မကွေးတိုင်း၊ အထက်မင်းလှမြို့နယ်က အရှိုချင်းရွာတရွာကို စစ်ကောင်စီတပ်တွေက မီးရှို့ဖျက်ဆီးခဲ့ပြီး ရွာ ၅ ရွာက ပြည်သူတွေ ထွက်ပြေးနေရတယ်လို့ ဒေသခံတွေက ပြောပါတယ်။
အင်အား ၃၀၀ လောက်ပါတဲ့ စစ်ကောင်စီတပ်သားတွေဟာ စစ်ကြောင်း ၃ ကြောင်း ခွဲပြီးတော့ ဧပြီ ၂၀ ရက်ကစပြီး ပုသိမ်-မုံရွာလမ်း အနောက်ဘက် လက်ပံတံခါးကျေးရွာ၊ မီးလောင်ကုန်းကျေးရွာနဲ့ မင်းတုန်း မြို့နယ်ဘက် တိုင်တား သရက်ချဉ်ရွာကနေ လာခဲ့တာဖြစ်ပါတယ်။
အဲဒီစစ်ကြောင်းတွေမှာ တပ်မ ၈၈ နဲ့ ကပစ ၂၊ ၁၀ နဲ့ ၁၃ အထိုင်ထုတ်လုပ်ရေး တပ်သားတွေအပြင် ရေတပ်၊ ရဲ တို့ကနေ ထုတ်နုတ်လာတာလို့ မြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံက ပြောပါတယ်။
“ရေရင်ရွာကို ဧပြီ ၂၂ ရက်နေ့ မနက် ၁၁ နာရီလောက်ကနေ မီးရှို့ခဲ့တာပါ။ တောင်ပေါ်ဒေသဆိုတော့ ဆက်သွယ်ရေးပိုင်း အဆင်မပြေလို့ သတင်းမြန်မြန်မရတာပါ။ စစ်ဘေးရှောင်တွေအနေနဲ့က လက်ရှိတောတောင်တွေထဲမှာပဲ ကြုံသလိုနေ နေရတုန်းပါ။ ထပ်ပြီးစစ်ကြောင်းထိုးလာမှာ ပြည်သူတွေကြောက်တဲ့အတွက် ရွာထဲ မဝင်ရဲကြပါဘူး မီးဘေးသင့်ရွာအတွက်လည်း အလှူရှင်တွေလိုအပ်နေပါတယ်” လို့ မြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံ ကိုရန်ကြီးအောင်က ပြောပါတယ်။
စစ်ကြောင်းသတင်းရကတည်းက ဒေသခံတွေဟာ ရွာတွေထဲမနေဘဲ အကုန်ထွက်ပြေး ခဲ့ကြတဲ့အတွက် လူတွေတော့ဘေးကင်းတယ်လို့လည်း သူက ပြောပါတယ်။
အန်အယ်လ်ဒီ ပါတီရဲ့ လွှတ်တော်ကိုယ်စားလှယ်ဖြစ်ပြီး လက်ရှိတော်လှန်ရေးမှာပါဝင်နေသူ ဒေါက်တာရဲထွန်းဇော်က ရေရင်ရွာဟာ အရှိုချင်းရွာဖြစ်ပြီး မီးရှို့ခံရပြီးနောက် အိမ်တလုံးပဲ ကျန်ခဲ့တယ်လို့ သိရကြောင်း ပြောပါတယ်။
စစ်ကြောင်းထိုးလာတာကြောင့် အထက်မင်းလှမြို့နယ်နဲ့ မင်းတုန်းမြို့နယ်အစပ်၊ အနောက်ရိုးမတောင်ပေါ်နေ အရှိုချင်းရွာက ရွာသူရွာသား ၃၀၀ လောက်ဟာလည်း စစ်ဘေးရှောင်တွေအဖြစ် ဘေးလွတ်ရာပုန်းအောင်းတိမ်းရှောင်နေရတယ်လို့ သူက ဆိုပါတယ်။
ရေရင်ရွာ၊ ရဖုံရွာ၊ တောင်ဖီလာ၊ ချောင်းသာနဲ့ ကျောက်စည်ရွာတို့ဖြစ်ပြီး ခရစ်ယာန်ဘုန်းတော်ကြီးနဲ့ ဗုဒ္ဓဘာသာဘုန်းတော်ကြီး၊ ကိုရင်နဲ့ သီလရင်တွေလည်း စစ်ဘေးရှောင်နေရတယ်လို့ သိရပါတယ်။
