မကွေးတိုင်း စလင်းမြို့နယ်မှာ ဇူလိုင် ၁၃ ရက်နေ့ညက စလင်းအခြေစိုက် ခလရ (၂၅၄) ရဲ့ လက်နက်ခဲယမ်းတိုက်တခု မိုင်းခွဲတိုက်ခိုက်ခံခဲ့ရတယ်လို့ စလင်းမြို့နယ် ပြည်သူ့အုပ်ချုပ်ရေးအဖွဲ့က ပြောပါတယ်။
စလင်းမြို့နယ် တောစိမ့်ရွာအနောက်ဘက်က ခလရ (၂၅၄) တပ်ရင်းရဲ့ လက်နက်တိုက်တခုကို ဇူလိုင် ၁၃ ရက်နေ့ည ၈ နာရီ ၄၇ မိနစ်လောက်မှာ စလင်း-PDF က ပေါက်ကွဲအား ပြင်းထန်တဲ့ မိုင်း ၂ လုံးနဲ့ ဖောက်ခွဲတိုက်ခိုက်ခဲ့တယ်လို့ စလင်းပြည်သူ့အုပ်ချုပ်ရေးအဖွဲ့တာဝန်ခံ ဗိုလ်သံခဲက ဒီဗွီဘီကို ပြောပါတယ်။
စလင်းမြို့အဝင် တောစိမ့်ရွာအနောက်ဘက် မင်းဂံကျေးရွာနားမှာ ပခုက္ကူအခြေစိုက် တပ်မ (၁၀၁) လက်အောက်ခံ ခလရ ၂၅၃၊ ၂၅၄၊ ၂၅၅ ဖိုခနောင့်ဆိုင် တပ်ရင်း ၃ ရင်းရှိတဲ့ထဲက အဝင်အထွက်ကော အသွားအလာပါ အားလုံးအဆင်ပြေတဲ့ ခလရ ၂၅၄ ရဲ့ လက်နက်ခဲယမ်းတိုက်ကို ရွေးချယ်ပြီး ဖောက်ခွဲတိုက်ခိုက်ခဲ့တာလို့ ဆိုပါတယ်။
“အဓိကကတော့ စစ်(...)ရဲ့ လက်နက်ခဲယမ်းတွေ လျော့ကျသွားအောင် ရည်ရွယ်ပြီး ဖောက်ခွဲတိုက်ခိုက်လိုက်တာပါ။ မိုင်းက ၂ လုံးစလုံးကွဲတယ်ဗျ။ ကျနော်တို့ ရဲဘော်တွေက ဖောက်ခွဲတိုက်ခိုက်ပြီးတော့ ဘေးလွတ်ရာကို အန္တရာယ်ကင်းအောင်တိမ်းရှောင်ခဲ့ရလို့ ထိခိုက်ပျက်စီးတဲ့ အခြေအနေကို အတိကျ မသိရသေးဘူး။”
စလင်း-PDF အနေနဲ့ ရှေ့ဆက်ပြီး တော်လှန်ရေးအရှိန်မြှင့်တော့မှာဖြစ်လို့ ပြည်သူတွေအနေနဲ့ စစ်ကောင်စီတပ်သားတွေ၊ ရဲတွေနဲ့ နီးစပ်တဲ့နေရာတွေမှာ မနေကြဖို့နဲ့ ပြည်သူတွေ ထိခိုက်မှုမရှိအောင် အဓိကထားပြီး လုပ်ဆောင်နေပေမယ့် တိုက်ပွဲဖြစ်နေတဲ့ အချိန်တွေမှာ ဖြတ်သန်းသွားလာတာတွေ မပြုလုပ်ကြဖို့ သတိပေးထားပါတယ်။
အဲဒီလက်နက်တိုက် ဖောက်ခွဲတိုက်ခိုက်ခံရတာနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်ထားတာ မတွေ့ရသေးပါဘူး။
မကွေးတိုင်း စလင်းမြို့မှာ မေ ၁ ရက်နေ့ညက ကင်းလှည့်တွေတဲ့ ရဲတွေကို ပြည်သူ့ကာကွယ်ရေးတပ်မတော်-အနောက်ပိုင်းတိုင်း တပ်ဖွဲ့ဝင်တွေက မိုင်းဆွဲ တိုက်ခံခဲ့တာကြောင့် ရဲ ၆ ယောက်သေဆုံးခဲ့တယ်လို့ အနောက်ပိုင်းတိုင်း PDF ကနေ သိရပါတယ်။
