စစ်အာဏာရှင်စနစ်ကျရှုံးတဲ့အထိ ဆန့်ကျင်တော်လှန်နေတဲ့ အင်အားစုအဖွဲ့အစည်းအားလုံးနဲ့ ဆက်လက်တိုက်ပွဲဝင်သွားမယ်လို့ ကရင်အမျိုးသားအစည်းအရုံး (ကေအန်ယူ) တပ်မဟာ ၅ က ဧပြီ ၁၇ ရက်က ထုတ်ပြန်ခဲ့ပါတယ်။

ဧပြီ ၁၁ ရက်နေ့က စစ်ကောင်စီရဲ့ လေကြောင်းတိုက်ခိုက်မှုကြောင့် စစ်ကိုင်းတိုင်း ကန့်ဘလူမြို့နယ်၊ ပဇီကြီးကျေးရွာက အပြစ်မဲ့အရပ်သားပြည်သူ ၁၆၀ ကျော်သေဆုံးခဲ့ရတဲ့အပေါ် အခုလို ထုတ်ပြန်ကြေညာခဲ့တာပါ။

စစ်တပ်က အာဏာသိမ်းပြီးချိန်ကစပြီး ဒီကနေ့အထိ တိုင်းရင်းသား တော်လှန်ရေးနယ်မြေမှာသာမက ဗမာတိုင်းရင်းသားတွေနေထိုင်တဲ့ မြို့ပြဒေသတွေပါမကျန် အပြစ်မဲ့ပြည်သူတွေကို ရန်သူသဖွယ်သဘောတားပြီး မတရားပစ်ခတ်တိုက်ခိုက် သတ်ဖြတ်နေတာကို တွေ့မြင်နေရတယ်လို့ ဆိုပါတယ်။

မတရားတဲ့ နည်းလမ်းပေါင်းစုံကို ကျင့်သုံးပြီး ပြည်သူတွေအပေါ် ရာဇဝတ်မှုကျူးလွန်နေတဲ့ စစ်ကောင်စီတပ်တွေရဲ့ ရက်စက်ယုတ်မာမှုအပေါ် ကေအန်ယူတပ်မဟာ ၅ အနေနဲ့ လုံးဝကန့်ကွက်ရှုတ်ချတဲ့အပြင် သေဆုံးခဲ့ရတဲ့ ပြည်သူတွေရဲ့ မိသားစုတွေနဲ့အတူ ထပ်တူ ထပ်မျှဝမ်းနည်းရပြီး ပြည်သူတွေ အဖိနှိပ်ခံဘဝက လွတ်မြောက်စေဖို့အတွက် အသက်ပေးခဲ့ရတဲ့ ပုဂ္ဂိုလ်အားလုံးကိုလည်း လေးစားဂုဏ်ပြုအပ်ပါတယ်လို့ ထုတ်ပြန်ထားပါတယ်။

မင်းအောင်လှိုင်ခေါင်းဆောင်တဲ့ စစ်ကောင်စီဟာ မဟာလူမျိုးကြီးဝါဒနဲ့ စစ်အာဏာရှင်စနစ် တည်တံ့ခိုင်မြဲရေးအတွက်သာဖြစ်တဲ့အတွက် တိုင်းရင်းသားအဖွဲ့အစည်းတွေအပါအဝင် ဆန့်ကျင်တော်လှန်တဲ့ အင်အားစုအဖွဲ့အစည်းတွေအားလုံးနဲ့ ဆက်လက်တိုက်ပွဲဝင်သွားမယ်လို့ ဆိုပါတယ်။

ဒါအပြင် နိုင်ငံတကာအသိုက်အဝန်းအနေနဲ့ စစ်ကောင်စီကို ထိရောက်တဲ့ အပြစ်ပေးအရေးယူမှုတွေ လုပ်ဆောင်နိုင်ရေးအတွက် လက်တွေ့ကျကျဆောင်ရွက်ပေးကြဖို့ လိုအပ်တယ်လို့ တိုက်တွန်းထားပါတယ်။

