ငါး ဆိုတာ ရေသတ္တဝါဖြစ်တယ်။ ငါးဟာ ရေထဲမှာသာ အသက်ရှင်နိုင်ပြီး ကုန်းပေါ်အတင်ခံလိုက်ရရင် ကြာကြာအသက်မရှင်နိုင်တာ အားလုံးသိပြီးဖြစ်တယ်။ ရေထဲကငါးဟာ အကြောင်းတခုခုကြောင့် ရေထဲမှာမနေနိုင်ဘဲ ကုန်းပေါ်အတင်ခံလိုက်ရပြီဆိုရင် အသက်ရှူစရာ အောက်ဆီဂျင်မရနိုင်တော့ ပါးစပ်ကလေး ဟစိ ဟစိဖြစ်ပြီး မကြာခင် အသက်ဆုံးပါးရမြဲ ဖြစ်ပါတယ်။

အဲ့ဒီလိုပါပဲ၊ ပြည်သူ့ရိက္ခာလစာကိုယူပြီး ရှင်သန်ရတဲ့ စစ်တပ်ဟာ မိဘပြည်သူအပေါ် ကျေးဇူးကန်းလို့ သတ်ဖြတ်ရမ်းကားလာတဲ့အခါ ရေနဲ့တူတဲ့ ပြည်သူတွေ ဒေါသဆူပွက်လာတာမို့ ပူလောင်တဲ့ရေပူထဲ ဆက်မနေနိုင်လို့ ခုန်ထွက်ရင်း ကုန်းပေါ်ရောက်သွားတဲ့ငါးနဲ့ ပမာတူပါတယ်။ ပြည်သူကလက်မခံလို့ ရပ်တည်ရှင်သန်စရာ ရေခံမြေခံ ပျောက်ဆုံးရတဲ့ အကြမ်းဖက်စစ်တပ်ဟာ ကုန်းခေါင်ခေါင်ပေါ်ရောက်ရတဲ့ငါးလို ကြာကြာအသက်မရှင်နိုင်ပါဘူး။

အာဏာသိမ်း စစ်ကောင်စီတပ်က ထိုင်း-မြန်မာနယ်စပ်မှာရှိတဲ့ ကရင်ပြည်နယ်၊ မြဝတီမြို့နယ်မှာရှိတဲ့ ကရင်အမျိုးသားအစည်းအရုံး - KNU တပ်မဟာ ၆ ထိမ်းချုပ်ထားတဲ့ နယ်မြေတွေကို စစ်ရေးအရ သိမ်းပိုက်နိုင်ဖို့အတွက် ကမ်းရိုးတန်းဒေသ တိုင်းစစ်ဌာနချုပ် (ကရခ) မှ အမှတ် ၁၃ နှင့် အမှတ် ၂၀ စစ်ဆင်ရေးကွပ်ကဲမှုဌာနချုပ် စကခ ၁၃၊ စကခ ၂၀၊ သထုံမြို့အခြေစိုက် တပ်မ ၄၄ လက်အောက်က တပ်ရင်း ၁၈ ရင်းလောက်နဲ့ ၂၀၂၁ ခုနှစ်၊ ဒီဇင်ဘာလကစပြီး ၁၀ လကြာ ထိုးစစ်ဆင်ခဲ့ရာမှာ လက်ရှိအခြေအနေမှာတော့ တပ်ရင်း ၈ ရင်းစာ ပမာဏရှိတဲ့ စစ်ကောင်စီတပ်ဖွဲ့ဝင် ၁,၀၀၀ ကျော် သေကျေ၊ ထွက်ပြေး၊ စစ်သုံ့ပန်းအနေနဲ့ အဖမ်းခံရတာတွေ၊ CDM ပြုလုပ်မှု‌တွေ ပေါ်ပေါက်ခဲ့တာကြောင့် အဲ့ဒီလောက် အင်အားပြုန်းတီးခဲ့ကြောင်း စစ်ဘက်သတင်းရင်းမြစ်တွေထံမှ သိခဲ့ရပါတယ်။

