ယခုဘဏ္ဍာနှစ်မှာ ပညာရေးနဲ့ ကျန်းမာရေးအတွက် အသုံးစရိတ်ကို ဘတ်ဂျက် စုစုပေါင်း အသုံးစရိတ်ရဲ့ ၁၅ ရာခိုင်နှုန်း သုံးစွဲဖို့ စစ်ကောင်စီက ထည့်သွင်းထားပေမယ့် အဆိုပါပမာဏဟာ ကာကွယ်ရေးအသုံးစရိတ်ရဲ့ ထက်ဝက်နီးပါးသာ ရှိတယ်လို့ ဘတ်ဂျက်လေ့လာသူတွေက ထောက်ပြထားပါတယ်။
အာဏာသိမ်း စစ်ခေါင်းဆောင်က အတည်ပြုပေးလိုက်တဲ့ ၂၀၂၃-၂၄ ဘဏ္ဍာနှစ် ပြည်ထောင်စု၏ဘဏ္ဍာငွေအရအသုံးဆိုင်ရာဥပဒေမှာ ပညာရေးအတွက် အသုံးစရိတ်ဟာ ကျပ် ၂,၁၈၈,၅၆၅ သန်း (၂,၁၈၈ဘီလီယံ) ရာခိုင်နှုန်းအားဖြင့် ၁၀ ရာခိုင်နှုန်းရှိပြီး ကျန်းမာရေးအတွက် အသုံးစရိတ်ဟာ ကျပ် ၈၁၄,၄၄၀ သန်း(၈၁၄ဘီလီယံ) ရာခိုင်နှုန်းအားဖြင့် ၄ ရာခိုင်နှုန်း အသီးသီး ရှိပါတယ်။
ဒါကြောင့် ပညာရေးနဲ့ကျန်းမာရေး နှစ်ခုအတွက် အသုံးစရိတ်ဟာ ကျပ် ၃,၀၀၃,၀၀၅ သန်း(၃,၀၀၃ဘီလီယံ) ရှိတာကြောင့် စုစုပေါင်းအသုံးစရိတ် ကျပ် ၁၉,၉၅၆,၃၇၀ သန်း(၁၉,၉၅၆ဘီလီယံ)နဲ့နှိုင်းယှဉ်ပါက ၁၅ ရာခိုင်နှုန်း သုံးစွဲဖို့ ထည့်သွင်းထားပါတယ်။
ဒါပေမဲ့ ပညာရေးနဲ့ကျန်းမာရေး နှစ်ခုအတွက် သုံးတဲ့ အဆိုပါပမာဏဟာ ကာကွယ်ရေးအသုံးစရိတ် ကျပ် ၅,၆၃၅,၁၀၂ သန်း (၅,၆၃၅ဘီလီယံ)နဲ့ နှိုင်းယှဉ်ပါက ထက်ဝက်နီးပါး(၅၃ ရာခိုင်နှုန်း)သာ ရှိတယ်လို့ ဘတ်ဂျက်လေ့လာသူတွေက ထောက်ပြထားပါတယ်။
“အခုတော့ စစ်တပ်က သူ့ဘာသာ အစိုးရဖွဲ့ပြီး လုပ်တာဆိုတော့ ဘယ်သူမှလည်း အထိန်းအထေ မရှိတော့ဘူး။ ဆိုတော့ သဘောက ကိုယ့်ဘာသာကိုယ် ဘတ်ဂျက်ချပြီး ကိုယ့်ဘာသာ သုံးလို့ ရသလို ဖြစ်သွားတာပေါ့နော်။ အရင်ကတော့ လွှတ်တော်နဲ့ကော်မတီတွေ ရှိတော့ ဘာပဲပြောပြော စောင့်ကြည့်လေ့လာမှု အောက်ကနေ ဖြတ်ရတယ်လေ။ အခုတော့ ဒါတွေ မရှိတော့ဘူး။ ဆိုတော့ ပိုဆိုးသွားတာပေါ့။ အရင် နဝတ၊နအဖ စစ်အစိုးရလက်ထက်မှာလည်း ကျန်းမာရေးနဲ့ ပညာရေးအတွက် ဘာမျှ ဂရုမစိုက်ဘူးလေ။ ဒီတော့ ဘတ်ဂျက်က ဘာမျှ မသုံးသလောက်ပဲ။ အခုလည်း အဲ့လိုမျိုး ပြန်ဖြစ် လာမှာပေါ့” လို့ ဒီဗွီဘီကို ပြောပါတယ်။
