ရန်ကုန်တိုင်းအတွင်းရှိ မြို့နယ်အချို့မှာ မုန်တိုင်းဖြစ်လာပါက သောက်သုံးရေပြတ်လပ်မှာစိုးပြီး ရေကြိုတင်ဝယ်ယူ သိုလှောင်သူတွေ များလာလာတယ်လို့ မြို့ခံတွေက ပြောပါတယ်။

လျှပ်စစ်မီးအချိန်ကြာမြင့်စွာ ပြတ်တောက်မှုနဲ့ ဂျိုးဖြူရေပုံမှန်မရှိလို့ မုန်တိုင်းဖြစ်လာပါက သောက်သုံးရေ အခက်အခဲဖြစ်မှာစိုးပြီး ရေသန့်ဝယ်ယူသိုလှောင်ထားရတယ်လို့ မြောက်ဥက္ကလာနေသူတဦးက ဒီဗွီဘီကို ပြောပါတယ်။

"မီးကမလာတော့ ရေမရဘူး၊ ဒါကြောင့် သုံးရေထက် သောက်ရေကို ဦးစားပေးပြီး ဝယ်ထားရတယ်။ နာဂစ်တုန်းက သောက်ရေပြဿနာက အတော်ဆိုးတာ" လို့ ပြောပါတယ်။

မြောက်ဒဂုံ၊ မြောက်ဥက္ကလာ၊ သာကေတနဲ့ တောင်ဒဂုံမြို့နယ်မှာ နှစ်ရက်ဆက်တိုက် မိုးသည်းထန်စွာ ရွာသွန်းပြီးနောက် မီးအချိန်ကြာမြင့်စွာ ပြတ်တောက်ပြီး ရေဝယ်ယူသိုလှောင်ထားရတာလို့ တောင်ဒဂုံမြို့ခံတဦးက ဒီဗွီဘီကို ပြောပါတယ်။

"ဂျိုးဖြူရေပေးတဲ့အချိန် မီးကပျက်နေတယ်၊ မီးလာတဲ့အချိန်ကျတော့ ရေပေးတဲ့အလှည့်က အခြားရပ်ကွက်ကို ရောက်သွားရော ရေသန့်တွေ ဝယ်လှောင်ထားရတယ်၊ မိုးကလည်း ဆက်တိုက်ရွာနေတာဆိုတော့။" 

မုန်တိုင်းအတွက် ရေဝယ်ယူသိုလှောင်သူတွေရှိသလို သောက်သုံးရေမရှိလို့ ပရဟိတအဖွဲ့တွေက လှူဒါန်းတဲ့ရေကို သိုလှောင်ထားရတယ်လူတွေလည်းရှိတယ်လို့ ဒလမြို့ခံတဦးက ဒီဗွီဘီကို ပြောပါတယ်။

"ဒလမှာဆို ကြီးလေးကြီး ပရဟိတအဖွဲ့က လာလှူနေတာ တပတ်လောက်ရှိပြီ။ ကျန်စစ်သား၊ တပင်ရွှေထီးနဲ့ စံပြရပ်ကွက်တွေမှာ မုန်တိုင်းသာ တကယ်ဝင်မယ်ဆို ကျနော်တို့လို မြစ်နဲ့နီးတဲ့သူတွေက ပိုဆိုးတယ်။" 

လက်တလောမှာ သောက်ရေသန့်ဘူးစျေးနှုန်းမှာ ၁၂၀၀ မှ ၈၀၀ အတွင်းရှိပြီး ဝယ်ယူသူတွေဆီ အလျင်မီအောင် မပို့နိုင်ဘူးလို့ သောက်ရေသန့်ရောင်းသူတဦးက ဒီဗွီဘီကို ပြောပါတယ်။

"၁၂၀၀ ဆိုတာ တိုက်အပေါ်ထိ ထမ်းတင်ပေးရတာ။ ၈၀၀ ဆိုတာ တိုက်အောက်ဆင်းယူရတာ။ အခုဆို မိုးရွာပြီး မီးကမလာတော့ ရေဘူးဝယ်လှောင်ထားတဲ့သူတွေများတယ်၊ ဂျိုးဖြူရေသုံးတဲ့သူတွေ ဝယ်လှောင်တာများတယ်။" 

အချို့ကလည်း  မုန်တိုင်းဖြစ်ပေါ်လာပါက သောက်သုံးရေအပြင် ဆေးဝါးနဲ့ ပလတ်စတစ်ပုံး၊ တာယာကွင်းတွေ ဆောင်ထားတယ်လို့ သိရပါတယ်။

