close

စစ်ရှောင်ပြည်သူများ

close

June 20, 2022

မင်းတုန်း စစ်ရှောင်များ စား၀တ်နေရေး အခက်အခဲကြုံနေ

PDF တွေကို ထောက်ပံ့ကူညီတယ်ဆိုပြီး မကွေးတိုင်း၊ မင်းတုန်းမြို့နယ်ထဲက ကျေးရွာတွေကို စစ်ကောင်စီတပ်က မီးရှို့ဖျက်ဆီးတာကြောင့် ဒေသခံတွေ ရခိုင်ရိုးမတောင်တန်းတွေမှာ ဖြစ်သလို နေထိုင်နေကြရပြီး စားဝတ်နေရေး အကူအညီ လိုအပ်နေပါတယ်။

အခုလက်ရှိ မိုးရာသီဖြစ်တာကြောင့် နေရေးထိုင်ရေး၊ ကျန်းမာရေးနဲ့ စား၀တ်နေရေး အရမ်းခက်ခဲနေကြတယ်လို့ တိမ်းရှောင်နေသူဒေသခံ အမျိုးသမီးတယောက်က ပြောပါတယ်။

“အခုလတ်တ‌လောမှာ ကိုယ်ဝန်ဆောင် အမျိုးသမီးတွေလည်း ပါတယ်၊ မွေးခါနီးနေပြီ၊ ဒီမှာက သူနာပြုတယောက်မှ မရှိဘူး။ လသားအရွယ်ကလေးတွေလည်းပါတယ်၊ အသက်အရွယ်ကြီးသူတွေလည်း ပါတယ်၊ မိုးကလည်း အရမ်းများပြီး သူတို့တဲလေးတွေက ဖြစ်သလို ပလတ်စတစ်တွေ၊ သစ်ခက်တွေနဲ့ ဆောက်ထားတော့ မိုးကလည်း မလုံဘူး၊ နေထိုင်မကောင်းဖြစ်ကြတော့လည်း တောထဲက အရွက်တွေနဲ့ပဲ ကြံဖန်ပြီး တယောက်တပြန် ပြန်ကုပေးနေရတာ။ နောက် တနေရာတည်းမှာလည်း စုမနေရဲကြဘူး၊ တနေရာမှာ မိသားစု ၂ စု၊ ၃ စုအပြင် ပိုမနေရဲကြဘူး။ စားဖို့ကတော့ ထောထဲက တောကောင်လေးဘာလေး ရှာရတဲ့နေ့တွေ၊ ဖားလေး၊ ငှက်ကလေးတွေရတဲ့ နေ့လောက်ပဲ အသားစားရတာ။ ဆန်ကလည်း စစ်ကောင်စီတပ် ငြိမ်တဲ့အချိန်တွေမှာ ရွာတွေထဲကို ခိုး၀င်ပြီး ဆန်လေးဘာလေးပြန်ရှာပြီး မျှစားနေရတာ၊ မျှစ်ပြုတ်လောက်ပဲ နပ်မှန်တာ။ ပြီးခဲ့တဲ့လကလည်း အမျိုးသမီးတယောက် မီးဖွားတာ ရွာက ရှိတဲ့ အမျိုးသမီးတွေကပဲ ၀ိုင်းဖွားပေးလိုက်ရတယ်။ အခုအသက်ကြီးသူတွေနဲ့ ကလေးငယ်တွေအတွက် စိုးရိမ်နေရတာ နေမကောင်းဖြစ်ရင် မလွယ်ဘူး။”

CDM ကျောင်းဆရာတဦးက “သူတို့က ဒီမှာ တိမ်းရှောင်နေကြတာ ၆ လ လောက်ရှိပြီး ကျနော်ကလည်း ကျောင်းဆရာ CDM ဆိုတော့ မြို့မှာနေလို့မရတော့ အဲဒီဘက်ကို သွားရှောင်နေရင်း ကလေးတွေကို စာသင်ပေးဖို့လုပ်နေတာ သူတို့တောင် နေစရာမရှိတဲ့အထဲမှာ ကျနော်လည်း ဖြစ်သလို၊ ရအောင်သင်ပေးမယ်ဆိုပြီး အားထုတ်နေရတာ။ ကလေးတွေအတွက်က ပုံနိုပ်စာအုပ်လည်း တအုပ်မှမရှိကြပါဘူး။ အခုတော့ မိုးမရွာတဲ့ နေတွေမှာပဲ စာသင်နိုင်တယ်၊ ကလေးအများစုရှိနိုင်တဲ့နေရာမှာ တခြားတဲစုတွေက ကလေးတွေပါခေါ်သွားပြီး ဖြစ်သလို သင်ပေးနေရတာ။ သူတို့က တနေရာနဲ့တနေရာ နည်းနည်းဝေးကြတယ်၊ အတူတူစုမနေရဲကြဘူး။ အဲ့ဒီလိုစုနေရင် စစ်ကောင်စီက လက်နက်ကြီးနဲ့ လှမ်းလှမ်းထုနေလို့။ ခလေးတွေအတွက်ကတော့ စာသင်ပေးဖို့ နေရာတခုနဲ့ စာအုပ်၊ စာရေးကိရိယာတွေလိုပါတယ်၊ အခုက ကျောင်းဆရာအနေနဲ့ ကျနော်တယောက်တည်းပဲ ရှိတယ်” လို့ ပြောပါတယ်။’

