စစ်ကိုင်းတိုင်း၊ စစ်ကိုင်းမြို့၊ ပန်းပဲတန်းရပ်ကွက်ရှိ  ခရိုင်စိုက်ပျိုးရေးရုံးမှာ ဒီဇင်ဘာ ၂၃ ရက်က နေ့လယ် ၂ နာရီကျော်လောက်က ဗုံးနဲ့နဲ့ တိုက်ခိုက်ခံရလို့ ဝန်ထမ်းတွေအပါအဝင် ၉ ယောက် ဒဏ်ရာရသူတွေ ရှိခဲ့တယ်လို့ မြို့ခံတွေထံက သိရပါတယ်။

လက်ပစ်ဗုံးဟာ စိုက်ပျိုးရေးရုံးအတွင်း ကျရောက်ပေါက်ကွဲခဲ့လို့  စစ်ကောင်စီ ဝန်ထမ်း ၇ ယောက်နဲ့ ကလေးငယ် အပါအဝင် ရုံးကို လာလည်တဲ့ ဝန်ထမ်းမိသားစု နှစ်ယောက်လည်း ထိခိုက်ဒဏ်ရာရတယ်လို့ ဒေသခံတစ်ဦးကပြောပါတယ်

ဗုံးပေါက်ကွဲမှုကြောင့် ဒဏ်ရာရသူတွေကတော့ ဒုဦးစီးမှူး ဦးသီဟန်ဦး၊ ဒုဦးစီးမှူး ဒေါ်ဖြူဖြူဝင်း၊ ဒုဦးစီးမှူး ဒေါ်နွဲနွဲအေး၊ အငယ်တန်းစာရေး ဒေါ်သီသီလှိုင်၊ လက်ထောက် ဦးစီးမှူးဒေါ်ဆွေဆွေအောင်၊ ဒုလက်ထောက်ဦးစီးမှူး ဒေါ်ဝင်းမြတ်သူ၊ လက်ထောက်ဦးစီးမှူး ဒေါ်လှလှရီတို့ ၇ ယောက်အပြင် ရုံးကို အလည်လာတဲ့ အမျိုးသမီးတစ်ဦးနဲ့ သူနဲ့ပါလာတဲ့ ၁၁ လအရွယ် ကလေးငယ်တစ်ဦးတို့လည်း ဒဏ်ရာရသွားတယ်လို့ သိရပါတယ်။

စစ်ကိုင်းခရိုင် စိုက်ပျိုးရေးရုံကို  ဗုံးနဲ့ တိုက်ခိုက်မှုကို  Royal Phoenix Guerilla Force အဖွဲ့က လုပ်ဆောင်ခဲ့တာလို့ ဆိုပါတယ်။

မကွေးတိုင်း၊ ရေစကြိုမြို့ စိုက်ပျိုးရေးရုံးအတွင်းမှာ စက်တင်ဘာ ၈ ရက် ဒီနေ့ မွန်းလွဲ ၂ နာရီဝန်းကျင်လောက်က ဗုံး ၁ လုံးပေါက်ကွဲခဲ့တယ်လို့ သိရပါတယ်။

ဒေသခံတဦးက “အသံကြားလိုက်တယ်။ ဘာတွေထိသွားလဲ မသိရသေးဘူး။ ရဲနဲ့ စစ်သားတွေ ရောက်လာပြီးတော့ လမ်းသွားလမ်းလာတွေကို စစ်နေတယ်” လို့ ပြောပါတယ်။

ဗုံးပေါက်ကွဲမှုကြောင့် လူတွေ ထိခိုက်ဒဏ်ရာရမှု ရှိ၊ မရှိနဲ့ အဆောက်အအုံတွေ ပျက်စီးမှု ရှိ၊ မရှိ သိရှိနိုင်ဖို့ DVB က ဆက်လက်စုံစမ်းနေပါတယ်။

ရေစကြို၊ စိုက်ပျိုးရေးရုံးက ဗုံးပေါက်ကွဲမှုဖြစ်စဉ်နဲ့ပတ်သက်လို့ ဘယ်အဖွဲ့တွေကမှ သူတို့ရဲ့ လက်ချက်လို့ ကြေညာချက်ထုတ်ပြန်ထားတာ မရှိသေးပါဘူး။