ဖာပွန်ခရိုင်ပြည်သူ့ကာကွယ်ရေးတပ်ဖွဲ့ တာဝန်ရှိသူက “စစ်ကောင်စီကတော့ အပြစ်မဲ့ အရပ်သားပြည်သူတွေကိုပါ ပစ်မှတ်ထားပြီး ရက်စက်တဲ့ လုပ်ရပ်ကတော့ ဘယ်လိုမှ မခံစားနိုင်ဘူး။ အဲဒီအပေါ်မှာလည်း အကြမ်းဖက်စစ်အာဏာရှင်အမြစ်ပြတ်တဲ့အထိ တော်လှန်ရေးတပ်ဖွဲ့တွေအနေနဲ့ နိုင်ငံတကာရဲ့အကူအညီ ရသည်ဖြစ်စေ၊ မရသည်ဖြစ်စေ ဆက်ပြီး တော်လှန်ရေးအောင်မြင်တဲ့အထိ လုပ်ဆောင်သွားရမယ်ဆိုတာ ပိုပြီးစိတ်ဓာတ်တွေ ပြင်းထန်လာတယ်” လို့ ပြောပါတယ်။

လတ်တလောမှာ လက်နက်ကိုင်တိုင်းရင်းသားနယ်မြေတွေအပါအဝင် စစ်ကိုင်း၊ မကွေး၊ မန္တလေးတိုင်း စတဲ့နေရာတွေမှာ စစ်ကောင်စီတပ်တွေနဲ့ တော်လှန်ရေးတပ်ပေါင်းစုတွေ နေ့တိုင်း တိုက်ပွဲတွေဖြစ်ပွားနေပါတယ်။

စစ်အာဏာရှင်စနစ်ကို ဆန့်ကျင်တော်လှန်တဲ့ မြန်မာ့နွေဦးတော်လှန်ရေး ၂ နှစ်ကျော် ကာလအတွင်း အကြမ်းဖက်စစ်တပ်က အပြစ်မဲ့ပြည်သူ ၃,၀၇၀ ကျော်ကို သတ်ဖြတ်ခဲ့ပြီး အဲဒီထဲမှာ အရွယ်မရောက်သေးတဲ့ ကလေးသူငယ် အယောက် ၃၀၀ နီးပါး ပါဝင်နေတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ပြောပါတယ်။

အကြမ်းဖက်စစ်အုပ်စု အာဏာသိမ်းပြီးချိန်ကတည်းကနေ အခုနှစ်၊ ဖေဖော်ဝါရီ ၂၈ ရက်အထိ အေအေပီပီကနေ ကောက်ယူမှတ်တမ်းတင်ထားတဲ့ အဖမ်းအဆီးနဲ့ သေဆုံးအချက်အလက်တွေ ထုတ်ပြန်ချက်မှာ ဖော်ပြလိုက်တာဖြစ်ပြီး ကျဆုံးပြည်သူတွေထဲ စစ်ကိုင်းတိုင်းက အယောက် ၁,၀၀၀ ကျော်နဲ့ အများဆုံး ပါဝင်နေတာပါ။ အဲဒီနောက်မှာတော့ မန္တလေးတိုင်း၊ ရန်ကုန်တိုင်းနဲ့ မကွေးတိုင်းတွေက ကျဆုံးပြည်သူဦးရေ အများဆုံး ရှိနေတယ်လို့ ဆိုပါတယ်။

အဆိုပါ ကျဆုံးပြည်သူစုစုပေါင်းထဲမှာ ဖမ်းဆီးခံရပြီးနောက် သတ်ဖြတ်ခံရတဲ့ ရာခိုင်နှုန်းကတော့ ၃၄ ဒသမ ၆ ရာခိုင်နှုန်းထိ ရှိခဲ့ပြီး အမျိုးသမီးဦးရေ ၁၂ ဒသမ ၇ ရာခိုင်နှုန်းထိ ပါဝင်နေတာပါ။

