မန္တလေးမြို့၊ ပြည်ကြီးတံခွန်မြို့နယ်ရှိ ကျွဲဆည်ကန်ကားကြီးဝင်းနားက  စစ်တပ်ပိုင် မြဝတီဘဏ်ခွဲရဲ့ ဝင်းအတွင်းမှာ  မေ ၁၃ ရက် ညနေ ၄ နာရီလောက်က ဗုံးပေါက်ကွဲခဲ့ပါတယ်။

ဗုံးပေါက်ကွဲမှုကြောင့် ဘဏ်နှစ်ထပ်အ​ဆောက်အအုံက မှန်ပြတင်းပေါက်ကွဲ ပျက်စီးခဲ့ပြီး လူ ထိခိုက်တာ မရှိဘူးလို့ သိရပါတယ်။

ဗုံးပေါက်ကွဲမှုဖြစ်ပြီး မကြာခင် အနီးဝန်းကျင်မှာ စစ်ကောင်စီတပ်သားတွေက ပြည်သူတွေရဲ့ ဆိုင်ကယ်တွေကို ပိတ်ဆို့စစ်ဆေးခဲ့တယ်လို့ အနီးပတ်ဝန်းကျင်ရှိ ပြည်သူတချို့က ဆိုပါတယ်။

ဇန်နဝါရီ ၁၈ ရက်ကလည်း မြဝတီဘဏ်ရှေ့က အတွင်းခြံစည်းရိုး သံတံခါးအနီးမှာ လက်လုပ်မိုင်း ပေါက်ကွဲခဲ့ပြီး လူထိခိုက်တာ မရှိဘူးလို့ သိရပါတယ်။

ရန်ကုန်တိုင်း၊ မင်္ဂလာဒုံမြို့နယ်၊ ပျဉ်းမပင်စက်မှုဇုန် အမှတ် ၃ လမ်းမမှာရှိတဲ့ စစ်တပ်ပိုင် မြန်မာဘီယာစက်ရုံကို မြောက်ပိုင်းခရိုင် ပြည်သူ့ကာကွယ်ရေးအဖွဲ့က ဧပြီ ၁၉ ရက် ညနေ ၄ နာရီလောက်မှာ ပစ်ခတ်တိုက်ခိုက်ခဲ့တယ်လို့ ရန်ကုန်တိုင်း စစ်ဒေသကွပ်ကဲရေးဌာန၊ သတင်းပြန်ကြားရေးနဲ့ စိတ်ဓာတ်စစ်ဆင်ရေးတာဝန်ခံက ပြောပါတယ်။

နန်းထိုက်အောင် စစ်ဆင်ရေးအရ စစ်ရေးပစ်မှတ်ဖြစ်တဲ့ စစ်တပ်ပိုင် မြန်မာဘီယာစက်ရုံကို ၄၀ မမ ဗုံးသီး ၂ လုံးနဲ့ ပစ်ခတ်တိုက်ခိုက်ခဲ့တာလို့လည်း အဲဒီတာဝန်ခံက ဒီဗွီဘီကို ပြောပါတယ်။

“ပင်မထုတ်လုပ်ရေးဘက်မှာတော့ တော်တော် ထိခိုက်ပျက်စီးသွားတယ်လို့ သိရတယ်။ လူထိခိုက်တာမျိုးတော့ မရှိဘူး။ အက်ဒမန်ဂိုး ထုတ်လုပ်တဲ့အခြမ်းရော မြန်မာဘီယာထုတ်တဲ့ အခြမ်းရော တော်တော်ထိသွားတယ်။ အဲ့နောက်ပိုင်း လုံခြုံရေး အဆမတန်မြှင့်ထားတယ်။”

နန်းထိုက်အောင် စစ်ဆင်ရေးကို ဧပြီ ၈ ရက်က စတင်ခဲ့တာဖြစ်ပြီး စစ်ကောင်စီရဲ့ အုပ်ချုပ်ရေး၊ စီးပွားရေးနဲ့ စစ်ရေးပစ်မှတ်တွေကို တိုက်ခိုက်ရှင်းလင်း ဆောင်ရွက်ခဲ့တဲ့ မစ်ရှင်ပေါင်း ၃၄ ခုထိရှိပြီလို့ ဆိုပါတယ်။

နန်းထိုက်အောင် စစ်ဆင်ရေးဟာ အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနရဲ့ မြန်မာနိုင်ငံတောင်ပိုင်း မြို့ပြစစ်ဆင်ရေးဖြစ်ပြီး အကြမ်းစစ်ကောင်စီနဲ့ ပတ်သက်ဆက်နွှယ်နေတဲ့ ပစ်မှတ်အကုန်လုံးကို တိုက်ခိုက်သွားမယ်လို့ ရန်ကုန်တိုင်းစစ်ဒေသ ကွပ်ကဲရေးဌာန သတင်းပြန်ကြားရေးနဲ့ စိတ်ဓာတ်စစ်ဆင်ရေးတာဝန်ခံက ဒီဗွီဘီကို ပြောပါတယ်။