ရခိုင်ပြည်နယ်မှာ မေလ ၂၁ ရက် ဒီနေ့ မွန်းလွဲ ၁၂ နာရီ ကျော်လောက်က မိုးသက်လေပြင်းတိုက်ခတ်လို့ စစ်ဘေးရှောင်စခန်းတွေမှာ လူနေအိမ် ၂၀၀ ကျော်လောက် ပျက်စီးသွားတယ်လို့ စခန်းတာဝန်ခံတွေနဲ့ ဒေသခံတွေထံက သိရပါတယ်။
လေပြင်းတွေကြောင့် ဘူးသီးတောင်မြို့ရှိ လမ်းမကျောင်းစစ်ဘေးရှောင်စခန်း၊ မြတောင်စစ်ဘေးရှောင်စခန်းနဲ့ ရန်အောင်မြေ စစ်ဘေးရှောင်စခန်းက လူ နေအိမ် ၅၀ ကျော် ပြိုပျက်သွားခဲ့တယ်လို့ မြို့ခံတယောက်ဖြစ်တဲ့ ရခိုင့်ဦးဆောင်ပါတီ ( AFP) ပါတီဝင် မောင်သာဖြူက ပြောပါတယ်။
"လေပြင်းကြောင့် စစ်ဘေးရှောင်စခန်းတွေက လူနေအိမ် ၅၀ ကျော်လောက်ပျက်စီးသွားတယ်။ စစ်ဘေးရှောင်နေအိမ်တွေက လေပြင်းတိုက်လို့မပြိုရင်လည်း အားလုံးပြုပြင်ရမယ့် အနေထားတွေမှာရှိတယ်။ နှစ်တွေလည်းကြာပြီ။ ဒီနေအိမ်တွေကလည်း ကိုယ်ထူကိုယ်ထ ဆောက်ထားကြတာ။”
မြောက်ဦးမြို့နယ်ရှိ စင်းဘောကိုင်းစစ်ဘေးရှောင်စခန်းမှာလည်း လေပြင်းတိုက်ခတ်လို့ လူနေဆောင် ၄၀ ကျော် ပြိုပျက်သွားခဲ့တယ်လို့ စခန်းတာဝန်ရှိသူတွေထံက သိရပါတယ်။
အလားတူ ကျောက်တော်မြို့ရှိ ညောင်ချောင်းစစ်ဘေးရှောင်စခန်းနဲ့ မဟာမုနိစစ်ဘေးရှောင်စခန်း ရှိနေအိမ် ၁၀၀ ကျော်လောက် ပျက်စီးသွားတယ်လို့ စခန်းတာဝန်ရှိသူတဦးက ပြောပါတယ်။
"မဟာမုနိစစ်ဘေးရှောင်စခန်းမှာ အရင် လေပြင်းတိုက်လို့ ပြုလုပ်ထားတဲ့နေအိမ်တွေပါ ပြိုပျက်သွားတာတွေရှိတယ်။ ညောင်ချောင်စခန်းက နေအိမ်တွေက အိုဟောင်းနေတော့ အပြိုအပျက်များပါတယ်။”
ပြီးခဲ့တဲ့ ဧပြီလ ၂၀ ရက်ကလည်း လေပြင်းတွေ တိုက်ခတ်သွားလို့ မြောက်ဦး စစ်ဘေးရှောင်စခန်း၊ ကျောက်တော်ရှိ မဟာမုနိစစ်ဘေးရှောင်စခန်းနဲ့ ညောင်ချောင်း စစ်ဘေးရှောင်စခန်းတို့မှ လူနေဆောင် ၂၀၀ ကျော် ပျက်စီးသွားခဲ့ပါတယ်။
လက်ရှိ လူနေအိမ်တွေပျက်စီးသွားပြီး ပြန်ဆောက်လုပ်ဖို အကူအညီလိုအပ်နေတဲ့ စစ်ဘေးရှောင်စခန်းတွေကတော့ စစ်တွေ၊ မင်းပြား၊ ကျောက်တော်၊ ပုဏ္ဏားကျွန်း ၊မြောက်ဦး၊ ဘူးသီးတောင်က စခန်းတွေဖြစ်ကြပါတယ်။
