စစ်ကိုင်းတိုင်း၊ ချောင်းဦးမြို့နယ် အမြင့်ရဲစခန်းကို အင်အားလာဖြည့်တဲ့ စစ်ကောင်စီရေယာဥ် ၂ စင်းကို ဒေသခံကာကွယ်ရေးတပ်တွေပူးပေါင်းပြီး ဒီဇင်ဘာ ၂၄ ရက်မှာ နှစ်ကြိမ်ကြားဖြတ်တိုက်ခိုက်ခဲ့သလို စစ်ကောင်စီဘက်ကလည်း ရဟတ်ယာဉ်နဲ့ လာရောက်ပစ်ခတ်ခဲ့တယ်လို့ Aung San Force - A.S.F  တပ်ဖွဲ့ထံက သိရပါတယ်။

မုံရွာမြို့ မင်းထောက်ဆိပ်ကနေ ဒီဇင်ဘာ ၂၄ ရက် မနက်ပိုင်းမှာ ချင်းတွင်း မြစ်ကြောင်းအတိုင်း စုန်ဆင်းလာတဲ့ စစ်ကောင်စီ ရေယာဉ် ၂ စင်းကို Aung San Force - A.S.F မုံရွာခရိုင်အမှတ် (၅) တပ်ရင်းနဲ့ မဟာမိတ်တပ်ဖွဲ့တွေဖြစ်တဲ့ CKDF ၊ SGF ၊ Black Wolf Defense Force - Monywa တို့က ရှေ့ထွက်မိုင်းတွေနဲ့ ပူးပေါင်းတိုက်ခိုက်ခဲ့ကြတာလို့ဆိုပါတယ်။

ဒီတိုက်ခိုက်မှုမှာ စစ်ကောင်စီဘက်က အကျအဆုံးရှိနိုင်တယ်လို့ မြေပြင်သတင်းတွေ ရရှိခဲ့တယ်လို့ ဆိုပေမယ့် အတည်ပြုနိုင်ခြင်းတော့ မရှိပါဘူး။

မွန်းလွဲ ၂ နာရီခွဲလောက်မှာလည်း အမြင့်ဘက်ကနေ မုံရွာဘက်ကို ပြန်လည်ဆန်လာသော ရေယာဉ် ၂ စင်းကို ဒေသခံကာကွယ်ရေးတပ်တွေက နောက်ထပ် တိုက်ခိုက်ခဲ့ကြပြီး စစ်ကောင်တပ်က Mi 35 ရဟတ်ယာဉ်နဲ့ ချင်းတွင်းမြစ်ကြောင်းတလျှောက်လာရောက်ပစ်ခတ်ခဲ့တယ်လို့ ဆိုပါတယ်။

ပြည်သူ့ကာကွယ်ရေးရဲဘော်တွေ အထိအခိုက်မရှိ ဆုတ်ခွာနိုင်ခဲ့ပြီး ပြည်သူတွေအနေနဲ့ စစ်ကောင်စီတပ်စခန်းတွေ၊ စစ်ကောင်စီတပ်သားတွေရဲ့ အနီးတဝိုက်မှာ မနေကြဖို့ကိုလည်း သတိပေးထားပါတယ်။

ဒေသခံကာကွယ်ရေးမဟာမိတ်တပ်တွေဟာ ဒီဇင်ဘာ ၁၈ ရက် ညပိုင်းကလည်း မုံရွာမြို့နယ်က ပျူစောထီးနဲ့ စစ်ကောင်စီတပ်သားတွေရှိနေတဲ့ တောပုရွာကို လက်နက်ကြီးတွေနဲ့ သွားရောက် တိုက်ခိုက်ခဲ့ကြပါသေးတယ်။

စစ်ကိုင်းတိုင်း၊ ကလေးမြို့နယ် မြောက်ပိုင်း နန်းချောင်းကျေးရွာက ဒေသခံနေအိမ်တွေကို စစ်ကောင်စီတပ်က မီးရှို့ဖျက်ဆီးနေသလို ဒေသခံ ကာကွယ်ရေးတပ်ဖွဲ့တွေနဲ့လည်း တိုက်ပွဲတွေ ပြင်းထန်နေပါတယ်။

စစ်ကောင်စီတပ်တွေက ကလေးမြို့ အနောက်မြောက်ပိုင်း‌‌ဒေသ တာဟန်း-ရာဇဂြိုဟ် လမ်းမကြီးပေါ်ကို ဒီဇင်ဘာ ၁၂ ရက် ဒီနေ့မနက် ၇ နာရီလောက်က စစ်ကြောင်းထိုးလာစဉ် ဒေသခံကာကွယ်ရေးတပ်‌‌တွေက ကြားဖြတ်တိုက်ခိုက်ခဲ့တယ်လို့ ဒေသခံထံကသိရပါတယ်။