♦️ အိုနာကျိုးကန်းတပ်မတော် ♦️

တိုက်ပွဲမှာ ကျဆုံး‌ရတာ များပြားနေတဲ့အပြင် ပြည်သူလူထုကို မတရားသတ်ဖြတ်နေတာ သိနေကြတာမို့ အကြမ်းဖက်စစ်တပ်ထဲကို ဘယ်သူမှ အသက်အသေခံဖို့ တပ်သားသစ် မဝင်ရောက်လိုတော့တာမို့ အကြံကုန် ဂဠုန်ဆားချက် ဆိုသလို လက်ပြတ်ခြေပြတ် ပင်စင်စား စစ်မှုထမ်းဟောင်းတွေကို မင်းအောင်လှိုင်ဟာ သူ့အာဏာတည်မြဲရေးအတွက် အသုံးချဖို့ ကြိုးစားလာခဲ့ပြန်ပါတယ်။

ဩဂုတ်လ ၁၈ ရက်နေ့ စစ်ကောင်စီရဲ့ လုံခြုံရေး၊ တည်ငြိမ်အေးချမ်းရေးနဲ့ တရားဥပဒေ စိုးမိုးရေး အစည်းအဝေး အမှတ်စဉ် ၅/၂၀၂၂ မှာ မင်းအောင်လှိုင်က နေပြည်တော်မှာ စစ်မှုထမ်းဟောင်း‌တွေ ဦးဆောင်တဲ့ တပ်ဖွဲ့တွေ ဖွဲ့စည်းပြီး ရဲ၊ စစ်တပ်နဲ့အတူ ပေါင်းစပ် လုံခြုံရေးယူဖို့ ညွှန်ကြားခဲ့ပါတယ်။

ဒါကြောင့် စစ်မှုထမ်းဟောင်းတွေကို ကိုယ်ပိုင်အမှတ် ပြန်လည်ထုတ်ပေးခဲ့ရပြီး လုံခြုံရေးအတွက် ပူးပေါင်းဆောင်ရွက်ခိုင်းရုံမက စစ်မှုထမ်းဟောင်းတွေရဲ့ ဇနီးနဲ့ သားသမီး‌တွေကိုပါ အရန်အင်အားအဖြစ် ကိုယ်ပိုင်အမှတ်တွေ ထုတ်ပေးလို့ စာရင်းကောက်ယူမှုများ ရှိနေပြီး စစ်မှုထမ်းဟောင်းတွေ ဦးဆောင်တဲ့ တပ်ဖွဲ့တွေကိုလည်း ဖွဲ့စည်းနေရပြီ ဖြစ်ပါတယ်။

♦️ စစ်သားမိန်းမ‌တွေနဲ့ စစ်သားကလေးတွေ ကင်းစောင့်ကြရ ♦️

ကရင်ပြည်နယ်ကို ထိုးစစ်ဆင်ခဲ့ရာမှာ မအောင်မြင်တဲ့အပြင် အထိနာပြီး အကျအဆုံး များပြားခဲ့ရတာကြောင့် သထုံမြို့မှာ အခြေစိုက်တဲ့ တပ်မ ၄၄ လက်အောက်က တပ်ရင်းများစွာနဲ့ အရှေ့တောင်တိုင်းစစ်ဌာနချုပ် (ရတခ) လက်အောက်ရှိ မွန်ပြည်နယ်နဲ့ ကရင်ပြည်နယ်အတွင်းမှ နောက်တန်းတပ်ရင်း‌တွေ ကင်းစောင့်မယ့်စစ်သား မရှိတာမို့ စစ်တပ်အရာရှိတွေက တပ်ရင်းမှ စစ်သားမိန်းမ‌တွေကို သေနတ်ပေးပြီး ကင်းရုံတွေမှာ ၂၄ နာရီ အလှည့်ကျ ကင်းစောင့်ခိုင်းနေရပြီ ဖြစ်ပါတယ်။

အဲ့ဒီလို ကင်းစောင့်ခိုင်းရာမှာ စစ်အကြမ်းဖက်ကောင်စီဟာ ကလေးအမေတွေကိုပါ မချန်ဘဲ ကင်းစောင့်ခိုင်းတဲ့အတွက် စစ်သားမိန်းမ‌တွေက သူတို့ရဲ့ကလေးတွေကိုပါ ကင်းရုံ‌တွေထဲထိ ခေါ်ဆောင်လို့ သေနတ်ကိုင် ကင်းစောင့်နေရကြောင်း သိရပါတယ်။ လူကြီးတွေ ကင်းမစောင့်နိုင်ရင် ကလေးတွေကို လူစားထိုး ကင်းစောင့်ခိုင်းစေရလောက်အောင် တပ်ပျက်နေပြီ ဖြစ်ပါတယ်။

