စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ ညောင်ပေါင်ရင်းရွာကို ဧပြီ ၁ ရက် မနက်ပိုင်းက အင်အား ၁၀၀ ကျော်နဲ့ စစ်ကြောင်းထိုး ဝင်ရောက်လာတဲ့ စစ်တပ်နဲ့ ပျူစောထီးတွေကို ကန့်ဘလူ မြေပြင်မဟာမိတ်အဖွဲ့တွေက သွားရောက်ပစ်ခတ် တိုက်ခိုက်ခဲ့တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင်က ထုတ်ပြန်ပါတယ်။
ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင် သတင်းနဲ့ ပြန်ကြားရေး တာဝန်ရှိသူက “အကြမ်းဖက်စစ်တပ်နဲ့ ပျူစောထီးတွေက ညောင်ပေါင်ရင်းရွာကို စစ်ကြောင်းထိုးလာပြီး လက်နက်ကြီး လက်နက်ငယ်တွေနဲ့ ပစ်ခတ်ဝင်ရောက်ခဲ့ကြတယ်။ ဖြည့်စွက်ပြောရရင်တော့ ဧပြီလဆန်းကတည်းက ကန့်ဘလူခရိုင် စစ်ကြောင်းထိုးခံရတော့ စိတ်ပူသောကတော့ ရှိတယ်ဗျ၊ တခြားတော့မဟုတ်ဘူး၊ စစ်ရှောင်များလေ၊ ထောက်ပံ့မှုလိုအပ်လေမို့ မနိုင်ဝန်ဖြစ်တော့မှာ တွေးပူမိလို့ပါဗျ။ ကျနော်တို့လည်း ထောက်ပံ့မှုမပေးနိုင်ရင် စိတ်မကောင်းဖြစ်ရပါတယ်” လို့ ဒီဗွီဘီကို ပြောပါတယ်။
ညောင်ပေါင်ရင်းရွာထဲမှာ ပြည်သူပိုင်ပစ္စည်းတွေကို ခိုးယူလုယက်နေတဲ့ အဆိုပါ စစ်ကြောင်းကို မနက် ၁၁ နာရီခွဲမှာ Kanbalu Underground Warriors၊ MPF U.18၊ စွန်ရဲအဖွဲ့၊ ကန့်ဘလူမြို့နယ်(ပကဖ) နဲ့ မြေပြင်လှုပ်ရှားညီနောင်တွေ ပူးပေါင်းပြီး ဒရုန်းနဲ့ ဗုံးသီး ၁ လုံးချကာ တိုက်ခိုက်ခဲ့ပါတယ်။
မွန်းလွဲ ၁၂ နာရီခွဲမှာတော့ မြေပြင်မဟာမိတ်အဖွဲ့တွေက ၈၁ မမ ၇ လုံး၊ ၆၀ မမ ၃ လုံး အပါအဝင် လက်နက်ငယ်တွေနဲ့ ရွာထဲထိ ဝင်ရောက်ပစ်ခတ် တိုက်ခိုက်ခဲ့ရာ စစ်တပ်နဲ့ ပျူစောထီးတို့က ၇၉ အောက်တွဲနဲ့ အချက် ၂၀ ခန့် ပစ်ခတ် တိုက်ခိုက်ခဲ့ရာ နာရီဝက်ကြာ အပြန်အလှန် ပစ်ခတ်ခဲ့ကြပြီး စစ်တပ်နဲ့ ပျူစောထီးတို့ဘက်က ၄ ယောက် ထိခိုက်သေဆုံးခဲ့ကာ ပြည်သူ့ကာကွယ်ရေးတပ်ဖွဲ့ မြေပြင်မဟာမိတ်အဖွဲ့ဘက်က ရဲဘော် ၂ ဦး ထိခိုက်ဒဏ်ရာရပြီး အသက်အန္တရာယ် မစိုးရိမ်ရကြောင်း PDF တပ်ဖွဲ့ဝင်တဦးက ပြောပါတယ်။
