လက်နက်ကိုင်တပ်တွေအနေနဲ့ စစ်ဘက်ဆိုင်ရာ ကျင့်ဝတ်တွေကို လိုက်နာပြီး အများပြည်သူ နေထိုင်တဲ့ ကျေးရွာ၊ လူနေရပ်ကွက်တွေကို ရှောင်ရှားတိုက်ပွဲဖော်ကြဖို့  မွန်ပြည်သစ်ပါတီက ထုတ်ပြန်တိုက်တွန်းတယ်။

ကရင်ပြည်နယ်၊ ကော့ကရိတ်မြို့နယ်၊ ကမ်းနီနဲ့ အနီးတဝိုက် ကျေးရွာတွေ မီးရှို့ခံရတဲ့ဖြစ်စဉ်နဲ့ ပတ်သက်ပြီး မွန်ပြည်သစ်ပါတီက ဇန်နဝါရီ ၂၉ ရက်မှာ ထုတ်ပြန်လိုက်တာဖြစ်ပြီး ကမ်းနီရွာရှိ ပြည်သူ့စစ်တပ်ဖွဲ့ဝင် နေအိမ်တွေကို ဗိုလ်အယ်စေးဝါး ဦးဆောင်တဲ့ Lion Battalion commando ပူးပေါင်းစစ်ကြောင်းတပ်ဖွဲ့က စတင်မီးရှို့ခဲ့တာလို့ စွပ်စွဲထားသလို စစ်ကောင်စီတပ်က ပစ်ခတ်တဲ့ လက်နက်ကြီး ကျည်ထိမှန်ပြီး နေအိမ်တချို့ ပျက်စီးခဲ့တယ်လို့လည်းဆိုပါတယ်။

ဗိုလ်စောအယ်စေးဝါး ဦးဆောင်တဲ့ Lion Battalion Commando အဖွဲ့က ဇန်နဝါရီ ၂၄ ရက်နဲ့ ၂၆ ရက်တို့မှာ ကမ်းနီကျေးရွာ အုပ်ချုပ်ရေးမှူးရုံး‌နဲ့ ပြည်သူ့စစ်အဖွဲ့ဝင်တွေရဲ့ နေအိမ်တွေကို စတင်မီးရှို့ရာကနေ ကျေးရွာအတွင်းက နေအိမ်တွေ ကူးစက်မီးလောင်ခဲ့တယ်လို့ ဆိုပါတယ်။

မီးလောင်မှုကြောင့် ကမ်းနီကျေးရွာက နေအိမ် ၂၁ လုံးနဲ့ ကျေးရွာသား ၂ ဦး ထိခိုက်ဒဏ်ရာရခဲ့ပြီး ‌ညောင်ရိပ်ကျေးရွာမှာတော့ နေအိမ် ၁၈ လုံး မီးလောင်ခဲ့တယ်လို့ မွန်ပြည်သစ်ပါတီက ထုတ်ပြန်ထားပါတယ်။

ကော့ပိန်းကျေးရွာ မွန်လူမှုကယ်ဆယ်ရေးအဖွဲ့ဝင်တဦးက “ရွာသားတွေက ရွာကို ဒီ PDF တွေ မီးရှို့တာ၊ အမြောက်တွေကျတော့ ဟိုက ပစ်တာပေါ့နော်။ သူတို့က ရှို့တာ ဥက္ကဋ္ဌအိမ်၊ နောက် မီးငြှိမ်းတာကို မပေးငြှိမ်းဘူး။ ငြှိမ်းရင် ပစ်သတ်မယ် ဘာညာနဲ့ ရွာသူ ရွာသားကို ခြောက်‌တော့ ရွာသူရွာသားတွေကြ မလုပ်ရဲဘူး။ သူတို့ပြောတာ ဥက္ကဋ္ဌအိမ်တို့၊ ပြည်သူ့စစ်ခေါင်းဆောင်အိမ်တို့ ဟိုအရင်တုန်းက ပြည်သူ့စစ် လုပ်ခဲ့ဖူးတဲ့လူတွေလေ။ အိမ်က ကပ်တယ်။ အိမ်ကကပ်တော့ ဘယ်တတ်နိုင်မလဲ”  လို့ ပြောပါတယ်။

