ရှမ်းပြည်နယ်တောင်ပိုင်း အင်းလေးဒေသပြည်သူ့ကာကွယ်ရေးတပ်ဖွဲ့(IPDF)ကို ဇန်နဝါရီ ၁၀ ရက်က ဖွဲ့စည်းလိုက်ပြီး စစ်အာဏာရှင်စနစ်အမြစ်ပြတ်တဲ့အထိ နည်းလမ်းမျိုးစုံနဲ့ တော်လှန်တိုက်ခိုက်သွားမယ်လို့ ကြေညာပါတယ်။
စစ်အာဏာရှင်စနစ်ကို တော်လှန် တိုက်ခိုက်နေတဲ့ ရည်ရွယ်ချက်တူတဲ့ ဘယ်အဖွဲ့အစည်းတွေနဲ့မဆို မဟာမိတ်ပြု ပူးပေါင်းဆောင်ရွက်မယ်လို့ ဆိုပါတယ်။
ဒါ့အပြင် လူမျိုးဘာသာပေါင်းစုံ ပြည်သူလူထုတွေရဲ့ အသက်အိုးအိမ်စည်းစိမ်ကို ကာကွယ် စောင့်ရှောက်ဖို့၊ ပြည်သူလူထုမှ အမှန်တကယ်လိုလားတောင့်တတဲ့ ဖက်ဒရယ်ဒီမိုကရေစီ နိုင်ငံတော်ကြီး မရမချင်း တိုက်ပွဲဝင်သွားမယ်ဆိုတဲ့ အချက်တွေကိုလည်း ထည့်သွင်းဖော်ပြထားတာကို တွေ့ရပါတယ်။
တချိန်တည်းမှာပဲ အင်းလေးဒေသပြည်သူ့ကာကွယ်ရေးတပ်ဖွဲ့(IPDF)အနေနဲ့ အမျိုးသား ညီညွတ်ရေးအစိုးရ(NUG) နဲ့ ပြည်ထောင်စုလွှတ်တော်ကိုယ်စားပြုကော်မတီ(CRPH) တို့ရဲ့ ဦးဆောင်လမ်းညွှန်မှုကို လိုက်နာဆောင်ရွက်သွားမှာဖြစ်ပြီး စစ်ဘေးရှောင် ပြည်သူတွေ ကိုလည်း ကူညီစောင့်ရှောက်ကာကွယ်သွားမယ်လို့ ဆိုပါတယ်။
မြန်မာနိုင်ငံမှာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်က စတင်ကာ အကြမ်းဖက်စစ်အုပ်စုက မတရား အာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၁၁ လကျော် ကြာမြင့်ခဲ့ပြီ ဖြစ်ပါတယ်။
ဒီကာလတွေအတွင်း စစ်တပ်ရဲ့ အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီး ထောင်ချခံရသူတွေနဲ့အတူ နိုင်ငံတဝန်း တောရောမြို့ပါမကျန် ဒေသခံပြည်သူ့ ကာကွယ်ရေးတပ်တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေတာပါ။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ ကျဆုံးပြည်သူ ၁၄၆၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၁၁,၄၈၀ ကျော်ရှိပြီလို့ ဆိုပါတယ်။
အမျိုးသားညီညွတ်ရေးအစိုးရ(NUG)ကတော့ စစ်အာဏာရှင် ဆန့်ကျင်ရေး ခုခံတွန်းလှန် စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်း နေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ ပြီးခဲ့တဲ့ ၂၀၂၁ ခုနှစ်၊ စက်တင်ဘာ ၇ ရက်က ကြေညာထားပါတယ်။
စစ်အာဏာရှင်စနစ်တိုက်ဖျက်ရေး၊ ဖက်ဒရယ်ဒီမိုကရေစီပြည်ထောင်စုပေါ်ပေါက်ရေးအတွက် အဓိကရည်ရွယ်ပြီး မန္တလေးမှာ သပိတ်စစ်ကြောင်း ၂၀ ပူးပေါင်းကာ အထွေထွေ သပိတ်တပ်ပေါင်းစုတစ်ခုကို ဧပြီလ ၄ ရက်နေ့က ဖွဲ့စည်းလိုက်ပါတယ်။
ဒီသပိတ်တပ်ပေါင်းစုကနေ ဒေသအလိုက် သပိတ်ကော်မတီများဖွဲ့စည်းရေး၊ CDM လှုပ်ရှားမှုမှာ ပါဝင်သူများကို ကူညီရေး၊ စစ်အာဏာရှင်စနစ်တိုက်ဖျက်ရေးအတွက် လူထုသပိတ်တိုက်ပွဲများစုပေါင်းဖော်ဆောင်နိုင်ရေး၊ တိုက်ပွဲအရှိန်အဟုန် ထိန်းညှိနိုင်ရေး၊ လူထုလှုပ်ရှားမှုများကို စုပေါင်းကိုယ်စားပြုရေးတွေ လုပ်ဆောင်သွားမယ်လို့ ထုတ်ပြန်ချက်မှာ ပါရှိပါတယ်။
သပိတ်တပ်ပေါင်းစုမှာ ဗမာနိုင်ငံလုံးဆိုင်ရာကျောင်းသားသမဂ္ဂ၊ ဆရာသမဂ္ဂ သပိတ်စစ်ကြောင်းတွေ ၊ ဘုရားကြီးငြိမ်းချမ်းရေး သပိတ်စစ်ကြောင်း၊ မြန်မာ-မွတ်စလင်အဖွဲ့၊ ဟိန္ဒူဘာသာဝင်အဖွဲ့၊ ဥပဒေအထောက်အကူပြုအဖွဲ့တွေ ပါဝင်ကြပါတယ်။
နိုင်ငံတော်အာဏာသိမ်းခံရပြီးနောက် ဖေဖော်ဝါရီ ၆ ရက်ကစပြီး နိုင်ငံတဝန်း စစ်အာဏာရှင်ဆန့်ကျင်ရေး သပိတ်စစ်ကြောင်းတွေ ကိုယ့်အစုအဖွဲ့အလိုက် ပေါ်ထွက်လာခဲ့တာဖြစ်ပြီး လက်ရှိအချိန်အထိလည်း ပုံစံအမျိုးမျိုးနဲ့ သပိတ်စစ်ကြောင်းတွေ ဆက်လက် လမ်းပေါ်ထွက်ဆန္ဒပြနေကြပါတယ်။
မန္တလေးမြို့မှာ အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်အဖွဲ့တွေ နေရာအနှံ့မှာရှိနေပေမယ့် ဧပြီလ ၅ ရက် ဒီနေ့ မနက်ပိုင်းကလည်း စစ်အာဏာရှင်စနစ်ကျဆုံးရေးအတွက် စစ်ကြောင်းတွေပေါင်းပြီး ချီတက်ဆန္ဒပြခဲ့ကြပါတယ်။
ချီတက်ဆန္ဒပြရာမှာ ဘုရားကြီး ငြိမ်းချမ်းရေး သပိတ်စစ် ကြောင်း၊ ပညာရေးမိသား စုသပိတ်စစ်ကြောင်း၊ မန္တလေးကျူရှင်ဆရာများစစ်ကြောင်း၊ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်၊ ဒေါင်းစစ်သည်သပိတ်စစ်ကြောင်း၊ အ-ထ-က(၇) ကျောင်းသူ/သား ဟောင်းများအဖွဲ့တို့ ပါဝင်ခဲ့ကြပါတယ်။
