စစ်ကိုင်းတိုင်း ယင်းမာပင်ခရိုင် ဆားလင်းကြီးမြို့နယ်မှာ နိုဝင်ဘာ ၁၆ ရက်နေ့က စစ်​ကောင်စီယာဉ်တန်းနဲ့ ရဲကား ၂ စီး မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။ 

ဆားလင်းကြီးမြို့နယ် မြန်မာ ဝမ်​ပေါင်၊ မြန်မာ ယန်စီ လုပ်ကွက်အနီး မုံရွာ-ပုသိမ် ကားလမ်း​​ဘေးက ၁၆ ကုတင်ဆန့် တိုက်နယ်​ဆေးရုံအနီး ည ၈ နာရီဝန်းကျင်လောက် တိုက်ခိုက်ခံရတာလို့ ဒေသခံတွေက ပြောပါတယ်။

အဲဒီကား​တွေ​ပေါ်မှာ ရဲအရာရှိအပါဝင် ရဲတပ်သားတွေ လိုက်ပါလာပြီး မိုင်းဆွဲတိုက်ခိုက်ခံရမှု​ကြောင့် ဒဏ်ရာရသူ ၂ ​ယောက်အား ဆားလင်းကြီး​ဆေးရုံကို အရေးပေါ်ပို့လိုက်ရပြီး ထိခိုက်ကျဆုံးမှု အ​ရေအတွက် အတိကျ မသိရ​သေးဘူးလို့ ​ဒေသခံ​တစ်ဦးက ​ပြောပါတယ်။ 

အခုလို မိုင်းဆွဲတိုက်ခိုက်မှုကို ညီ​နောင်မဟာမိတ်အဖွဲ့များနဲ့ ရဲ​ဘော်​နောင်​တော်ကြီး ဦး​ဆောင်​တဲ့ ချင်းတွင်းဂဠုန်ဇာရာအဖွဲ့သားများပူး​ပေါင်းကာ ပ​ဒေသာမိုင်းနဲ့ လုပ်​ဆောင်ခဲ့တာလို့ သိရပါတယ်။

နိုဝင်ဘာ ၁၆ ရက်​ ညနေ ၃ နာရီလောက်ကလည်း ဆားလင်းကြီးမြို့နယ် ​ရွှေသမင်​ကျေးရွာ တံတားအနီးမှာ စစ်​ကောင်စီတပ်ယာဥ်တန်းကို ယင်းမာပင် နဲ့ ဆားလင်းကြီး PDF အဖွဲ့တွေက မိုင်းဆွဲတိုက်ခိုက်ခဲ့တာကြောင့် ကားတစ်စီးပျက်စီးသွားပြီး ထိခိုက်ဒဏ်ရာရမှုအခြေအနေကိုတော့ မသိရသေးပါဘူး။

စစ်ကိုင်းတိုင်း၊ အရာတော်မြို့၊ ကြွေပုဂံရွာကို ဝင်ရောက်ဖျက်ဆီးပြီးပြန်လာတဲ့ စစ်ယာဉ်တန်းကို ဩဂုတ်လ ၂၅ ရက် မနေ့လယ်ပိုင်းက အရာတော် တော်လှန်ရေး အင်အားစုအဖွဲ့က မိုင်းဆွဲ တိုက်ခိုက်ခဲ့တယ်လို့ ပြောပါတယ်။

စစ်ကောင်စီတပ်တွေဟာ ကြွေပုဂံကျေးရွာက ရွာသူရွာသားတွေကို ဖမ်းဆီးပြီး စားနပ်ရိက္ခာတွေနဲ့ ရွားသာားတွေ ပိုင်ဆိုင်တဲ့ ပစ္စည်းတွေကို အဓမ္မလုယက်ယူဆောင်သွားပြီးနောက် အပြန်လမ်းမှာ  မိုင်းဆွဲတိုက်ခိုက်ခံရတာဖြစ်ပါတယ်။

အရာတော်မြို့နယ် တော်လှန်ရေးအင်အားစုအဖွဲ့ တာဝန်ရှိသူက “ကျနော်တို့တော်လှန်ရေး အင်အားစုအဖွဲ့က ဆွဲမိုင်း ၅ လုံးနဲ့တိုက်ခိုက်တယ်၊ စစ်ပွိုင့်ကား တစ်စီး ထိပြီး ပက်လက်လန်သွားတယ်။ ပါတဲ့သူအားလုံးကတော့ ထိခိုက် အကျအဆုံးရှိတယ်။ အခုလုပ်ရပ်မှာ ထင်သလောက် ခရီးမပေါက်ခဲ့ဘူး မိုင်းငါးလုံးဆွဲတာ နှစ်စီး သုံးစီးလောက်ထိ မယ်မှန်းခဲ့တာ ထင်သလောက်ဖြစ်မလာခဲ့ဘူး၊ တစ်စီးပဲထိခဲ့လို့ သိပ်အားမရဘူးပေါ့။ ကြွေပုဂံရွာ အတွက် ကျနော်တို့ တော်လှန်ရေးအင်အားစုတွေက ပြန်လည်လက်တုံ့ပြန်ခဲ့ တာပါ”လို့ ပြောပါတယ်။

အကြမ်းဖက်စစ်တပ်က  ကြွေပုဂံရွာမှာ ရွာသူရွာသား ၁၀ ယောက် ကျော်ကို ဖမ်းဆီး ခေါ်ဆောင်သွားကြပြီး ဆိုင်ကယ် ၂ စီးကို မီးရှို့ဖျက်ဆီးခဲ့ကာ  တချို့ဆိုင်ကယ်တွေကိုရိုက်ခွဲကြတဲ့အပြင် ဆန်၊ ဆီ ၊ ပဲ၊ ပိုက်ဆံနဲ့ ဖုန်း ၁၀ လုံးကျော်လည်း ယူသွားကြပြီး ရွာသားတွေ ချက်ပြုတ်ထားတဲ့ ထမင်းဟင်းတွေ စားသောက်ပြီး ပြန်ထွက်သွားကြတာ ဖြစ်တယ်လို့လည်း ရွာသားတွေက ပြောပါတယ်။

အရာတော်မြို့နယ်မှာ လေ့ကျင့်ရေး ၁၀ နဲ့ ၅၀၀၄ တင့်ကားတပ် စစ်တပ် နှစ်တပ်ရှိပြီး စစ်ယာဉ်တန်း မိုင်းဆွဲတိုက်ခိုက်ခံရတာဟာ ပထမဆုံးဖြစ်တယ်လို့ သိရပါတယ်။