ကနေဒါနိုင်ငံအတွင်း သေနတ်ရောင်းချတာ၊ ဝယ်ယူတာ ဒါမှမဟုတ် လွှဲပြောင်းတာတွေကို တားမြစ်လိုက်တဲ့ စည်းမျဉ်းစည်းကမ်းတွေဟာ အောက်တိုဘာ ၂၁ ရက်မှာ စတင်အသက်ဝင်ပြီလို့ ကနေဒါဝန်ကြီးချုပ် ဂျပ်စတင်ထရူးဒိုးက ကြေညာလိုက်ပါတယ်။
ဒီအစီအမံဟာ အသစ်တင်သွင်းရရှိလာတဲ့ သေနတ်တွေကိုလည်း ပိတ်ဆို့လိုက်တာဖြစ်တယ်လို့ ဆိုပါတယ်။
နှစ်ပေါင်း ၄၀ အတွင်း နိုင်ငံရဲ့ အပြင်းထန်ဆုံး သေနတ်ထိန်းချုပ်ရေး အစီအမံတွေကို အကောင်အထည်ဖော်နိုင်ဖို့ အဆိုပြုထားတဲ့ ဥပဒေတွေနဲ့အတူ သေနတ်ကိုင်ဆောင်မှု တားမြစ်ချက်ကို မေလက ကြေညာခဲ့တာပါ။
ဒါဟာ သေနတ် အကြမ်းဖက်မှုတွေကို ကိုင်တွယ်ဖြေရှင်းဖို့ ထရူးဒိုး အစိုးရရဲ့ ပြီးပြည့်စုံတဲ့ အစီအစဉ် ဖြစ်ကြောင်း သူ့ရုံးခန်းက ထုတ်ပြန်ပါတယ်။
ကနေဒါမှာ သေနတ်ဥပဒေဟာ အမေရိကန်ထက် ပိုတင်းကျပ်ပေမယ့် ကနေဒါနိုင်ငံသားတွေဟာ လိုင်စင်နဲ့ သေနတ်ကိုင်ဆောင်နိုင်ပြီး တချို့သေနတ်တွေကိုလည်း မှတ်ပုံတင်ထားရပါတယ်။
၂၀၂၀ ပြည့်နှစ် အချက်အလက်တွေအရ ကနေဒါနိုင်ငံမှာ သေနတ်နဲ့လူသတ်မှုနှုန်ဟာ အမေရိကန်ရဲ့လူသတ်မှုနှုန်း တစိတ်တပိုင်းလောက်သာ ရှိပေမဲ့ တခြားချမ်းသာတဲ့နိုင်ငံတွေထက်တော့ မြင့်မားနေဆဲဖြစ်ပါတယ်။
ထရူးဒိုးရဲ့ အာဏာရလစ်ဘရယ်အစိုးရဟာ သေနတ်အကြမ်းဖက်မှုကို တိုက်ဖျက်မယ့် C-21 ဥပဒေကြမ်းကို မိတ်ဆက်ခဲ့ပြီး အခုဆောင်ရွက်ချက်ဟာ ဥပဒေပြုရေး ဆွေးနွေးနေချိန်မှာ ကနေဒါနိုင်ငံသားတွေကို ဘေးကင်းအောင် ကူညီပေးလိမ့်မယ်လို့ ဝန်ကြီးချုပ်ရုံးကပြောပါတယ်။
