ကရင်ပြည်နယ်၊ သံတောင် ၁၃ မိုင်၊ ပျားစခန်းကျေးရွာအထွက်မှာ ဇူလိုင် ၁၂ ရက် မနက် ၁၁ နာရီက အင်အား ၇၀ ပါ စစ်ကောင်စီယာဉ်တန်းကို သံတောင်ပြည်သူ့ကာကွယ်ရေးအဖွဲ့က စောင့်ဆိုင်း မိုင်းခွဲတိုက်ခိုက်ခဲ့တဲ့အတွက် စစ်ကောင်စီအရာရှိအပါအဝင် ၂၃ ဦးကျဆုံးပြီး အများအပြား ဒဏ်ရာရရှိခဲ့တယ်လို့ သံတောင် PDF တာဝန်ရှိသူက ပြောပါတယ်။
ဘောကလိကနေ ခြေလျင်ထွက်ခွာလာတဲ့ အင်အား ၇၀ ပါစစ်ကြောင်းဟာ သံတောင် ၁၃ မိုင်ကနေ စစ်ကား ၄ စီးနဲ့ဆင်းအလာ ပျားစခန်းကျေးရွာအရောက်မှာ PDF တပ်ဖွဲ့တွေက စောင့်ဆိုင်းပြီး မိုင်းဆွဲတိုက်ခိုက်ခဲ့တာပါ။
သံတောင် PDF တာဝန်ရှိသူက “သံတောင် ၁၃ မိုင်အထွက် ပျားစခန်းရွာကနေ ကျနော်တို့အဖွဲ့က စောင့်ဆိုင်းပြီး မိုင်းဆွဲတိုက်ခိုက်ခိုက်ခဲ့တာ။ ကား ၂ စီးကတော့ ကျနော် ဝိုင်းပစ်တာ။ ဗိုလ်ကြီး အပါအဝင် ၂၃ ဦးနဲ့ ဒဏ်ရာရရှိသူများတယ်လို့ သတင်းအတိအကျကတော့ ဖရဲသီးတွေဆီက သိရတယ်” လို့ ပြောပါတယ်။
အဆိုပါတိုက်ခိုက်မှုကြောင့် စစ်ကောင်စီစစ်ကား ၂ စီး ပျက်စီးခဲ့သလို ဗိုလ်ကြီးအဆင့် အပါအဝင် အကျအဆုံးများတဲ့အတွက် စစ်ကောင်စီတပ်ဖွဲ့ဝင်တွေက ပျက်စီးသွားတဲ့ ကား ၂ စီးကို လာဆွဲစဉ် PDF တွေက တိုက်ခိုက်လာရင် ပျားစခန်းကျေးရွာအတွင်းကို လက်နက်ကြီးနဲ့ ပစ်ခတ်မယ်ဆိုပြီး ကျေးရွာသားတွေကို ခြိမ်းခြောက်ပြောဆိုခဲ့တယ်လို့ ဒေသခံတွေက ပြောပါတယ်။
ဇူလိုင် ၇ ရက် ညနေ့ ၃ နာရီလောက်က သံတောင်မြို့နယ်၊ ၁၆ မိုင် ရေပူစခန်းအောက် (သံတောင်-သံတောင်ကြီး) ကားလမ်းဘေးမှာ သံတောင်ကြီး ဘုရင့်နောင်တပ်နယ်မှူး လိုက်ပါလာတဲ့ ကား ၂ စီးကို စောင့်ဆိုင်းတိုက်ခိုက်ခဲ့တဲ့အတွက် စစ်ကောင်စီရဲ့ တပ်ကြပ်အဆင့်အပါအဝင် တပ်ဖွဲ့ဝင် ၆ ဦး သေဆုံးခဲ့ပါတယ်။
မတ် ၈ ရက် မနက်ကလည်း သံတောင်ကြီးမြို့နယ် သောက်ရေခပ်ကျေးရွာနဲ့ သကွဲပလိုကျေးရွာအကြားမှာ စစ်ကောင်စီရဲ့ လစာနဲ့ရိက္ခာပို့ စစ်ယာဉ်တန်းကား ၅ စီးဟာ အမည်မသိလက်နက်ကိုင်အဖွဲ့ရဲ့ ကြားဖြတ်တိုက်ခံခဲ့ရပြီး စစ်ကောင်စီတပ်ဖွဲ့ဝင် ၃ ဦးသေဆုံးပြီး အများအပြားထိခိုက်ဒဏ်ရာရရှိခဲ့ပါတယ်။
စစ်ယာဉ်တန်း ကြားဖြတ်တိုက်ခိုက်ခံရပြီးနောက် စစ်ကောင်စီတပ်တွေဟာ ကဆောပလို အောက်ကျေးရွာအတွင်း ဝင်ရောက်ပြီး ဒေသခံရွာသားတဦးကို ပစ်သတ်ခဲ့သလိ ကက်သလစ် ဘုရားကျောင်းပိုင်ဆိုင်ပစ္စည်းတွေနဲ့ နေအိမ် ၃ လုံးကို မီးရှို့ဖျက်ဆီးခဲ့ပါတယ်။
