စစ်ကိုင်းတိုင်းအခြေစိုက် ဆရာစံ-PDF အဖွဲ့က မီတာ ၃၀၀ အကွာအဝေး ပစ်နိုင်တဲ့ လက်လုပ် စနိုက်ပါသေနတ်ကို ကုန်ကျငွေ သိန်း ၃၀ နဲ့ ထုတ်လုပ်ထားနိုင်ပြီလို့ သိရပါတယ်။
ဆရာစံ-PDF တာဝန်ရှိသူက “စျေးနှုန်းတွေ တအားတက်နေတော့ ၃၀ လောက်ကုန်တယ်။ ပစ္စည်းရှာရတာလည်း မလွယ်ဘူး။ ပြောင်းတင် ၉ သိန်းလောက်ကျတယ်။ ဒါတောင် ဝယ်မရဘူး။ ပိုက်ဆံရှိပြန်တော့လည်း ပစ္စည်းကမရှိ၊ ပစ္စည်းရှိပြန်တော့လည်း ပိုက်ဆံကမရှိနဲ့။ ကျည်ဘောက်က ၁၀ တောင့်ဆန့်တယ်။ ၈ စကုတ်တပ်ပစ်လို့ရတယ်” လို့ ဒီဗွီဘီကို ပြောပါတယ်။
လက်ရှိအချိန်အထိ စနိုက်ပါသေနတ် ၅ လက် ထုတ်လုပ်ထားပြီး ဘေးမြို့နယ်က မဟာမိတ် အဖွဲ့တွေကိုလည်း မျှဝေပေးထားပြီး အရင်ကထုတ်လုပ်ထားတဲ့ စနိုက်ပါသေနတ်တွေနဲ့ တိုက်ပွဲဝင်နေတယ်လို့ ဆိုပါတယ်။
အဆိုပါ စနိုက်ပါသေနတ်ဟာ မီတာ ၂၅၀ အထိ ထိရောက်ပြီး မီတာ ၃၀၀ ကျော် အကွာအဝေးထိ ပစ်လို့ရတယ်လို့ သိရပါတယ်။
ဆက်လက်ပြီး လက်နက်အမျိုးမျိုး ထပ်မံ ကြိုးစားထုတ်လုပ်သွားမှာဖြစ်သလို ထုတ်လုပ်ထားတဲ့ လက်နက်တွေနဲ့လည်း ဖက်ဒရယ်ဒီမိုကရေစီရတဲ့အထိ တိုက်ပွဲဝင်သွားမယ်လို့ ဆရာစံ-PDF က ပြောပါတယ်။
ဒါ့အပြင် မီတာ ၁,၂၀၀ အထိ ရောက်အောင်ပစ်နိုင်တဲ့ ၆၀ မမတွေကို နည်းပညာမြင့် ဆရာတွေထံက သင်ယူထားပြီး အောင်မြင်စွာ ထုတ်လုပ်ထားနိုင်ပြီလို့ ဆရာစံ-PDF က ထုတ်ပြန်ထားပါတယ်။
မွန်ပြည်နယ် ရေး PDF က ကိုယ်ပိုင် စမ်းသပ်တီထွင်ခဲ့တဲ့ ပွိုင့် ၂၂ ကျည်နဲ့ အသုံးပြုနိုင်တဲ့ စနိုက်ဘာပုံစံ သေနတ်အမျိုးစားကို တီထွင်နိုင်ခဲ့ပြီး ဇန်နဝါရီ ၁၀ ရက်နေ့မှာ ပြည်သူတွေကို ပုံရိပ်တချို့ကို ထုတ်ဖော်ပြသလိုက်ပါတယ်။
အဆိုပါ သေနတ်မှာ ကိုက် ၂၀၀ ပစ်မှတ်လောက်ကို ထိရောက်တယ်လို့ ဆိုပါတယ်။ ပစ္စည်းကုန်ကြမ်းနဲ့ နည်းပညာပိုင်းအတွက် ငွေကြေး အဓိကလိုအပ်ချက် ဖြစ်နေတယ်လို့ ရေး PDF တာဝန်ရှိသူတဦးက ပြောပါတယ်။
“သေနတ် ၁ လက်ရဲ့ ခန့်မှန်း ကုန်ကျစရိတ်က ၁ သိန်း ၈ သောင်းလောက် ကုန်ကျပါတယ်။ လက်နက်စမ်းသပ်အောင်မြင်လာတဲ့အခါ စစ်မြေပြင်မှာပိုပြီး အသုံးချသွားဖို့ များများ ထုတ်လုပ်နိုင်ဖို့ ရည်ရွယ်ထားပေမဲ့ လက်ရှိ အခြေနေမှာ ကိုယ့်အားကိုယ်ကိုးဘဲ လုပ်ရသေးတော့ အခက်ခဲတွေက အများကြီးနဲ့ ကြုံရတယ်။”
ရေးမြို့နယ်မှာ စစ်တပ်က အာဏာသိမ်းပြီးတဲ့နောက် ရေး PDF တွေက စစ်ကောင်စီနဲ့ လက်အောက်ခံ အဖွဲ့အစည်းတွေကို ရရာလက်နက်တွေနဲ့ တိုက်ခိုက်လာတာ ဒီနေ့အထိ ဖြစ်ပြီး စစ်ကောင်စီဘက်က ထိခိုက်ကျဆုံးတာတွေ ၁ ဒါဇင်လောက် ရှိနေပါတယ်။