မြန်မာနိုင်ငံမှာ လွှတ်တော်ပေါ်လာပြီးနောက် အရပ်သားတပိုင်း အစိုးရနဲ့ ဒီမိုကရေစီ အရပ်သား အစိုးရအဖွဲ့တို့ လက်ထက်မှာ ဘတ်ဂျက်နဲ့ပတ်သတ်ပြီး ခေတ်မီ တပ်မတော် တည်ဆောက်နိုင်ရေး ဆိုတဲ့ ခေါင်းစဉ်အောက်မှာ ကာကွယ်ရေး အသုံးစရိတ်တွေကို တနှစ်ထက်တနှစ် ပိုမို တောင်းခဲ့တဲ့ နှစ်တွေသာ ရှိခဲ့ပါတယ်။
ဒါကြောင့် လွှတ်တော်က ကာကွယ်ရေး အသုံးစရိတ်တွေကို တိတိကျကျ စိစစ်ခွင့် ရရှိအောင် ကြိုးပမ်းခဲ့ပေမယ့် အလုံးစုံ အောင်မြင်မှုတော့ မရရှိခဲ့ ပါဘူး။ ကာကွယ်ရေးအတွက် အသုံးစရိတ်တွေကို တပ်မတော် စစ်ဆေးရေး အရာရှိချုပ်က စစ်ဆေးလေ့ရှိပြီး ငွေလုံးငွေရင်း အသုံးစရိတ်နဲ့ သာမန် အသုံးစရိတ်တွေကိုသာ လွှတ်တော်က အကြမ်းဖျင်း စိစစ်ခွင့် ရရှိခဲ့တာပါ။
ပြီးခဲ့တဲ့ ၂၀၁၁-၁၂ ဘဏ္ဍာနှစ် သမ္မတဦးသိန်းစိန် အစိုးရလက်ထက်က ကာကွယ်ရေးအသုံးစရိတ်ဟာ ပြည်ထောင်စု ဘတ်ဂျက်ရဲ့ ၁၇ ရာခိုင်နှုန်းကျော်အထိ အမြင့်ဆုံးအသုံးပြုခဲ့တာ ရှိပါတယ်။ ထူးခြားချက်ကတော့ အဆိုပါကာလမှာ မြန်မာစစ်တပ်(တပ်မတော်) နဲ့ KIA တို့အကြား တကျော့ပြန် တိုက်ပွဲတွေ ရှိနေတဲ့အချိန် ဖြစ်နေတာပါ။
တခါ အန်အယ်လ်ဒီအစိုးရလက်ထက် ပြီးခဲ့တဲ့ ၂၀၁၅-၁၆ ဘဏ္ဍာနှစ်မှာ ကာကွယ်ရေးအသုံးစရိတ်က ပြည်ထောင်စု ဘတ်ဂျက်ရဲ့ ၁၅ ရာခိုင်နှုန်းနီးပါး ရှိခဲ့ပါတယ်။ အဆိုပါနှစ်မှာလည်း မြန်မာစစ်တပ်(တပ်မတော်) နဲ့ တိုင်းရင်းသားလက်နက် ကိုင်တွေအကြား တိုက်ပဲအရေအတွက်က ၇၂၀ ကျော်ရှိခဲ့တယ်လို့ United Nations OCHA Myanmar က ထုတ်ပြန်ထား တာရှိပါတယ်။
ဒီ့အပြင် Institute for Strategy and Policy Myanmar(ISP-Myanmar) ရဲ့ သုတေသနစစ်တမ်းတွေအရ မြန်မာနိုင်ငံမှာ စစ်တပ် အာဏာသိမ်းပြီးနောက် ၂၀၂၁ ခုနှစ် မေလ မှစပြီး ၂၀၂၂ ခုနှစ် နိုဝင်ဘာလ ၁၅ရက်အထိ တိုက်ပွဲပေါင်း ၇၈၀၀ ကျော် ဖြစ်ပွားခဲ့တဲ့အနက် ထက်ဝက်ကျော် (၅၇ ရာခိုင်နှုန်း)က မြန်မာစစ်တပ်(တပ်မတော်) နဲ့ တိုင်းရင်းသား လက်နက်ကိုင်တပ်ဖွဲ့ (EAOs)တို့အကြား ဖြစ်ပွားခဲ့တဲ့ တိုက်ပွဲအရေအတွက် ဖြစ်ပါတယ်။