အဆိုပါ အကြမ်းဖက်စစ်တပ်စစ်ကြောင်းဟာ ဧပြီ ၂ ရက်မှာလည်း ညောင်ပေါင်ရင်းရွာဘက်ကနေ ဉာဏ်အင်းရွာဘက်ကို ဆက်လက် စစ်ကြောင်းထိုး ဝင်ရောက်ခဲ့ကြပြီး အပြစ်မဲ့ပြည်သူပိုင်နေအိမ်တွေကို မီးရှို့ဖျက်ဆီးခဲ့ကာ အင်းလယ်ကြီးရွာဘက်ကို ဆက်လက်စစ်ကြောင်းထိုး ထွက်ခွာသွားကြပြီး အင်းလယ်ကြီးရွာမှာ စခန်းချနေတယ်လို့ ဒေသခံတွေထံက သိရပါတယ်။
စစ်ကြောင်းမှာ ပျူခေါင်းဆောင် ဝါသဝရဲ့ ဩဝါဒခံ ပျူစောထီး အများဆုံးပါတဲ့ စစ်ကြောင်းဖြစ်ပြီး သူတို့ စစ်ကြောင်းထိုးခဲ့တဲ့ရွာတွေက တန်ဖိုးရှိ ရွှေ၊ ငွေ၊ ဆန်စပါး၊ ကောက်ပဲသီးနှံနဲ့ အိမ်မွေးတိရစ္ဆာန် ကြက်၊ ဝက်တွေသာမက လယ်ယာသုံး ကျွဲ၊ နွားတွေကိုပါ ခိုးယူသယ်ဆောင်သွားလေ့ရှိတဲ့ အကြမ်းဖက်စစ်ကြောင်း ဖြစ်တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ - ကန့်ဘလူခရိုင် ထုတ်ပြန်ချက်မှာ ဖော်ပြထားပါတယ်။
စစ်ကိုင်းတိုင်း မင်းကင်းမြို့နယ်၊ မအူရွာမှာ တပ်စွဲစခန်းချထားတဲ့ စစ်ကောင်စီတပ်သားနဲ့ ပျူစောထီးတွေကို ဧပြီ ၁ ရက်နဲ့ ၂ ရက်က နှစ်ရက်ဆက်တိုက် ပစ်ခတ်တိုက်ခိုက်ခဲ့ပြီး စစ်ရေးအခြေအနေ တင်းမာနေတယ်လို့ ကလေးခရိုင် အမှတ် ၁၁ တပ်ရင်း မင်းကင်းက တာဝန်ရှိသူက ဆိုပါတယ်။
မအူရွာက ပျူစောထီးတွေ နေထိုင်တဲ့ရွာဖြစ်ပြီး မအူရွာအတွင်းက စစ်ကောင်စီတပ်စခန်းကို လက်နက်ကြီး လက်နက်ငယ်တွေနဲ့ နှစ်ရက်ဆက်တိုက် ပစ်ခတ်တိုက်ခိုက်ခဲ့တာလို့ သိရပါတယ်။
“အခြေအနေက ခုထိ ရင်ဆိုင်ထားဆဲပါ။ ပြည်သူတွေ သွားလာတာကို သတိထားစေချင်ပါတယ်။ သူတို့က အထိနာရင် ချောဆွဲတာတွေ လုပ်တတ်တာမို့ပါ။ စစ်ကောင်စီဘက်က ထိခိုက်မှုများတယ်လို့ ယူဆရပါတယ်” လို့ အဆိုပါအဖွဲ့ တာဝန်ရှိသူက ပြောပါတယ်။
မအူရွာ စစ်ကောင်စီစခန်းကို ဧပြီ ၁ ရက် မနက် ၉ နာရီမှာ ၆၀ မမနဲ့ တချက်ပစ်ခတ်ခဲ့ပြီး နေ့လယ် ၁၁ နာရီမှာ ဒရုန်းနဲ့ အီနာဂါ လေးလုံးချ တိုက်ခိုက်ခဲ့ပြီး ညနေပိုင်းမှာ ၆၀ မမ ၃ ချက်၊ ၄၀ မမ ၂ လုံးနဲ့ တိုက်ခိုက်ခဲ့ပြီး မီတာ ၃၀၀ အတွင်း အနီးကပ် လက်နက်ငယ်တွေနဲ့ တိုက်ပွဲဖြစ်ပွားခဲ့တယ်လို့ သိရပါတယ်။
