောက်လောက်ကို အရှင်ဖမ်းမိထားကာ စခန်းမှာရှိတဲ့ လက်နက် ၁၉ လက်လောက်နဲ့ ခဲယမ်းတွေကို သိမ်းဆည်းနိုင်ခဲ့တယ်လို့ ဆိုပါတယ်။
“စခန်းသိမ်းပြီး နာရီဝက်လောက်အကြာမှာ ဂျက်ဖိုက်တာ ၁ စီးနဲ့ ၃ ကြိမ်လာတယ်။ ဗုံး ၆ ကြိမ်ချသွားတယ်။ ကျနော်တို့ဘက်က ရဲဘော်တယောက်ကတော့ လက်ပစ်ဗုံးဖြုတ်လိုက်တဲ့အချိန်မှာ ကိုယ့်ကိုယ်ကိုယ် မတော်တဆဖြစ်ပြီးတော့ ကျဆုံးခဲ့တယ်” လို့ ကိုကျူံးငိုင်းက ပြောပါတယ်။
ဒါ့အပြင် တိုက်ပွဲနဲ့ သက်ဆိုင်ခြင်းမရှိတဲ့ ဝေဘူလမြို့ကို မနက် ၁၁ နာရီလောက်က အကြောင်းမဲ့လေကြောင်းတိုက်ခိုက်ခဲ့တာကြောင့် ပြည်သူ ၉ ယောက်သေဆုံးကာ ၅ ယောက်လောက် ဒဏ်ရာရရှိခဲ့တယ်လို့ ဆိုပါတယ်။
မကွေးတိုင်း မင်းတုန်းမြို့နယ်မှာလည်း ဧပြီ ၁၀ ရက်နေ့ မနက်ပိုင်းက ကျောက်တိုင်ရဲစခန်း အနီးကပ်တိုက်ခိုက်ခံရပြီး ၂ ယောက်သေဆုံးကာ ၄ ယောက် အပြင်းထန် ဒဏ်ရာရရှိခဲ့တယ်လို့ Eagle Force ရဲ့ ပြန်ကြားရေးတာဝန်ခံ ကိုမြတ်က ပြောပါတယ်။
“ကျောက်တိုင်ရဲစခန်းမှာက စခ၊ ရခ ပူးပေါင်း ၁၅ ယောက်လောက်ရှိမယ်။ အဲဒါကို သရက်ခရိုင်တပ်ရင်း (၄) Eagle Force၊ ကျောင်းသားလက်ရုံးတပ်တော် SAF၊ လွတ်မြောက်ရေးတပ်တော် W.O.L.F တို့ ပူးပေါင်းပြီး အနီးကပ် ချည်းကပ်ပြီး ကျနော်တို့ဘက်က စတင် ပစ်ခတ်ခဲ့တာ။ သူတို့ဘက်ကလည်း ပြန်လည်ပစ်ခတ်တာတွေရှိပြီး လမ်းတဖက်ကနေ ပစ်ခတ်ရတာဆိုတော့ ခရီးသွားပြည်သူတွေရဲ့ ကားတချို့က တိုက်ပွဲ နားကပ်လာလို့ ပစ်ခတ်တဲ့ အရှိန်လျော့သွားပြီး သတ်မှတ်တဲ့အချိန်လွန်သွားပြီး ကျည်ဆန်လည်းမလုံလောက်တော့လို့ ပြန်လည်ဆုတ်ခွာခဲ့ကြတယ်။”
စခန်းကို ဝင်ရောက်သိမ်းပိုက်ဖို့ သွားရောက်တိုက်ခိုက်ခဲ့တာဖြစ်ပြီး မသိမ်းပိုက်နိုင်ခဲ့ဘဲ မင်းတုန်းဇာတိ ရဲတပ်သားဇင်ဘိုကို အပါဝင် ၂ ယောက်သေဆုံး၊ ၄ ယောက် ဒဏ်ရာရရှိကာ မကွေးဆေးရုံကို သယ်သွားတယ် သတင်းကြားတယ်လို့ ပြောပါတယ်။
မကွေးတိုင်း မြိုင်မြို့နယ်မှာ ဧပြီ ၈ ရက်နေ့ ညနေက စစ်ကောင်စီစစ်ကြောင်း ဒရုန်းနဲ့ဗုံးကြဲတိုက်ခိုက်ခံရပြီး ၆ ယောက်ထက်မနည်း အပြင်းထန် ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။
