ရန်ကုန်မှာ စစ်ကောင်စီက လာမယ့် မြန်မာ့နှစ်သစ်ကူး သင်္ကြန်ပွဲတော်ကို စည်စည်ကားကား ကျင်းပဖို့အတွက် စက်ရုံ၊ အလုပ်ရုံတွေသာမကပဲ စားသောက်ဆိုင်တွေကိုပါ တဆိုင်ကို ကျပ် ၃ သိန်းသတ်မှတ်ကောက်ခံနေတယ်လို့ ဆိုင်ရှင်တွေထံက သိရပါတယ်။ 

စစ်ကောင်စီက အခုနှစ် သင်္ကြန်ကို စည်ကားသိုက်မြိုက်စွာကျင်းပဖို့ နည်းလမ်းမျိုးစုံနဲ့ပြုလုပ်နေပြီး ကုန်ကျစရိတ်ကို လုပ်ငန်းရှင်တွေနဲ့ စားသောက်ဆိုင်၊ လက်ဖက်ရည်ဆိုင်တွေပါမချန်ပဲ ငွေကြေးတောင်းခံနေတယ်လို့ ရန်ကုန်မြို့က စားသောက်ဆိုင်ပိုင်ရှင်တဦးကပြောပါတယ်။

မြောက်ဥက္ကလာပမြို့နယ်မှာ စားသောက်ဆိုင်ဖွင့်ထားသူတဦးက “ထွေအုပ်ရယ်၊ ရပ်ကွက်အုပ်ချုပ်ရေးမှူးတွေက လိုက်ကောက်နေတာ။ သူတို့ကို ၃ သိန်းပေးရမှာစိုးလို့ ဆိုင်မဖွင့်ဖြစ်တာ တပတ်ကျော်ပြီ။ ပေးစရာလည်းမရှိဘူး။ အခုကသိတဲ့အတိုင်း တရက်တာ ဆိုင်အရင်းအနှီး ရအောင်လုပ်နေရတာ မလွယ်ဘူး”  ပြောပါတယ်။

ဒီလိုစားသောက်ဆိုင်တွေအပြင် စက်ရုံ၊ အလုပ်ရုံတွေထံကလည်း လုပ်ငန်း၊ စက်ရုံအကြီး အသေးပေါ်မူတည်ပြီး ကျပ် ၂ သိန်းကနေ၊ ကျပ် ၅ သိန်းလောက်အထိ ကောက်ခံနေ တယ်လို့သိရပါတယ်။

ဒါ့အပြင် ရန်ကုန်မြို့လမ်းမတွေပေါ်မှာ စည်ကားနေစေဖို့အတွက် ထွေအုပ်ဝန်ထမ်းတွေ သင်္ကြန် လည်ပတ်ရမှာဖြစ်ပြီး၊ ရပ်ကွက်အပိုင်လိုက် ရာမှူးတွေကတဆင့် တအိမ်တယောက် သင်္ကြန် ရေပက်ခံထွက်လည်ပတ်ဖို့အတွက် စည်းရုံးပြောဆိုနေပါတယ်။ 

စစ်ကိုင်းတိုင်း၊ ကောလင်းမြို့ပေါ်က စတိုးဆိုင်ပိုင်ရှင်နဲ့ စားသောက်ပိုင်ရှင် အပါအဝင် အရပ်သား ၅  ယောက်ကို  စစ်ကောင်စီက  ဇွန် ၄ ရက် နေ့ခင်းပိုင်းမှာ ဖမ်းဆီးသွားတယ်လို့ ဒေသခံတွေက ပြောပါတယ်။

ကောလင်းမြို့ခံတဦးက “ဖမ်းတာကတော့ စတိုးဆိုင်ပိုင်ရှင် ဦးအောင်သူရရယ်၊ ကောင်းကောင်းရယ် ၊ ဒေါ်ကြည်ကြည်ခိုင်ရယ်၊ စားသောက်ဆိုင်လုပ်ငန်းရှင် ဦးအောင်ကျော်ဦး ခေါ် ဦးကျော်ဦးရယ် ကျန်တယောက်ကတော့ ဘယ်သူဆိုတာတော့ အတိကျမပြောနိုင်ဘူးဗျ။ ဖမ်းတာကတော့ ငါးဦးဖမ်းတာသေချာတယ်။ ဘာကြောင့်ဖမ်းတာလဲဆိုတော့ သူတို့ငွေလိုလို့‌ ဖမ်းတာလို့ပဲ ပြောရမယ်။ အခုသူတို့ ဖမ်းတဲ့သူတွေက ဘာမှလုပ်တာမှ မဟုတ်တာအသိသာကြီးပဲ” လို့ ပြောပါတယ်။

အခုဖမ်းဆီးထားသူ ၅ ယောက်ကို ဘယ်မှာ ဖမ်းဆီးထားတယ် ဘာကြောင့်ဖမ်းဆီးတယ်ဆိုတာကိုတော့ တိတိကျကျ မသိရသေးပါဘူး။ 

စစ်ကောင်စီတပ်ကတော့ ကောလင်းမြို့မှာသာမက စစ်ကိုင်းတိုင်း၊ မုံရွာမြို့တော်ဝင်ကျောက်စိမ်း ဟိုတယ်ပိုင်ရှင် အပါအဝင် ၅ ယောက်ကိုလည်း စစ်ကောင်စီက မေ ၂၈ ရက်က ဖမ်းဆီးခဲ့ပါတယ်။

စစ်ကောင်စီတပ်တွေကတော့ အခုလို စီးပွားရေးလုပ်ငန်းရှင်တွေနဲ့ အပြစ်မဲ့ရွာသားတွေကို စွပ်စွဲ ချက်အမျိုးမျိုးနဲ့ ဖမ်းဆီးကာ နောက်ပိုင်းမှာ ငွေကြေးတောင်းခံပြီး ပြန်လွှတ်ပေးတာရှိတယ်လို့ ဒေသခံတွေရဲ့ပြောပြချက်အရ သိရပါတယ်။