စစ်ကိုင်းတိုင်း ကန့်ဘလူမြို့နယ်၊ ဇီးကုန်းမြို့ပေါ်မှာ ရွေးကောက်ပွဲအတွက် ပြင်ဆင်နေတဲ့ ဝန်ထမ်းတွေကို ဇန်နဝါရီ ၂၁ ရက် မနက် ၁၁ နာရီကျော်က ကန်ဘလူမြို့နယ် လင်းယုန်နီအဖွဲ့က တိုက်ခိုက်ခဲ့တယ်လို့ ဒေသခံပြည်သူကာကွယ်ရေးအဖွဲ့ တာဝန်ရှိသူတွေက ပြောပါတယ်။
ကန့်ဘလူ လင်ယုန်နီအဖွဲ့ တာဝန်ရှိသူက “ထွေအုပ်ရုံးထဲကို လက်ပစ်ဗုံး တလုံးနဲ့ စပစ်တယ်။ ပြီးတော့ ဆိုင်ကယ်နဲ့ အသင့်လုပ်ထားတဲ့ အဝေးထိမ်း စနစ်မိုင်းနဲ့ မိုင်းခွဲခဲ့နိုင်ခဲ့တယ်။ ၃ ဦး သေတယ်လို့ နီးစပ်သူစီက ပြန်ကြားရတယ်။ ကျနော်တို့အဖွဲ့ကတော့ အထိခိုက် မရှိ ဌာနေကို ပြန်ဆုတ်နိုင်ခဲ့တယ်” လို့ ပြောပါတယ်။
နိုင်ငံတော်အာဏာကို ဆက်လက်ထိန်းသိမ်းနိုင်ရေး လုပ်ဆောင်နေတာကြောင့် အခုလို တိုက်ခိုက်ခဲ့တာလို့ ဆိုပါတယ်။
စစ်ကောင်စီကြီးစိုးရာ ဇီးကုန်းမြိုပေါ်ကို အခုလို ဝင်ရောက်တိုက်ခိုက်တာဟာ ပထမဆုံးအကြိမ် ဖြစ်ပြီး ပေါက်ကွဲမှုအပြီး လုံးခြုံရေးတင်းကြပ်ကာ အပြင်းအထန် စစ်ဆေးနေတယ်လို့လည်း ဒေသခံတွေက ပြောပါတယ်။
စစ်ကိုင်းတိုင်း ကသာခရိုင်၊ အင်းတော်မြို့နယ်၊ ကြိမ်ချောင်းရွာနဲ့ သစ်ပုံလွင်ရွာကြားမှာ ဇန်နဝါရီ ၂၀ ရက် မွန်းလွဲပိုင်းအချိန် ထီးချိုင့်ဘက်ကနေတက်လာတဲ့ စစ်ကောင်စီတပ်နဲ့ KIA၊ PDF၊ ပကဖ ပူးပေါင်းတပ်တို့ ထိတွေ့ တိုက်ပွဲဖြစ်ပွားခဲ့ပြီး နှစ်ဖက်ထိခိုက် ကျဆုံးမှုရှိတယ်လို့ Indaw Revolution-IR အဖွဲ့က ထုတ်ပြန်ပါတယ်။
အင်းတော် PDF တပ်ဖွဲ့ဝင်တဦးက "စစ်ကောင်စီဘက်က ၄ ယောက် ထိခိုက် ဒဏ်ရာရပြီး ၁ ယောက် သေဆုံးကာ သစ်ပုံလွင်ရွာ သင်္ချိုင်းမှာ မြေမြှုပ်ထားခဲ့တယ်။ PDF ရဲဘော် ၂ ဦး ထိခိုက်ဒဏ်ရာရပြီး အသက် ၂၀ အရွယ်(ပကဖ)ရဲဘော်တဦး ကျဆုံးခဲ့တယ်" လို့ ပြောပါတယ်။
စစ်ကောင်စီတပ်က ထီးချိုင့်မြို့နယ် လယ်မှီးရွာကနေ ဓားစာခံခေါ်လာတဲ့ အသက် ၃၅ နှစ်အရွယ် ကိုရဲဝင်းအောင်၊ ကိုညိုအေး နဲ့ အသက် ၄၀ နှစ်အရွယ် ကိုစန်းဝေတို့ကို သတ်ဖြတ်ကာ ဦးသျှစ်ကုန်းရွာက တောထဲမှာ ပစ်ထားခဲ့ကြတယ်လို့ ထုတ်ပြန်ချက်အရ သိရပါတယ်။
စစ်ကြောင်းထိုးလာတဲ့ စစ်ကြောင်းဟာ တပ်မ (၈၈) လက်အောက်ခံ ခမရ (၃၀၁) နဲ့ ခလရ(၄၁၆)တို့ ဖြစ်တယ်လို့ Indaw Revolution-IR အဖွဲ့က ထုတ်ပြန်ထားပါတယ်။