မအူရွာစစ်တပ်စခန်းကို ဧပြီ ၂ ရက် မနက် ၁၀ နာရီက စတင်ပြီး ၆၀ မမ ၇ လုံး၊ ၄၀ မမ ၃ လုံး၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့ပြီး စနိုက်ပါနဲ့ ပစ်ခတ်မှုကြောင့် စစ်သားတဦး သေဆုံးခဲ့တယ်လို့ ဆိုပါတယ်။
စစ်ကောင်စီတပ်ဘက်ကလည်း ၆၀ မမ လက်နက်ကြီး၊ လက်နက်ငယ်တွေနဲ့ ပြန်လည်ပစ်ခတ်ခဲ့ပြီး ပြည်သူ့ကာကွယ်ရေးတပ်ဖွဲ့တွေဘက်က ထိခိုက်မှုမရှိဘူးလို့ သိရပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ချောင်းဦးမြို့နယ်မှာတော့ ဧပြီ ၂ ရက် မနက်ပိုင်းက စစ်ကြောင်းထိုး ဝင်ရောက်လာတဲ့ စစ်ကောင်စီတပ်က အမျိုးသား နှစ်ဦးကို သေနတ်နဲ့ပစ်သတ်ပြီး ပြည်သူ ၁၅ ဦးကို ဖမ်းဆီးသွားကြောင်း သိရပါတယ်။
စစ်ကောင်စီတပ်ဟာ တောင်ဖီလာကျေးရွာကို စစ်ကြောင်းထိုး ဝင်ရောက်လာကာ ပြည်သူနှစ်ဦးကို သေနတ်နဲ့ပစ်သတ်ပြီး ၁၅ ဦးကို ဖမ်းဆီးသွားကာ နေအိမ်တွေကို မီးရှို့ဖျက်ဆီးသွားတယ်လို့ သိရပါတယ်။
ဒေသခံ အမျိုးသားတဦးက “မနက်အစောကြီး ၃ နာရီလောက်မှာ အင်အား ၁၅၀ လောက်နဲ့ ရွာကို စစ်ကြောင်းထိုးလာတယ်။ စစ်ကြောင်းထိုးတဲ့လမ်းမှာပဲ အမျိုးသားနှစ်ဦးကို သေနတ်နဲ့ ပစ်သတ်သွားတယ်။ လမ်းမှာတွေ့တဲ့ အမျိုးသား ၁၀ ဦးနဲ့ အမျိုးသမီး ၅ ဦးကိုလည်း ဖမ်းသွားတယ်။ ရွာက နေအိမ်တွေလည်း မီးရှို့သွားတယ်” လို့ ပြောပါတယ်။
စစ်ကောင်စီတပ်ဟာ အမျိုးသားနှစ်ဦးကို သေနတ်နဲ့ပစ်သတ်ပြီး တောင်ဖီလာကျေးရွာက ပြည်သူ ၃ ဦး၊ မှန်ချိုကျေးရွာက ပြည်သူ ၆ ဦး၊ ထူးနီကျေးရွာက ပြည်သူ ၆ ဦးကို ဖမ်းဆီးပြီး ဘယ်နေရာကို ခေါ်ဆောင်သွားတယ်ဆိုတာ မသိရသေးပါဘူး။
အရပ်သား ပြည်သူနှစ်ဦးကို သေနတ်နဲ့ပစ်သတ်ပြီး ပြည်သူ ၁၅ ဦးကို ဖမ်းဆီးခဲ့တဲ့ စစ်ကောင်စီတပ်ဟာ တောင်ဖီလာကျေးရွာက နေအိမ် ၅ လုံးကိုလည်း မီးရှို့ ဖျက်ဆီးခဲ့ပါတယ်။
