ကယားပြည်နယ်၊ လွိုင်ကော်နဲ့ ဒီးမော့ဆိုမြို့နယ်တွေမှာ ဒီကနေ့ ဇန်နဝါရီ ၈ ရက်က တိုက်ပွဲပြင်းထန်ဖြစ်ပွားခဲ့ပြီး စစ်ကောင်စီဘက်က ၃၀ ထက်မနည်သေဆုံးကာ စစ်ကောင်စီရဲ့ တင့်ကားတစီးနဲ့ ရဟတ်ယာဉ်တစင်းကို ပျက်စီးသွားတယ်လို့ ကရင်နီအမျိုးသား ကာကွယ်ရေးတပ် (KNDF) က သတင်းထုတ်ပြန်ပါတယ်။

လွိုင်ကော်မြို့ မိုင်းလုံး၊ ပန်ကန်းရပ်ကွက်နဲ့ ဒီးမော့ဆိုမြို့နယ် ၅ မိုင်၊ ၆ မိုင် တဆက်တည်းတွေမှာ ဖြစ်ပွားတဲ့ တိုက်ပွဲတွေအတွင်း  စစ်ကောင်စီတပ်တွေဘက်က ဗိုလ်အဆင့်ရှိသူ တယောက် အပါအဝင် အနည်းဆုံး အယောက် ၃၀ သေဆုံးကာ  အများအပြား ဒဏ်ရာရရှိခဲ့တယ်လို့ ဆိုပါတယ်။

ဒါ့အပြင် စစ်ကောင်စီတပ်တွေက ရဟတ်ယာဉ်နဲ့ တိုက်လေယာဉ်တွေ  ၂ စင်းနဲ့ပါ မွန်းလွဲ ၂ နာရီလောက်ကစပြီး ည ၇  နာရီအထိ ၁၀ ကြိမ်လာ ရောက်ပစ်ခတ်ခဲ့ကြောင်း ထုတ်ပြန်ပါတယ်။

ည ၈ နာရီလောက်က  စစ်ရဟတ်ယာဥ်တစ်စင်း လွိုင်ကော်မြို့ဘက် လာရောက်ပစ်ခတ်စဥ် ပစ်ချခံရပြီး လွိုင်ကော်မြို့နယ် ဒေါမူကလားကျေးရွာအနီး ပျက်ကျမီးလောင်ပျက်စီးခဲ့တယ်လို့ KNDF ထုတ်ပြန်ချက်မှာ ဖော်ပြပါတယ်။

ရဟတ်ယာဉ် ပျက်ကျတဲ့သတင်းကို စစ်ကောင်စီဘက်က ထုတ်ပြန်တာမရှိသေးသလို ဒီဗွီဘီအနေနဲ့ သီးခြားအတည်ပြုနိုင်ခြင်းတော့ မရှိသေးပါဘူး။

ညပိုင်းလေကြောင်းတိုက်ခိုက်မှုမှာ လွိုင်ကော်မြို့ နမ့်ဘော်ဝမ်ရပ်ကွက်က ပြည်သူတချို့ ထိခိုက်ဒဏ်ရာရခဲ့တယ်လို့ ဒေသခံတွေရဲ့ ပြောဆိုချက်အရ သိရပါတယ်။

ဒါ့အပြင် တိုက်ပွဲအတွင်း စစ်ကောင်စီတပ်တွေဟာ အင်အားအလုံးအရင်းနဲ့ တင့်ကားတွေ အသုံးပြုကာ တိုက်ခိုက်ခဲ့ပေမဲ့ အကျအဆုံးများတဲ့အပြင် စစ်ကောင်စီရဲ့ တင့်ကားတစီး မီးလောင်ပျက်စီးခဲ့သလို  လက်နက် ၁၁ လက်၊ လက်နက်ကြီးကျည်နဲ့  လက်နက်ငယ်ကျည်တချို့ကို သိမ်းဆည်းရမိခဲ့တယ်လို့ KNDF က ဆိုပါတယ်။

