စစ်ကောင်စီတပ်တွေနဲ့ တိုက်ပွဲတွေကြောင့် နေရပ်စွန့်ခွာ ထွက်ပြေးတိမ်းရှောင်နေကြရတဲ့ ကေအန်ယူ ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေထဲက ကျေးရွာတွေမှာ တောမီးလောင်မှုကနေတဆင့် မီးကူးပြီး နေအိမ်အလုံး ၁၆၀ နီးပါး မီးလောင်ဆုံးရှုံးခဲ့ရတယ်လို့ ကေအန်ယူ ဗဟိုက သတင်းထုတ်ပြန်ပါတယ်။ 

ပြီးခဲ့တဲ့ ဖေဖော်ဝါရီ ၁၂ ရက်က ကေအန်ယူ-မူးမြို့နယ်အုပ်ချုပ်မှုနယ်မြေထဲက ကြောင်ပြာကျေးရွာမှာ တောမီးလောင်မှုကတဆင့် ကျေးရွာအတွင်း မီးစွဲသွားပြီး အိမ်ခြေ ၂၂၀ ကျော်ထဲက အိမ်ခြေ ၁၅၀ ဝန်းကျင် မီးလောင်ပြာကျသွားခဲ့သလို ဖေဖော်ဝါရီ ၁၀ ရက်တုန်းကလည်း တောမီးလောင်မှုကတဆင့် ကော့ပျင်းကျေးရွာထဲကို မီးကူးသွားကာ အိမ်ခြေ ၅၁၃ လုံးထဲက နေအိမ် ၇ လုံး မီးလောင်ပြာကျပျက်စီးခဲ့ရတယ်လို့ ဆိုပါတယ်။

အဆိုပါ မီးစွဲလောင်ခံရတဲ့ ကျေးရွာတွေရှိ ဒေသခံတွေဟာ စစ်ကောင်စီတပ်တွေရဲ့ လူ့အခွင့်အရေး ချိုးဖောက်မှုတွေကြောင့် ၂၀၂၂ ခုနှစ် ဇူလိုင်လကတည်းက ရွာလုံးကျွတ် ထွက် ပြေးတိမ်းရှောင်နေခဲ့ကြရတာလို့ ဆိုပါတယ်။

ဒါ့အပြင်စစ်ကောင်စီတပ်တွေဟာ ကျေးရွာတွေထဲကို ဝင်ရောက်မွှေနှောက် ဖျက်ဆီးတာတွအပြင် တယောက် ယောက်ကို တွေ့ရှိပါက ဖမ်းဆီး၊ နှိပ်စက်၊ သတ်ဖြတ်နေတာကြောင့် ကျေးရွာနေသူတွေဟာ ခုချိန်ထိ နေအိမ်တွေမှာ ပြန်မနေရဲကြသေးချိန်မှာ ကျေးရွာအတွင်း အမှိုက်သရိုက် သစ်ရွက် ခြောက်တွေ ပြည့်နှက်နေတာကြောင့် ခုလို လွယ်ကူစွဲမီးစွဲလောင်ခံရတာလို့ ထုတ်ပြန်ချက်မှာ ဖော်ပြပါတယ်။

ဒါ့အပြင် အာဏာသိမ်းအကြမ်းဖက်စစ်ကောင်စီတပ်တွေဟာ ခလယ်လွီထူခရိုင် တပ်မဟာ(၃)၊ လယ်ဒိုမြို့နယ်ထဲကို  ပြီးခဲ့တဲ့ ဖေဖော်ဝါရီ ၁၅ ရက်ညနေ ၅ နာရီခွဲလောက်ကလည်း လေယာဉ် ၂ စင်းနဲ့ ဗုံး ၄ လုံး ကြဲ ချခဲ့တဲ့အပြင် အော်လီဂန်းတွေနဲ့လည်း ပစ်ခတ်ခဲ့ပေမယ့် ထိခိုက်ပျက်စီးခြင်းမရှိခဲ့ဘူးလို့ ဆိုပါတယ်။

ချင်းပြည်နယ်၊ ထန်တလန်မြို့နယ်မှာ စစ်ဘေးရှောင်တွေခိုလှုံနေတဲ့ ကျေးရွာ ၅ ရွာကို ဇန်နဝါရီ ၁၄ ရက်နေ့မှာ အသုံးအဆောင်ပစ္စည်း ကျပ်သိန်း ၃၀၀ ဖိုးလောက် ပေးပို့နိုင်ခဲ့တယ်လို့ TRRC က ထုတ်ပြန်ပါတယ်။

ထန်တလန်မြို့ပေါ်ကနေ ဇနတလန်၊ ခွာလ်ရိန်းတလန်၊ ဗူးယာလ်၊ ဗိုင်လမ်နဲ့ ဗင်ဇင်တလန်ရွာတွေကို ထွက်ပြေးတိမ်းရှောင်နေတဲ့ စစ်ဘေးရှောင်ပြည်သူတွေအတွက် အသုံးအဆောင်ပစ္စည်တွေ ကျပ်သိန်း ၃၀၀ ဖိုးလောက် ထောက်ပံ့ပေးခဲ့တယ်လို့ TTRC ရဲ့တာဝန်ရှိသူတစ်ယောက်က ဒီဗွီဘီကိုပြောပါတယ်။

အဲဒီပစ္စည်းတွေကို ကိုးရီးယားက ပါစတာဖက်ဆုန်(ကျုံဘွေ)နဲ့ မန္တလေးက သိက္ခာတော်ရ ဆိုင်မွန်ထောင်မှုန်နဲ့ မိတ်ဆွေတွေကလှူဒါန်းပြီးတော့ ဟားခါးကြက်ခြေနီအဖွဲ့ရဲ့ အစီအမံနဲ့ ပေးပို့ခဲ့တာလို့ ဆိုပါတယ်။

ထန်တလန်မြို့က အိမ်ခြေ ၂၀၀၀ လောက်ရှိ ပြည်သူ ၁၀၀၀၀ ကျော်လောက်ဟာ စစ်ကောင်စီတပ်တွေ အကြမ်းဖက်ပြီး မီးရှို့တာကြောင့် တမြို့လုံးထွက်ပြေးနေကြရတာဖြစ်ပြီး စားရေးသောက်ရေး နေထိုင်ရေးနဲ့ ကျန်းမာရေးစောင့်ရှောက်မှုတွေ လိုအပ်တယ်လို့ စစ်ဘေးရှောင်တွေက ပြောပါတယ်။

စစ်ဘေးရှောင်ပြည်သူအများစုဟာ အိန္ဒိယနိုင်ငံနဲ့ နီးစပ်တဲ့ ကျေးရွာတွေကို ထွက်ပြေးပြီးတော့ ဖြစ်သလိုနေထိုင်နေကြရတယ်လို့ ဆိုပါတယ်။

ထန်တလန်မြို့မှာ စစ်ကောင်စီတပ်တွေ မီးရှို့ဖျက်ဆီးတာကြောင့် ဘုရားကျောင်း၊ လူနေအိမ်၊ စျေးဆိုင်တွေနဲ့  အဆောက်အအုံပေါင်း ၈၄၁ လုံး မီးလောင်ဆုံးရှုံးခဲ့တယ်လို့ သိရပါတယ်။