တိုက်ပွဲက မနက်အစောပိုင်းကစ ဖြစ်ပွားခဲ့ပြီး မနက် ၉ နာရီလောက်မှာတော့ စစ်ကောင်စီတပ်တွေက နန်းချောင်းရွာက ဒေသခံ‌နေအိမ်တွေကို မီးရှို့ဖျက်ဆီးနေကြတာလို့ ဆိုပါတယ်။

အဆိုပါတိုက်ပွဲကြောင့် တိုက်ပွဲဖြစ်ပွားရာအနီးရှိ လက်ပံချောင်း၊ ပြည်တော်သာနဲ့ နန်းချောင်းကျေးရွာက ဒေသခံတွေဟာ ဘေးလွတ်ရာဒေသတွေကို ထွက်ပြေးတိမ်းရှောင်နေကြတယ်လို့ ဒေသခံတဦးက ပြောပါတယ်။

“အခုချိန်ထိ မီးကလောင်နေဆဲပါ။‌ ခန့်မှန်းခြေ ၁၀ လုံးလောက်တော့ ရှိတော့မယ်။ စစ်ကြောင်းပြန်ထွက်မှ မီးရှို့ခံရတဲ့ အရေအတွက်ကို သိနိုင်မှာ။ ဒေသခံတွေကတော့ ပြေးနေကြရတာပါပဲ။ ရွာထဲမှာလည်း တချို့တလေ ပိတ်မိနေတယ်လို့ ပြောကြတယ်။ သေချာတော့မသိဘူး။”

စစ်ရေးအခြေအနေကြောင့် ကလေးမြို့ပေါ်မှာလည်း စစ်ကောင်စီတပ်တွေနဲ့ ပျူစောထီးအဖွဲ့တွေရော ကားဆိုင်ကယ်တွေစီးပြီး သေနတ်တွေနဲ့ ခြေရှုပ်နေကြတာကြောင့် ပြည်သူတွေအနေနဲ့ အသွားအလာ ဂရုစိုက်ကြဖို့ ဒေသခံ တော်လှန်ရေးတပ်ဖွဲ့တွေက သတိပေးထားပါတယ်။

တိုက်ပွဲပြင်းထန်နေဆဲဖြစ်တာကြောင့် တိုက်ပွဲတွင်းအခြေအနေနဲ့ မီးရှို့ဖျက်ဆီးခံရတဲ့ နေအိမ်အရေအတွက်ကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။

အလားတူ စစ်ကိုင်းတိုင်း၊ ကောလင်းမြို့နယ်ထဲက ကုက္ကိုကျွန်းရွာ၊ ပေပင်ချောင်ရွာ၊ ညောင်ကုန်း ရွာတွေကို ဒီဇင်ဘာ ၁၁ ရက်မှာ စစ်တပ်က မီးရှို့ခဲ့တာကြောင့် ​​ဒေသခံရွာသားတွေ ထွက်ပြေးနေရတယ်လို့ သိရပါတယ်။

ဒေသခံတဦးက “ညနေကျတော့ မီးရှို့တဲ့ရွာတွေဘက်ကို လက်နက်ကြီးနဲ့ ပစ်နေတယ်။ ဖုန်းလိုင်းတွေလည်း မကောင်းတော့ဘူး။ ရွာသားတွေကတော့ ပြေးနေရတယ်” လို့ ပြောပါတယ်။

ဒီဇင်ဘာ ၁၀ ရက်ကလည်း ဇီးဖြူကုန်းနဲ့ လျှော်ဖြူကုန်းရွာကို စစ်တပ်က မီးရှို့တာကြောင့် ဇီးဖြူကုန်းရွာက နေအိမ် ၄၅ လုံးနဲ့ လျှော်ဖြူကုန်းရွာက နေအိမ် ၂၅ လုံး မီးလောင်ပျက်စီးခဲ့တယ်လို့ သိရပါတယ်။

ကောလင်းမြို့နယ်ထဲကို စစ်တပ်က ဒီဇင်ဘာ ၉ ရက်က စတင် စစ်ကြောင်းထိုးလာတာကြောင့် အနီးအနားကျေးရွာက ဒေသခံတွေ ထွက်ပြေးနေရပြီး ဆေးဝါးနဲ့ စောင်တွေ လိုအပ်နေတယ်လို့ သိရပါတယ်။

စစ်ကိုင်းတိုင်းအတွင်းမှာပဲ ဆားလင်းကြီးမြို့နယ်ကနေ မုံရွာကို ဆန်တက်လာတဲ့ စစ်တပ်ရေယာဉ်တစီးကို ဒီဇင်ဘာ ၁၁ ရက် မနက် ၈ နာရီက လက်နက်ကြီးနဲ့ ပစ်ခတ်ခဲ့တယ်လို့ Monywa Peregrine People's Defence Force အဖွဲ့က သတင်းထုတ်ပြန်ပါတယ်။