ဒီးမော့ဆိုမြို့နယ်  (၅) မိုင် (၆) မိုင်နဲ့ ဒေါပိုးစီတို့မှ နေအိမ်တွေကို စစ်ကောင်စီတပ်တွေက ဖောက်ထွင်းခိုးယူကာ ကားနှစ်စီးဖြင့်သယ်ဆောင်သွားပြီး လူနေ အိမ် ၁၀ လုံးကျော်ကို မီးရှို့ဖျက်ဆီးသွားတယ်လို့လည်း သိရပါတယ်။   

လွိုင်ကော်မြို့တိုက်ပွဲအတွင်း PDF (လွိုင်ကော်) မှ ရဲဘော်တယောက်ကျဆုံးခဲ့ရသလို ထိခိုက်ဒဏ်ရာရသူတွေရှိနေပြီး ဒီးမော့ဆိုမြို့နယ်တိုက်ပွဲမှာလည်း ထိဒဏ်ဒဏ်ရာရသူတွေ ရှိနေပါတယ်။ 

ဒီကနေ့ တိုက်ပွဲမှာ  ပြည်သူ့ရဲဘော်အချို့ ဒဏ်ရာရရှိကြပြီး လွိုင်ကော် PDF မှ ရဲဘော် ရီးရယ်ထွန်းကြည် (ခ) သျှောင်ကြီးဗွေ တိုင်းပြည်အတွက် အသက်ပေးလှူသွားရကြောင်း PDF လွိုင်ကော်က သတင်းထုတ်ပြန်ထားပါတယ်။ 

ရဲဘော် ရီးရယ်ထွန်းကြည်ဟာ လွိုင်ကော်မြို့ မိုင်းလုံနဲ့ ပန်ကန်းတစ်ဝိုက်ရှိ အိမ်ပြင် မထွက်နိုင်တဲ့ သက်ကြီးရွယ်အိုတွေကို  အိမ်ပြင်သို့ ကယ်ထုတ်နေချိန် ဒဏ်ရာရရှိကာ ကျဆုံးသွားတာဖြစ်ပါတယ်။

ဒီကနေ့ တိုက်ပွဲအတွင်း စစ်ကောင်စီဘက်ကနေ လက်နက်ကြီးနဲ့ရော လေကြောင်းကနေပါ ပစ်ခတ်ခဲ့တဲ့အပြင် လွိုင်ကော်မြို့ မိုင်းလုံးရပ်ကွက်ထဲက အထပ်မြင့်အဆောက်အဦးပေါ်ကနေ စနိုက်ပါနဲ့ ပစ်ခတ်တာကြောင့် မိုင်းလုံး၊ ရွာတန်းရှည်၊ ပန်ကန်း ရပ်ကွက်တွေမှာရှိတဲ့ အရပ်သားပြည်သူ ထိခိုက် ဒဏ်ရာရခဲ့ပါတယ်။ 

ဒီးမော့ဆိုနဲ့ လွိုင်ကော်မြို့နယ်တို့မှာ စစ်ရေးအရှိန်မြင့်နေပြီး  လေကြောင်းတိုက်ခိုက်မှုတွေလည်း ပိုမိုပြင်းထန်နိုင်လို့ ပြည်သူတွေအနေနဲ့  လေကြောင်းရန်မှ အကာအကွယ်ဖြစ်နိုင်တဲ့ နေရာတွေမှာ နေကြဖို့နဲ့ တိုက်ပွဲဖြစ်နိုင်တဲ့နေရာတွေမှာ  နေထိုင်သွားလာတာမလုပ်ဖို့ KNDFက တိုက်တွန်းနှိုးဆော်ထားပါတယ်။

Photo-KNDF

ကချင်ပြည်နယ်၊ ဗန်းမော်ခရိုင်၊ မိုးမောက်မြို့နယ်မှာ စစ်ရဟတ်ယာဉ် တစ်စင်း ပစ်ချခံရပြီး အကြမ်းဖက်တပ်ဖွဲ့ဝင် ၃ ဦး သေဆုံးသွားပြီးနောက် အလော့ဘွမ်တောင်တန်းတိုက်ပွဲ အပြင်းအထန် ဆက်လက်ဖြစ်ပွားနေပါတယ်။