မွန်ပြည်နယ် သံဖြူဇရပ်-ရေးကားလမ်းဝန်းကျင်က ရွာတွေနားမှာ နိုဝင်ဘာ ၁၉ ရက်က စစ်ကောင်စီတပ်နဲ့ တိုက်ပွဲ သုံးကြိမ်ဖြစ်ခဲ့တယ်လို့ ဒေသခံတောင်ညိုပြည်သူ့ပြောက်ကျားအဖွဲ့က ဒီနေ့ သတင်းထုတ်ပြန်ပါတယ်။
မနေ့မနက် ၉ နာရီခွဲကျော်လောက်က ရေးမြို့ကနေ သံဖြူဇရပ်ကို တက်လာတဲ့ စစ်ကား ၇ စီးကို ကွမ်ကြိုက်နဲ့ ကနင်ကမော့ရွာကြားမှာ ပထမအကြိမ် ချုံခို မိုင်းဆွဲပစ်ခတ်တိုက်ခိုက်ခဲ့ပြီး မနက် ၁၁ နာရီကျော်လောက်မှာတော့ သံဖြူဇရပ်မြို့ကနေ လမ်းကင်းလာတဲ့ စစ်ကားသေး ၁ စီးနဲ့ ဝဲခမီကျေးရွာနားမှာ ဒုတိယအကြိမ် ထိပ်တိုက်တွေ့ဆုံ ပစ်ခတ်ခဲ့သလို နေလယ် ၁ နာရီဝန်းကျင်မှာ ရေးမြို့ ကနေ သံဖြူဇရပ်ကို တက်လာတဲ့ စစ်ကား ၇ စီးကို ဘေးလမိုင်းရွာနားမှာ တတိယအကြိမ် ချုံခိုတိုက်ခိုက်နိုင်ခဲ့တယ်လို့ ထုတ်ပြန်ချက်က ဆိုပါတယ်။
တိုက်ခိုက်မှု သုံးခုမှာ စစ်ကောင်စီတပ်သား ၈ ယောက် သေဆုံးကာ အများအပြား ဒဏ်ရာ ရခဲ့တယ်လို့ သိရပါတယ်။
တိုက်ခိုက်မှု ၃ ကြိမ်အတွင်း ဒေသခံပြောက်ကျားအဖွဲ့တွေဘက်က ထိခိုက်ကျဆုံးမှုကိုတော့ ထုတ်ပြန်ချက်ထဲမှာ မဖော်ပြထားပါဘူး။
အခုလို သံဖြူဇရပ်-ရေးကားလမ်းပေါ်မှာဖြစ်ခဲ့တဲ့ မကြာခဏ တိုက်ခိုက်ခံရမှု၊ သေဆုံး ဒဏ်ရာမှုတွေနဲ့ ပတ်သက်လို့ စစ်ကောင်စီဘက်က ခုချိန်ထိ တစုံတရာ သတင်းထုတ်ပြန်တာ မရှိသလို သီခြား အတည်လို့လည်း မရခဲ့ပါဘူး။
မနေ့ကအဲဒီလမ်းပိုင်းမှာ ခရီးသွားခဲ့သူ တဦးက “စစ်တပ်နဲ့ PDF တွေ တိုက်ပွဲဖြစ်နေတယ် ကြားတယ်။ ခရီးသွားကားတွေ ပိတ်မိနေတယ်။ စစ်ကား ၂ စီးလောက် ပျက်စီးတာ မြင်ရတယ်။ ထိခိုက် သေဆုံးတာတော့ ရှိနိုင်တယ်။ လမ်းက ညလောက်မှ ပြန်ပြီးသွားလာလို့ရတယ်” ပြောပါတယ်။
သံဖြူဇရပ် - ရေး ကားလမ်းပေါ်ရှိ ပိန္နဲတော၊ ငှက်ပျောတောကျေးရွာနဲ့ အနီးအနားက ကျေးရွာတွေ၊ သံဖြူဇရပ် - ဘုရားသုံးဆေလမ်းပေါ်က ဇီးနှစ်ပင်၊ ဦးခွေး(ဒေါ်ယိမ်း)ရွာ ၊ရဲတံခွန် ကျေးရွာနဲ့ အနီးအနားရှိရာဘာခြံတွေနဲ့ ဂျပန်တောင်ခြေဝန်းကျင်က ရာဘာခြံတွေမှာ နေထိုင်ကြတဲ့ ဒေသခံ ၂၀ လောက် ပြီးခဲ့တဲ့ရက်တွေက ဖမ်းဆီးခံထားရပါတယ်။
သံဖြူဇရပ်-ရေး ကားလမ်းပေါ်က ဦးခွေး(ဒေါ်ယိမ်း) ကျေးရွာမှာ ရွာလုံးကျွတ်နီးပါး ထွက်ပြေး တိမ်းရှောင်နေရပြီး ရွာသားအများစုကတော့ ရွာကို မပြန်လာရဲကြသေးပါဘူး။