ပြည်သူ့ကာကွယ်ရေးတပ်ဖွဲ့(PDF) များနဲ့ မြန်မာစစ်တပ်(တပ်မတော်)တို့အကြား ဖြစ်ပွားခဲ့တဲ့ တိုက်ပွဲအရေအတွက်က ၂၂၀၀ ကျော် ရှိခဲ့တာ တွေ့ရပါတယ်။
အဆိုပါ ကိန်းဂဏန်းအချက်အလက်တွေဟာ လွတ်လပ်သော သတင်းမီဒီယာတွေနဲ့ အရပ်ဘက်အဖွဲ့အစည်းတွေရဲ့ ထုတ်ပြန်ချက်တွေအပေါ် အခြေခံထားတာ ဖြစ်တာကြောင့် မြေပြင်တွင် ယခုထက် တိုက်ပွဲအရေအတွက် ပိုမို များပြားနိုင်တယ်လို့ ISP-Myanmar ကထုတ်ပြန်ထားပါတယ်။
အကြမ်းဖက်စစ်တပ်ဟာ တိုင်းပြည်ကာကွယ်ရေးဆိုတဲ့ ခေါင်းစဉ်အောက်ကနေ အသုံးပြုခဲ့တဲ့ ကာကွယ်ရေး အသုံးစရိတ်တွေကို နှစ်အလိုက်ကြည့်ပါက ၂၀၁၆-၁၇ ဘဏ္ဍာနှစ်မှာ ကျပ် ၂၉၉၀ ဘီလီယံ၊ ၂၀၁၇-၁၈ ဘဏ္ဍာနှစ်မှာ ကျပ် ၃၁၉၂ ဘီလီယံ၊ ၂၀၁၈-၁၉ ဘဏ္ဍာနှစ်မှာ ၃၂၅၀ ဘီလီယံ၊ ၂၀၁၉-၂၀ ဘဏ္ဍာနှစ်မှာ ၃၃၈၅ ဘီလီယံ၊ ၂၀၂၀-၂၁ ဘဏ္ဍာနှစ်မှာ ၃၄၁၄ ဘီလီယံ အသီးသီး သုံးစွဲခဲ့တာ တွေ့ရပါတယ်။
တိုင်းပြည်ဘဏ္ဍာငွေတွေကို အခုလို နှစ်စဉ် တိုးမြှင့်သုံးစွဲခဲ့တဲ့ အကြမ်းဖက်စစ်တပ်ဟာ လက်ရှိမှာတော့ နိုင်ငံအနှံ့အပြားရှိ ပြည်သူတွေကို ပစ်ခတ် သတ်ဖြတ်နေပြီး ရွာလုံးကျွတ် မီးရှို့နေတဲ့အပြင် လေကြောင်းကပါ ဗုံးကြဲတိုက်ခိုက်တဲ့ အကြမ်းဖက် လုပ်ရက်တွေကို အပြင်းအထန် ပြုလုပ်နေပါတယ်။
တိုင်းပြည်ဆင်းရဲမွဲတေနေချိန်မှာ အာဏာသိမ်းစစ်ခေါင်းဆောင်ဟာ ထပ်တိုးဘတ်ဂျက် အတည်ပြုပြဋ္ဌာန်းကာ ကာကွယ်ရေးအသုံးစရိတ်ကို ကျပ် ၄,၁၄၀ ဘီလီယံကျော်အထိ စံချိန်တင် တိုးမြှင့်သုံးစွဲနေတဲ့အပေါ် ဘတ်ဂျက်ကျွမ်းကျင်တဲ့ လေ့လာသူတွေက ဝေဖန်ပြောကြားလိုက်ပါတယ်။
စစ်ခေါင်းဆောင်ဟာ နိုင်ငံတော်အာဏာကို တရားမဝင်သိမ်းပြီးနောက် ၂၀၂၂ ခုနှစ် မတ်လ ၂၉ ရက်နေ့စွဲနဲ့ အတည်ပြုပြဋ္ဌာန်းခဲ့တဲ့ ၂၀၂၂-၂၃ ဘဏ္ဍာနှစ် ပြည်ထောင်စု၏ ဘဏ္ဍာငွေ ရသုံးဆိုင်ရာ ဥပဒေမှာ ကာကွယ်ရေးအတွက် အသုံးစရိတ် ကျပ်သန်းပေါင်း ၃,၇၀၃,၈၆၆ ဒသမ ၇၉၈ (ဘီလီယံ ၃,၇၀၀ ကျော်) ထပ်ချပေးထားခဲ့တာပါ။ ဒီပမာဏဟာ ပြည်ထောင်စုဝန်ကြီးဌာနတွေနဲ့ ဦးစီးဌာနတွေရဲ့ စုစုပေါင်း အသုံးစရိတ်နဲ့ယှဉ်ရင် ရာခိုင်နှုန်းအားဖြင့် ၂၀ ဒသမ ၅ ရာခိုင်နှုန်းအထိ ရှိပါတယ်။
