ရခိုင်ပြည်နယ်ဝန်ကြီးချုပ် ဦးညီပုနဲ့ စည်ပင်ဝန်ကြီး ဦးမင်းအောင်တို့ နှစ်ဦးတို့အပေါ်ချမှတ်ထားတဲ့ ၅၀၅ ပုဒ်မအတွက် ကျခံရမယ့်ပြစ်ဒဏ်ကို စစ်ကောင်စီက လျှော့ခဲ့တယ်လို့ နီးစပ်သူတွေက ပြောပါတယ်။
“အားလုံးကို ဖြေလျှော့လိုက်တာတော့ မဟုတ်ဘူးဗျ။ သူတို့ နှစ်ဦးကို ပုဒ်မ ၅၀၅ နဲ့ ချမှတ်ထားတဲ့ ပြစ်ဒဏ်ကို ဖြေလျှော့လိုက်တာပါ။”
ဇန်နဝါရီ ၄ ရက် စိန်ရတုလွတ်လပ်ရေးနေ့ အထိမ်းအမှတ်အဖြစ် စစ်ကောင်စီက အကျဉ်းသား ၇,၀၁၂ ဦး လွတ်ငြိမ်းခွင့်ပေးခဲ့ရာမှာ ရခိုင်ဝန်ကြီးချုပ် ဦးညီပုနဲ့ ဝန်ကြီး ဦးမင်းအောင်တို့ကို အခုလို ပြစ်ဒဏ် လျှော့ပေါ့ခဲ့တာပါ။
ရခိုင်ပြည်နယ်ဝန်ကြီးချုပ် ဦးညီပုကို စစ်ကောင်စီက ရွေးကောက်ပွဲ ဥပဒေ ပုဒ်မ ၁၃၀(က) နဲ့ ထောင်ဒဏ် ၂ နှစ်၊ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ ထောင်ဒဏ် ၉ နှစ်၊ ရာဇသတ်ကြီးပုဒ်မ ၅၀၅(ခ) နဲ့ အလုပ်ကြမ်းနဲ့ ထောင်ဒဏ် ၂ နှစ်၊ စုစုပေါင်း ၁၃ နှစ် အမိန့်ချခဲ့တာပါ။
စည်ပင်ဝန်ကြီး ဦးမင်းအောင်ကိုလည်း အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ ထောင်ဒဏ် ၇ နှစ်၊ ရာဇသတ်ကြီးပုဒ်မ ၅၀၅(ခ) နဲ့ ထောင်ဒဏ် ၂ နှစ်၊ စုစုပေါင်း ၉ နှစ် ချမှတ်ခံထားရတာ ဖြစ်ပါတယ်။
ရခိုင်ပြည်နယ်ဝန်ကြီးချုပ် ဦးညီပုဟာ ဘယ်ဘက်မျက်လုံးမှာ တိမ်စွဲနေတဲ့အတွက် ခွဲစိတ်ကုသနိုင်ဖို့ စစ်ကောင်စီကို တင်ပြထားပေမဲ့ ခွင့်ပြုချက် မကျနိုင်သေးဘူးလို့ နီးစပ်သူတွေက ပြောပါတယ်။
“မျက်လုံးတိမ်စွဲနေတာ အချိန်မီခွဲစိတ်မှ အဆင်ပြေမှာလေ။ မဟုတ်ရင် မျက်လုံးကွယ်သွားမှာပေါ့။ ခွင့်ပြုချက်တင်ထားတာ ၃ လကျော်ပြီလေ၊ ခွင့်မပြုသေးဘူး။ လူမှာ မျက်လုံးက အဓိကလေ။ အမြန်ခွင့်ပြုသင့်တာပေါ့။”
