ထိုင်းနိုင်ငံ၊ ဆမွတ်ဆာခွန်ခရိုင်၊ မြန်မာအများစုနေထိုင်တဲ့ မဟာချိုင်မြို့နယ်ရှိ တနင်္ဂနွေ စျေးကွင်းကြီးမှာ မြန်မာနိုင်ငံတွင်းက စစ်ဘေးရှောင်ပြည်သူတွေအတွက် ရန်ပုံငွေ အတာသင်္ကြန် လမ်းလျှောက်ပွဲ ကျင်းပဖို့ရှိနေပါတယ်။

ဧပြီ ၁၃ ရက်နဲ့ ၁၄ ရက်နေ့တွေမှာ ကျင်းပမယ့် ရန်ပုံငွေရှာ အတာသင်္ကြန် လမ်းလျှောက်ပွဲမှာ ပါဝင် ရေကစားဖို့ တနေရာကို ဘတ် ၅,၀၀၀ နှုန်း သတ်မှတ်ထားပြီး လူ ၁၀ ဦးအထိ ကစားခွင့်ရှိသလို ဈေးရောင်းတာ၊ စတုဒိသာကျွေးတာ၊ သင်္ကြန်ယိမ်းအကများ ကတာ စတာတွေ ပြုလုပ်နိုင်တယ်လို့ ပွဲစီစဉ်သူတွေထံက သိရပါတယ်။

ပွဲစီစဉ်သူတဦးက “ပွဲစီစဉ်ခွင့်ရဖို့အတွက် အာဏာပိုင်တွေရဲ့ ခွင့်ပြုချက်ယူတဲ့နေရာမှာ အနည်းငယ်တော့ အခက်အခဲရှိပါတယ်။ မြန်မာပြည်မှာ ဒုက္ခရောက်နေကြတဲ့ ဒေသအသီးသီးမှာရှိတဲ့ စစ်ဘေးရှောင်တွေကို အဘက်ဘက်က ကူညီပေးနိုင်ဖို့ရယ်၊ အမိမြေနဲ့ ဝေးကွာပြီး ကိုယ့်ရဲ့ ရိုးရာသင်္ကြန်ကို လွမ်းဆွတ်တမ်းတနေတဲ့ မြန်မာပြည်သားတွေအတွက် တနှစ်တာ ပင်ပန်းဆင်းရဲမှုတွေကို အပန်းပြေသွားအောင် ရည်ရွယ်ပြီး စီစဉ်ခဲ့တာပါ။ မနက်ပိုင်းမှာ သံဃာတော်တွေကို ဆွမ်းကပ်မယ်၊ ပရိတ်ရွတ်တာတွေ ပါဝင်မှာပါ။ မြန်မာ့ရိုးရာနှစ်သစ်ဆိုတော့ ဒုလ္လဘ ရဟန်းခံမယ့်လူတွေလည်း ရှိပါတယ်။ အခုကတည်းက ရေကစားဖို့ စာရင်းသွင်းထားကြ တဲ့လူတွေလည်း ရှိပြီဆိုတော့ အစစအရာရာ အဆင်ပြေသွားမယ်လို့ ယုံကြည်ပါတယ်” လို့ ပြောပါတယ်။

မြန်မာပြည်မှာလည်း နိုင်ငံရေး အခြေအနေမကောင်းတဲ့အချိန်ဖြစ်နေလို့ ထိုင်းရောက်နေတဲ့ ကိုယ့်နိုင်ငံသားတွေ စိတ်လွတ်ကိုယ်လွတ် ပျော်လို့ရအောင် မြန်မာပြည်ကိုရောက်သွားတဲ့ ပုံစံမျိုးဖြစ်အောင် စီစဉ်ခွင့်ရလို့ ဝမ်းသာမိပါတယ်လို့ ပွဲစဉ်သူက ဒီဗွီဘီကို ပြောပါတယ်။

အိန္ဒိယနိုင်ငံ၊ မဏိပူရ်ပြည်နယ်မှာ ဇွန် ၂၈ ရက် မနက်က မြန်မာနိုင်ငံသားတွေ ခိုလှုံနေထိုင်တဲ့ ကျေးရွာတွေမှာ အိန္ဒိယရဲတပ်ဖွဲ့ဝင်တွေက ဝင်ရောက်စစ်ဆေးကာ အသက်မပြည့်‌သေးတဲ့ ကလေးငယ် အယောက် ၂၀ အပါအဝင် မြန်မာနိုင်ငံသား စစ်ဘေးရှောင်ဒုက္ခသည် အယောက် ၈၀ ကို ဖမ်းဆီး‌ခေါ်ဆောင်သွားတယ်လို့ ကူကီးကျောင်းသားများ အဖွဲ့အစည်းကနေ သိရပါတယ်။