အခုတခါ ၂၀၂၂-၂၃ ဘဏ္ဍာရေးနှစ် ပြည်ထောင်စု၏ နောက်ထပ် ဘဏ္ဍာငွေခွဲဝေသုံးစွဲရေး ဥပဒေ ဆိုပြီး (နောက်တိုး ဘတ်ဂျက်) စစ်ခေါင်းဆောင်က ၂၀၂၂ ခုနှစ် ဒီဇင်ဘာ ၁၈ ရက်နေ့စွဲနဲ့ ထပ်မံခွင့်ပြုပေးလိုက်ပါတယ်။
ခွင့်ပြုချက်အရ ကာကွယ်ရေးအတွက် အသုံးစရိတ်က ကျပ်သန်းပေါင်း ၄၄၀,၂၀၉ ဒသမ ၂၂၈ (၄၄၀ ဘီလီယံ) ရှိပါတယ်။ အဆိုပါပမာဏဟာ ပြည်ထောင်စုဝန်ကြီးဌာနတွေနဲ့ ဦးစီးဌာနတွေရဲ့ စုစုပေါင်းအသုံးစရိတ် (ထပ်တိုးဘတ်ဂျက်) နဲ့ယှဉ်ရင် ရာခိုင်နှုန်းအားဖြင့် ၃၉ ရာခိုင်နှုန်းရှိပြီး အမြင့်ဆုံးရှိနေတာ တွေ့ရပါတယ်။
ဒါကြောင့် အကြမ်းဖက်စစ်ခေါင်းဆောင်ဟာ ၂၀၂၂-၂၃ ဘဏ္ဍာရေးနှစ် တနှစ်တည်းမှာ ကာကွယ်ရေးအတွက် အသုံးစရိတ် ကျပ်သန်းပေါင်း ၄,၁၄၀ ဘီလီယံကျော်အထိ သုံးစွဲဖို့ စံချိန်တင် ခွင့်ပြုပေးထားပါတယ်။
ဒါကြောင့် စစ်ကောင်စီအနေနဲ့ ကာကွယ်ရေးအတွက် အသုံးစရိတ်ကို တနှစ်တာအတွင်းမှာ စံချိန်တင် တိုးမြှင့်သုံးစွဲလာတာဟာ အကြောင်းမဲ့မဖြစ်နိုင်ဘူးလို့ ဘတ်ဂျက် စောင့်ကြည့်လေ့လာသူတွေက ဆိုပါတယ်။
သုတေသီတဦးက “ကာကွယ်ရေးအတွက် အသုံးစရိတ်က ဒီတနှစ်တည်းမှာ တော်တော်လေး တိုးလာတာ တွေ့ရတယ်။ ပြီးခဲ့တဲ့ကာလတွေမှာ သုံးခဲ့တဲ့ ကာကွယ်ရေးအသုံးစရိတ်ကို ပြန်ကြည့်တဲ့အခါ ဘတ်ဂျက်စုစုပေါင်းရဲ့ ၁၃ ရာခိုင်နှုန်းလောက် ေပးခဲ့တာ တွေ့ရတယ်။ အခုတော့ ထပ်တိုးဘတ်ဂျက်မပါခင် သူတို့ထုတ်တဲ့ စာရင်းတွေအရ ၁၈ ရာခိုင်နှုန်းလောက် ရှိတာဆိုတော့ ကာကွယ်ရေးအသုံးစရိတ်တွေ တက်လာတယ်လို့ ပြောနိုင်ပါတယ်။ ပြီးတော့ အခုဟာက သိတဲ့အတိုင်းပဲ စစ်အုပ်ချုပ်ရေးဆိုတော့ သူတို့ဆီမှာ check and balance ကလည်း မရှိဘူးလေ။ အရင်ကတော့ လွှတ်တော်ရှိတဲ့အတွက် လွှတ်တော်မှာ တင်ရတယ်။ ဒါကို အပြန်အလှန် ဆွေးနွေးပြီးတော့မှ စဉ်းစားဆုံးဖြတ်ကြတာပေါ့။ အခုတော့ စစ်ကောင်စီ ကို counter လုပ်မယ့်သူလည်း မရှိဆိုတော့ ကိုယ့်ဘတ်ဂျက်ကို ကိုယ့်ဘာသာကိုယ်ဆွဲပြီး သုံးသလိုတော့ ရှိတာပေါ့” လို့ ဒီဗွီဘီကို ပြောပါတယ်။