ပြီးခဲ့တဲ့ မတ်လ ၃ ရက်ကလည်း စစ်ကောင်စီတပ် အင်အား ၁၅၀ ခန့်ဟာ ချောင်းဦးမြို့နယ် ခင်မွန်ကျေးရွာကို စစ်ကြောင်းထိုး ဝင်ရောက်ပြီး လက်နက်ကြီးနဲ့ပစ်ခတ်လို့ အသက် ၁၃ နှစ်အရွယ် အမျိုးသားတဦးနဲ့ အသက် ၆၇ နှစ်အရွယ် အမျိုးသမီးတဦး သေဆုံးခဲ့ပြီး ပြည်သူ ၇ ဦး ဒဏ်ရာရှိခဲ့ကာ နေအိမ် အလုံး ၆၀ ကျော်ကိုလည်း မီးရှို့ဖျက်ဆီးခဲ့ပါတယ်။
စစ်ကိုင်းတိုင်း၊ ကန့်ဘလူမြို့နယ်၊ လယ်လှကျေးရွာနဲ့ ကံပေါက်ကျေးရွာမှာ အထိုင်ချ တပ်စွဲနေတဲ့ စစ်ကောင်စီတပ်နဲ့ ပျူစောထီးတွေ စားဖို့ ထမင်းဟင်း ချက်ပြုတ် ပို့ဆောင်ပေးရမယ်လို့ ဒေသခံတွေကို အမိန့်ထုတ်ထားကြောင်း သိရပါတယ်။
ခြေမြန်တပ်ရင်း ခမရ ၃၆၈ တပ်နဲ့ ပျူစောထီးတွေဟာ ဒေသခံတွေကို ရွာအပြင်မထွက်ခိုင်းစေဘဲ သူတို့ကို ထမင်းဟင်း ချက်ပြုတ် ပို့ဆောင်ပေးရမှာဖြစ်ကြောင်း ကျေးရွာဒေသခံတွေက ပြောပါတယ်။
ကံပေါက်ကျေးရွာ ဒေသခံတဦးက “ရွာမှာ ခမရ ၃၆၈ တပ်နဲ့ ပျူစောထီးအဖွဲ့က တပ်စွဲနေတာ ကြာပြီ။ ရွာပြင်လည်း ပေးမထွက်ဘူး။ ခုနောက်ပိုင်း နေအိမ်တွေကနေ ထမင်းဟင်း ချက်ပို့ရမယ်ဆိုပြီး အမိန့်ထုတ်ထားတယ်။ နောက်ပြီး ပျူစောထီးသင်တန်းတက်ရမယ် ဆိုပြီးလည်း သတင်းထွက်နေတယ်” လို့ ပြောပါတယ်။
ခြေမြန်တပ်ရင်း ၃၆၈ နဲ့ ပျူစောထီးအဖွဲ့ဟာ လယ်လှကျေးရွာနဲ့ ကံပေါက်ကျေးရွာမှာ အထိုင်ချပြီး ကန့်ဘလူမြို့နယ်က ကျေးရွာတွေကို လိုက်လံ မီးရှို့ဖျက်ဆီးနေတာပါ။
ခြေမြန်တပ်ရင်း ၃၆၈ နဲ့ ပျူစောထီး ပူးပေါင်းတပ်ဖွဲ့ အင်အား ၁၀၀ ကျော်ဟာ ဇန်နဝါရီ ၃၀ ရက် မနက်ပိုင်းက ကန့်ဘလူမြို့နယ် တောင်ယာဆိပ်ကျေးရွာအုပ်စုအတွင်းကို စစ်ကြောင်းထိုး ဝင်ရောက်ပြီး ပြည်သူပိုင်နေအိမ်တွေကို မီးရှို့ဖျက်ဆီးခဲ့ပါတယ်။
မီးရှို့မှုကြောင့် သရက်တောကျေးရွာက နေအိမ်အလုံး ၃၀ ကျော်၊ အောင်ရန်ကင်းကျေးရွာက နေအိမ် အလုံး ၅၀ ကျော်၊ မြင်သာဦးကျေးရွာက နေအိမ် ၂၀ ကျော်နဲ့ တောင်ယာဆိပ်ကျေးရွာက နေအိမ် အလုံး ၂၀ ကျော် မီးလောင်ဆုံးရှုံးခဲ့ပါတယ်။