အခုလိုမီးရှို့မှုနဲ့ပတ်သက်ပြီးတော့ ဗိုလ်အယ်စေးဝါး ဦးဆောင်တဲ့ Lion Battelion Commando - ဗျူဟာစစ်ကြောင်းဘက်က ထုတ်ပြန်တာ မရှိပါဘူး။

တိုက်ပွဲအတွင်း စစ်ကောင်စီတပ်ဘက်က ပစ်ခတ်လိုက်တဲ့ လက်နက်ကြီးကြောင့် နေအိမ်တချို့ ပျက်စီးခဲ့ကြောင်းလည်း မွန်ပြည်သစ်ပါတီက ထုတ်ပြန်ထားပါတယ်။

လက်ရှိမှာ မွန်ပြည်သစ်ပါတီအနေနဲ့ စစ်ဘေးရှောင်တွေအတွက် အကူအညီနဲ့ ကျန်းမာရေးအတွက် လုပ်ဆောင်နေပြီး ကျေးရွာတွေအတွင်း လုံခြုံရေးအစီအမံတွေ ကြိုတင်ပြင်ဆင်ထားကြဖို့ ထုတ်ပြန် တိုက်တွန်းထားပါတယ်။

ဇန်နဝါရီ ၂၀ ရက်ကနေ ၂၆ ရက်အထိ ကျုံးဒိုးဒေသတဝိုက် တိုက်ပွဲတွေကြောင့် စစ်ကောင်စီဘက်က ၉၀ ကျော် သေဆုံးခဲ့ပြီး ၅၀ ကျော် ထိခိုက်ဒဏ်ရာရရှိခဲ့ကြောင်း Lion Battalion Commando - ဗျူဟာစစ်ကြောင်းက သတင်းထုတ်ပြန်ပါတယ်။

တိုက်ပွဲတွေကြောင့် ကျုံဒိုးမြို့နဲ့ အနီးနားက ကျေးရွာ ၂၀ လောက်က ထောင်နဲ့ချီတဲ့ ရွာသားတွေ ထွက်ပြေးတိမ်းရှောင်နေကြရပြီး ကျေးရွာတချို့ ဘုန်းကြီးကျောင်းတွေမှာ စစ်ရှောင်စခန်း ၉ ခု ဖွင့်လှစ်ထားကာ စစ်ဘေးရှောင်တွေအတွက် စားနပ်ရိက္ခာ အကူအညီတွေ လိုအပ်နေတယ်လို့ လူမှုကယ်ဆယ်ရေးအဖွဲ့တွေက ပြောပါတယ်။

တိုက်ပွဲပြင်းထန်နေတဲ့ ကော့ကရိတ်မြို့နယ်၊ ကျုံဒိုးမြို့အနီးရှိ ကမ်းနီ၊ မိဂလုံ၊ ကော့ဘိန်း စတဲ့ကျေးရွာတွေဟာ မွန်ပြည်သစ်ပါတီ သထုံခရိုင်ဌာနချုပ် ထိန်းချုပ်နယ်မြေထဲမှာ ပါဝင်နေသလို မွန်လူမျိုးအများစု နေထိုင်ကြတဲ့ ကျေးရွာတွေ ဖြစ်ပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ပြည်သူ့ကာကွယ်ရေး တပ်မတော်စစ်ဘက်ဆိုင်ရာ ကျင့်ဝတ်တွေကို ထုတ်ပြန်လိုက်ပါတယ်။