ရှမ်းပြည်နယ်မြောက်ပိုင်း ကြူကုတ် (ပန်ဆိုင်း) မြို့နယ်ခွဲ၊ ကောင်းစထီးရွာက စစ်ဘေးရှောင်တွေရဲ့ နေအိမ်ကို စစ်ကောင်စီတပ်ဖွဲ့တွေက ပြီးခဲ့တဲ့ ရက်ပိုင်းက သော့ဖျက်ဝင်ရောက်မွှေနောက်ပြီး ပစ္စည်းတွေယူသွားတယ်လို့ ဒေသခံတွေက ပြောပါတယ်။
ဒေသခံ တစ်ဦးက "အိမ်ထဲကအကုန် ဖရိုဖရဲ မွှေနောက်ရှာဖွေပြီး ကြိုက်တာ ယူသွားကြတယ်" လို့ ပြောပါတယ်။
စစ်ကောင်စီတပ်တွေဟာ စစ်ဘေးတိမ်းရှောင်နေတဲ့ ပြည်သူတွေ မွေးမြူထားသော ကြက်၊ ဝက်တွေကိုပါ သတ်စားခဲ့ကြတယ်လို့ စစ်ရှောင်ပြည်သူတစ်ဦးက ပြောပါတယ်။
"အိမ်ကို ခဏသွားကြည့်တော့ အိမ်မှာရှိတဲ့ တန်ဖိုးရှိ ပစ္စည်းတွေ၊ မွေးထားတဲ့ ကြက်၊ ဝက် တွေလည်း မရှိတော့ဘူး။ တံခါး သော့ခတ်ထားတာတောင် ရစရာမရှိအောင် ရိုက်ခွဲဖျက်ဆီး ပေးထားကြတယ်။”
လက်ရှိမှာတော့ စစ်ကောင်စီတပ်တွေဟာ ကောင်းစထီးရွာကနေ ပြန်လည်ထွက်ခွာသွားကြပြီလို့ ဒေသခံတဦးက ပြောပါတယ်။
ကြူကုတ် (ပန်ဆိုင်း) နဲ့ မုံးကိုးတို့မှာ စက်တင်ဘာ ၁၆ ရက်နေ့ကစ စစ်ကောင်စီတပ်ဘက်က တင့်ကားနှစ်စီးအပါအဝင် စစ်ကား ၃၀ ကျော်၊ Vego ၆ စီး၊ အင်အားအလုံးအရင်း နဲ့ ကြူကုတ် (ပန်ဆိုင်း) ကို စစ်ကြောင်းထိုး ချီတက်လာတယ်လို့ ဒေသခံတွေက ပြောပါတယ်။
စက်တင်ဘာ ၂၃ ရက်နေ့ မနက် ၅ နာရီခွဲ ဝန်းကျင်မှာတော့ ပန်ဆိုင်းဘော်လုံးကွင်းမှာရပ်ထားတဲ့ စစ်ကားတွေ အားလုံး မုံးကိုးဘက် ချီတက်သွားပြီလို့ ဒေသခံမျက်မြင်တစ်ဦးက ပြောပါတယ်။
စစ်ကောင်စီနဲ့ MNDAA တို့ကြား တိုက်ပွဲ ပြင်းထန်ခဲ့တာကြောင့် ဩဂုတ်လ ၄ ရက်နေ့ကစ ဖိုင်ကောင်း၊ ကောင်းစထီးရွာအပါအဝင် ကြူကုတ် (ပန်ဆိုင်း) မြို့နယ်ခွဲက ကျေးရွာ ၉ ရွာက ဒေသခံ ၁၄၀၀ ကျော် တရုတ်နယ်စပ်တလျှောက် ယာယီရှောင်နေကြရပြီး တချို့က ဖြစ်သလို နေထိုင်နေကြရဆဲဖြစ်ပါတယ်။