ပြီးခဲ့တဲ့ မတ်လကတည်းက မင်းတုန်းမြို့နယ်ထဲမှာ အထိုင်စခန်းချနေတဲ့ သရက်မြို့ဘက်ကလာတဲ့ စစ်ကောင်စီတပ်တွေက ရခိုင်ရိုးမပေါ်က ကျေးရွာတွေမှာ PDF စခန်းတွေရှိတယ်ဆိုပြီး မင်းတုန်းအထိုင်နေရာကနေ လက်နှက်ကြီးတွေနဲ့ နေ့စဉ်ရက်ဆက်ပစ်ခတ်တာတွေ၊ တောင်ပေါ် က ရွာတွေကိုလာပြီး ဒေသခံတွေကို ဖမ်းဆီးတာတွေ၊ ရွာကနေ နှင်ထုတ်တာ၊ ရွာတွေကို မီးရှို့တာတွေကြောင့် ဒေသခံတွေ ရွာမှာမနေရဲကြတော့ဘဲ တောင်ပေါ်တက်ပြီး ဖြစ်သလို ပုန်းလျှိုးနေထိုင်နေကြရတာပါ။

ဒါ့အပြင် ကံမမြို့နယ်နဲ့ မင်းတုန်းမြို့နယ်ထဲက ကျေးရွာတွေမှာလည်း စစ်ကောင်စီတပ်က မကြာခဏ ၀င်ရောက်ဖမ်းဆီးတာတွေ လုပ်တာကြောင့် ရခိုင်ရိုးမတောင်ပေါ်မှာ တိမ်းရှောင်နေကြတာ အိမ်ထောင်စု ၆၀ ကျော် ရှိပြီး နေရေးထိုင်ရေး ကျန်းမာရေးနဲ့ စားဝတ်နေရေး ခက်ခဲနေကြတယ်လို့ သိရပါတယ်။

7 mins Ago

May 30, 2022

ကရင်ပြည်နယ်က စစ်ရှောင်ပြည်သူများ ဆေးဝါးနှင့် လူသားချင်းစာမှုအကူအညီ လိုအပ်

ကရင်ပြည်နယ်အတွင်း ကေအန်ယူနယ်မြေရှိ စစ်ဘေးရှောင်ပြည်သူတွေဟာ နေထိုင်စားသောက်ရေးအပြင် ဆေးဝါးလိုအပ်ချက်တွေရှိနေတဲ့အတွက် လူသားချင်းစာနာမှုဆိုင်ရာ အကူအညီတွေ အရေးပေါ် လိုအပ်နေတယ်လို့ မေ ၃၀ ရက်က ကရင်ကျန်းမာရေးနှင့် ကယ်ဆယ်အရေးအဖွဲ့ဆီက သိရပါတယ်။

မိုးကာလရောက်ရှိလာပြီးဖြစ်တဲ့အတွက် ကေအန်ယူ တပ်မဟာ ၁၊ ၂၊ ၃၊ ၄၊ ၅၊ ၆ ထိန်းချုပ်နယ်မြေရှိ စစ်ဘေးရှောင်တွေဟာ စားရိက္ခာ၊ သောက်ရေသန့်၊ လုံခြုံတဲ့ အဆောက်အဦတွေနဲ့ ကျန်းမာရေးအတွက်ဆေးဝါးတွေ အရေးပေါ် လိုအပ်ချက်တွေရှိနေတာပါ။

စစ်ဘေးရှောင်ပြည်သူတွေဟာ မသန့်ရှင်းတဲ့ရေတွေကို သောက်သုံးနေရတာတွေကြောင့် ငှက်ဖျားနဲ့ ဝမ်းပျက်ဝမ်းလျောရောဂါတွေခံစားနေကြရတဲ့အပြင် တီဘီရောဂါတွေပါ ခံစားနေကြရပါတယ်။

ကော်သူးလေကရင်ကျန်းမာရေးနှင့် ကယ်ဆယ်အရေးအဖွဲ့ အတွင်းရေးမှူး စောလာစဲက” နေထိုင်ဖို့ လုံခြုံတဲ့ အဆောက်အအုံနဲ့ စားနပ်ရိက္ခာတွေ၊ဆေးဝါးတွေ လိုတယ်။ လောလောဆယ်အဲဒါတွေက အခက်အခဲရှိနေတယ်။ အခု တီဘီတွေပါဖြစ်နေတယ်။ ကျနော်တို့ ထိန်းချုပ်ခြင်းမရှိတဲ့ အမျိုးအစားတွေက တော်တော်လေးဖြစ်နေတယ်။ အဓိက ကတော့ ကလေးနဲ့သက်ကြီးရွယ်အိုတွေ”လို့ ဆိုပါတယ်။

