ဧရာဝတီတိုင်း၊ ကန်ကြီးထောင့်မြို့နယ်မှာ စက်တင်ဘာလ ၂၁ ရက် ညပိုင်းက မြို့ပြပြောက်ကျား တော်လှန်ရေးတပ်ဖွဲ့ရဲ့ စခန်းငယ် တစ်ခုကို စစ်တပ်က လာရောက်ပစ်ခတ်ခဲ့တယ်လို့ သိရပါတယ်။

မဂူကျွန်းကျေးရွာအနောက်ဘက် တောထဲမှာ စခန်းချထားတဲ့ မြို့ပြပြောက်ကျား တော်လှန်ရေးတပ်ဖွဲ့ဝင်တွေကို ည ၈ နာရီကျော်လောက်မှာ ပိတ်ဆို့ပစ်ခတ်ခဲ့တာလို့ မြို့ပြပြောက်ကျားတပ်ဖွဲ့ရဲ့ တာဝန်ရှိသူ တဦးက ဒီဗွီဘီကိုပြောပါတယ်။

" စစ်တပ်က အင်အား ၃၀ လောက်နဲ့ လာဝိုင်းပစ်တာ ကျနော်တို့ ဘက်ကတော့ ပြန်မပစ်ဘူး၊ မိုင်း ၂ လုံးခွဲလိုက်တယ်။ တပ်ကူတွေလွှတ်ပြီး ဖောက်ထွက်နိုင်ခဲ့တယ်''လို့ ပြောပါတယ်။

စစ်တပ်ကလာဝိုင်းတဲ့အချိန်မှာ မိုင်း ၂ လုံးခြောက်လှန့်ဖောက်ခွဲခဲ့ပြီးနောက်  တပ်ကူတွေရောက်လို့ ထွက်ဖို့ပြင်ချိန်မှာ စစ်တပ်ဘက်က သေနတ်နဲ့ နောက်က လိုက်လံပစ်ခတ်ခဲ့ပေတယ်လို့လည်း ဆိုပါတယ်။ ပစ်ခတ်တိုက်ခိုက်မှုတွေကြားမှာ ပြောက်ကျားတပ်တွေ အထိခိုက်မရှိဖောက်ထွက်နိုင်ခဲ့ တယ်လို့ သိရပါတယ်။

ကန်ကြီးထောင့်မြို့နယ်ထဲမှာ မြို့ပြပြောက်ကျားတပ်ဖွဲ့စခန်းကို စစ်ကောင်စီတပ်ကပ လာဝိုင်းပြီးပစ်ခတ်တိုက်ခိုက်တာ  ပထမဆုံးအကြိမ်လည်းဖြစ်ပါတယ်။

စစ်ကိုင်းတိုင်း၊ မြောင်မြို့နယ်၊ ချောင်းဇင်းကျေးရွာကို စက်တင်ဘာလ ၆ ရက်မနက်အစောပိုင်းက စစ်ကောင်စီတပ်တွေဟာ ချင်းတွင်းမြစ်ကြောင်းက စစ်ကြောင်းတစ်ခု၊ ဧရာဝတီမြစ်ကြောင်းက စစ်ကြောင်းတခုနဲ့ဝိုင်းညှပ်ပြီး ရွာအတွင်းကို သေနတ်ပစ်ခတ်စီးနင်းဝင်ရောက်တဲ့အတွက် ရွာသား တွေ အသက်လုထွက်ပြေးနေကြရတယ်လို့ ဒေသခံတွေက ပြောပါတယ်။

“စစ်တပ်က ကျနော်တို့ရွာကို နှစ်ဖက်ညှပ်ပြီး သေနတ်တွေ ပစ်ခတ်ဝင်လာကြတာ၊ ကျနော်တို့တောင် မနည်းအသက်လု ထွက်ပြေးလာကြရတယ်။ မြစ်ထဲဆင်းပြေးတဲ့သူတွေကို လည်း လိုက်ပစ်တယ်။ ထိခိုက်ဒဏ်ရာရတာတွေလည်း ရှိတယ်၊ ဖမ်းဆီးခံရတာတွေလည်း ရှိတယ်။ အခု ထိခိုက် သေဆုံး ဒဏ်ရာရ ဖမ်းဆီး ခံရသူစားရင်းကတော့ ဘာမှ အတည်မပြုနိုင်သေးဘူး” လို့ ဒေသခံတစ်ဦးက ပြောပါတယ်။

လတ်တလော ‌ဒေသခံရွာသားတွေဟာ အသက်လုထွက်ပြေးနေကြရပြီး၊ သက်ကြီးရွယ်အို အချို့နဲ့ ကလေးငယ်အချို့သာ ရွာအတွင်းမှာ ကျန်ရစ်ခဲ့တာဖြစ်ပါတယ်။

မြောင်မြို့နယ်၊  ချောင်းဇင်းကျေးရွာအနီးက PDF စခန်းတခုကို ပြီးခဲ့တဲ့မေလကတည်းက စစ်တပ်ကဝင်စီးပြီး လက်နက်တွေ သိမ်းဆည်းသွားတယ်လို့ သိရပါတယ်။