မြိုင်မြို့နယ် ညောင်ရွာကျေးရွာမှာ စစ်ကောင်စီရဲ့ အင်အား ၈၀ လောက်ပါတဲ့ ဘီလူးစစ်ကြောင်းကို ဧပြီ ၈ ရက် ညနေ ၅ နာရီ ၅၃ မိနစ်မှာ ဒရုန်းနဲ့ အီနာဂါဗုံးသီး ၂၈ လုံး ဖြုတ်ချတိုက်ခိုက်ခဲ့တာလို့ မြိုင်ပကဖ တပ်ရင်း ၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။
စစ်ကြောင်းကတော့ ပုလဲမြို့နယ် ပန်းရွာကို Mi35 တိုက်ခိုက်ရေးရဟတ်ယာဥ်နဲ့ ပစ်ခတ်ပြီး ထောက်ပို့ ရဟတ်ယဥ် ၂ စီးနဲ့ လာချသွားတဲ့ စစ်ကြောင်းဖြစ်ပြီး ဘီးလူးစစ်ကြောင်းလို့ အမည်ပေးထားတယ်လို့ ဆိုပါတယ်။
အဲဒီတိုက်ခိုက်မှုကို မြိုင်ပကဖ တပ်ရင်း ၁၊ ၂၊ သူရိန်တပ်ဖွဲ့နဲ့ Black Cobra တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က ၆ ယောက်အပြင်းထန် ဒဏ်ရာရရှိကာ ပြည်သူ့ကာကွယ်ရေးတပ်က ရဲဘော်တွေ ထိခိုက်မှုမရှိခဲ့ဘူးလို့ ဗိုလ်လက်ယာက ပြောပါတယ်။
အဲဒီစစ်ကြောင်းဟာ မြိုင်မြို့နယ် အိုင်းမကျေးရွာကိုလည်း ဧပြီ ၈ ရက် မနက်မှာ မီးရှို့ဖျက်ဆီးခဲ့တာကြောင့် နေအိမ် ၁၈ လုံး မီးလောင်ကျွမ်းခဲ့တယ်လို့ ဒေသခံတွေက ပြောပါတယ်။
တိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းတွေမှာ စစ်ကောင်စီရဲ့ မြေပြင်စစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အထိနာနေတာကြောင့် စစ်ကောင်စီဘက်က လေကြောင်းတိုက်ခိုက်တာတွေ ဆက်တိုက်ပြုလုပ်လာနေတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။
စစ်ကိုင်းတိုင်း ဝက်လက်နယ် စိုင်နိုင်ကွေ့လမ်းဆုံကနေ ရွှေဘိုမြို့နယ်ဘက် ထွက်ခွာလာတဲ့ စစ်ကောင်စီတပ်သား ၂၀ ကျော်ပါတဲ့ ၁၂ ဘီးကားကို ဖေဖော်ဝါရီ ၄ ရက် မနက်မှာ ဒေသကာကွယ်ရေးတပ်တွေက ပဒေသာမိုင်း ၆ လုံးနဲ့ မိုင်းဆွဲတိုက်ခိုက်ခဲ့တယ်လို့ ရွှေဘိုခရိုင်တပ်ရင်း (၂၃) နဲ့ မဟာမိတ် ပ.က.ဖအဖွဲ့တွေက ထုတ်ပြန်ပါတယ်။
အဲဒီတိုက်ခိုက်မှုကြောင့် စစ်ကောင်စီတပ်သား ၃ ဦး တိုက်ပွ်ဖြစ်ပွားရာနေရာမှာပဲ သေဆုံးပြီး အများအပြား ထိခိုက်ဒဏ်ရာရသွားတယ်လို့ ဆိုပါတယ်။
“ကားခေါင်းပိုင်းကို အထိက ခပ်ပြင်းပြင်းလေး ထိသွားတော့ ကားက ထိုးရပ်သွားတာဗျ။ အဲ့ကျမှ အပေါ်က (-) တချို့ဆင်းလာပြီး ဆက်တိုက်ဖိပစ်တော့တာပါပဲ” လို့ ရွှေဘိုခရိုင်တပ်ရင်း ၂၃ တပ်ရင်းမှူး ဗိုလ်ရန်ကြီးက ဒီဗွီဘီကို ပြောပါတယ်။