စစ်ကောင်စီရဲ့ အရာရှိအပါအဝင် စစ်သားနဲ့ ရဲတပ်ဖွဲ့ဝင်တွေဟာ သံတောင်ပြည်သူ့ကာကွယ်ရေးအဖွဲ့ရဲ့ စနိုက်ပါနဲ့ ပစ်ခတ်ခံရတာ၊ စောင့်ဆိုင်းပစ်ခတ်ခံရတဲ့အတွက် သေဆုံးသူတွေ ရှိခဲ့သလို ပြည်သူတွေအနေနဲ့ စစ်ကောင်စီတပ်တွေရဲ့ ယာဉ်တန်းတွေနောက်ကနေ ကပ်လိုက်တာ၊ စစ်ကောင်စီတပ်ဖွဲ့တွေနဲ့ အဝေးကနေ ရှောင်နေပေးဖို့ သံတောင် PDF တပ်ဖွဲ့က ထပ်မံသတိပေးတိုက်တွန်းထားပါတယ်။
မကွေးတိုင်း၊ ဂန့်ဂေါမြို့အနီးက ဂန့်ဂေါ-ကလေး ကားလမ်းမှာ စစ်ယာဉ်တန်း မိုင်းဆွဲတိုက်ခိုက်ခံရပြီး ချင်းပြည်နယ် မင်းတပ်-မတူပီ ကားလမ်းမှာလည်း အကြမ်းဖက် စစ်ကောင်စီတပ်နဲ့ မင်းတပ် CDF တွေ တိုက်ပွဲတွေ ဖြစ်ပွားခဲ့တယ်လို့ ဒေသခံတွေက ပြောပါတယ်။
နိုဝင်ဘာလ ၈ ရက်နေ့ ညနေပိုင်းက ဂန့်ဂေါ-ကလေး ကားလမ်းပေါ်မှာ မိုင်းခွဲတိုက်ခိုက်ခံရမှုကြောင့် စစ်ကောင်စီဘက်က ၅ ဦးသေဆုံးကာ ၇ ဦး ဒဏ်ရာအပြင်းအထန် ရရှိခဲ့တယ်လို့ ဒေသခံတွေဆီက သိရပါတယ်။
မကွေးတိုင်းအတွင်း ပြည်သူ့ကာကွယ်ရေးတပ်တွေအနေနဲ့ ဂန့်ဂေါမြို့နယ်အတွင်းမှာ စစ်ကောင်စီတပ်တွေကို မိုင်းဆွဲတိုက်ခိုက်မှုတွေ ဆက်တိုက်ဆောင်ရွက်နေတယ်လို့ People Defense Force- GanGaw Battalion မှ PDF အဖွဲ့ဝင်တစ်ဦးက ပြောပါတယ်။
ချင်းပြည်နယ် မင်းတပ်- မတူပီ လမ်းမိုင်တိုင် ၁၉ အနီးမှာလည်း နိုဝင်ဘာ ၈ ရက်နေ့ နေ့လယ် ၁ နာရီကျော်လောက်က အကြမ်းဖက်စစ်ကောင်စီတပ်ဖွဲ့ဝင်တွေနဲ့ မင်းတပ် CDF တွေကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ၁၀ ဦးကျော် သေဆုံးခဲ့ပြီး သံချပ်ကာအမြောက်ကား ၁ စီး ထိခိုက်ပျက်စီးခဲ့တယ်လို့ CDF အဖွဲ့ဝင်တစ်ဦးဆီက သိရပါတယ်။
မင်းတပ်မြို့က ထွက်ခွာလာတဲ့ စစ်ကောင်စီယာဉ်တန်း အစီး ၇၀ ကျော်ကို CDF မင်းတပ်က ကြားဖြတ်တိုက်ခိုက်မှုတွေ ပြုလုပ်ခဲ့ပြီး နိုဝင်ဘာ ၂ ရက်နေ့က ၈ ရက်နေ့အထိ စစ်ကောင်စီတပ်ဖွဲ့ဝင် ၇၀ ကျော်သေဆုံးခဲ့တယ်လို့ CDF-မင်း ထုတ်ပြန်ချက်တွေအရ သိရပါတယ်။
စစ်ယာဉ်တန်း မိုင်းဆွဲတိုက်ခိုက်ခံရတာနဲ့ တိုက်ပွဲကြောင့် စစ်ကောင်စီဘက်က သေဆုံးဒဏ်ရာရမှုအခြေအနေကို ဒီဗွီဘီက သီးခြား အတည်မပြုနိုင်သေးပါဘူး။