ဒါ့အပြင် တော်လှန်ရေး ၂ နှစ်ကျော် ကာလအတွင်း ဖမ်းဆီးခံရတဲ့ စာရင်းမှာတော့ စုစုပေါင်းပြည်သူ ၁၉,၉၃၆ ယောက်ထိ ဖမ်းဆီးခံခဲ့ရပြီး အဲဒီထဲက ၁၆,၀၇၅ ယောက်ကတော့ လက်ရှိအချိန်ထိတိုင်အောင် ဖမ်းဆီးထိန်းသိမ်းခံနေရဆဲဖြစ်တယ်လို့ အေအေပီပီက ပြောပါတယ်။

အဆိုပါ ဖမ်းဆီးခံရသူတွေထဲမှာတော့ အမျိုးသမီးဦးရေ ၂၀ ဒသမ ၅ ရာခိုင်နှုန်းထိ ပါဝင်နေပြီး ကလေးသူငယ်ဦးရေကတော့ ၂ ဒသမ ၇ ရာခိုင်နှုန်းထိ ပါဝင်နေတယ်လို့ ဆိုပါတယ်။

ဒါ့အပြင် အကြမ်းဖက်စစ်အုပ်စုရဲ့ အရပ်သားပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှုတွေ၊ ဗုံးကြဲမှုတွေ အပါအဝင် စစ်ကောင်စီ လုံခြုံရေးတပ်ဖွဲ့တွေရဲ့ နှိပ်စက်မှုတွေ၊ လိင်အကြမ်းဖက်မှုတွေလည်း တိုးပွားလာနေပြီး ကာလရှည်ကြာလာတဲ့ ပဋိပက္ခကြောင့် ပြည်သူ ၁၇ သန်းကျော် အကူအညီတွေ လိုအပ်နေကာ ပြည်သူ ၁ သန်းခွဲကတော့ နေရပ်စွန့်ခွာ ထွက်ပြေးတိမ်းရှောင်နေကြရတယ်လို့ ဆိုပါတယ်။

လတ်တလောမှာတော့ ပြည်သူလူထုတရပ်လုံးရဲ့ ပြတ်သားတဲ့ စိတ်ပိုင်းဖြတ်မှု၊ စွန့်လွှတ်စွန့်စားမှု၊ ရဲစွမ်းသတ္တိနဲ့ တစိုက်မတ်မတ် ကြိုးစားအားထုတ်မှုတွေကို အရင်းတည်ပြီးတော့ တော်လှန်ရေးအုတ်မြစ်ဟာ အခြေခိုင်ခဲ့ကာ လက်ရှိအချိန်မှာ ဘယ်သူကမှ ဖြိုလှဲဖျက်ဆီးပစ်လို့ မရနိုင်တဲ့ ခိုင်မာအားကောင်းမှုတခုနဲ့ ရှေ့ဆက်နေပြီဖြစ်တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ထားပါတယ်။

ဒါ့အပြင် အကြမ်းဖက်စစ်ကောင်စီရဲ့ တရားမဝင် အတုအယောင်ရွေးကောက်ပွဲ အပါအဝင် တခြားသော ခြေလှမ်းတိုင်း၊ လုပ်ရပ်တိုင်းဟာ ပြည်သူ့အချုပ်အခြာအာဏာကို မတရားရယူဖို့ ကြိုးစားတဲ့ အာဏာဖီဆန်မှုမြောက်တဲ့ ဥပဒေချိုးဖောက်မှုတွေသာဖြစ်ပြီး မြန်မာနိုင်ငံရဲ့ တရားဝင်အစိုးရတရပ်ဖြစ်တဲ့ NUG အစိုးရအနေနဲ့ အဆိုပါ ဥပဒေချိုးဖောက်မှုတွေမှာ တာဝန်ရှိသူတွေအားလုံးကို တရားဥပဒေရှေ့မှောက်ကို ပို့ဆောင်ပြီး ထိခိုက်နစ်နာခဲ့ရသူ အားလုံးအတွက် တရားမျှတမှုကို ရယူပေးနိုင်ဖို့လည်း ကြိုးစားသွားမယ်လို့ ဆိုပါတယ်။