ကချင်ပြည်နယ်၊ ရွှေကူမြို့နယ်မှာ တိုက်ပွဲတွေဖြစ်နေလို့ ထွက်ပြေးတိမ်းရှောင်နေကြရတဲ့ စစ်ဘေးရှောင်ပြည်သူတွေ ငှက်ဖျားရောဂါနဲ့ သွေးလွန်တုပ်ကွေးရောဂါ ဖြစ်ပွားမှု များပြားနေတယ်လို့ စစ်ရှောင်တွေက ပြောပါတယ်။
ရွှေကူမြို့အရှေ့ဘက်ခြမ်းမှာ တိုက်ပွဲဖြစ်ပွားနေပြီး လူနေအိမ်တွေ မီးရှို့ဖျက်ဆီးခံရတဲ့အတွက် ထွက်ပြေးတိမ်းရှောင်နေရတဲ့ ကျေးရွာ ၁၀ ရွာက စစ်ရှောင်ပြည်သူတွေ ငှက်ဖျားရောဂါနဲ့ သွေးလွန်တုပ်ကွေးရောဂါ အဖြစ်များနေတာလို့ ဆိုပါတယ်။
စီသောင်ကျေးရွာ စစ်ဘေးရှောင်တဦးက “ရွာပေါင်း ၁၀ ရွာလောက်က စစ်ဘေးရှောင် ၇,၀၀၀ နီးပါးလောက် တောထဲမှာ နေနေကြရတယ်။ တချို့ကလည်း မြို့ပေါ်မှာနေကြတယ်။ တိုက်ပွဲတွေဖြစ်နေတော့ ပြန်လို့လည်းမဖြစ်၊ အိမ်တွေကလည်း မီးရှို့ခံလိုက်ရတော့ နေစရာမရှိဖြစ်နေတော့ တောထဲမှာပဲ နေကြရတယ်။ အခုရက်ပိုင်း သက်ကြီးရွယ်အိုတွေ၊ ကိုယ်ဝန်ဆောင်တွေနဲ့ ကလေးငယ်တွေ သွေးလွန်တုပ်ကွေးနဲ့ ငှက်ဖျား အဖြစ်များတယ်” လို့ ပြောပါတယ်။
တိုက်ပွဲတွေဖြစ်ပွားနေပြီး နေအိမ်တွေ မီးရှို့ခံခဲ့ရတဲ့အတွက် ဒေသခံပြည်သူတွေ တောတောင်တွေထဲမှာ စစ်ဘေးရှောင်နေရတာ ၁ လကျော်ကြာမြင့်ပြီး မိုးရွာသွန်းမှုတွေ ဖြစ်ပွားပြီးနောက်ပိုင်း သွေးလွန်တုပ်ကွေးနဲ့ ငှက်ဖျားရောဂါ ဖြစ်ပွားသူ များပြားလာတာပါ။
စစ်ရှောင်ပြည်သူတဦးက “စစ်ဘေးရှောင်နေရတာ ၁ လကျော်ပြီ။ ပြီးခဲ့တဲ့ ဧပြီလလယ်လောက်မှာ မိုးတွေရွာတယ်။ မိုးရွာပြီးတဲ့နောက် သွေးလွန်တုပ်ကွေးနဲ့ ငှက်ဖျား အဖြစ်များလာတာပဲ။ တောထဲနေရတာဆိုတော့ လယ်ခင်းတဲလေးတွေထဲ တချို့နေကြတယ်။ တချို့ကလည်း မိုးကာလေးတွေနဲ့ နေကြရတယ်။ နေထိုင်ဖို့ အဆင်မပြေ၊ ဆေးဝါးမရှိတော့လည်း ရောဂါဖြစ်ပွားမှုနှုန်း ပိုများပြားလာတယ်။ ကလေးတွေလည်း ငှက်ဖျားနဲ့ တုပ်ကွေး ဖြစ်နေတာ အများကြီးပဲ” လို့ ပြောပါတယ်။