လက်တလောမှာ ရန်ကုန်အတိုင်းဒေသကြီးအတွင်းမှာ စစ်ကောင်စီတပ်၊ ရဲ၊ မီးသတ်နဲ့ လူမှုဝန်ထမ်းအဖွဲ့တွေက မုန်တိုင်းကြိုတင်ကာကွယ်ရေးအတွက် မြို့နယ်ရုံးတွေမှာ အုပ်စုဖွဲ့ စောင့်ကြည့်နေပါတယ်။ 

မြန်မာနိုင်ငံမှာ အကြမ်းဖက်စစ်အုပ်စုက မတရားအာဏာသိမ်းမှုကို အဖွဲ့ဝင် ၇ နိုင်ငံပါတဲ့ G7 စက်မှုထိပ်သီးနိုင်ငံတွေက ပြင်းပြင်းထန်ထန် ရှုတ်ချလိုက်ပြီး ယိုယွင်းလာတဲ့ မြန်မာနိုင်ငံရဲ့ လုံခြုံရေး၊ လူသားချင်း စာနာထောက်ထားမှုဆိုင်ရာ၊ လူ့အခွင့်အရေးနဲ့ နိုင်ငံရေး အခြေအနေတွေအပေါ် နက်နက်ရှိုင်းရှိုင်း စိုးရိမ်နေတယ်လို့ ပြောပါတယ်။

ဒါ့အပြင် ပြီးခဲ့တဲ့ရက်ပိုင်းက စစ်ကိုင်းတိုင်း၊ ကန့်ဘလူမြို့နယ်၊ ပဇီကြီးကျေးရွာကို အကြမ်းဖက်စစ်အုပ်စုရဲ့ လေကြောင်းတိုက်ခိုက်မှုကို ပြင်းပြင်းထန်ထန် ရှုတ်ချကြောင်းလည်း ဖော်ပြထားပါတယ်။

ဂျပန်နိုင်ငံမှာကျင်းပတဲ့ G7 စက်မှုထိပ်သီးနိုင်ငံတွေရဲ့ နိုင်ငံခြားရေးဝန်ကြီးတွေ အစည်းအဝေး အပြီး ဧပြီ ၁၈ ရက် မနေ့ကထုတ်ပြန်တဲ့ ကြေညာချက်မှာ ဖော်ပြထားတာဖြစ်ပြီး ခုလို အကြမ်းဖက်မှုတွေအားလုံးကို ချက်ချင်းရပ်တန့်ဖို့၊ နိုင်ငံရေးအကျဉ်းသားတွေ အပါအဝင် မတရားဖမ်းဆီးခံထားရသူတွေ အားလုံးကို ပြန်လွှတ်ပေးဖို့၊ တိုင်းပြည်ကို စစ်မှန်တဲ့ ဒီမိုကရေစီလမ်းကြောင်းပေါ် ပြန်ရောက်စေဖို့လည်း မြန်မာစစ်အုပ်စုကို တောင်းဆိုထားပါတယ်။

ဒါ့အပြင် မြန်မာနိုင်ငံထဲက ဒုက္ခရောက်နေသူတွေဆီ လူသားချင်းစာနာထောက်ထားမှုဆိုင်ရာ အကူအညီတွေ ပေးအပ်နိုင်ရေးမှာ အဟန့်အတားမရှိ ဘေးကင်းလုံခြုံစွာ ပေးအပ်နိုင်ရေး အတွက် အာမခံပေးဖို့နဲ့ သက်ဆိုင်သူတွေ အားလုံးပါဝင်ပြီး ငြိမ်းချမ်းတဲ့ တွေ့ဆုံဆွေးနွေးမှုတွေ ပေါ်လာနိုင်စေမယ့် အခြေအနေတွေ ဖန်တီးနိုင်ဖို့လည်း တောင်းဆိုလိုက်တာပါ။

G7 စက်မှုထိပ်သီးနိုင်ငံတွေအနေနဲ့ မြန်မာနိုင်ငံဆိုင်ရာ ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ်ကို ထောက်ခံသွားမှာဖြစ်ပြီး လုံခြုံရေးကောင်စီရဲ့ မြန်မာနိုင်ငံ အခြေအနေနဲ့ ပတ်သက်တဲ့ ဆုံးဖြတ်ချက် UNSCR ၂၆၆၉ ကိုလည်း ကြိုဆိုတယ်လို့ ဆိုပါတယ်။

ဒါ့အပြင် မြန်မာနဲ့ပတ်သက်တဲ့ ဘုံသဘောတူညီချက် အကောင်အထည်ဖော်နိုင်အောင် အာဆီယံရဲ့ ကြိုးပမ်းမှုတွေကို ဆက်လက် ထောက်ခံအားပေးသွားမှာဖြစ်ကြောင်းလည်း ထုတ်ပြန်ချက်ထဲမှာ ဖော်ပြပါတယ်။