ဧရာဝတီတိုင်း၊ ငပုတောမြို့နယ်မှာ နိုင်ငံရေးတက်ကြွလှုပ်ရှားသူတွေရဲ့ စာရင်းကို မတ်လဆန်းပိုင်းက စတင်ကာ ကောက်ယူဖို့အတွက် စစ်ကောင်စီက ထွေအုပ်ကို ညွှန်ကြားခဲ့တယ်လို့ သိရပါတယ်။
ဟိုင်းကြီးရေတပ်စခန်းတပ်မှူးက မြို့နယ်အုပ်ချုပ်ရေးမှူး ဦးကျော်သူကို ညွှန်ကြားခဲ့တာဖြစ်ပြီး ဦးကျော်သူကတဆင့် ရပ်ကျေးအုပ်ချုပ်ရေးမှူးတွေကို အစည်းအဝေးခေါ်ယူကာ စာရင်းမဖြစ်မနေ ကောက်ဖို့ ညွှန်ကြားခဲ့တာလို့ ရပ်ကျေးအုပ်ချုပ်ရေးမှူး တယောက်က ပြောပါတယ်။
“စာရင်းကောက်ခိုင်းတာတင် မဟုတ်ဘူး၊ အပြစ်မရှိ အပြစ်ရှာဖမ်းလို့ရတဲ့ခေတ် ရောက်နေပြီ။ စာရင်းကောက်ပြီး အားလုံးအပြစ်ရှာဖမ်းဖို့ လပတ်အစည်းဝေးမှာ ပြောတာ” လို့ ရပ်ကျေး အုပ်ချုပ်ရေးမှူးတဦးက ပြောပါတယ်။
သက်ဆိုင်ရာ ရပ်ကွက်ကျေးရွာအလိုက် နိုင်ငံရေးလှုပ်ရှားသူတွေကို စာရင်းကောက်ပေးတဲ့အခါ နာမည်စာရင်း ကျန်ခဲ့ရင်လည်း ကျန်ခဲ့တဲ့အုပ်ချုပ်ရေးမှူးကို ထိရောက်စွာ အရေးယူသွားမယ်ဆိုပြီး အစည်းအဝေးမှာ ခြိမ်းခြောက်ခဲ့တယ်လို့ ဆိုပါတယ်။
ငပုတောမြို့နယ်အုပ်ချုပ်ရေးမှူး ဦးကျော်သူဟာ စစ်တပ်အာဏာသိမ်းပြီးနောက်ပိုင်း စစ်ကိုင်းတိုင်းဘက်က ပြောင်းရွှေ့လာသူတဦး ဖြစ်သလို သူကိုယ်တိုင် အစည်းအဝေးမှာ မိမိအနေနဲ့ နိုင်ငံရေးသမားတွေကို မြို့နယ်အတွင်းရေးမှူးဘဝထဲက နှိပ်ကွပ်လာတာဖြစ်ကြောင်း ပြောဆိုစည်းရုံးတာတွေ ပြုလုပ်ခဲ့တယ်လို့ သိရပါတယ်။
ဧရာဝတီတိုင်း၊ မြောင်းမြမြို့နယ်၊ ကွယ်လွယ်ကျေးရွာမှာ ကျောင်းအပ်ခြင်းမရှိတဲ့ ကလေးတွေရဲ့ မိသားစုတွေကို အုပ်ချုပ်ရေးမှူး ဦးကျော်ပိုင်စိုးက လိုက်လံစာရင်းကောက်ယူနေပါတယ်။
ရွာအုပ်ချုပ်ရေးမှူးက ကျောင်းသားရှိတဲ့ အိမ်တွေကို ကျောင်းမအပ်ရင် ငါးနှစ်နားရမယ်ဆိုပြီး ခြိမ်းခြောက်ပြီး စာရင်းလိုက်ကောက်နေတာလို့ ဒေသခံရွာသားတွေက ပြောပါတယ်။
“အမည်တွေ အလုပ်အကိုင်တွေအစသေချာမေးတယ်။ အထက်ကမေးခိုင်းလို့မေးတာဆိုပြီး ပြောတယ်။ ဘာကြောင့် ကျောင်းမအပ်တာလဲလို့မေးတယ် ကျောင်းမအပ်ရင် ကျောင်းငါးနှစ်နား ရမယ်လို့ ပြောတယ်”လို့ ကျောင်းသားမိဘတစ်ဦးက ပြောပါတယ်။
ကလေးတွေကို ကျောင်းမအပ်တဲ့ ရွာသားတစ်ဦးကလည်း “အခုလို နိုင်ငံရေးမတည်ငြိမ်ချိန်မှာ ကိုဗစ်ကလည်း ဘာမှန်းမသိချိန်မှ ကလေးတွေကို ကျောင်းမထားနိုင်ဘူး၊ ဒလန်ကျောင်း ပြည်ခိုင်ဖြိုးရွာ ပြည်ခိုင်ဖြိုးကျောင်းလို့ပြောလို့ရတာအဲ့ဒါမို့ မအပ်ရဲဘူးလေ”လို့ ပြောပါတယ်။
မြန်မာနိုင်ငံတဝန်း အခြေခံပညာစာသင်ကျောင်းတွေကို အကြမ်းဖက်စစ်အုပ်စုက ဇွန်လ ၁ ရက်နေ့မှာ စတင်ဖွင့်လှစ်ခဲ့ပေမဲ့ သိန်းနဲ့ချီတဲ့ ကျောင်းဆရာဆရာမတွေက အာဏာဖီဆန် CDM လုပ်နေကြသလို ကျောင်းသူကျောင်းသား အများစုကလည်း ကျောင်းမတက်ကြပါဘူး။
