ရန်ကုန်တိုင်း၊ စမ်းချောင်းမြို့နယ်၊ စမ်းချောင်းလမ်းမ၊ 777 ဘီယာဆိုင်အနီးရှိ ၆ လွှာ တိုက်ခန်းတခုမှာ ဖေဖော်ဝါရီ ၂၆ ရက် ည ၁၁ နာရီ ၄၅ မိနစ်လောက်က အမျိုးသား ၁ ဦးနဲ့  အမျိုးသမီး ၁ ဦး ဓားဒဏ်ရာတွေနဲ့ လဲကျနေတယ်လို့ အဲဒီတိုက်ခန်းနေသူတွေက လူမှုကယ်ဆယ်ရေးအသင်းတွေဆီ အကူအညီ တောင်းခဲ့တယ်လို့ သိရပါတယ်။

ကယ်ဆယ်ရေးအဖွဲ့တွေ ရောက်လာချိန်မှာတော့ တိုက်ခန်းဝင်ပေါက်မှာ အမျိုးသားဖြစ်သူက ဓားဒဏ်ရာ ၅ ချက်နဲ့ သေဆုံးနေပြီဖြစ်ပြီး အမျိုးသမီးဖြစ်သူက ဧည့်ခန်းမှာ ပြတ်ရှဒဏ်ရာ ၃ ချက်နဲ့ လဲကျနေတာပါ။

အဲ့ဒီည ၁၁ နာရီခွဲလောက်ကတည်းက အဆိုပါတိုက်ခန်းမှာ အပြန်အလှန် ရန်ဖြစ်သံတွေ ကြားရပြီး အမျိုးသားဖြစ်သူက တိုက်ခန်းတံခါးဝကို ပြေးထွက်ကာ ပတ်ဝန်းကျင်ကို အကူအညီ တောင်းခဲ့ပေမဲ့ သေဆုံးသွားခဲ့တယ်လို့ သိရပါတယ်။

“သတင်းရတော့ ည ၁၁:၄၅ မိနစ်လောက်ရှိပြီ။ တယောက်နဲ့အထက်လို့ ပြောတယ်။ ဟိုရောက်တော့ တယောက်က သေဆုံးနေတယ်၊ တယောက်က သတိရသေးတယ်၊ အမျိုးသမီးက သတိရသေးတယ်။ သေဆုံးသူက လည်ပင်းတည့်တည့်မှာ ထိုးသွင်းဒဏ်ရာ ရထားတယ်။ အရှိုက်၊ ဗိုက်၊ ခေါင်းမှာ စုစုပေါင်း ၅ ချက်၊ ဒဏ်ရာရသူက ပေါင်မှာ ၁ ချက်၊ ဗိုက်မှာ ၂ ချက်ရတယ်။ ဓားက မီးဖိုချောင်သုံးဓား ၂ ချောင်းတွေ့တယ်။ အသွားက ၅ လက်မ၊ ၆ လက်မလောက်ပါပဲ။ အိမ်က အတွင်းက သော့ပိတ်ထားတော့ သေသွားတဲ့ အမျိုးသားကတော့ အပြင်ကို လှမ်းအကူအညီတောင်းတယ် ပြောတယ်။ ဘယ်လိုဖြစ်လဲဆိုတာ သေမှုသေခင်းကို ရဲက စစ်ဆေးနေပါတယ်။ အပြင်က လာလုပ်သွားတာလား၊ အချင်းချင်း ဖြစ်တာလား၊ မသိသေးပါဘူး” လို့ မြို့နယ်အခြေစိုက် လူမှုကူညီရေးအသင်းက ဆိုပါတယ်။

သေဆုံးသွားသူနဲ့ ဒဏ်ရာရရှိသူ နှစ်ဦးစလုံးဟာ အသက် ၂၇ နှစ်အရွယ်ဖြစ်ကြပြီး အမျိုးသားဟာ ဓာတ်ပုံရိုက်ကူးရေးလုပ်ငန်း လုပ်ကိုင်ကာ အမျိုးသမီးဖြစ်သူက ဓာတ်ပုံမော်ဒယ် ဖြစ်တယ်လို့လည်း သိရပါတယ်။

ဓာတ်ပုံ ( ရဲသူရိန် rescue)

ရန်ကုန်တိုင်း၊ စမ်းချောင်းမြို့နယ်၊ လင်းလွန်းတောင်ရပ်ကွက်၊ ဗားကရာလမ်းမှာ ဖေဖော်ဝါရီ ၂၀ ရက်ညက ရပ်ကွက်အုပ်ချုပ်ရေးမှူး ဦးမျိုးမြင့်နိုင် သေနတ်နဲ့ ပစ်ခံရတယ်လို့  ရပ်ကွက်နေသူတွေ ထံက သိရပါတယ်။

ဗားကရာလမ်းက မီးရထားနေအိမ်လိုင်းခန်းမှာ မနေ့ ည ၁၁ နာရီကျော်က ပစ်ခတ်ခံတာဖြစ်ပြီး ဦးမျိုးမြင့်နိုင်ကို စစ်ကောင်စီတပ်က လူနာတင်ယာဥ်နဲ့ တင်ဆောင်သွားကာ ဆေးရုံကို ပို့ထားတယ် လို့ အုပ်ချုပ်ရေးနဲ့နီးစပ်သူ တဦးက ပြောပါတယ်။

"သူက မီးရထားလိုင်းခန်းမှာနေတာ။ ညက အိမ်သာ သွားတက်ရင်း အပစ်ခံရတာ။ သေတော့ မသေဘူး။ စိုးရိမ်ရတယ်"

မနေညက သေနတ်ပစ်သံကြားရပြီး ည ၁၁ နာရီခွဲလောက် လူနာတင်ယာဉ်နဲ့ စစ်ကားတွေ ရောက်လာတယ်လို့ ဒေသခံ တဦးက ပြောပါတယ်။

သာကေတနဲ့ ဒဂုံဆိပ်ကမ်းမြို့နယ်မှာ ဖေဖော်ဝါရီ ၁၉ ရက် ညနေပိုင်းကလည်း ပစ်ခတ်မှုဖြစ်ခဲ့ပြီး စစ်တပ်ထောက်ခံသူ လူမိုက်နေမျိုးအောင်နဲ့ ရာအိမ်မှူး နှစ်ဦး သေဆုံးကာ ရာအိမ်မှူး လေးဦးနဲ့ အရပ်သား တစ်ဦးထိခိုက် ဒဏ်ရာရရှိခဲ့ပါတယ်။

ဇန်နဝါရီလအတွင်းက ရန်ကုန်မှာ ပစ်ခတ်မှုတွေကြောင့် ဗိုလ်မှူး သုံးဦး အပါအဝင် အုပ်ချုပ်ရေးမှူး နဲ့ ရာအိမ်မှူး ၉ ဦး သေဆုံးခဲ့ပါတယ်။