ရန်ကုန်တိုင်း၊ သာကေတမြို့နယ်၊ ခိုင်ရွှေဝါလမ်းမဘေးက သောက်ရေကန်နားမှာ ဖေဖော်ဝါရီ ၁၉ ရက် ညနေ ၃ နာရီကျော်လောက်က စစ်တပ်ထောက်ခံသူ မဘသအဖွဲ့ဝင်အဖြစ်လူသိများတဲ့ နေမျိုးအောင် သေနတ်နဲ့ ပစ်ခတ်ခံရတာကြောင့် ဦးခေါင်းထိမှန်ဒဏ်ရာနဲ့ ပွဲချင်းပြီး သေဆုံးသွားတယ်လို့ မဘသအသိုင်းအဝိုင်းကနေ သိရပါတယ်။
သာကေတမြို့နယ်၊ ၁၃ ရပ်ကွက်၊ သလ္လာဝတီ ၂ လမ်းမှာ နေထိုင်တဲ့ နေမျိုးအောင်ဟာ စစ်တပ်ထောက်ခံပွဲတွေမှာ မဘသခေါင်းဆောင် အဖွဲ့ဝင် တင်လင်းထိုက်နဲ့အတူ လူစုပေးတာ၊ သေနတ်ကိုင် လုံခြုံရေးယူပေးနေတာ ဖြစ်တဲ့အပြင် အဆိုပါရပ်ကွက်က လောင်းကစား လုပ်ငန်းတွေမှာလည်း လိုင်းကြေးတောင်းယူနေသူလို့ သိရပါတယ်။
“နေ့ခင်းကအထိ ဖုန်းအဆက်အသွယ်ရသေးတယ်။ တင်လင်းထိုက်၊ မှက်ကြီးနဲ့ နေမျိုးအောင်ကို ပစ်မယ်ဆိုတာ သတင်းကြိုရလို့ ရှောင်နေဖို့ပြောတာ။ ရတယ် ဘာမှမစိုးရိမ်နဲ့ သူပစ်ကိုယ်ပစ်ဆိုပြီး ပြန်ပြောခဲ့သေးတယ်။ လက်ဖက်ရည်ဆိုင် မထိုင်ဖို့တောင် သတိပေးခဲ့တာ။ ညနေ အပြင်ထွက်တဲ့လမ်းမှာ ကန်နားမှာ အပစ်ခံရတာလို့ ပြောတယ်။ ဖြစ်ဖြစ်ချင်း ဆေးရုံပို့ပေမဲ့ မမီတော့ဘူး” လို့ အင်းစိန်မြို့နယ် မဘသအဖွဲ့ဝင်တဦးက ပြောပါတယ်။
ပြီးခဲ့တဲ့ ဖေဖော်ဝါရီ ၁ ရက်က ဆူးလေ၊ မြို့တော်ခန်းမအရှေ့က စစ်တပ်ထောက်ခံပွဲမှာ ဒေါပုံ၊ သာကေတဘက်က စစ်ကောင်စီထောက်ခံသူတွေနဲ့ အတူတွေ့ခဲ့ရပြီး မဘသ နေမျိုးအောင်ကြောင့် သာကေတမြို့နယ်မှာ ဖမ်းဆီးခံရတဲ့ အရပ်သားလူငယ် ၅ ယောက်ထက်မနည်း ရှိခဲ့တယ်လို့ မြို့ခံတွေဆီက သိရပါတယ်။
မြို့ခံတဦးက “အခုမှမဟုတ်ဘူး၊ အာဏာမသိမ်းခင်ကတည်းက ရွေးကောက်ပွဲကို နှောင့်ယှက်ဖို့ ဆန္ဒပြတာလည်း သူတို့ပဲ။ အဲ့ကတည်းက တွင်ခုံကလုပ်ထားတဲ့ သေနတ်လိုဟာတွေ ကိုင်ထားတာ။ သူ့ရပ်ကွက်ထဲလည်း ရဲတောင် ဝင်မဖမ်းရဲဘူး။ ရပ်ကွက်လူမိုက်လို့ ပြောလို့ရတယ်။ လတိုင်း လိုင်းကြေးတွေကောက်ပြီး စားနေတာ။ မနှစ်က ၁ လပိုင်းလောက်က ရုံးခန်းက လူကြီးတဦး လက်ဖက်ရည်ဆိုင်ထိုင်ရင်း အပစ်ခံရတော့ နေမျိုးအောင် ဒလန်လုပ်လို့ ၁၃ ရပ်ကွက်ထဲက ၂ ယောက် အဖမ်းခံခဲ့ရဖူးတယ်။ မနေ့ညနေက ဆေးရုံတောင်မရောက်ဘူး သေပြီပြောတယ်။ အလောင်းက ရင်ခွဲရုံမှာ။ သူ့အိမ်ရှေ့မှာ မဏ္ဍပ်ထိုးထားတာ တွေ့တယ်။ စစ်တပ်ကတော့ တမြို့လုံးပိတ်ပြီး စစ်နေတယ်” လို့ ပြောပါတယ်။
