အိန္ဒိယနိုင်ငံ​၊ မီဇိုရမ်ပြည်နယ်၊ ဆိုက်ဟားခရိုင်အတွင်းရှိ စစ်ဘေးရှောင် မြန်မာပြည်သူတွေကို မရာ နယ်မြေအုပ်ရေးကောင်စီ၊ ကယ်ဆယ်ရေးနှင့်ပြန်လည်နေရာချထားရေးဌာနက ဆန်၊ ဆီ၊ ပဲ စတဲ့ စားနပ်ရိက္ခာတွေ ထောက်ပံ့ပါတယ်။

အဆိုပါ ထောက်ပံ့မှုတွေကို အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနမှ ပေးပို့တဲ့ ထောက်ပံ့ငွေတွေနဲ့ အနယ်နယ် အရပ်ရပ်မှ မရာပြည်သူ စေတနာရှင်တွေရဲ့ အလှူငွေတွေနဲ့ ထောက်ပံ့ခဲ့တာပါ။

အိန္ဒိယနိုင်ငံ၊ မီဇိုရမ်ပြည်နယ်၊ ဆိုက်ဟားခရိုင်အတွင်း ကျေးရွာ ၂၅ ရွာမှာ စစ်ဘေးရှောင်စခန်း ၆ ခုမှ မြန်မာစစ်ဘေးရှောင်ပြည်သူပေါင်း ၉၀၀၀ ကျော်ရှိတဲ့အနက် ပြည်သူ ၂၀၀၀ ကျော်ကိုသာ ထောက်ပံ့နိုင်ပါသေးတယ်။

အနယ်နယ်အရပ်ရပ်မှ စေတနာရှင်တွေအနေနဲ့ ဒုက္ခရောက်နေတဲ့ ပြည်သူတွေကို မိမိ တတ်နိုင်သ​လောက် ကူညီထောက်ပံ့ပေးကြဖို့နဲ့ ကူညီထောက်ပံ့လိုပါက မရာ နယ်မြေအုပ်ချုပ်ရေးကောင်စီ  ကယ်ဆယ်ရေးနှင့်ပြန်လည်နေရာချထားရေးဌာနကို ဆက်သွယ်နိုင်ပါတယ်။

မြန်မာနိုင်ငံရဲ့ မြို့ပြဒေသတွေနဲ့ ကျေးလက်ဒေသတွေက ပြည်သူ ၁၂ သိန်းခွဲအတွက် ၂၀၂၁ ခုနှစ်အတွင်း   စားနပ်ရိက္ခာ၊ ငွေသားနဲ့အာဟာရ အထောက်အပံ့တွေ ပေးအပ်ထောက်ပံ့နိုင်ခဲ့တယ်လို့ ကုလသမဂ္ဂကမ္ဘာ့စားနပ်ရိက္ခာအစီအစဉ် (WFP) က ထုတ်ပြန်ပါတယ်။

WFP ဟာ မြို့ပြစားနပ်ရိက္ခာ အထောက်အပံ့စီမံချက်တစ်ခုကို မေလမှာ စတင်အကောင်အထည်ဖော်ခဲ့ပြီး အခုသြဂုတ်လအထိ ရန်ကုန်တိုင်း လှိုင်သာယာနဲ့ ဒဂုံဆိပ်ကမ်း မြို့နယ်တို့က ထိခိုက်လွယ်သူ လူဦးရေပေါင်း  ၆၅၀,၀၀၀ အတွက် တိုက်ရိုက်ကူညီပံ့ပိုး ပေးနိုင်ခဲ့ တယ်လို့ ဆိုပါတယ်။

ထောက်ပံ့တာကတော့ မိခင်တွေ၊ ကလေးငယ်တွေ၊ မသန်စွမ်းသူတွေနဲ့ သက်ကြီးရွယ်အိုတွေ အများစုပါဝင်တယ်လို့လည်း ဆိုပါတယ်။

WFP ရဲ့ မြန်မာနိုင်ငံဆိုင်ရာဌာနေကိုယ်စားလှယ် မစ္စတာ စတီဖင်အန်ဒါဆန်က  “မြန်မာနိုင်ငံမှာ ဆာလောင်ငတ်မွတ်မှုဟာ ပိုမိုတိုးများလာသလို ပိုဆိုးရွားလာတာကို ကျနော်တို့ တွေ့မြင်နေရပါတယ်။ ရန်ကုန်မြို့တစ်ဝိုက်က ပျံကျရပ်ကွက်တွေမှာ နေထိုင်တဲ့ အိမ်ထောင်စု ၉၀ ရာခိုင်နှုန်း နီးပါးဟာ ငွေချေးယူပြီး အစားအစာဝယ်ယူနေကြရပါတယ်။ သူတို့ ဝင်ငွေဟာလည်း တော်တော်လေးကို ကျဆင်းသွားပါတယ်။”လို့ ထုတ်ပြန်ချက်မှာပြောပါတယ်။

ပြီးတော့ မကြာသေးခင်က နိုင်ငံအနှံ့အပြားမှာ ဖြစ်ပွားခဲ့တဲ့ အခြေအနေမငြိမ်သက်မှုတွေကြောင့် နေရပ်စွန့်ခွာရွှေ့ပြောင်းခဲ့ရသူ လူပေါင်း ၁၇,၅၀၀ ကိုလည်း ထောက်ပံ့ကူညီနိုင်ခဲ့ပြီး  နေရပ်စွန့်ခွာရွှေ့ပြောင်းခဲ့ရသူတွေကို အခုသြဂုတ်လထဲမှာ တိုးချဲ့ကူညီသွားဖို့လုပ်နေတယ်လို့လည်း ထုတ်ပြန်ပါတယ်။

မြန်မာနိုင်ငံမှာ အကောင်အထည်ဖော်ဆောင်ရွက်နေတဲ့ ကမ္ဘာ့စားနပ်ရိက္ခာအစီအစဉ် WFP ရဲ့ အသက်ကယ်ဆယ်ရေးလုပ်ငန်း တွေကို ဆက်လုပ်နိုင်ဖို့ အခုလကစပြီး  ၂၀၂၂ ခုနှစ်၊ ဇန်နဝါရီလ အထိ ကြားကာလ အရေးပေါ် ရန်ပုံငွေလိုအပ်ချက် အမေရိကန်ဒေါ်လာ ၈၆ သန်းရရှိနိုင်ဖို့ ကြိုးပမ်းနေတယ်လို့လည်း ထုတ်ပြန်ထားပါတယ်။