မနေ့မနက်က  စစ်ရဟတ်ယာဉ်တစ်စီးကို ကေအိုင်အေက ပစ်ခတ်ခဲ့တာကြောင့် လေတပ်က  ဗိုလ်မှူး ကျော်ဇေယျာထွဏ်း အသက် ၃၅ နှစ်၊ ဗိုလ်ကြီး သန်းထွန်းလင်း အသက် ၃၃ နှစ်နဲ့ အုပ်ခွဲတပ်ကြပ်ကြီး ကျော်စွာအောင် အသက် ၄၈ နှစ်တို့ သေဆုံးသွားခဲ့တာပါ။ 

မွန်းလွဲပိုင်းမှာတော့ စစ်ကောင်စီတပ်ဘက်က ပစ်ခတ်လိုက်တဲ့ လက်နက်ကြီးတချို့ဟာ (၇) မိုင်ကျေးရွာစာသင်ကျောင်းထဲသို့ ကျရောက်ခဲ့ပြီး တချို့မှာ သစ်ပင်ပေါ်ထိမှန်ကာ  လူနေအိမ် ခေါင်မိုးတွေကို ထိမှန် လွင့်စင်ပေါက်ကွဲခဲ့ပြီး လူတွေကို ထိခိုက်မှု မရှိခဲ့ဘူးလို့ ဒေသခံတွေက ပြောပါတယ်။

မနေ့ မနက် ၁၀ နာရီလောက်ကလည်း ကုန်းလောဘုန်းတော်ကြီးကျောင်းတိုက်အတွင်း လက်နက်ကြီးကျရောက်ပေါက်ကွဲခဲ့လို့ ဘုန်းတော်ကြီးတစ်ပါး ပျံလွန်တော်မူခဲ့ရပြီး အမျိုးသား ၂ ဦးနဲ့ အသက် ၁၀ နှစ်အရွယ် မိန်းကလေး ၁ ဦးသေဆုံးခဲ့ကာ အရပ်သား  ၁၀ ဦးထက်မနည်း ထိခိုက်ဒဏ်ရာရရှိခဲ့ပါတယ်။

အဆိုပါသေဆုံးခဲ့ရတဲ့ ဒေသခံ ၃ ဦးကို ဗန်းမော်ရှိ ကြက်ပေါင်ခြံသုဿန်မှာ မနေ့က  သင်္ဂြိုဟ်ခဲ့ပြီး ပျံလွန်တော်မူသွားတဲ့ ကုန်းလောကျောင်းတိုက်ဆရာတော်ကိုတော့ မိုးမောက်မြို့ရှိ မန္တလေးကျောင်းတိုက်မှာ ဈာပနပြုလုပ်ဖို့ပြင်ဆင်နေတယ်လို့  ဒေသခံတွေက ပြောပါတယ်။

မိုးမောက်မြို့နယ် အလော့ဘွမ်တောင်တန်း မြို့သစ်၊ ကုန်းလော၊ စီဟက်ဘက်မှာ ကေအိုင်အေနဲ့ အကြမ်းဖက်စစ်ကောင်စီတပ်တို့ တိုက်ပွဲတွေဖြစ်ပွားနေတာ ၁လ ကျော်လောက်ရှိနေပြီး  စစ်ကောင်တပ်ဖွဲ့ဝင်တွေလည်း  အများအပြားသေဆုံးခဲ့ပါတယ်။ 

ပြီးခဲ့တဲ့ မတ်လကုန်ပိုင်းက ကေအိုင်အေတို့ ပြန်လည်သိမ်းပိုက်ထားတဲ့ အလော့ဘွမ်တောင်တန်းရှိ စလောင်းကုန်းကို ပြန်သိမ်းနိုင်ဖို့ စစ်ကောင်စီတပ်တွေက မြေပြင်ကရော ဝေဟင်ကပါ အကြိမ်ကြိမ်နေ့စဉ်လိုလို အပြင်းအထန်တိုက်ခိုက်နေတာဖြစ်ပါတယ်။ 

ကချင်ပြည်နယ် မံစီမြို့မှာလည်း အကြမ်းဖက်စစ်ကောင်စီရဲစခန်းတစ်ခုကို ကေအိုင်အေက ယနေ့ည ၈ နာရီလောက်က တိုက်ခိုက်ခဲ့ရာမှာ မြို့နယ်စခန်းမှူး စနိုက်ပါ  ကျည်ဆန်ထိမှန်သေဆုံးခဲ့တယ်လို့မြို့ခံ တစ်ဦးက ပြောပါတယ်။