စစ်သည်တော် ကျင့်ဝတ်စည်းမျဉ်းတွေအနေနဲ့ စစ်ရေးရည်မှန်းချက်တွေနဲ့သာ တိုက်ပွဲဖော်ဆောင်ဖို့၊ စစ်ဆင်ရေးဆောင်ရွက်ရာမှာ လိုအပ်တဲ့ အင်အားကိုသာ အသုံးပြုပြီး ထိခိုက်ပျက်စီးမှု အနည်းဆုံးဖြစ်စေရေး စီမံဆောင်ရွက်ဖို့၊ အရပ်သားပြည်သူတွေကို ကာကွယ်စောင့်ရှောက်ဖို့၊ ပြည်သူပိုင်ဉစ္စာပစ္စည်းတွေကို ထိပါးခြင်းမပြုဖို့၊ ဘာသာရေးအ ဆောက်အအုံတွေနဲ့ ယဉ်ကျေးမှုအမွေအနှစ်တွေကို တန်ဖိုးထားဖို့၊ လက်နက်ကိုင်ပဋိပက္ခဆိုင်ရာ ဉပဒေသတွေကို ဖောက်ဖျက်ကူးလွန်မှုမပြုဖို့၊ ခေါင်းဆောင်တွေဟာ စံနမူနာပြ ခေါင်းဆောင်မှုကို ပြသပြီးလက်အောက်ငယ်သားတွေအပေါ် ကျောသားရင်သား မခွဲခြားဘဲ တရားမျှတစွာ ကွပ်ကဲအုပ်ချုပ်ဖို့၊ အထက်ကွပ်ကဲမှု အဆင့်ဆင့်က ပေးအပ်တဲ့ အမိန့်နဲ့ တာဝန်တွေကို လေးစားလိုက်နာဖို့၊ တပ်ဖွဲ့ဝင်အချင်းချင်း ရဲဘော်ရဲဘက်စိတ်နဲ့ ပူးပေါင်းဆောင်ရွက်ဖို့၊ လူမျိုး၊ ဘာသာ၊ ကျားမ၊ လိင်စိတ်ခံယူချက် ကွဲပြားမှုအပေါ် မူတည်ကာ ခွဲခြားဆက်ဆံခြင်းမပြုဖို့၊ မူးယစ်ဆေးဝါးသုံးစွဲခြင်းမပြုဖို့၊ လူမှုရေး ရှုပ်ထွေးခြင်းမပြုဖို့ စတဲ့ အချက် ၁၁ ချက်ကို ထုတ်ပြန်ထားပါတယ်။

အဲဒီနောက် စစ်ရေးဆိုင်ရာ ပစ်မှတ်သတ်မှတ်ချက်မှာတော့ စစ်အာဏာရှင်စနစ်ရဲ့ ယန္တရားတွေကိုသာ ချေမှုန်းဖို့၊ အရပ်သားပြည်သူတွေကို ခြိမ်းခြောက်တာ၊ ပစ်မှတ်ထား တိုက်ခိုက်တာတွေ မလုပ်ဖို့၊ စာသင်ကျောင်း၊ ဆေးရုံ၊ ဘာသာရေးအဆောက်အအုံ၊ ယဉ် ကျေးမှုဆိုင်ရာ အထိမ်းအမှတ်နေရာတွေနဲ့ အရပ်သားပြည်သူတွေစုဝေးသွားလာလှုပ်ရှားတဲ့ နေရာတွေကို ပစ်မှတ်ထားတိုက်ခိုက်ခြင်းမပြုဖို့၊ လူနာတင်ယာဉ်တွေ၊ ကျန်းမာရေး စောင့်ရှောက်မှုပေးတဲ့ နေရာတွေနဲ့ ရှေးဦးသူနာပြုတွေနဲ့ကျန်းမာရေးစောင့်ရှောက်ကုသ ပေးနေသူတွေ၊ လူမှုကယ်ဆယ်ရေး အသင်းအဖွဲ့တွေကို ပစ်မှတ်ထားတိုက်ခိုက်ခြင်း မပြုဖို့ စတဲ့ အချက်တွေ ပါဝင်ပါတယ်။

