စစ်ကိုင်းတိုင်း၊ ကလေးမြို့မှာ  မတ် ၂၇ ရက် ဖက်ဆစ်တော်လှန်ရေးနေ့  စစ်ကောင်စီတပ်သားတွေက မြို့တွင်း နေရာအနှံ့အပြားမှာ လုံခြုံရေးရယူထားတဲ့ကြားက မြို့တွင်းနေရာတချို့မှာလည်း ပေါက်ကွဲသံတွေ၊ လက်နက်ကြီးသံတွေ ကြားခဲ့ရတယ်လို့ မြို့ခံတွေက ပြောပါတယ်။

ကလေးမြို့ပြစစ်ဆင်ရေး Special Underground တပ်ဖွဲ့က တောင်ဇလပ်ရပ်ကွက်ရှိ စသုံးလုံးရုံးကို တိုက်ခိုက်ခဲ့ပြီးနောက် ကလေးမြို့တွင်းမှာရှိတဲ့ စစ်တပ်တွေကနေ မြို့နယ် မြောက်ပိုင်းနဲ့ တောင်ပိုင်းကို လက်နက်ကြီးဖြင့် ပစ်ခတ်ခဲ့တယ်လို့ SUG က အဖွဲ့ဝင်တဦးက ပြောပါတယ်။

“စစ်ကောင်စီဘက်က ထိခိုက်ကျဆုံးမှုအ‌ခြေအနေကိုတော့ မသိခဲ့ရဘူး။ သူတို့က ကျနော်တို့ လက်နက်ကြီးနဲ့ပစ်ပြီး သိပ်မကြာခင် လက်နက်ကြီး‌တွေနဲ့ ထုတာ။ ကျနော်တို့အထင်တော့ စစ်သားဘက်က အကောင်ကြီးတစ်ကောင်လောက်ကျလို့ အဲဒီလောက် လုပ်နေတာလို့ ခန့်မှန်းရတယ်။ ကျနော်တို့ဘက်ကတော့ အထိအခိုက်မရှိဘူး။”

စစ်ကောင်စီရဲ့ လက်နက်ကြီးကျည်ကြောင့် မြို့နယ်တောင်ပိုင်းနဲ့ မြောက်ပိုင်း ကျေးရွာက ဒေသခံတွေအနေနဲ့ ထိတ်လန့်ကြောက်ရွံ့နေကြရတယ်လို့ ကျေးရွာဒေသခံတွေက ပြောပါတယ်။

ကလေးမြို့တွင်းမှာလည်း စစ်ကောင်စီက ဒေသခံပြည်သူတွေကို မတ် ၂၆ ရက်က ၇၈ နှစ်မြောက် တပ်မတော်နေ့အကြိုအဖြစ် စစ်တပ်ဝါဒဖြန့် လက်ကမ်းစာစောင်တွေ ဖြန့်ဝေခဲ့ပါတယ်။

မုံရွာမြို့၊ မြို့သစ်ရပ်ကွက်၊ ဗိုလ်ချုပ်လမ်းမှာရှိတဲ့ စစ်ကိုင်းတိုင်း အထူးစုံစမ်းစစ်ဆေးရေး ဦးစီးဌာနရုံး (စသုံးလုံးရုံး) ဂိတ်ပေါက်ရှိ စစ်ကောင်စီတပ်ဖွဲ့ဝင်တွေကို အောက်တိုဘာ ၁၈ ရက် မနက် ၁၁ နာရီခွဲဝန်းကျင်က ပစ်ခတ်တိုက်ခိုက်ခဲ့တယ်လို့ မုံရွာနတ်ဆိုး ပြောက်ကျားအဖွဲ့က ပြောပါတယ်။

စသုံးလုံးရုံးအဝင် ဂိတ်‌ပေါက်မှာရှိတဲ့ စစ်ကောင်စီတပ်ဖွဲ့ဝင်တွေကို ကားပေါ်ကနေ သေနတ်နဲ့ ပစ်ခတ်တိုက်ခိုက်ခဲ့တာပါ။

နတ်ဆိုးပြောက်ကျားအဖွဲ့ရဲ့ အဖွဲ့ဝင်တဦးက “လတ်တလော ဂိတ်ပေါက်‌က ကောင်တွေရဲ့ အထိအခိုက် အခြေအနေကိုတော့ မသိရသေးဘူးဗျ။ သူတို့အငိုက်မှာ တိုက်ခိုက်ခဲ့တာ။ ကျနော်တို့အဖွဲ့ဝင်တွေကတော့ အထိအခိုက်မရှိ ဘေးလွတ်ရာမှာ ရောက်ရှိနေပါပြီ” လို့ ပြောပါတယ်။

အဲဒီပစ်ခတ်တိုက်ခိုက်မှု ဖြစ်ပွားပြီးနောက် စစ်ကောင်စီတပ်ဖွဲ့နဲ့ ရဲတပ်ဖွဲ့ဝင်တွေက မုံရွာမြို့ရဲ့ အဝင်အထွက်တွေကို တင်းကျပ်စွာ စစ်ဆေးတာတွေလည်း ရှိခဲ့တယ်လို့ သိရပါတယ်။

ပြီးခဲ့တဲ့ စက်တင်ဘာ ၂၇ ရက်နေ့ကလည်း မုံရွာမြို့အခြေစိုက် စစ်ကိုင်းတိုင်း စသုံးလုံးရုံးမှာ ဗုံးပေါက်ကွဲမှု ဖြစ်ခဲ့တယ်လို့ သိရပါတယ်။