အခုတလော အာဏာသိမ်းစစ်ကောင်စီတပ်က ဝက်လက်နယ်က ကျေးရွာတွေကို ဆက်တိုက်ဆိုသလို မီးရှို့ဖျက်ဆီးကာ ဒေသခံတွေကိုလည်း ဖမ်းဆီးသတ်ဖြတ်တာတွေ ရှိနေပြီး ဒေသကာကွယ်ရေးတပ်တွေနဲ့လည်း မကြာခဏဆိုသလို တိုက်ပွဲတွေ ဖြစ်ပွားနေတာပါ။
ဖေဖော်ဝါရီ ၁ ရက်နေ့ကလည်း လှတောကျေးရွာက ထွက်ခွာလာတဲ့ စစ်ကောင်စီတပ်သားတွေကို ဒေသကာကွယ်ရေးတပ်တွေက ရှေ့ထွက်မိုင်းနဲ့ မိုင်းဆွဲတိုက်ခိုက်ခဲ့လို့ တပ်သား ၃ သေဆုံးပြီး ၆ ဦး ဒဏ်ရာရရှိခဲ့ပါသေးတယ်။
စစ်ကိုင်းတိုင်း၊ မြင်းမူမြို့နယ်၊ ထီးဆောင်းရွာက စစ်ကောင်စီစခန်းကို ဒေသကာကွယ်ရေးအဖွဲ့ တွေက ဖေဖော်ဝါရီ ၄ ရက် မနက် ၁ နာရီမှာ ဝင်ရောက်တိုက်ခိုက်ခဲ့တယ်လို့ ဒေသကာကွယ်ရေးအဖွဲ့တွေက ပြောပါတယ်။
စစ်ကိုင်း-မုံရွာသွား ကားလမ်းမဘေးမှာရှိတဲ့ အဲဒီစခန်းဟာ ဘန်ကာတွေ၊ ကတုတ်ကျင်းတွေနဲ့ အခိုင်အမာ တည်ဆောက်ထားတာပါ။
Zero ပြောက်ကြားတပ်ဖွဲ့ မြင်းခြံ ကိုသက်ကြီးက “စတိုက်တာက မနက် ၁ နာရီကနေ စတိုက်တာ၊ ၃ နာရီထိ တိုက်ခဲ့တယ်။ အကျအဆုံးကတော့ ၁၅ ကောင် သေဆုံးတယ်။ တချို့ ထွက်ပြေး သွားတယ်” လို့ ပြောပါတယ်။
အဲဒီစခန်းကနေ MA-3 တလက်၊ ကျည်ဘောက်တခု၊ ၅ ဒသမ ၅၆ ကျည် ၁၈ တောင့်၊ ကာဘိုင် ၁ လက်၊ ကျည်ဘောက် ၃ ခု၊ ကာဘိုင်ကျည် ၁၀၄ တောင့်၊ 9ball ကျည် ၇၆ တောင့်၊ Jummer စက် ၂ လုံး၊ ကျည်ကာအင်္ကျီ ၁ ထည်၊ စစ်ယူနီဖောင်း ၂ စုံ၊ စစ်ဖိနပ် ၃ ရံနဲ့ စစ်ဦးထုပ် ၃ လုံး ရလိုက်တယ်လို့ သိရပါတယ်။
ကျောက်ဆည်ခရိုင်အမှတ် ၁ တပ်ရင်း(နဂါးနီတပ်ရင်း)မှ ကိုနာဂါးက "လက်နက်ကြီး လက်နက်ငယ်တွေနဲ့ဝင်ပစ်တာ၊ ၂ နာရီကြာတယ်။ စခန်းကို သိမ်းပြီး မီးရှို့နိုင်ခဲ့တယ်။ စခန်း ကတော့ ပြာကျသွားပြီ" လို့ ပြောပါတယ်။
သေဆုံးတဲ့စစ်သားအလောင်း ၁၅ လောင်းကတော့ စခန်းမီးရှို့တဲ့ထဲမှာ ပါသွားတယ်လို့ ဆိုပါတယ်။
တိုက်ပွဲမှာ ပြည်သူကာကွယ်ရေးဘက်က ရဲဘော် ၂ ဦး မစိုးရိမ်ရဒဏ်ရာရခဲ့ပြီး စစ်တပ်က လက်နက်ကြီးနဲ့ ပစ်တာကြောင့် ကျေးရွာအတွင်းက နေအိမ်တွေပေါ်ကျပြီး ပြည်သူတယောက် ထိမှန်သေဆုံးခဲ့တယ်လို့ ဒေသခံတွေက ပြောပါတယ်။
ဝက်လက်နဲ့ ထီးဆောင်းရွာတို့မှာ တိုက်ခိုက်ခံရတာကြောင့် ထိခိုက်ကျဆုံးတဲ့အခြေအနေကို စစ်ကောင်စီ သတင်းမထုတ်ပြန်သေးသလို ဒီဗွီဘီကလည်း သီးခြားအတည်မပြုနိုင်သေးပါဘူး။
