ထိုင်ဝမ်ဟာ လာမယ့် ၂၀၂၄ ခုနှစ်ကစပြီး သူ့ကျွန်းနိုင်ငံမှာ စစ်မှုမထမ်းမနေရ ထမ်းဆောင်ရမယ့် ကာလသက်တမ်းကို လေးလကနေ တနှစ်အထိ တိုးမြှင့်မယ်လို့ သမ္မတ ဆိုင်အင်းဝမ်က ဒီဇင်ဘာ ၂၇ ရက်မှာ ပြောလိုက်ပါတယ်။
ဒီမိုကရေစီနည်းကျ အုပ်ချုပ်နေတဲ့ ထိုင်ဝမ်ကျွန်းကို အိမ်နီးချင်း တရုတ်နိုင်ငံက ခြိမ်းခြောက်မှု မြင့်တက်လာလို့ ခုလို သက်တမ်းတိုးတာလို့လည်း ပြောပါတယ်။
တရုတ်နိုင်ငံဟာ လွန်ခဲ့တဲ့ သုံးနှစ်အတွင်း ထိုင်ဝမ်ကျွန်းနားမှာ နေ့စဉ်နီးပါး လေတပ်စစ်ဆင်ရေးတွေလုပ်တာ အပါအဝင် သူ့ရဲ့ အချုပ်အခြာအာဏာပိုင်ဖြစ်ကြောင်း အခိုင်အမာပြောဖို့ ထိုင်ဝမ်အပေါ် စစ်ရေး၊ သံတမန်ရေးနဲ့ စီးပွားရေးဖိအားတွေ အရှိန်မြှင့်ခဲ့တာပါ။
ထိုင်ဝမ်လေ့ကျင့်ရေးအစောင့်တပ်တွေ အပါအဝင် လက်ရှိစစ်ရေးစနစ်ဟာ ထိရောက်မှုမရှိသလို အထူးသဖြင့် ကျွန်းကို အမြန်တိုက်ခိုက်လာရင်လည်း စစ်မှုထမ်းရမယ့် ကာလကို သက်တမ်းတိုးဖို့ ဆုံးဖြတ်ချက်က မလုံလောက်ဘူး၊ မယုံနိုင်လောက်အောင် ခက်ခဲတယ်လို့ ဆိုင်က သတင်းစာရှင်းလင်းပွဲမှာ ပြောခဲ့ပါတယ်။
ဒီဇင်ဘာ ၂၆ ရက်က တရုတ်လေတပ်ဟာ ထိုင်ဝမ်ကျွန်းရဲ့ လေကြောင်းရန်ကာကွယ်ရေး သတ်မှတ်ဇုန်ဆီကို တရုတ်လေယာဉ် ၄၃ စီးနဲ့ ကျူးကျော်ဝင်ရောက် ပျံသန်းခဲ့တယ်၊ တရားဝင်မဟုတ်တဲ့ တရုတ်-ထိုင်ဝမ် နယ်နိမိတ် ပိုင်းခြားထားတဲ့ ကြားခံမျဉ်းကို ဖြတ်ကျော်ဝင်ရောက်ခဲ့တယ်လို့ ထိုင်ဝမ်အစိုးရက သတင်းထုတ်ပြန်ခဲ့ပါတယ်။
ထိုင်ဝမ်ကို တရုတ်ရဲ့ အချုပ်အခြာအဖြစ် အာဏာပိုင်ဆိုင်ခွင့် တောင်းဆိုမှုကို ထိုင်ဝမ်အစိုးရက ပယ်ချခဲ့တာ ဖြစ်ပါတယ်။
