စစ်ကိုင်းတိုင်း၊ ယင်းမာပင်မြို့နယ်နဲ့ ပုလဲမြို့နယ်မှာ သောက်သုံးရေမသန့်မှုကြောင့် စစ်ဘေးရှောင်ကလေးငယ်တွေ ဝမ်းပျက်ဝမ်းလျှောရောဂါနဲ့ သန်ရောဂါ ဖြစ်ပွားနေတဲ့အတွက် သံချဆေး တိုက်ကျွေးနေရတယ်လို့ ဒီမိုကရက်တစ်လူငယ်ကောင်စီရဲ့ ပုလဲမြို့နယ်တာဝန်ခံ ကိုမင်းတော်ဝင်က ပြောပါတယ်။

CDM ပြုလုပ်ထားတဲ့ ဆေးမှူး သူနာပြုဆရာမ ၂ ဦးနဲ့အတူ ကျေးရွာပေါင်း ၇ ရွာက အသက် ၁၀ လကနေ ၁၆ နှစ်ထိ ကလေးပေါင်း ၁,၃၆၈ ယောက်ကို မတ်လ ၆ ရက်မှာ ပထမအကြိမ်၊ မတ်လ ၁၃ ရက်မှာ ဒုတိယအကြိမ်၊ မတ်လ ၁၄ ရက်မှာ တတိယအကြိမ် သန်ချဆေး တိုက်ကျွေးခဲ့တယ်လို့ သိရပါတယ်။

“စစ်ကြောင်းထိုးလာရင် ပြေးနေလွှားနေရတော့ ကလေးတွေက တွေ့ရာရေသောက်၊ ကြုံရာစားဆိုတော့ သန်တွေထိုးပြီး ဗိုက်ပူနံကားတွေ ဖြစ်နေကြတယ်။ ဝမ်းတွေလည်း ပျက်နေကြတယ်” လို့ ဆေးမှူးက ပြောပါတယ်။

ရာသီဥတု ပူပြင်းလာတဲ့အတွက် ကလေးတွေကနေ ရဲဘော်တွေ၊ မိဘတွေကိုလည်း ဝမ်းရောဂါ ကူးလာတဲ့အတွက် ဓာတ်ဆားထုပ်တွေကို ခက်ခက်ခဲခဲ ဝယ်ယူနေရတယ်လို့ ဆိုပါတယ်။

ပုလဲမြို့နယ် NUG လက်အောက်ခံ ကြားကာလပညာရေးကျောင်းက တာဝန်ခံ ကျောင်းအုပ်ဆရာတဦးက “ဝမ်းရောဂါဆိုတော့ ကူးတာက တအားမြန်နေတယ်။ ဓာတ်ဆားအထုပ် ၅၀ ရဖို့တောင် ကျနော်တို့ မနည်းဝယ်နေရတယ်။ ဆေးဆိုတာနဲ့ အသိမ်းခံရတယ်။ သန်ချဆေးတွေအတွက် နွေဦးနတ်ကွန်းဆိုတဲ့အဖွဲ့ကို အကူအညီတောင်းလိုက်တာ ကလေး ၂,၀၀၀ စာ ရောက်လာတယ်။ ကျန်တဲ့ကလေးတွေကိုလည်း ဆက်တိုက်သွားမှာပါ” လို့ ပြောပါတယ်။

စစ်ဘေးရှောင်နေရတဲ့ ကိုယ်ဝန်ဆောင်တွေ အနေနဲ့လည်း ဆေးရုံ၊ ဆေးခန်း သွားမယ့်လမ်းတွေမှာ စစ်ကောင်စီဂိတ်တွေ ရှိနေတဲ့အတွက် စစ်ရှောင်အမျိုးသမီး အချင်းချင်း ကလေးမီးဖွားပေးရတာမျိုးလည်း ရှိနေတယ်လို့ စစ်ရှောင်ဒေသခံတွေဆီက သိရပါတယ်။

စစ်ကိုင်းတိုင်း၊ ကလေးမြို့နယ်၊ တင်သားကျေးရွာအုပ်စု၊  အရှေ့စည်းကျေးရွာမှာ ‌စစ်ဘေးရှောင်ကလေးငယ် ၁၀၀ ဝန်းကျင်လောက် ဝမ်းလျှော ဝမ်းပျက် ရောဂါဖြစ်ပွားနေတဲ့အတွက် ဆေးဝါးကျန်းမာရေး အကူအညီတွေ လိုအပ်နေတယ်လို့  ဒေသခံပြည်သူတွေက ပြောပါတယ်။

ပြီးခဲ့တဲ့ ဧပြီလကုန်ပိုင်းလောက်ကစပြီး စစ်ကောင်စီတပ်ဖွဲ့တွေက အရှေ့စည်းရွာကို စစ်ကြောင်းထိုး ဝင်ရောက်လာတဲ့အတွက် ဒေသခံတွေအနေနဲ့ ဘေးလွတ်ရာမှာ ရှောင်တိမ်းနေကြရတာပါ။

အဲဒီလို စစ်ဘေးရှောင်ရင်း ကလေးငယ်တွေက တောင်ကျချောင်းရေချိုးပြီး တောင်ကျချောင်းရေကိုပဲ သောက်သုံးရတဲ့အတွက် ကလေးငယ်တွေအနေနဲ့ မေ ၄ ရက်ကစပြီး ဝမ်းလျှော ဝမ်းပျက် ဖြစ်ပေါ်နေကာ ကုသပေးမယ့်သူလည်း မရှိဘူးလို့ ဒေသခံတွေက ပြောပါတယ်။

ကလေးငယ် ၂၀၀ ဝန်းကျင်မှာ တဝက်နီးပါးက အခုလို ဖြစ်ပွားနေတာဖြစ်ပြီး လက်ရှိ တောတောင်တွေထဲမှာ စစ်ဘေးရှောင်နေရတဲ့အတွက် နေစရာ အခက်အခဲလည်း ရှိနေသလို စားနပ်ရိက္ခာတွေလည်း လုံလောက်မှုမရှိဘူးလို့ အရှေ့စည်းရွာက ဒေသခံတဦးက ဆိုပါတယ်။

အရှေ့စည်းရွာဟာ အိမ်ခြေ ၉၀၀ ဝန်းကျင်ရှိတဲ့ ကျေးရွာကြီးတခုဖြစ်ပြီး မေလဆန်းပိုင်းက စစ်ကောင်စီတပ်ဖွဲ့တွေ ဝင်ရောက်မီးရှို့ခဲ့လို့ ကျေးရွာအတွင်းက အိမ်ခြေ ၇၀၀ ကျော်လောက် မီးလောင်ဆုံးရှုံးခဲ့ပါတယ်။

ပြီးခဲ့တဲ့ ဧပြီ ၂၇ ရက်ကလည်း တိုက်ပွဲတွေကြောင့် ထွက်ပြေးတိမ်းရှောင်လာတဲ့ ဒေသခံတွေဟာ ဒိုးနွယ်မြစ်ကူးတံတား ကူးတဲ့အချိန် တံတားကျိုးကျပြီး ဒေသခံ ၇ ဦး ရေနစ်သေဆုံးခဲ့ပါသေးတယ်။