လက်ရှိ မိုးတွင်းကာလ သယ်ယူပို့ဆောင်ရေးအတွက် သွားရေးလာရေး အခက်အခဲတွေကြောင့် အကူအညီပေးရေးအဖွဲ့တွေအနေနဲ့  အကူညီပေးနိုင်ဖို့ အခက်အခဲတွေရှိနေတယ်လို့ စစ်ရှောင်အရေးကူညီပေးနေသူတွေက ဆိုပါတယ်။

တောင်ငူခရိုင်၊ တပ်မဟာ ၂ နယ်မြေအတွင်း စစ်ဘေးရှောင်ပြည်သူတွေအနေနဲ့ တော၊ တောင်အတွင်း ထွက်ပြေးတိမ်းရှောင်ရင် ကိုယ်ဝန်ဆောင်မီးဖွားခဲ့ရသူတွေရှိသလို့ ကျန်းမာရေးစောင့်ရှောက်မှု မရရှိတဲ့အပြင် နေထိုင်မကောင်းသူတွေဟာ ဆေးဝါးအခက်အခဲတွေရှိနေတဲ့အတွက် အကူအညီတွေ လိုအပ်နေတယ်လို့ သံတောင်မြို့၊ တိုင်းရင်းသားလူမျိုး လူမှုအဖွဲ့အစည်း(အမျိုးသမီးအဖွဲ့)အဖွဲ့ဝင်တစ်ဦးက ပြောပါတယ်။

အထူးသဖြင့် သထုံခရိုင် တပ်မဟာ (၁)၊ တောင်ငူခရိုင် တပ်မဟာ(၂)၊ ညောင်လေးပင်ခရိုင် တပ်မဟာ (၃)၊ မြိတ်ထားဝယ်ခရိုင် တပ်မဟာ (၄)၊ ဖာပွန်(မူတြော်)ခရိုင်တပ်မဟာ (၅) နယ်မြေတွေဟာ သွားရေးလာရေးခက်ခဲတွေကြောင့် စစ်ဘေးရှောင်ပြည်သူတွေအတွက် လူသားချင်းစာနာမှု့ဆိုင်ရာ အကူအညီတွေ  အရေးပေါ်လိုအပ်နေတာပါ။

ပြီးခဲ့တဲ့နှစ် ဒီဇင်ဘာလက မြဝတီမြို့တောင်ဘက် လေးကေ့ကော်မြို့သစ်ကနေ စတင်လိုက်တဲ့ စစ်ကောင်စီတပ်ရဲ့ ကျူးကျော်တိုက်ပွဲတွေကြောင့် အိမ်မပြန်နိုင်သေးတဲ့ စစ်ရှောင် ပြည်သူတွေဟာ အခုမိုးဦးစရာသီမှာ ကျန်းမာရေးအတွက် လုံလောက်တဲ့ ဆေးဝါးမရှိဖြစ်နေကြပါတယ်။

မြန်မာ-ထိုင်း နယ်စပ် စစ်ဘေးလွတ်ကင်းနိုင်တဲ့ နေရာမှာ နေထိုင်နေတဲ့ စစ်ဘေးရှောင်တွေအများစုဟာ ယာယီတဲအိမ်တွေနဲ့ နေထိုင်နေကြတာဖြစ်လို့ မိုးရာသီရောက်လာတဲ့အခါ လေပြင်းဒဏ်မခံနိုင်လို့ ပျက်စီးမှုတွေလည်း ရှိပါတယ်။

ကေအန်ယူ ထိန်းချုပ်နယ်မြေတွေအတွင်းကို နယ်မြေကျော်ဝင်ရောက်လာတဲ့ စစ်ကောင်စီတပ်တွေနဲ့ KNLA ၊ KNDO ၊ PDF ပူးပေါင်းတပ်အကြား တိုက်ပွဲတွေကလည်း မကြာခဏ ဖြစ်ပွားနေပါတယ်။

စစ်ကောင်စီပူးပေါင်းတပ်တွေက ဒေသခံပြည်သူတွေနေထိုင်တဲ့ ကျေးရွာတွေအတွင်းကို လက်နက်ကြီးတွေအပြင် လေကြောင်းကပါ ဗုံးကြဲတိုက်ခိုက်ခဲ့တဲ့အတွက် အရပ်သားပြည်သူ ၇၀,၀၀၀ ကျော်ဟာ နေအိမ်စွန်ခွာပြီး တော၊ တောင်၊ လျှိုမြောင်တွေနဲ့ နယ်စပ်သောင်းရင်းမြစ်တလျှောက် ထွက်ပြေးတိမ်းရှောင်နေရပါတယ်။

Photo-DVB&KNU

3 weeks Ago
Up