မန္တလေးတိုင်း ကျောက်ဆည်မြို့နယ် နိုဝင်ဘာ ၇ ရက်က ထနောင်းပင်လှရွာ အနောက်ဘက် ရှိ ရထားလမ်း ဗုံးဖောက်ခွဲမှုကို စစ်ဆေးဖို့လာတဲ့ စစ်ကောင်စီယာဉ်တန်း မိုင်းဆွဲ တိုက်ခိုက်ခံရပြီး ၃ ဦး ဒဏ်ရာရရှိတယ်လို့ သိရပါတယ္။
မိုင်းဆွဲတိုက်ခိုက်မှုကို ကျောက်ဆည်ခရိုင်ကာကွယ်ရေးတပ်ဖွဲ့ (K.D.D.F) က ပြုလုပ်ခဲ့တာလို့ ထုတ်ပြန်ထားပါတယ်။
ဒေသခံတစ်ဦးကတော့ "မနက်ပိုင်းက ဗုံးပေါက်သံတွေကြားရတယ်၊ အသံအတော်ပြင်းတယ်။ ထိခိုက်ဒဏ်ရာရတာတွေရှိတယ်၊ အရေအတွက်တော့ မသိဘူး။ အသံက သိတ်ပြင်းတော့ သေဆုံးတာလည်း ရှိနိုင်တယ်။ စစ်ကောင်စီက စစ်ကားနဲ့ရောပြီး အဖြူရောင်အိမ်စီးကားတွေပါ အသုံးပြုလာတာတွေ့ရတယ်” လို့ ပြောပါတယ်။
K.D.D.F ဟာ ဇူလိုင် ၁၀ ရက်နေ့က ကျောက်ဆည်မြို့မရဲစခန်းရှေ့နဲ့ ဇူလိုင် ၁၁ ရက်နေ့က အမြန်လမ်းမကြီးရှိ စစ်ကာင်စီတပ်ဖွဲ့ အသုံးပြုတဲ့ ဗိုလ်တဲတို့ကို ဗုံးခွဲမီးရှို့ဖျက်ဆီးခဲ့တယ်လို့ သိရပါတယ်။
စက်တင်ဘာ ၁၄ ရက်နေ့က ကျောက်ဆည်မြို့နယ်ရှိ အမှတ် ၃ အဆင့်မြင့် ဆက်သွယ်ရေးတပ် (အဆရ-၃) ရဲ့ ဆက်သွယ်ရေးကြိုးတွေနဲ့ စက်တက်ဘာ ၁၈ ရက်နေ့က မိုင်တဲတာဝါတိုင် ၂ ခုတို့ကို ဗုံးဖောက်ခွဲဖျက်ဆီးခဲ့တယ်လို့ ထုတ်ပြန်ကြေညာထားပါတယ်။
စစ်ကိုင်းတိုင်း၊ ထီးချိုင့်မြို့နယ် မန္တလေး-ဗန်းမော်လမ်း တကောင်းလမ်းခွဲအနီးမှာ အောက်တိုဘာ ၇ ရက် မနက် ၁ နာရီလောက်က စစ်ကောင်စီယာဥ်တန်း မိုင်းဆွဲတိုက်ခိုက်ခံရတာကြောင့် တစ်စီး မီးလောင်ပျက်စီးသွားတယ်လို့ ဒေသခံတွေဆီက သိရပါတယ်။
ဒေသခံတဦးက “ပစ်ကြတာတော့ ည ၁၂ နာရီကျော် ၁ နာရီ ဝန်းကျင်လောက်ဖြစ်ဖို့များတယ်ဗျ။ ပထမ အသံအကျယ်ကြီး ပေါက်ကွဲအသံတွေ ကြားရတယ်။ ဖြစ်တာက စစ်ယာဥ်တန်း မိုင်းဆွဲ တိုက်ခိုက်ကြတာလို့တော့ သတင်းရတယ်လေ။ ဘယ်အဖွဲ့ဆိုတာတော့ အတိကျ မသိဘူးပေါ့။ စစ်ကောင်စီဘက်က အကျဆုံးများနိုင်တယ်လို့လည်း ကြားရတယ်ဗျ” လို့ ပြောပါတယ်။
စစ်ကောင်စီတပ်တွေဟာ ထီးချိုင့်မြို့နယ်အတွင်း ရဲစခန်းတွေကို ဒေသခံ PDF တွေက ပစ်မှတ်ထား တိုက်ခိုက်လာတာကြောင့် စစ်အင်အားတိုချဲ့လာတာဖြစ်ပြီး ဒေသခံပြည်သူကာကွယ်ရေးတပ်တွေကလည်း ညချိန်သွားလာတာ မပြုလုပ်ကြဖို့ အသိပေးစာတွေ ထုတ်ပြန်ထားတယ်လို့ ဒေသခံတွေက ဆိုပါတယ်။
ထီးချိုင့်မြို့နယ်အတွင်း စစ်ယာဥ်တန်း မိုင်းဆွဲတိုက်ခိုက်ခံရပြီး စစ်ကောင်စီတပ်ဘက်က သေဆုံးမှုနဲ့ ထိခိုက်ပျက်စီးမှုအခြေအနေကိုတော့ DVB က သီးခြားအတည်မပြုနိုင်သေးပါဘူး။
