ဧရာဝတီတိုင်း၊ မအူပင်မြို့မှာ လုံခြုံရေးအတွက် စစ်ကောင်စီတပ်က စစ်မှုထမ်းဟောင်းတွေကို နေ့စားခ ကျပ် ၁၀၀၀၀ ပေးပြီး ကင်းစောင့်ခိုင်းနေတယ်လို့  ဒေသခံတွေဆီက သိရပါတယ်။

မြို့ပေါ်လုံခြုံရေးကင်းစောင့်ရတဲ့နေရာတွေနဲ့ ယာဉ်စစ်ဆေးတဲ့နေရာတွေမှာ စစ်ကောင်စီတပ်က သက်ပြည့် ပင်စင်ယူပြီထွက်လာတဲ့ စစ်မှုထမ်းဟောင်းတွေကို နေ့စားခပေးပြီး ပြန်ခေါ်အသုံးပြုနေတာလို့ ဒေသခံတွေက ပြောပါတယ်။

မအူပင်မြို့ခံတဦးက “ နေ့စားခ တသောင်းပေးတယ်လို့ ကြားတယ်၊ လမ်းထဲက အဖိုးကြီးပြောတာ၊ သူကတပ်က ထွက်လာတဲ့သူ အာဏာမသိမ်းခင်ကတည်းက တပ်ကထွက်လာတာ၊ အဲ့အဖိုးကြီးကို ခုယူနီဖောင်းပြန်ထုတ်ပေးပြီး နေ့စားခနဲ့ပေးခိုင်းထားတာ”လို့ ပြောပါတယ်။

စစ်မှုထမ်းဟောင်းဝန်ထမ်းတွေကို မနက် ၈ နာရီကနေ ည ၈ နာရီအထိ ခေါ်ယူအသုံးပြုလေ့ရှိပြီး တခါတလေ ညဘက် လှည့်ကင်းထွက်တာတွေနဲ့ ဧည့်စာရင်းစစ်တာတွေမှာပါ အသုံးပြုလေ့ရှိတယ်လို့ ဆိုပါတယ်။

မအူပင်မြို့မှာ စစ်ကောင်စီတပ်က စစ်မှုထမ်းဟောင်းဝန်ထမ်းတွေကို နေ့စားခပေးပြီး ကင်းစောင့်ခိုင်းတဲ့အပြင် အရန်မီးသတ်တွေနဲ့ သတင်းပေးတွေကိုလည်း လုံခြုံရေးစောင့်ဖို့နဲ့ စစ်ဆေးရေးဂိတ်တွေမှာ အသုံးပြုနေရပါတယ်။

ခုလိုမျိုး စစ်ကောင်စီတပ်က စစ်မှုထမ်းဟောင်းတွေ၊ အရန်မီးသတ်တွေနဲ့ သတင်းပေးတွေကို လုံခြုံရေးစောင့်တာနဲ့ ဧည့်စာရင်းစစ်တဲ့နေရာတွေမှာ အသုံးပြုလာတာဟာ စစ်ကောင်စီတပ်ရဲ့ အင်အား မြို့ပေါ်မှာ လျော့နည်းလာတာမျိုးဖြစ်တယ်လို့ ရဲတပ်ဖွဲ့ဝင်ဟောင်းတွေက သုံးသပ်ပြောဆိုပါတယ်။

မွန်ပြည်နယ်၊ လမိုင်းမြို့၊ မော့ကနင်ကျေးရွာမှာ မနေ့ ဇန်နဝါရီ ၁၄ ရက်နေ့ မွန်းတည့် ၁၂ ခွဲနာရီလောက်က စစ်မှုထမ်းဟောင်းတဦး ဖမ်းဆီးစစ်ဆေးစဉ် သေနတ်ဝင်လုတာကြောင့် ပစ်ခတ်ရှင်းလင်းလိုက်တယ်လို့ ရေးပြောက်ကျားတပ်ဖွဲ့ ဗိုလ်ကျန်ရစ်က ဒီဗွီဘီကို ပြောပါတယ်။

လမိုင်းအခြေစိုက် စစ်ကောင်စီ ခြေလျပ်တပ်ရင်း ခလရ (၁၀၆) အနီးနေ စစ်မှုထမ်းဟောင်း ဦးရခိုင်ဟာ စစ်တပ် သတင်းပေးဒလန်အဖြစ် ဆောင်ရွက်နေကြောင်း ပြည်သူတွေ တိုင်ကြားလာတာကြောင့် ရေးပြောက်ကျားတပ်ဖွဲ့က နေအိမ်မှာ သွားရောက်ဖမ်းဆီးခဲ့တာပါ။

ဖမ်းဆီးလာတဲ့ စစ်မှုထမ်းဟောင်း ဦးရခိုင်ကို လမ်းခုလတ် နေရာတခုမှာ စစ်ဆေးမေးမြန်းနေစဉ် တပ်ဖွဲ့ဝင်တဦးဆီကနေ သေနတ်ဝင်လုသဖြင့် ပစ်ခတ်ရှင်းလင်းလိုက်တာ ဖြစ်ပါတယ်။

“စစ်မှုထမ်းဟောင်း ဦးရခိုင်က သတင်းပေး ဆောင်ရွက်တာရယ်၊ ပြီးတော့ သူမှာ သေနတ်တွေပါ ရှိနေတယ်လို့ ပြည်သူတွေ တိုင်လာလို့ သွားဖမ်းခဲ့တာ၊ စစ်ဆေးတော့လည်း သေနတ်လုပြီး ခုခံဖို့ လုပ်လို့ ရှင်းလင်းလိုက်တာ” လို့ ဗိုလ်ကျန်ရစ်က ပြောပါတယ်။

စစ်မှုထမ်းဟောင်း ဦးရခိုင်ဆီကနေ လက်လုပ်သေနတ်တလက်၊ လက်ထိတ်တခု၊ ဓားတို တချောင်း၊ ဓါးရှည် တချောင်း သိမ်ဆည်းရမိခဲ့တယ်လို့ ရေးပြောက်ကျားတပ်ဖွဲ့က ထုတ်ပြန်ထားပါတယ်။

ရေးပြောက်ကျားတပ်ဖွဲ့ဟာ ပြီးခဲ့တဲ့ ဇန်နဝါရီ ၁၁ ရက်နေ့က စစ်ကောင်စီ ရေးခရိုင် ဒုစရိုက်နှိမ်နင်းရေးခေါင်းဆောင် ဒုရဲမှူးလှိုင်မင်းသန့်ကို အဝေးထိန်းမိုင်းနဲ့ တိုက်ခိုက်ခဲ့သလို ဇန်နဝါရီ ၉ ရက်နေ့ကလည်း စစ်ကောင်စီ ရဲသတင်းတပ်ဖွဲ့ဝင် ရဲအုပ်ညီညီဝင်းကို ပစ်ခတ်ရှင်းလင်းထားပါတယ်။