ရုရှားနဲ့ ယူကရိန်းကြား စစ်ရေးတင်းမာနေမှုကို သံတမန်နည်းနဲ့ ဖြေရှင်းနိုင်ဖို့ အမေရိကန်နိုင်ငံခြားရေးဝန်ကြီး အန်တိုနီ ဘလင်ကင်ဟာ ဇန်နဝါရီ ၁၉ ရက်နေ့က ယူကရိန်းကို သွားရောက်ပြီး သမ္မတ ဗိုလိုဒီမာ ဇာလန်းစကီး နဲ့ တွေ့ဆုံခဲ့ပါတယ်။
ဘလင်ကင်က “ပဋိပက္ခကို သံတမန်နည်းနဲ့ဖြေရှင်းမှုကသာ အဓိက ဦးစားပေးမှု ဖြစ်ရပါမယ်။ မော်စကိုအနေနဲ့ ကျူးကျော်ရန်လိုမှုအသစ်တွေကို ရွေးချယ်မယ်ဆိုရင် ရှေ့မှာရင်ဆိုင်ရမယ့် အကျိုးဆက်က ကြီမားပါတယ်” လို့ ပြောပါတယ်။
သမ္မတ ဇာလန်စကီးက အမေရိကန်ရဲ့ စစ်ရေးကူညီမှုတွေကို ကျေးဇူးတင်ကြောင်းနဲ့ အဲဒီအကူအညီဟာ နေတိုးအဖွဲ့ထဲ ယူကရိန်းဝင်ရောက်ရေး မဟာဗျူဟာအတွက် အထောက်အပံ့အများကြီးဖြစ်ကြောင်း ပြောပါတယ်။
ယူကရိန်းနယ်စပ်မှာ ရုရှားတပ် ထောင်သောင်းချီချထားမှုအပေါ် အမေရိကန်နဲ့ အနောက်အုပ်စုက စိုးရိမ်မှုမြင့်တက်နေချိန်မှာ ဘလင်ကင်က ကီးယက်ဗ်မြို့ကို သွားရောက်ခဲ့တာပါ။
ရုရှားဘက်ကတော့ ယူကရိန်းအား တိုက်ခိုက်မယ့်အစီအစဉ်ကို ငြင်းဆိုထားပြီး အနောက်အုပ်စုအနေနဲ့ ယူကရိန်းကို နေတိုးအဖွဲ့ဝင်အဖြစ် လက်မခံဖို့ အဓိကတောင်းဆိုထားပါတယ်။
ဇာလန်စကီးနဲ့ တွေ့ဆုံပြီးနောက် အမေရိကန်နိုင်ငံခြားရေးဝန်ကြီး ဘလင်ကင်ဟာ ဂျာမဏီမှာ နေတိုးမဟာမိတ်တွေနဲ့ တွေ့ဆုံဖို့ ရှိပါတယ်။ အဲဒီနောက် ဂျီနီဗာမှာ ရုရှားနိုင်ငံခြားရေးဝန်ကြီး ဆာဂေအိ လက်ဗရော့ဗ်နဲ့ ထပ်မံတွေ့ဆုံမှာ ဖြစ်ပါတယ်။
ရှမ်းပြည်နယ်မြောက်ပိုင်း၊ မုံးကိုးဒေသအတွင်း စစ်ရေးတင်းမာမှု လျော့ကျစေလိုတဲ့ ရည်ရွယ်ချက်နဲ့ MNDAA ဗဟိုဌာနချုပ်က မုံးကိုးဒေသမှာရှိတဲ့ သူ့ရဲ့တပ်ခွဲ ၃ ခုကို သတ်မှတ်နေရာ ၃ နေရာကနေ ဆုတ်ခွာဖို့ အမိန့်ပေးထားတယ်လို့ MNDAA ပြောရေးဆိုခွင့်ရှိသူ လီထျန်းဖူက ကိုးကန့်သတင်းဌာနကနေ ထုတ်ပြန်ပါတယ်။
ဒါ့အပြင် မုံးကိုးမှ ပန်ဆိုင်းတံတားကြားရှိ စနိုက်ပါတပ်သားချုံခို ပွိုင့်နေရာ ၂ နေရာကိုလည်း ဆုတ်ခွာဖို့ ညွှန်ကြားထားတယ်လို့ နိုဝင်ဘာ ၉ ရက်နေ့စွဲနဲ့ သတင်းထုတ်ပြန်ချက်မှာ ဖော်ပြပါတယ်။
စစ်တပ် အဏာသိမ်းမှုကြောင့်ဖြစ်ပေါ်လာတဲ့ ပဋိပက္ခတွေကို နိုင်ငံရေးနည်းလမ်းဖြင့်ဖြေရှင်းဖို့လည်း MNDAA ကိုးကန့်တပ်ဖွဲ့က တိုက်တွန်းလိုက်ပါတယ်။
MNDAA ပြောရေးဆို ခွင့်ရှိသူလီထျန်းဖူက “မိမိတို့သည် အကြမ်းဖက်စစ်ကောင်စီအား ရောဂါကာကွယ်ရေး၊ ပြည်သူလူထု လူမှုစီးပွားအဆင်ပြေစေရေး၊ ငြိမ်းချမ်းစွာဆွေးနွေးညှိနှိုင်းရေး၊ နှစ်ဖက်သွေးထွက်သံယိုဖြစ်မှု လျော့ကျစေရေး၊ သမိုင်းပေးတာဝန်ကိုသိတတ်ရေး အာဏာသိမ်းမှုကြောင့်ဖြစ်ပေါ်လာသော ပဋိပက္ခများကို နိုင်ငံရေးနည်းလမ်းနဲ့ ဖြေရှင်းပြီး နိုင်ငံတော်အားစစ်မှန်သော ဒီမိုကရေစီလမ်းကြောင်းပေါ်သို့ ရောက်ရှိရေး တိုက်တွန်းနှိုးဆော်တယ်” လို့ ထုတ်ပြန်ချက်မှာ ပြောပါတယ်။
ရှမ်းပြည်နယ်၊ ကြူကုတ် (ပန်ဆိုင်း) မြို့နယ်ခွဲနဲ့ မုံးကိုးမြို့နယ်ခွဲအတွင်း စစ်ကောင်စီတပ်တွေနဲ့ မြန်မာအမျိုးသားဒီမိုကရက်တစ် မဟာမိတ်တပ်မတော် ကိုးကန့် MNDAA တို့အကြား ပြီးခဲ့တဲ့ ဩဂုတ်လကတည်းကနေ အခု နိုဝင်ဘာလဆန်းပိုင်းအထိ တိုက်ပွဲ ပြန်လည် ပြင်းထန်ဖြစ်ပွားခဲ့တာ ဖြစ်ပါတယ်။
ကြူကုတ် (ပန်ဆိုင်း) အနီးတဝိုက် တိုက်ပွဲ ပြင်းထန်လာလို့ ရွာပေါင်း ၈ ရွာက ဒေသခံ ထောင်ချီ တရုတ်နယ်စပ် တလျှောက်မှာ ယာယီ ထွက်ပြေး တိမ်းရှောင်နေရတာလည်းရှိခဲ့ပါတယ်။