အဆိုပါ ဖမ်းဆီးခံ စစ်ဘေးရှောင်တွေကို နိုင်ငံခြားသားအက်ဥပဒေနဲ့ တရားစွဲ အရေးယူထားတယ်လို့ သိရပြီး မြန်မာနိုင်ငံမှ စစ်ဘေးရှောင်တွေ တရားစွဲဆိုခံထားရတဲ့အပေါ် လွန်စွာမှ စိတ်မကောင်းဖြစ်မိတယ်လို့ ကူကီးကျောင်းသားများအဖွဲ့က ပြောပါတယ်။

ကူကီး‌ကျောင်းသား လူငယ်တဦးက “အဲ့ဒီ စစ်ဘေးရှောင်ဒုက္ခသည်တွေဟာ အများအားဖြင့် စစ်ကိုင်းတိုင်းတွင်းက စစ်ဘေးရှောင်တွေဖြစ်ပြီး တမူးမြို့နယ်နဲ့ ကလေးမြို့နယ်က စစ်ရှောင်တွေ အများစုပါဝင်ကာ မုံရွာနယ်က စစ်ဘေးရှောင်တချို့လည်း ပါဝင်တယ်။ အိန္ဒိယအစိုးရအနေနဲ့ မြန်မာနိုင်ငံသားတွေ အခုလို ဒုက္ခရောက်နေချိန်မှာ ကူညီထား‌သင့်ကြောင်း၊ အိန္ဒိယ နိုင်ငံခြားသားအက်ဥပဒေဟာ အနည်းဆုံး ထောင်ဒဏ် ၁ နှစ်ကနေ အမြင့်ဆုံး ထောင်ဒဏ် ၅ နှစ်အထိ ချမှတ်နိုင်တယ်လို့လည်း သိရပါတယ်။ ဒါကြောင့် စစ်ဘေးရှောင်ဒုက္ခသည်တွေအတွက် သက်ဆိုင်ရာ အစိုးရတာဝန်ရှိသူတွေကနေ အမြန်ဆုံး ဆောင်ရွက်ကူညီပေးကြဖို့” ပြောကြားလိုက်ပါတယ်။

ဖမ်းဆီးခံရတဲ့ စစ်ဘေးရှောင်ဒုက္ခသည်တွေဟာ ၂၀၂၁ ခုနှစ် ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက် ဒေသတွင်း တိုက်ပွဲတွေနဲ့ စစ်ကောင်စီတပ်တွေက ကျေးရွာတွေကို မီးဖျက်ဆီးကာ ဒေသခံတွေကို ဖမ်းဆီးနှိပ်စက် သတ်ဖြတ်နေတာကြောင့် ဘေးလွတ်ရာဒေသတွေကို ထွက်ပြေးတိမ်းရှောင်နေကြရတာပါ။

ဖမ်းဆီးခံ စစ်ဘေးရှောင် မြန်မာနိုင်ငံသားတွေ အနေနဲ့လည်း မိမိတို့မှာ တရားဝင်နေထိုင်ခွင့် စာရွက်စာတမ်း အထောက်အထားမရှိကြောင်း ဝန်ခံပြီးပြီလို့ ဆိုပါတယ်။

အခုလို မြန်မာ့နိုင်ငံရေးအခြေအနေ အခက်အခဲဆုံး အခြေအနေကာလမှာ အိမ်နီးနားချင်းနိုင်ငံ နယ်နိမိတ်ချင်း ထိစပ်နေတဲ့ မဏိပူရ်အစိုးရအနေနဲ့ မြန်မာပြည်သူလူထုတွေ အဘက်ဘက်မှ ပိတ်မိနေတဲ့ အခြေအနေ အချိန်ကာလမှာ အခုလို နိုင်ငံခြားသားအမှုနဲ့ အမှုအကြီးကြီးတပ်ပြီး ဖမ်းဆီးနေတာဟာ လူသားချင်း စာနာထောက်ထားမှုကို အလေးမထားတဲ့အပြင် အိမ်နီးနားချင်းနိုင်ငံ မပီသတာလို့လည်း မိမိတို့မှ ရှုမြင်သုံးသပ်တယ်လို့ ကူကီးကျောင်းသားများအဖွဲ့က ထုတ်ပြန်ပါတယ်။

ဒါကြောင့် အိန္ဒိယအစိုးရအနေနဲ့ ဖမ်းဆီးခံ မြန်မာပြည်သူတွေကို လူသားချင်း စာနာထောက်ထားမှု အခြေအနေပေါ် အခြေခံတဲ့အနေနဲ့ရော၊ အိမ်နီးနားချင်းနိုင်ငံအနေနဲ့ အပြန်အလှန် ကူညီဖေးမမှု အခြေအနေပေါ် အခြေခံတဲ့အနေနဲ့ရော မြန်မာနိုင်ငံသား ဒုက္ခသည်တွေအပေါ် အကောင်းဆုံး နည်းလမ်းတခု ဖန်တီးနိုင်ဖို့ မျှော်လင့်တယ်လို့ ကူကီးကျောင်းသားများ ဒီမိုကရက်တစ်တပ်ဦးက ဇွန် ၂၉ ရက်မှာ သဘောထားထုတ်ပြန်‌ တောင်းဆိုလိုက်ပါတယ်။