စစ်သားက ၃ ယောက်နဲ့ စစ်သားမိန်းမ ၅ ယောက်နှုန်း၊ တရက်ကို ၈ ယောက်နှုန်းနဲ့ ကင်းချိန် ၃ နာရီစီ စောင့်ရတယ်လို့ ဆိုပါတယ်။ တပ်ရင်းရဲ့ အိမ်ထောင်သည်လိုင်းခန်းက ရှိရှိသမျှ ရဲမေတွေ အကုန်အလှည့်ကျ စောင့်ကြရပြီး အမေ၊ မိဘတွေ ကင်းမစောင့်နိုင်ရင် သူတို့ကိုယ်စား သေနတ်ကိုင်နိုင်တဲ့ ကလေးတွေ လွှတ်ပေးရတယ်လို့ ဆိုပါတယ်။

တကယ်တော့ အကြမ်းဖက်စစ်တပ်ဟာ သူတို့ရဲ့ တပ်သားစုဆောင်းရေးအတွက် ဒီဝါဒဖြန့် ယန္တရားတွေနဲ့ မလုံလောက်တော့လို့ ငွေကြေးသုံးစွဲ ဝယ်ယူနေခဲ့ရတာ အာဏာသိမ်းမှု ဖြစ်စဉ်တွေ မစတင်ခင်ကတည်းကပါပဲ။

တပ်သားသစ် ၁ ယောက်နှုန်းက ၂၀၂၂ ခုနှစ် ပထမလေးလပတ် ဇန်နဝါရီလမှာ ၅ သိန်း လောက်ကနေ ဖေဖော်ဝါရီလမှာ ၇ သိန်း၊ မတ်လရောက်တော့ ၁၀ သိန်းဖြစ်ပြီး ဧပြီလမှာ လုံးဝ တပ်သားသစ်မရခဲ့ရင် ၁၅ သိန်းလောက်အထိ ဖြစ်သွားပြီး “အခု အဲဒီထက်ကို နှစ်ဆလောက် တက်သွားတယ်။ သိန်း ၂၀ နဲ့ ၃၀ ကြားလောက် ပေးရတယ်လို့ ကြားတယ်။ သိန်း ၃၀ လောက် ပေးတာတောင် တပ်သားသစ်တယောက်ကို တပ် ၃ တပ်လောက်က ဝိုင်းလုနေရတဲ့ အနေအထား ဖြစ်သွားပြီဗျ” လို့ CDM ဗိုလ်ကြီး လင်းထက်အောင်က ပြောတဲ့သတင်းကိုလည်း အင်တာနက်သတင်းတွေမှာ ဖတ်ခဲ့ရပါတယ်။

အာဏာမလုခင်တုန်းကတော့ အလုပ်အကိုင်ရှားပါးတဲ့ အညာဒေသနဲ့ ရခိုင်ပြည်နယ်က ဒေသခံတွေကို ဝါဒဖြန့်ချိရေး၊ ငွေကြေးအပါအဝင် နည်းလမ်းအမျိုးမျိုးနဲ့ စွဲဆောင်ခဲ့တာကြောင့် အဲဒီဒေသတွေဟာ မြန်မာ့စစ်တပ်အတွက် တပ်သားသစ်တွေကို အများဆုံးရရှိတဲ့ ဒေသတွေ ဖြစ်ခဲ့ဖူးပါတယ်။

အာဏာသိမ်းပြီးနောက် ပြည်သူလူထုကို ပြန်သတ်၊ လေယာဉ်နဲ့ဗုံးကြဲ၊ ရွာတွေမီးနဲ့ရှို့ စတဲ့ အကြမ်းဖက်လုပ်ရပ်တွေ လုပ်ကိုင်လာပြီး နောက်ပိုင်းမှာတော့ စစ်တပ်ထဲကို ဝင်သူ မရှိသလောက်ကို ဖြစ်နေခဲ့ပါပြီ။