အကြမ်းဖက် စစ်ကောင်စီစစ်ကြောင်းကတော့ ဧပြီ ၂၆ ရက်နေ့မှာ မင်းတုန်းမြို့နယ်ဘက်ကို ထွက်သွားတယ်လို့ မြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံ ကိုရန်ကြီးအောင်က ပြောပါတယ်။
စစ်ကိုင်းတိုင်း၊ ဝက်လက်မြို့နယ်ထဲက စစ်ရှောင်စခန်းတွေမှာ စစ်ဘေးရှောင်ပြည်သူတွေဟာ သန့်ရှင်းတဲ့ သောက်သုံးရေမရတဲ့ ရေအခက်အခဲကြောင့် ဝမ်းပျက်၊ ဝမ်းလျှောရောဂါတွေ ဖြစ်ပွားနေတယ်လို့ အကူညီသွားပေးသူတွေထံက သိရပါတယ်။
ရွှေဘိုခရိုင်အမှတ် ၁၅ တပ်ရင်း တပ်ရင်းမှူး ဗိုလ်ကောက်ရိုးက “ဒီစစ်ရှောင်စခန်းမှာ သောက်ရေအခက်အခဲတွေကြောင့် ဝမ်းပျက်၊ ဝမ်းလျှောဖြစ်နေကြတယ်။ ဆေးရုံ၊ ဆေးခန်းပြဖို့ကို ဝက်လက်မြို့ပေါ်လည်း မသွားရကြဘူး။ သောက်ရေအခက်အခဲနဲ့ တခြားကူညီမှုတွေ လိုအပ်နေတယ်။ လူသားချင်းစာနာစိတ်နဲ့စိတ်ဓာတ်မြှင့်တင်ပေးနိုင်ဖို့ သွားကူညီခဲ့တာပါ"လို့ ပြောပါတယ်။
ဝက်လက်မြို့နယ်ထဲက စစ်ရှောင်စခန်း တစ်ခုကို ရွှေဘိုခရိုင်အမှတ် ၁၅ တပ်ရင်း(Eagle Guerrilla Force) က Visionary Support Team ရဲ့ ထောက်ပံ့မှုနဲ့အတူ ဧပြီ ၁ ရက်မှာ အခြေခံစားနပ်ရိက္ခာ နဲ့ ငွေကြေးအကူအညီကို သွားရောက်ပေးအပ်ခဲ့တယ်လို့လည်းဆိုပါတယ်။
စစ်ဘေးရှောင် အိမ်ခြေ ၁၁၈ လုံးရှိ အိမ်ထောင်စု ၁၇၀ ကျော်ထဲက စားဝတ်နေရေး အဆင်မပြေတဲ့ မိသားစု ၁၀၀ ကို စားဆီ၊ ငါးသေတ္တာ၊ ခေါက်ဆွဲ၊ ဆား၊ လက်ဖက်၊ အသားတု ကာဗော်လစ်ဆပ်ပြာတွေကို အချိုးကျထောက်ပံ့ပေးခဲ့ပြီး ဆန် ၃ ပိုင်း ပေးအပ်ခဲ့ကာ သက်ကြီးရွယ်အိုပါဝင်တဲ့ အိမ်ထောင်စု ၁၈ စုကို ငွေကျပ် ၁၅၀၀၀ စီ သွားရောက်လှူဒါန်းနိုင်ခဲ့တယ်လို့လည်း တပ်ရင်းမှူး ဗိုလ်ကောက်ရိုးက ပြောပါတယ်။
အဆိုပါ စစ်ရှောင်စခန်းတွေမှာ အဓိကလိုအပ်ချက်ဖြစ်တဲ့ သောက်ရေရှားပါးမှုတွေနဲ့ ကြုံနေရပြီး ကျန်းမာရေးထောက်ပံ့မှုတွေ လိုအပ်ကာ အရင်ကNUG တပ်ရင်းတွေက ကျန်းမာရေးမှူတွေ ရံဖန်ရံခါလာတာမျိုးရှိပြီး အခုနောက်ပိုင်းမလာတော့ဘူးလို့ စစ်ရှောင်တွေက ပြောပါတယ်။
လက်ရှိမှာတော့ တစ်နိုင်ငံလုံးအတိုင်းအတာနဲ့တောင်ပေါ်၊မြို့ပြ၊ကျေးလက်တွေမှာ စစ်ဘေးရှောင် တွေအလွန်များပြားနေပြီး နီးစပ်ရာတောတောင်တွေမှာ စစ်ဘေးရှောင်နေကြရတဲ့အတွက် သောက်ရေအခက်အခဲ၊ ဆေးဝါးနဲ့ စားနပ်ရိက္ခာလိုအပ်ချက်တွေရှိနေပါတယ်။
ဓာတ်ပုံ-ဗိုလ်ကောက်ရိုး