ဘတ်ဂျက်လေ့လာသူတဦးကလည်း “စစ်ကောင်စီက ခွင့်ပြုပေးလိုက်တဲ့ ထပ်တိုးဘတ်ဂျက် စာရင်းမှာ ကျန်းမာရေးအတွက် အသုံးစရိတ်က ကျပ်သန်းပေါင်း ၁,၂၀၀ (၁ ဒသမ ၂ ဘီလီယံ) ဆိုတာက ကာကွယ်ရေးအသုံးစရိတ် ကျပ်သန်းပေါင်း ၄၄၀ ဘီလီယံနဲ့ယှဉ်ရင် အဆပေါင်း ၃၀၀ ကျော်အထိ ကွာတယ်နော်။ ဆိုတော့ စစ်အုပ်ချုပ်ရေးအောက်က ကျန်းမာရေးစနစ် ဘယ်လိုဖြစ်မလဲဆိုတာ စဉ်းစားကြည့်လို့ ရပါတယ်။ တခါ ပညာရေးအသုံးစရိတ်ပေါ့။ သူကတော့ ကျပ်သန်းပေါင်း ၉ ဒသမ ၇ ဘီလီယံ သုံးမယ်ဆိုတော့ ကျန်းမာရေးလောက်တော့ မဆိုးဘူးပေါ့ဗျာ။ ဒါပေမဲ့ ကာကွယ်ရေးအသုံးစရိတ်နဲ့ ယှဉ်ရင်တော့ ၄ ဆကျော်လောက် နည်းတာ တွေ့ရတယ်။ ဒါကလည်း သိတဲ့အတိုင်းပဲလေ။ နယ်မြေစိုးမိုးရေးအတွက် တိုက်ပွဲတွေဖြစ်နေတာဆိုတော့ အသုံးစရိတ်က လိုတာပေါ့နော်။ တိုင်းပြည်အတွက်ကတော့ စိတ်မကောင်းစရာပဲ” လို့ ဒီဗွီဘီကို ပြောပါတယ်။
စစ်တပ်ဟာ တိုင်းပြည်ကာကွယ်ရေးဆိုတဲ့ ခေါင်းစဉ်အောက်ကနေ အသုံးပြုခဲ့တဲ့ ကာကွယ်ရေးအသုံးစရိတ်တွေကို နှစ်အလိုက်ကြည့်ပါက ၂၀၁၆-၁၇ ဘဏ္ဍာနှစ်မှာ ကျပ် ၂,၉၉၀ ဘီလီယံကျော်၊ ၂၀၁၇-၁၈ ဘဏ္ဍာနှစ်မှာ ကျပ် ၃,၁၉၂ ဘီလီယံကျော်၊ ၂၀၁၈-၁၉ ဘဏ္ဍာနှစ်မှာ ၃,၂၅၀ ဘီလီယံကျော်၊ ၂၀၁၉-၂၀ ဘဏ္ဍာနှစ်မှာ ၃,၃၈၅ ဘီလီယံကျော်၊ ၂၀၂၀-၂၁ ဘဏ္ဍာနှစ်မှာ ၃,၄၁၄ ဘီလီယံကျော် အသီးသီး သုံးစွဲခဲ့ပါတယ်။
တိုင်းပြည်ဘဏ္ဍာငွေတွေကို အခုလို နှစ်စဉ် တိုးမြှင့်သုံးစွဲခဲ့တဲ့ စစ်တပ်ဟာ လက်ရှိမှာတော့ နိုင်ငံအနှံ့အပြားရှိ ပြည်သူတွေကို ပစ်ခတ်သတ်ဖြတ်နေပြီး ရွာလုံးကျွတ် မီးရှို့နေတဲ့အပြင် လေကြောင်းကပါ ဗုံးကြဲတိုက်ခိုက်တဲ့ အကြမ်းဖက်လုပ်ရပ်တွေကို အပြင်းအထန် ပြုလုပ်နေပါတယ်။
စစ်ကောင်စီက စစ်အသုံးစရိတ်နဲ့ ကာကွယ်ရေးအသုံးစရိတ်တွေကို စံချိန်တင်သုံးစွဲနေချိန်မှာ တိုင်းပြည်ရဲ့ စီးပွားရေး၊ ကျန်းမာရေး၊ ပညာရေးတွေကတော့ ယိုယွင်းပျက်စီးပြီး ပြည်သူလူထုဟာလည်း ဆင်းရဲတွင်းနက် ခက်ခဲကျပ်တည်းနေကြတာ ဖြစ်ပါတယ်။