ဒီဆောင်းပါးကို နိဂုံးချုပ်ရရင် အကြမ်းဖက်စစ်ဓားပြတပ်ဟာ တနိုင်ငံလုံးအနှံ့ စစ်မျက်နှာတိုင်းမှာ အရေးနိမ့်နေပြီး အကျအဆုံးများ၊ လက်နက်ချအဖမ်းခံ၊ CDM လုပ်ပြီး ပြည်သူဘက် ကူးပြောင်းသူများလာလို့ စစ်သည်အင်အား အနုတ်လက္ခဏာ ဆောင်လာပေမဲ့ အင်းအားဖြည့်စရာ တပ်သားသစ်အဝင်လည်း မရှိသလောက် အလွန်အင်မတန် နည်းပါးသွားပြီ ဖြစ်ပါတယ်။ ဒါကြောင့်လည်း ကြံရာမရတဲ့အဆုံး အငြိမ်းစားစစ်သားအိုတွေ၊ ခြေပြတ်လက်ပြတ် အိုနာကျိုးကန်းတွေကို ပြန်ခေါ်ယူရတဲ့အဆင့်ကို ရောက်ခဲ့ရတာပါပဲ။

ပြည်သူက လက်မခံ‌တော့တာမို့ တပ်သားသစ်မရနိုင်ဘဲ သွေးသစ်မလောင်းနိုင်တဲ့ စစ်တပ်ဆိုတာ ဖုတ်လိုက်ဖုတ်လိုက်ဖြစ်ပြီး အသက်ငင်နေတဲ့ ကုန်းပေါ်တင်သွားတဲ့ငါးလို ဖြစ်နေတာ အားလုံးမြင်တွေ့နေကြရပါတယ်။ ပြည်သူလူထုဆိုတဲ့ ရေကလည်း ပွက်ပွက်ဆူလို့ ပူနေတော့ ရေထဲပြန်ဆင်းလို့မရ၊ ပြည်သူနဲ့ကင်းကွာပြီး ကုန်းပေါ်မှာလည်း ကြာကြာအသက်မရှင်နိုင်တဲ့ဘဝ အဖြစ်ဆိုးကို ရောက်ရတာဟာ မင်းအောင်လှိုင်နဲ့ အပေါင်းအပါ လက်ပါး‌‌စေ စစ်ဗိုလ်ချုပ်တသိုက် လောဘမထိန်းနိုင်ဘဲ ဆင်ခြင်တုံတရား ကင်းမဲ့စွာ ပြည်သူ့အာဏာလုယူပြီး ကိုယ့်သေတွင်း ကိုယ်တူးခဲ့ကြလို့ပဲ မဟုတ်ပါလား။

မင်းကောင်းချစ်

လူ့အဖွဲ့အစည်းတွေမှာ အကျိုးစီးပွား ကွဲပြားမှု၊ လောဘ၊ ဒေါသ၊ အတ္တ၊ မာန်မာန အာဃာတ စတာတွေကြောင့် ပဋိပက္ခအမျိုးမျိုး ဖြစ်ပေါ် တွန်းတိုက်မိလေ့ရှိကြတယ်။ ဆွေမျိုးစုအတွင်း ပဋိပက္ခ၊ လူမျိုးစုတွင်းပဋိပက္ခ၊ ဒေသတွင်းပဋိပက္ခ၊ နိုင်ငံတွင်း ပြည်တွင်းပဋိပက္ခ၊ နိုင်ငံအချင်းချင်း ပဋိပက္ခ၊ ကမ္ဘာလုံးဆိုင်ရာ ပဋိပက္ခ စတာတွေဟာ လူ့သမိုင်းတလျှောက်လုံးမှာ ဖြစ်ပွားခဲ့ကြပါတယ်။