ကျေးရွာ ၁၀ ရွာက စစ်ဘေးရှောင်နေကြရတဲ့ ပြည်သူတွေထဲမှာ စီသောင်ကျေးရွာက စစ်ရှောင်ပြည်သူ ၂,၀၀၀ ကျော်လောက် ပါဝင်ပြီး ကလေးငယ် ၅၀၀ နီးပါးမှာ ၁၀၀ လောက် သွေးလွန်တုပ်ကွေးနဲ့ ငှက်ဖျားရောဂါ ဖြစ်ပွားနေတာပါ။
ပြီးခဲ့တဲ့ မတ် ၂၁ ရက်မှာ စစ်ကောင်စီတပ်က ရွှေကူမြို့နယ် အရှေ့ဘက်ခြမ်းက ကျေးရွာတွေကို ဝင်ရောက်စီးနင်းပြီး စီသောင်ကျေးရွာက နေအိမ် ၂၀၀ ကျော်၊ စီမူကြီးကျေးရွာက နေအိမ် ၄၀ ကျော်၊ စီမူလေးကျေးရွာက နေအိမ် ၇၀ ကျော်၊ မံနားကျေးရွာက နေအိမ် ၄၀ ကျော်၊ တုံကောက်ကျေးရွာမှာ နေအိမ် ၄၀ ကျော်၊ မံခါးကျေးရွာက နေအိမ် ၃၀ ကျော်၊ မံဝိန်းကျေးရွာမှာ နေအိမ် ၁၀၀ ကျော်၊ စီမော်ကျေးရွာက နေအိမ် ၁၀၀ ကျော်၊ နန့်လတ်ကျေးရွာက နေအိမ် ၃၀ ကျော်၊ နောင်လတ်ကြီးကျေးရွာက နေအိမ် ၃၀ ကျော်နဲ့ စီသာကျေးရွာက နေအိမ် ၁၀၀ ကျော်ကို မီးရှို့ဖျက်ဆီးခဲ့တာကြောင့် ဒေသခံ ၁၀,၀၀၀ နီးပါး နေရပ်စွန့်ခွာ စစ်ဘေးတိမ်းရှောင်နေကြရပါတယ်။
ရွှေကုက္ကိုလ်မြို့သစ် အနီးတဝိုက်ကို စစ်ကောင်စီလက်အောက်ခံ နယ်ခြားစောင့်တပ်(BGF) တပ်တွေက နယ်မြေပြန်လည်စိုးမိုးနိုင်ပြီဖြစ်လို့ စစ်ဘေးရှောင်ပြည်သူတွေ ဧပြီ ၉ ရက် မနက်ကစတင်ပြီး ထိုင်းအာဏာပိုင်တွေက ပြန်လည်ပို့ဆောင်ပေးနေတယ်လို့ စစ်ဘေးရှောင်တွေက ပြောပါတယ်။
စစ်ကောင်စီလက်အောက်ခံ နယ်ခြားစောင့်တပ်(BGF) တပ်နယ် ၃ နယ်မြေဖြစ်တဲ့ ရွှေကုက္ကိုလ်မြို့သစ်အပါအဝင် ထီ့ကော်ထော၊ ရိက္ခာကုန်း၊ ထီးချာရား၊ ၆၀၆၊ ၁၁၅၃ စတဲ့ အနီးတဝိုက်ကျေးရွာတွေက စစ်ဘေးရှောင်ပြည်သူ ၅၀၀၀ ကျော်ကို နယ်ခြား စောင့်တပ် (BGF) အထွေထွေအတွင်းရေးမှူး ဗိုလ်မှူးကြီးစောချစ်သူက နယ်မြေပြန်လည်စိုးမိုးနိုင်ပြီဖြစ်တဲ့အပြင် ပြန်လည်နေထိုင်ဖို့ခေါ်ယူခဲ့တဲ့အတွက် ထိုင်အာဏာပိုင်တွေက အခုလိုပြန်လည်ပို့ဆောင်နေတာပါ။