မဘသနေမျိုးအောင် ပစ်ခတ်ခံရပြီးနောက်ပိုင်း သုဝဏ္ဏတံတား၊ ကမာကြည်တံတား၊ ရှုခင်းသာပတ်လမ်းနဲ့ မီးပွိုင့်တွေမှာ စစ်ကား ၃ စီးနဲ့ ပိတ်ဆို့စစ်ဆေးနေတယ်လို့ သိရပါတယ်။
စစ်အုပ်စုနဲ့ သူတို့ကို ထောက်ခံသူတွေ၊ သတင်းပေးတွေအနားမှာ ပြည်သူတွေ မနေကြဖို့ ညောင်တုန်းမြို့နယ် ပြည်သူ့ကာကွယ်ရေးတပ်က သတိပေးလိုက်ပါတယ်။
စစ်ဆင်ရေးတွေလုပ်ရာမှာ အနှောင့်အယှက်မဖြစ်စေဖို့ အခုလို သတိလိုက်တာဖြစ်ပြီး တော်လှန်ရေးလုပ်ငန်းတွေ အောင်မြင်ဖို့အတွက် မြို့နေပြည်သူတွေအနေနဲ့ CCTV ကင်မရာတွေ ဖြုတ်ပေးထားကြဖို့လည်း တောင်းဆိုထားပါတယ်။
စစ်ကောင်စီအလိုကျ ပြည်သူတွေအပေါ် နိုင်ထက်စီးနင်း အကြမ်းဖက်နေတဲ့ ညောင်တုန်းမြို့ အမှတ် ၇ ရပ်ကွက် အုပ်ချုပ်ရေးမှူးကို မနေ့ညနေ ၆ နာရီခွဲက ရှင်းလင်းသုတ်သင် ပစ်ခတ်ရာမှာ ပြည်သူတွေရှိတဲ့အတွက် ၁ ချက်ပဲ ပစ်နိုင်ခဲ့တယ်လို့ ညောင်တုန်း ပြည်သူ့ကာကွယ်ရေးတပ် တာဝန်ရှိသူတယောက်က ပြောပါတယ်။
“ရပ်ကွက်ရုံးကိုအသွား ရုံးနားရောက်ကာနီးမှာ ပစ်တာ။ သူ့ကို အရင်က သတိပေးတာတွေ ရှိခဲ့တယ်။ ကျန်တဲ့ တချို့အဖွဲ့တွေကလည်း လုပ်ကြံဖူးတယ်။ မအောင်မြင်တာ။ အခုလည်း ပစ်ကွင်းမရှင်းလို့ တချက်ပဲ ပစ်ခဲ့ရတယ်။ ညောင်တုန်းဆေးရုံကနေ မအူပင်ကို လွှဲတယ်လို့ ကြားတယ်။ သေ မသေတော့ မသိရသေးဘူး” လို့ ဆိုပါတယ်။
ဒါကြောင့် ပြည်သူတွေအနေနဲ့ အဲဒီလိုလူတွေ အနားကနေ ဝေးဝေးရှောင်စေချင်တယ်လို့လည်း သူက ပြောပါတယ်။
အုပ်ချုပ်ရေးမှူးဟာ စစ်ကောင်စီသတင်းပေးလုပ်သလို သူကိုယ်တိုင်လည်း ဖမ်းဆီးပေးတာမျိုးတွေရှိလို့ သူ့ကြောင့် ဖမ်းခံခဲ့ရသူလည်း အများအပြားရှိတယ်လို့ ဒေသခံတွေက ပြောပါတယ်။
မနေ့ညက အဲဒီလိုပစ်ခတ်တာဖြစ်ပြီးနောက် အကြမ်းဖက်စစ်တပ်က ပန်တိုင်ဂိတ်၊ ဆားမလောက်တာကွေ့ ဗိုလ်မြတ်ထွန်းတံတားမှာ စစ်ဆေးတာတွေ တင်းတင်းကြပ်ကြပ် လုပ်နေတယ်လို့ သိရပါတယ်။
လာရောက်ပစ်ခတ်တာကို ထော်လာဂျီနဲ့ လုပ်တယ်လို့ သတင်းထွက်တာကြောင့်လည်း မြို့ထဲက ထော်လာဂျီမောင်းသူတချို့ကို ဖမ်းထားတယ်လို့လည်း သိရပါတယ်။