အဲဒီလို ပဋိပက္ခအမျိုးမျိုးကို လူသားတွေဟာ တခါတရံ သံတမန်နည်းနဲ့ တွေ့ဆုံဆွေးနွေး ဖြေရှင်းတတ်သလို တခါတရံ လက်နက်နဲ့လည်း ဖြေရှင်းတတ်ကြပါတယ်။ သံတမန်နည်းနဲ့ တွေ့ဆုံဆွေးနွေး ဖြေရှင်းနိုင်ရင်တော့ အသေအပျောက် အထိအခိုက် ဆုံးရှုံးမှုနည်းပြီး ပဋိပက္ခကို ကျော်လွှားနိုင်ကြပါတယ်။ ဒီလိုနည်းလမ်းနဲ့ အဖြေရှာနိုင်ဖို့ဆိုတာ နှစ်ဖက်အုပ်စု ခေါင်းဆောင်တွေနဲ့ နောက်လိုက်တွေမှာ လူသားစိတ်ဓာတ်ရှိနေပြီး ကိုယ်ကျင့်သီလကောင်း ရှိမှသာ အပေးအယူ အလျှော့အတင်း လုပ်နိုင်ပြီး ညှိနှိုင်းဆွေးနွေး အဖြေထွက်နိုင်တာ ဖြစ်ပါတယ်။

အုပ်စုတစုက ခေါင်းဆောင်နဲ့ နောက်လိုက်တွေက သူတို့အကျိုးစီးပွား၊ မာန်မာန၊ လောဘ ဒေါသတွေ မလျှော့နိုင်ဘူး၊ ကိုယ်ကျင့်သီလ ဆိုးယုတ်နေမယ်၊ အမြဲတမ်း ကိုယ့်ဘက်ကပဲ အသာစီးယူချင်နေမယ်၊ လက်နက်အားကိုး ဗိုလ်ကျချင်တဲ့ စရိုက်ဆိုးကို မပြင်နိုင်ရင်တော့ စားပွဲဝိုင်းထိုင် ဆွေးနွေးရင် ဘယ်တော့မှ မအောင်မြင်တတ်ဘဲ မြန်မာနိုင်ငံမှာ နှစ်ပေါင်း ၇၀ ကျော် ကြာမြင့်ခဲ့ပေမဲ့ မအောင်မြင်တဲ့ ငြိမ်းချမ်းရေးဆွေးနွေးပွဲတွေလို ဖြစ်နေခဲ့မှာပဲ ဖြစ်ပါတယ်။

ဒါကိုပဲ ကိုယ်ထွေးတဲ့တံထွေးကို အမြဲပြန်မျိုချပြီး ဘယ်တုန်းကမှ ကတိမတည်တတ်တဲ့ မင်းအောင်လှိုင်နဲ့ စစ်ဓားပြတသိုက် ဟန်ပြ‌ခေါ်တဲ့ ငြိမ်းချမ်းရေး ဆွေးနွေးပွဲကို ၂၀၂၂ ခုနှစ် မေလ ၂၀ ရက်နေ့မှာ RCSS/SSA ဥက္ကဋ္ဌ ယွက်ဆစ်တို့အဖွဲ့ဟာ ပထမဆုံးအဖွဲ့အဖြစ် တွေ့ဆုံဆွေးနွေးခဲ့ကြပါတယ်။

ပြည်သူလူထုဆန္ဒကို ဆန့်ကျင်ပြီး အကြမ်းဖက်စစ်ကောင်စီရဲ့ အမည်ခံ ငြိမ်းချမ်းရေး ဆွေးနွေးပွဲကို တက်ရောက်ခဲ့ကြတဲ့ EAO အဖွဲ့အချို့က‌တော့ တနိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ် (NCA) မှာ လက်မှတ်ရေးထိုးထားတဲ့ ရခိုင်ပြည်လွတ်မြောက်ရေးပါတီ (ALP)၊ တိုးတက်သော ဗုဒ္ဓဘာသာ ကရင်အမျိုးသားတပ်ဖွဲ့ (DKBA)၊ KNU/KNLA-PC၊ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)၊ NMSP၊ LDU၊ RCSS အဖွဲ့ ၇ ဖွဲ့တို့ဖြစ်ပြီး NCA မှာ လက်မှတ်မထိုးထားတဲ့ UWSA၊ NDAA၊ SSPP အဖွဲ့ ၃ ဖွဲ့လည်း စာရင်းပေးခဲ့တာ ဖြစ်ပါတယ်။