စစ်ဘေးရှောင်ပြည်သူတဦးက “ဒီမနက်ဘဲ ပြန်ပို့ပေးနေတာ။ စစ်ရှောင်အားလုံးကို ပြန်လာနေထိုင်လို့ရပြီ။ ပြန်လာဖို့ ဗိုလ်မှူးကြီးစောချစ်သူက ဒေသခံ ဆရာတော်တွေဆီကိုလည်း ဖုန်းဆက်ပြီးပြောတယ်။ အခုစခန်းလိုက် ပြန်နေကြပြီ” လို့ ပြောပါတယ်။
နယ်မြေတည်ငြိမ်သွားပြီဖြစ်တဲ့အတွက် ထိုင်းနိုင်ငံ မဲဆောက်မြို့နယ် မယ်ကု (၁၀ရပ်ကွက်) မှာရှိတဲ့ ပြောင်းဂိုဒေါင်၊ ဝမ့်ဖန် (ဘုန်ကြီးကျောင်း သစ်)၊ ဗမာဆေးခန်း စတဲ့ စစ်ဘေးရှောင်စခန်းတွေက စစ်ဘေးရှောင်ပြည်သူတွေကို ထိုင်းအာဏာပိုင်တွေက အသုတ်လိုက် မော်တော်ယာဉ်တွေနဲ့ ပြန်လည်ပို့ဆောင်ပေးနေတယ်လို့ စစ်ဘေးရှောင်အရေးကူညီပေးနေသူတဦးက ပြောပါတယ်။
“ဒီဘက်က အာဏာပိုင်တွေက ကားနဲ့အသုတ်လိုက် ပြန်ပို့ပေးနေတယ်။ ကျနော်တို့ ဝမ့်ဖန်စစ်ရှောင်စခန်းက ပြည်သူတွေကိုတော့ ထမင်းကျွေးပြီး ညနေလောက်ပြန်ပို့ဖို့ စီစဉ်ထားတယ်။”
နှစ်ဖက်တိုက်ပွဲအတွင်း ထီ့ကော်ထာကျေးရွာ အုပ်ချုပ်ရေးမှူးအပါအဝင် ဒေသခံပြည်သူ ၂ ဦး လက်နက်ထိမှန်သေဆုံးပြီး ၁၀ ဦးနီးပါး ဒဏ်ရာရရှိခဲ့သလို နေအိမ်နဲ့ဆိုင်ခန်းတချို့ မီးလောင်ပျက်စီးခဲ့တဲ့အပြင် ရိက္ခာကုန်းမှာရှိတဲ့ ဘုရားစေတီနဲ့ ဘုန်းကြီးကျောင်းပါ လက်နက်ကြီးထိမှန် ပျက်စီးခဲ့တယ်လို့ ဒေသခံတွေဆီက သိရပါတယ်။
နယ်ခြားစောင့်တပ် (BGF) ကင်းစခန်းတွေကို ဧပြီ ၅ ရက်နေ့ မနက် ၄ နာရီလောက်က စတင်တိုက်ခိုက်ခဲ့ရာမှ ၆ ရက်နေ့ထိ နှစ်ဖက်တိုက်ပွဲတွေပြင်းထန်ခဲ့ပြီး စစ်ကောင်စီတပ်သားတွေနဲ့ BGF တပ်သား ၈၀ ကျော်သေဆုံးကာ လက်နက်မျိုးစုံ ၇၀ ကျော်နဲ့ မော်တော်ယာဉ်တွေကို သိမ်းဆည်းရမိခဲ့သလို BGF ကင်းစခန်း ၅ ခုကို မီးရှို့ဖျက်ဆီးခဲ့တယ်လို့ Lion Battalion ဗျူဟာစစ်ကြောင်းက ထုတ်ပြန်ခဲ့ပါတယ်။
ထိခိုက်ကျဆုံးတာတွေနဲ့ပတ်သက်ပြီး အသေးစိတ်အချက်အလက်တွေကို စစ်ကောင်စီက သတင်းထုတ်ပြန်တာမရှိသလို ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