ရေယာဉ်ပေါ်ပါတဲ့ စစ်တပ်ဟာ ဒီဇင်ဘာ ၈ ရက်မှ ၁၀ ရက်အထိ ဆားလင်းကြီးမြို့နယ်ထဲက ထန်းစဥ်၊ ဆားထုံး၊ ရွာသစ်၊ လက်ပံကျွန်း၊ တောကျောင်း ရွာတွေကို စစ်ကြောင်းထိုးကာ မီးရှို့ခဲ့သလို ရွာသားတွေကိုလည်း သတ်ဖြတ်ခဲ့တယ်လို့ ဆိုပါတယ်။

တဖက်ပွင့်မိုင်း ၆ လုံးနဲ့ နေရာ ၂ ခုကနေ တိုက်ခိုက်ခဲ့တာဖြစ်ပြီး စစ်တပ်က ပြန်ပစ်ခဲ့တာကြောင့် PDF ပူးပေါင်းရဲဘော်တွေရဲ့ လုံခြုံရေးအရ ဆုတ်ခွာခဲ့ရပြီး ထိခိုက်ကျဆုံးမှုကို စုံစမ်းနိုင်ခဲ့ခြင်း မရှိဘူးလို့လည်း ထုတ်ပြန်ထားပါတယ်။

ရခိုင်ပြည်နယ်၊ ဘူးသီးတောင်မြို့မှ စစ်တွေမြို့ကို ဒီဇင်ဘာ ၁၂ ရက် ဒီမနက် ၇ နာရီလောက်က ထွက်ခွာလာတဲ့ ရွှေပြည်တန် ခရီးသည်တင် အမြန်ရေယာဉ်နဲ့ စစ်ရေယာဉ်တို့တိုက်မိပြီး ခရီးသည် ၂ ယောက် ဒဏ်ရာရာသွားတယ်လို့  ရွှေပြည်တန်မြန်ရေယာဉ်တာဝန်ရှိသူက ပြောပါတယ်။

မြူ ကျနေတာကြောင့်  ဘူးသီးတောင်ချောင်းထွက်ဝမှာ ရပ်ထားတဲ့  စစ်ရေယာဉ်တစီးနဲ့  တိုက်မိခဲ့တာလို့ ဆိုပါတယ်။

အမြန်ရေယာဉ် တာဝန်ရှိသူက "မြူတွေကျနေတော့ ရပ်ထားတဲ့နေဗီကို မမြင်ရဘူး။ အနီးကိုရောက်ပြီး မြင်တော့ ကမ်းကို ထိုးရပ်လိုက်တာ။ နေဗီနဲ့တော့ လျှပ်ထိသွားတယ်။ ခရီးသည် ၂ ဦး ဒဏ်ရာရတယ်။ ဘူးသီးတောင်ဆေးရုံမှာ ဆေးကုပေးလိုက်ရတယ်။ တယောက်က ခေါင်းကွဲသွားတယ်။ နောက်တယောက်က ပွန်းပဲ့ဒဏ်ရာနဲ့ အကြောက်လွန်ပြီး သတိ‌မေ့သွားတာ" လို့ ပြောပါတယ်။

အခုလို တိုက်မိတာကြောင့် ခရီးသည် ၂ ယောက် ဒဏ်ရာရခဲ့သလို ခရီးသည်တင် အမြန်ရေယာဉ်ရဲ့ ဦးပိုင်း အနည်းငယ် ပျက်စီးသွားခဲ့တယ်လို့ ဆိုပါတယ်။

"အခုဆို မင်းချောင်းတံတားကို ကျော်သွားပါပြီ။ နေ့လယ် ၁ နာရီလောက်ဆို စစ်တွေကို ရောက် တော့မှာပါ။ ဒဏ်ရာရသူတွေကိုတော့ စပိဘုတ်နဲ့ သွားသယ်လိုက်တယ်။ သူတို့လည်း ဆေးရုံက ဆင်းကြပါပြီ။ ဒဏ်ရာရတာက ရသေ့တောင်က တဦးနဲ့ စစ်တွေက တဦးပါ" လို့ ရွှေပြည်တန်မြန်ရေယာဉ်တာဝန်ရှိသူက ပြောပါတယ်။

အမြန်ရေယာဉ်မတော်တဆတိုက်မိခဲ့တာကြောင့် ဒဏ်ရာရပြီး ဆေးရုံတက်ကုသခဲ့ရတဲ့ အမျိုးသမီး ၂ ယောက်ကတော့  လက်ရှိမှာ ဘူးသီးတောင်မြို့ ရွှေပြည်တန်တာဝန်ရှိသူတွေရဲ့ အစီအစဉ်နဲ့ ကျန်းမာစွာအနားယူနေပြီး မနက်ဖြန်နေရပ်ကို  ပို့ဆောင်ပေးမယ်လို့ သိရှိရပါတယ်။