ဒါ့အပြင် လက်နက်ချ အညံ့ခံသူတွေနဲ့ စစ်သုံ့ပန်းတွေအပေါ် ပြုကျင့်ရမယ့် ကျင့် ဝတ်တွေထဲမှာတော့ နှိပ်စက်ခြင်းနဲ့ သတ်ဖြတ်ခြင်း မပြုဖို့၊ ဂျီနီဗာကွန်ဗင်းရှင်းပါ ပြဋ္ဌာန်း ချက်များအရ လူ့ဂုဏ်သိက္ခာနဲ့အညီ ဆက်ဆံဖို့၊ မိသားစုတွေဆီ အတတ်နိုင်ဆုံး အ ကြောင်းကြားတာ၊ ကျန်းမာရေးစောင့်ရှောက်မှုပေးဖို့နဲ့ ချုပ်နှောင်ထားရှိဖို့ လိုအပ်ပါက အမျိုးသားနဲ့ အမျိုးသမီး သီးသန့်ခွဲခြားချုပ်နှောင်ဖို့ စတာတွေ ပါဝင်ပါတယ်။

အရပ်သား ပြည်သူတွေနဲ့ ဆက်ဆံရာမှာ လိုက်နာရမယ့် ကျင့်ဝတ်တွေထဲမှာတော့ ရိုသေစွာဆက်ဆံဖို့၊ မောက်မာရိုင်းပြတာ၊ စော်ကားတာ၊ အနိုင်ကျင့်နှိပ်စက်တာ၊ မူးယစ် ရမ်းကားတာတွေ မပြုလုပ်ဖို့၊ အမျိုးသမီးတွေ၊ လိင်စိတ်ကွဲပြားသူတွေကို ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ ထိပါးနှောက်ယှက်တာ မလုပ်ဖို့၊ အရေးပေါ်လိုအပ်ချက်အရ အရပ်သားပြည်သူပိုင် ပစ္စည်းဉစ္စာတွေကို အသုံးပြုရပါက ကာလတန်ဖိုးအတိုင်း ပေးချေဖို့၊ အရပ်သားတွေကို ဓားစာခံ၊ ဒါမှမဟုတ် လူသားဒိုင်းအဖြစ် အသုံးမပြုဖို့၊ ကလေးသူ ငယ်တွေ၊ မသန်စွမ်းတွေ၊ အမျိုးသမီးတွေ၊ သက်ကြီးရွယ်အိုတွေစတဲ့ ထိရှလွယ်တဲ့ အုပ်စုတွေကို အထူးကာကွယ်စောင့်ရှောက်ပြီး လိုအပ်တဲ့ အကူအညီတွေပေးဖို့ စတာတွေ ပါဝင်ပါတယ်။

ဒါ့အပြင် အမျိုးသမီးတွေနဲ့ ကလေးသူငယ်တွေအပေါ် လိုက်နာရမယ့် ကျင့်ဝတ် တွေအနေနဲ့ အမျိုးသမီးတွေ ကာယိန္ဒြေပျက်စီးစေခြင်း၊ အရှက်ခွဲခြင်း၊ ယုတ်ညံ့စေခြင်း၊ လိင်ပိုင်းဆိုင်ရာ ခေါင်းပုံဖြတ်အမြတ်ထုတ်ခြင်း၊ အကြမ်းဖက်ခြင်းတွေ မပြုဖို့၊ အရွယ်မရောက်သေးတဲ့ ကလေးတွေကို လိင်ပိုင်းဆိုင်ရာ ထိတွေ့ဆက်ဆံတာ၊ အကြမ်းဖက်တာတွေ မပြုလုပ်ဖို့ စတာတွေကိုပါ သီးခြားပြဋ္ဌာန်းထားပါတယ်။

အမျိုးသား ညီညွတ်ရေးအစိုးရက ပြည်သူ့ကာကွယ်ရေးတပ်မတော်ကိုတော့ ပြီးခဲ့တဲ့ မေလ ၅ ရက်နေ့မှာ ပြည်တွင်းစစ်ချုပ်ငြိမ်းရေး၊ ထိရောက်တဲ့ လုံခြုံရေးကဏ္ဍ ပြုပြင်ပြောင်းလဲမှုတွေ လုပ်ဆောင်ရေးနဲ့ ဖက်ဒရယ်ပြည်ထောင်စု တပ်မတော်ဖွဲ့စည်းနိုင်ရေး တို့ကို ဆောင်ရွက်နိုင်စေဖို့ တရားဝင်ဖွဲ့စည်းထူးထောင်လိုက်တာ ဖြစ်ပါတယ်။