ရခိုင်ပြည်နယ်ဝန်ကြီးချုပ် ဦးညီပု အပါအဝင် အစိုးရအဖွဲ့ဝင် ဝန်ကြီးတွေဖြစ်ကြတဲ့ ဦကျော်အေးသိန်း၊ ဦးကျော်လွင်၊ ဦးအောင်ကျော်ဇံ နဲ့ ဦးမင်းအောင်တို့ဟာ လက်ရှိ စစ်တွေ အကျဉ်းထောင်မှာ ထောင်ဒဏ်တွေကျခံနေကြပြီး မိသားစုဝင်တွေနဲ့ လုံးဝတွေ့ခွင့်မရသေးဘူးလို့ နီးစပ်သူတွေဆီက သိရပါတယ်။
ရခိုင်ပြည်နယ် ဝန်ကြီးချုပ် ဦးညီပုနဲ့ စည်ပင်ဝန်ကြီး ဦးမင်းအောင်တို့ကို ရွေးကောက်ပွဲဆိုင်ရာ ဥပဒေပုဒ်မတွေနဲ့ ထပ်တိုးတရားစွဲဆိုထားတဲ့အမှုအတွက် စွဲချက်အမိန့်ချမှတ်လိုက်တယ်လို့ တရားရုံးနဲ့ နီးစပ်သူတွေက ပြောပါတယ်။
ဒီအမှုနဲ့ပတ်သက်ပြီး စစ်တွေအကျဉ်းထောင် အထူးတရားရုံးမှာ မတ်လ ၃ ရက် ဒီကနေ့ ရုံးထုတ်ခဲ့ပြီး ဦးညီပုနဲ့ ဦးမင်းအောင်တို့ရဲ့ရှေ့နေတွ ခရီးလွန်နေတာကြောင့် တရားခွင်မတက်ရောက်နိုင်ခဲ့ပေမဲ့ စွဲချက်လျှောက်လဲချက်ပေးခဲ့ကြပြီး စွဲချက်အမိန့်ပါ တစ်ခါတည်းချမှတ်လိုက်တယ်လို့ တရားရုံးနဲ့ နီးစပ်သူတစ်ဦးက ပြောပါတယ်။
လာမယ့် မတ်လ ၁၀ ရက်နေ့ကို ထပ်မံရုံးချိန်း ချိန်းဆိုလိုက်ပြီး ပြန်ခေါ်သက်သေတွေ ဆက်လက်စစ်ဆေးသွားဖို့ရှိနေပါတယ်။
ဝန်ကြီးချုပ် ဦးညီပုကို ရွေးကောက်ပွဲဆိုင်ရာ ဥပဒေတွေကို ချိုးဖောက်မှု စွပ်စွဲချက်နဲ့ ရာဇသတ်ကြီးပုဒ်မ ၁၃၀(က)နဲ့ တရားစွဲဆိုထားသလို ဝန်ကြီးဦးမင်းအောင်ကိုလည်း အားပေးကူညီတယ်ဆိုပြီး ရာဇသတ်ကြီးပုဒ်မ ၁၃၀(က)အပြင် ရာဇသတ်ကြီးပုဒ်မ ၁၀၉ နဲ့ပါ စစ်ကောင်စီခန့် ရခိုင်ပြည်နယ်ရွေးကောက်ပွဲကော်မရှင် ဒု-ညွန်ကြားရေးမှူး ဦးသူရိန်ထွဋ်က တရားလိုလုပ်ပြီး စစ်တွေမြို့နယ်တရားရုံးမှာ စွဲဆိုထားတာဖြစ်ပါတယ်။
ဝန်ကြီးချုပ် ဦးညီပုဟာ နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)နဲ့ အလုပ်နဲ့ထောင်ဒဏ် ၂ နှစ်ချမှတ်ထားသလို အဂတိမှု ၃ မှုနဲ့ အလုပ်နဲ့ ထောင်ဒဏ် ၇နှစ် ချမှတ်ခံထားရပါတယ်။ ဒါ့အပြင် ဝန်ကြီး ဦးမင်းအောင်ဟာလည်း အဂတိမှုနဲ့ အလုပ်နဲ့ထောင်ဒဏ် ၉ နှစ်ချမှတ်ခံထားရပါတယ်။
