ကချင်ပြည်နယ်၊ မိုးညှင်းမြို့နယ်မှာ မတ် ၂၆ ရက် နေ့လယ်ပိုင်းက စစ်ဖက်ရေးရာ လုံခြုံရေးတပ်ဖွဲ့ (စရဖ) အရာရှိ တယောက် သေနတ်နဲ့ ပစ်သတ်ခံခဲ့ရတယ်လို့ ဒေသခံတွေက ပြောပါတယ်။

ပြည်ထောင်စုလမ်းမပေါ်ရှိ ညောင်ကုန်းကျေးရွာအနီးမှာ သေနတ်နဲ့ ပစ်သတ်ခံရတာလို့ သိရပါတယ်။

စရဖ အသိုင်းအဝိုင်းနဲ့ နီးစပ်သူ  အမျိုးသားတဦးက “စက်သုံးဆီမော်တော်ယာဉ် ကုန်တင်ယာဉ်တွေကို ပိုက်ဆံလိုက်ကောက်ပြီး ပြန်လာတာ။ Honda Fit လေး။ အဲဒါ ပြည်ထောင်စုလမ်းမကြီးပေါ်မှာပဲ ညောင်ကုန်းနဲ့နီးတယ်။ ပြန်အလာကို စောင့်ပစ်သွားတာ။ မသိဘူး၊ ဘယ်အဖွဲ့ ပစ်လည်းတော့"လို့ ပြောပါတယ်။

သေနတ်နဲ့ ပစ်သတ်ခံရလို့ သေဆုံးခဲ့တဲ့ (စရဖ)အရာရှိ လမင်းထွန်းဟာ မိုးညှင်းမြို့နယ်က စက်သုံးဆီ မော်တော်ယာဉ် ကုန်တင်ယာဉ်တွေကို  တရားမဝင် ငွေကြေးလိုက်လံ တောင်းယူနေသူ တဦးဖြစ်ပြီး CDM ဝန်ထမ်းနဲ့  နိုင်ငံရေးတက်ကြွ လှုပ်ရှားသူတွေကို ဖမ်းဆီးနှိပ်စက်သူ တယောက် ဖြစ်တယ်လို့လည်း ဒေသခံကပြောပါတယ်။

မိုးညှင်းမြို့နယ်မှာ  ဇန်နဝါရီ ၂၄ ရက်က ရှမ်းနီ (တိုင်းလျန်)သွေးစည်းညီညွှတ်ရေးပါတီကနေ ၂၀၂၀ ခုနှစ်မှာ ရွေးကောက်ပွဲဝင်ရောက် ယှဉ်ပြိုင်ခဲ့သူ အမျိုးသားတစ်ဦး လက်ဖက်ရည်ဆိုင် ထိုင်နေစဉ်  သေနတ်နဲ့ ပစ်သတ်ခံခဲ့ရပါသေးတယ်။

စစ်ကိုင်းတိုင်း တမူးခရိုင်အထက်ပိုင်း မြို့သစ်မြို့နယ်အတွင်း နယ်မြေရှင်းလင်းရေး ပြုလုပ်စဉ် စစ်ကောင်စီလက်အောက်ခံ ပျုစောထီးတွေနဲ့ ထိတွေ့တိုက်ပွဲဖြစ်ပွားခဲ့ပြီး စရဖအရာရှိ အပါအဝင် ပျူစောထီး ၇ ယောက် သေဆုံးခဲ့တယ်လို့ တမူးပြည်သူ့ကာကွယ်ရေးတပ်မတော် တပ်ရင်း ၁ က ပြောပါတယ်။ 

ဒီဇင်ဘာ ၂၈ ရက် မနက် ၉ နာရီလောက် တမူး PDF တပ်ရင်း ၁၊ KNA (Burma) နဲ့ KCNDF မဟာမိတ် ပူးပေါင်းတပ်ဖွဲ့ဝင်တွေဟာ မြို့သစ်မြို့နယ်အတွင်း နယ်မြေရှင်းလင်းရေးလုပ်ငန်းတွေ ဆောင်ရွက်နေစဉ် စစ်ကောင်စီလက်အောက်ခံ SNA နဲ့ ပျူစောထီးအဖွဲ့ဝင်တွေ မောင်းနှင်လိုက်ပါလာတဲ့ ကား ၁ စီး နဲ့ ထိပ်တိုက်တွေ့ဆုံကာ ရင်ဆိုင်တိုက်ပွဲဖြစ်ခဲ့တာလို့ ဆိုပါတယ်။

တိုက်ပွဲအတွင်း စ.ရ.ဖ အရာရှိ မောင်ဇော်(ခ)မုတ်ဆိတ်၊ SNA တပ်သားစုဆောင်းရေးနဲ့ ဘဏ္ဍာရေးတာဝန်ခံ ဝင်းအောင်၊ SNA ဗိုလ် သက်စိုးနိုင်(ခ)သိန်းစိုးနိုင်၊ ပျူစောထီးခေါင်းဆောင် ငြိမ်းမောင်မောင်၊ ကျော်ထူး၊ မျိုးသူနဲ့ ပျူစောထီးအဖွဲ့ဝင် ၁ ဦးတို့ သေဆုံးခဲ့တယ်လို့ တမူး - PDF တပ်ရင်း ၁ က ပြောပါတယ်။ 

ဒါ့အပြင် ၄၀ မမ လက်နက်ကြီး ၁ လက်၊ ၄၀ မမ ဗုံးသီး ၁၄ လုံး၊ M4-16 ၁ လက်၊ AK-47 ၁ လက်၊ M-92  ၁ လက်၊ 81 ၁ လက်၊ 9mm ပစ္စတို ၁ လက်၊ 380 ပစ္စတို ၁ လက်၊ ကျည်အိမ် ၆ ခု၊ 7.62 mm ကျည် ၉၆ တောင့်၊ 9 mm ကျည် ၄ တောင့်၊ 380 ကျည် ၄ တောင့်နဲ့ ဆက်သွယ်ရေးစကားပြောစက် ၁ လုံးတို့ကို သိမ်းဆည်းရမိတယ်လို့ တမူး -PDF တပ်ရင်း ၁  တာဝန်ရှိသူက ပြောပါတယ်။ 

"နယ်မြေရှင်းလင်းရေး လုပ်နေတဲ့အချိန် ထိတွေ့တိုက်ပွဲဖြစ်တာပါ။ နှစ်ဖက် ပစ်ခတ်မှုဖြစ်ပြီး စ.ရ.ဖ အရာရှိအပါအဝင် စုစုပေါင်း ၇ ဦး ကားပေါ်မှာပဲ သေသွားတာ။ သူတို့ အလောင်းတွေကို အဲဒီနားမှာပဲ ထားခဲ့လိုက်တာဆိုတော့ သူတို့လူတွေကပဲ လာကောက်ပြီး သင်္ဂြိုဟ်သွားကြတယ်။"

အဆိုပါ တိုက်ပွဲမှာ ပူးပေါင်းတပ်ဖွဲ့ဝင်တွေ ထိခိုက်မှု မရှိဘဲ ဆုတ်ခွာနိုင်ခဲ့ကြောင်း၊ နောင်မှာလည်း မဟာမိတ်တွေ ပူးပေါင်းပြီး စစ်အာဏာရှင်စနစ်ချုပ်ငြိမ်းရေး ဆက်လက်တိုက်ပွဲဝင်သွားမယ်လို့ တမူး - PDF တပ်ရင်း ၁ က ပြောပါတယ်။