ကရင်ပြည်နယ်၊ မြဝတီမြို့နယ်၊ ဖလူးကြီးရွာ အမှတ် (၄) ရပ်ကွက်မှာ မတ်လ ၂၃ ရက်က ဒေသခံ ဆယ်ကျော်သက်လူငယ်တယောက်ဟာ စစ်ပွဲလက်ကျန် မပေါက်ကွဲသေးတဲ့ လက်နက်ကျည်ဖူးတခုကို ကိုင်ပြီး ကစားနေစဉ် လက်ထဲမှာ ပေါက်ကွဲလို့ နေရာမှာတင် ပွဲချင်းပြီး သေဆုံးသွားပါတယ်။
ပေါက်ကွဲသွားတဲ့ အဆိုပါ (၇၉) ကျည်ဖူးဟာ စစ်ကောင်စီနဲ့ KNLA ပူးပေါင်းတပ်တို့မှ တိုက်ပွဲတွင်း ပစ်ခတ်ရာက ကျန်ခဲ့တဲ့ ကျည်ဆန်ဖြစ်ပြီး သေဆုံးသွားသူကတော့ သက် ၁၅ နှစ်အရွယ် ရွာသား စောကြေးဝါး ဖြစ်ပါတယ်။
ဖလူးဒေသမှာ စစ်ကောင်စီတပ်တွေရဲ့ ထိုးစစ်ဆင် ကျူးကျော်မှုကြောင့် ပြီးခဲ့တဲ့ ဒီဇင်ဘာလကတည်းက တိုက်ပွဲတွေဖြစ်ပွားခဲ့ရာမှာ ဒေသခံပြည်သူတွေ အခုချိန်ထိ နေအိမ်တွေကို မပြန်နိုင်သေးဘဲ တိမ်းရှောင်ခိုလှုံနေကြရပါတယ်။
မတ်လ ၂၃ ရက်ဒီကနေ့မှာတော့ စစ်ဘေးရှောင် ပြည်သူတွေ အားလုံး မိမိအိမ်နေရာဒေသကို ပြန်လည်နေထိုင်နိုင်ရေးအတွက် BGF၊ DKBA နဲ့ KNU အုပ်ချုပ်ရေးပိုင်းဆိုင်ရာ တာဝန်ရှိသူတွေ အစည်းဝေးပြုလုပ်ခဲ့ပါတယ်။
ဒီအစည်းအဝေးမှာတော့ ဖလူးလေး ဖလူးကြီးနဲ့ မြန်မာထိုင်းနယ်စပ် ကျေးရွာတွေမှာ တိုက်ပွဲ လက်ကျန် မပေါက်ကွဲသေးတဲ့ ကျည်ဆန်တွေ မြေအောက်မိုင်းတွေကို မတ်လ ၂၄ မနက်ဖန် စတင်ရှင်းလင်းသွားဖို့ ဆုံးဖြတ်ချက်ချခဲ့တယ်လို့ သိရပါတယ်။
ကရင်ပြည်နယ်မှာ စစ်ကောင်စီရဲ့ကျူးကျော် တိုက်ပွဲကြောင့် ပြည်သူ သိန်းချီ စစ်ဘေးရှောင်နေရသလို မတ် ၂၁ ရက်က KNLA ၊ KNDO ပူးပေါင်းတပ်တွေက မြဝတီခရိုင် ဝေါလေမြိုင်မြို့နယ်ခွဲရှိ စစ်ကောင်စီရဲ့ မော်ခီးတပ်စခန်းကို သိမ်းပိုက်ပြီး လက်နက်ခဲယမ်းတွေ သိမ်းဆည်းရမိခဲ့ပါတယ်။