ကိုယ့်ပြည်သူကို ပြန်သတ်၊ ရွာလုံးကျွတ် မီးရှို့၊ အရပ်သား စစ်ဘေးရှောင်ပြည်သူတွေကို လေယာဉ်နဲ့ ဗုံးကြဲတိုက်ခိုက်ပြီး စစ်ရာဇဝတ်မှု‌ပေါင်း မရေတွက်နိုင်အောင် ကျူးလွန်ခဲ့တာမို့ နိုင်ငံရေးစားပွဲဝိုင်းနဲ့ မထိုက်တန်တော့တဲ့ မကောင်းဆိုးဝါးစစ်တပ်နဲ့ ဆွေးနွေးအဖြေရှာလိုတဲ့ လူပုဂ္ဂိုလ်၊ နိုင်ငံရေးပါတီ၊ လက်နက်ကိုင်အဖွဲ့အစည်းဆိုတာ အကျိုးမဲ့တာလုပ်ချင်တဲ့ အခါခါသေခဲ့ရတာကို ပျဉ်ဖိုးနားမလည်တဲ့ လူမိုက်လူအန္ဓမဟုတ်ရင် ကိုယ်ကျိုးရှာသမားတွေ၊ စစ်နဲ့လုပ်စား၊ နိုင်ငံရေးနဲ့ လုပ်စားကြတဲ့ သမိုင်းအညစ်အကြေးတွေပဲ ဖြစ်မှာပါ။

နိုင်ငံနဲ့ ပြည်သူတွေ ငြိမ်းချမ်းဖို့ ဆွေးနွေးပွဲတက်ရောက်လာသူတွေမှာ အရေးအကြီးဆုံး အချက်က ရိုးသားမှုရှိဖို့နဲ့ နိုင်ငံသူနိုင်ငံသားတွေနဲ့ တိုင်းပြည်အပေါ် စေတနာထားနိုင်ဖို့ပဲ ဖြစ်ပါတယ်။ ကိုယ်ကျိုးရှာ ဖက်ဆစ်စစ်အုပ်စုဟာ အထက်ပါအချက်တွေ လုံးဝမရှိတာကို အောက်မှာ ဖော်ပြထားတဲ့ သာဓကတွေက သက်သေထူနေပါတယ်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က စလို့ ၂၀၂၂ ခုနှစ် ဇူလိုင် ၁၅ ရက်နေ့အထိ လက်နက်ကိုင် ပဋိပက္ခတွေကြားမှာ စစ်ကောင်စီတပ်ဟာ တိုက်ပွဲမဖြစ်ဘဲ ဝင်ရောက်စီးနင်း မီးရှို့ခဲ့တာကြောင့် ဆုံးရှုံးခဲ့ရတဲ့ အများပြည်သူလူထုရဲ့ နေအိမ်နဲ့ ဘာသာရေးအဆောက်အအုံ‌တွေ အပါအဝင် အဆောက်အဦ ၂၈,၀၀၀ ကျော် ရှိလာပြီလို့ ISP-Myanmar က သတင်းထုတ်ပြန်ခဲ့ပါတယ်။

ဒီကနေ့ သတင်းမီဒီယာခေတ်ကြီးထဲမှာ ဂြိုဟ်တုကနေ ရိုက်ယူထားတဲ့ ဗွီဒီယိုနဲ့ ဓာတ်ပုံအထောက်အထားတွေ၊ အင်တာနက်ဆက်သွယ်ရေးခေတ်ထဲမှာ အလွန်လျင်မြန်စွာ ရရှိနိုင်တဲ့ ဗွီဒီယိုနဲ့ ဓာတ်ပုံအထောက်အထား သန်းချီရှိနေတာ သိပါလျက်နဲ့ စစ်ဓားပြခေါင်းဆောင် မင်းအောင်လှိုင်ဟာ ကမ္ဘာ့ကုလသမဂ္ဂ အထူးကိုယ်စားလှယ် နိုလင်းဟေဇာနဲ့ တွေ့ဆုံပြီး ဩဂုတ်လ ၁၉ ရက် ညပိုင်း သတင်းထုတ်ပြန်ခဲ့တဲ့အချိန်မှာ ‌ကျေးရွာနေအိမ်များကို မီးမရှို့ဘူးလို့ အရှက်မဲ့စွာ ဗြောင်ငြင်းဆိုခဲ့တာ ဖြစ်ပါတယ်။