စလင်းမြို့ ဝက်သည်းကန်နားမှာ မေ ၁ ရက်နေ့ ည ၁၀ နာရီလောက်က ဆိုင်ကယ် ၅ စီးနဲ့ ကင်းလှည့်နေတဲ့ ရဲ ၉ ယောက်ကို CA4 ပါ အပြင်းစား တင့်ဖျက်မိုင်း အကြီးစားနှစ်လုံးသုံးပြီး အဝေးထိန်းစနစ်နဲ့ ဖောက်ခွဲတိုက်ခိုက်ခဲ့တာလို့ အနောက်ပိုင်းတိုင်း PDF ရဲ့ ပြန်ကြားရေးတာဝန်ခံ ဗိုလ်လျှပ်စီးက ဒီဗွီဘီကိုပြောပါတယ်။
“စလင်းမြို့မှာရှိတဲ့ ရဲတွေက အရပ်သားပြည်သူတွေကို ဖိနှိပ်ချုပ်ချယ်ပြီး မတရားဖမ်းဆီးတာတွေ ခြိမ်းခြောက်တာတွေ ဆက်တိုက်ကျူးလွန်နေတာဗျ။ ဒါကြောင့်မို့ စစ်ဆင်ရေး အစီမံတွေ စနစ်တကျရေးဆွဲပြီး စစ်ဆင်ရေးဒေသကြီး (၃) ဖြစ်တဲ့ စလင်းမြို့မှာ တိုက်တိုင်းအောင်စစ်ဆင်ရေးလို့ အမည်ပေးပြီး ဒုတိယအကြိမ်မြောက်တိုက်ခိုက်ခဲ့တာ။”
စလင်းမြို့မှာ မေလ ၁ ရက်နေ့ ည ၇ နာရီခွဲလောက်မှာလည်း အနောက်ပိုင်းတိုင်း PDF တိုက်တိုင်းအောင်စစ်ဆင်ရေးအဖွဲ့က လယ်ယာစိုက်ပျိုးရေးဘဏ်ရုံးကို လက်ပစ်ဗုံးနဲ့ ပစ်ခတ် သတိပေးခဲ့တယ်လို့ ပြန်ကြားရေးတာဝန်ခံက ပြောပါတယ်။
အဲဒီဌာနဟာ စလင်းမြို့နယ်က တောင်သူတွေကို ယခင်ပြည်သူ့အစိုးရလက်ထက်က ထုတ်ပေးထားတဲ့ ချေးငွေတွေကို ဖိအားပေးတောင်းခံနေလို့ သတိပေးတိုက်ခိုက်ခဲ့တာလို့ ဆိုပါတယ်။
စလင်းမြို့ခံတစ်ယောက်က “စလင်းမြို့ စိုက်ဘဏ်ရုံးနားနဲ့ ဝက်သည်းကန်းနားမှာ ပေါက်ကွဲသံတွေ ပစ်ခတ်သံတွေ ကြားရတယ်ဗျ။ ဒီနေ့မနက်ပိုင်းမှာစုံစမ်းကြည့်တော့ စလင်းမြို့မရဲ စခန်းမှာ နာရေးရှိတယ်လို့ ကြားသိရတယ်။ စိုဏ်ဘဏ်ရုံးကိုလည်း ဗုံးခွဲတိုက်ခိုက်ခံရတယ်လို့ သိရတယ်။ စစ် (-)၊ ရဲ (-) တွေကတော့ မြို့ဝင်မြို့ထွက် ဂိတ်တွေ နဲ့ လမ်းဆုံ လမ်းခွတွေမှာ ပြည့သူတွေကို ဒုက္ခ အမျိုးမျိုးပေးဖို့ ပိတ်ဆို့စစ်ဆေးနေကြပြီ” လို့ ပြောပါတယ်။
ကင်းလှည့်ရဲတွေ တိုက်ခိုက်ခံရတာနဲ့ပတ်သက်ပြီး ထိခိုက်ကျဆုံးမှုအခြေအနေကို စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။