မကွေးတိုင်း၊ ပေါက်မြို့နယ် မြောက်ပိုင်းမှာရှိတဲ့ ညောင်ရင်း၊ စသိန်း၊ ဂွေးဂုံ ကျေးရွာတွေကို အကြမ်းဖက် စစ်တပ်ကနေ သြဂုတ်လ ၂၀ ရက်နေ့မှာ မီးရှို့ဖျက်ဆီးခဲ့ပြီး ပြည်သူပိုင် နေအိမ် ၂၄ လုံး မီးလောင်ပြာကျ‌စေခဲ့ပါတယ်။

ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ် နိုလင်းဟေဇာနဲ့ တွေ့ဆုံနေတဲ့အချိန်အတွင်း တွေ့ဆုံပြီးချိန်မှာပါ ပြည်သူလူထုကို အသတ်မပျက်၊ ရွာမီးရှို့မပျက်၊ လူ့ဂုဏ်သိက္ခာကို စော်ကားမပျက်၊ လူ့အခွင့်အရေးကို ချိုးဖောက်မှုမပျက်ဘဲ တကမ္ဘာလုံးကို ပုဆိုးလှန်ပြတဲ့ မကောင်းဆိုးဝါးတွေဟာ နိုင်ငံရေးစားပွဲဝိုင်းနဲ့ လုံးဝမထိုက်တန်တော့တာ သေချာသထက် သေချာခဲ့ပြီမို့ ပြည်တွင်းပြည်ပ နိုင်ငံတကာက ဝိုင်းဝန်းဆုံးမ အပြစ်ပေးဖို့ကလွဲလို့ နည်းလမ်းမရှိတော့ပါဘူး။

ကောင်းကောင်းမွန်မွန် ဖျောင်းဖျလို့မရနိုင်တဲ့ အလွန်ရိုင်းစိုင်းယုတ်ညံ့တဲ့ မကောင်းဆိုးဝါး‌ တိရစ္ဆာန်တွေဆိုတာ မြတ်စွာဘုရားရှင်ကို မြင်းထိန်းသည်က ပြောပြခဲ့တဲ့ မြင်းထိန်းနည်း ၄ မျိုးထဲက နောက်ဆုံးနည်းလမ်းအရ ကိစ္စတုံးပစ်ရတဲ့ စတုတ္ထနည်းသာ ကျန်ပါတော့တယ်။

မြန်မာနိုင်ငံမှာ စစ်အာဏာရှင်စနစ်ဟာ ဂိတ်ဆုံးရောက်နေပြီး မကြာခင် ပြည်ဖုံးကားချခံရတော့မှာ ဖြစ်ပါတယ်။ တိုင်းပြည်ရဲ့ သမိုင်းဇာတ်ခုံပေါ်မှာ ဘယ်သူတွေက ပြည်သူလူထုနဲ့အတူ ရပ်တည်ခဲ့ကြတယ်၊ ဘယ်သူတွေက ပြည်သူလူထုကို ငရဲတွင်းချခဲ့ကြတဲ့ အဓမ္မဝါဒီ စစ်ဓားပြတွေကို သက်ဆိုးရှည်အောင် ဝိုင်းရံပူးပေါင်းခဲ့ကြတယ်ဆိုတာ မီးရောင်အောက်မှာ ထင်ထင်ရှားရှား မြင်တွေ့ပြီးခဲ့ကြပါပြီ။

လူ့အဖွဲ့အစည်းက လက်မခံတော့တဲ့ စစ်အခွင့်ထူးခံစနစ်ဆိုးရဲ့ သမိုင်းနိဂုံး ကားလိပ်ချချိန်နီးပြီမို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြောခဲ့သလို—

“သမိုင်းဆိုတာ မျက်နှာမလိုက်ဘူး။ ဘယ်သူမှန်တယ်၊ ဘယ်သူမှားတယ်၊ ဘယ်သူတွေ ဘယ်လို ရပ်တည်တယ်၊ ဘယ်သူတွေ ဘယ်လိုဖောက်ပြန်တယ် ဆိုတာတွေကို အားမနာစတမ်း မှတ်တမ်းတွေ ချန်ထားခဲ့ပါလိမ့်မယ်။”

မင်းကောင်းချစ်