စစ်ကိုင်းတိုင်း၊ ကလေးမြို့၊ တာဟန်းမီးပွိုင့်ရှိ စစ်ကောင်စီကင်းတဲဂိတ်ကို ဒီဇင်ဘာ ၂၄ ရက်မှာ ဝင်ရောက်စီးနင်းခဲ့တယ်လို့ CDF-KKG တပ်ဖွဲ့က ပြောပါတယ်။
အခုလို ဝင်ရောက်စီနင်းခဲ့ရာ MA 2 သေနတ် တလက်နဲ့ ကျည်ဘောက် တခု၊ ကျည်ဆန်အတောင့် ၆၀ သိမ်းဆည်းနိုင်ခဲ့တယ်လို့ ဆိုပါတယ်။
တာဟန်းမီးပွိုင့်ရှိ စစ်ကောင်စီတပ်သားတွေက CDF-KKG တပ်ဖွဲ့ဝင်တွေ ချဉ်းကပ်လာတာကို မြင်တွေ့ခဲ့ပြီး ပစ်ခတ်မှုမရှိဘဲ သေနတ်ထားကာ ထွက်ပြေးသွားခဲ့တယ်လို့ CDF-KKG ရဲ့ တာဝန်ခံက ပြောပါတယ်။
"စစ်သားတွေက ကျနော်တို့အဖွဲ့ ချဉ်းကပ်လာတာမြင်တော့ လန့်ပြီး ထွက်ပြေးကြတာ။ အဲဒါ ကျန်ခဲ့တဲ့ သေနတ် တလက်နဲ့ ကျည်ဆန်၊ ကျည်အိမ်တွေရခဲ့တာ။ ကျနော်တို့လည်း စစ်ကူလာတယ် သတင်းရလို့ ချက်ချင်းပဲ လွတ်မြောက်နယ်မြေ ပြေးကြရတာ။"
အဲဒီနောက် စစ်ကောင်စီတပ်သားအင်အား ၃၀ ခန့်ရောက်လာပြီး အနီးဝန်းကျင်ကို သေနတ်နဲ့ ပစ်ခတ်ခဲ့တယ်လို့ ဆိုပါတယ်။
အဲဒီနေ့ မနက် ၁၁ နာရီလောက်မှာပဲ တာဟန်းရပ်ကွက် ဗိုလ်ချုပ်လမ်းနဲ့ ဝယ်စလီဆေးရုံ လမ်းထောင့်မှာ တပ်စွဲတဲ့ စစ်ကောင်စီတပ်သားတွေက ပစ်ခတ်လို့ ဆိုင်ကယ်စီး အရပ်သား တယောက် သေဆုံးပြီး ၁ ဒဏ်ရာရရှိခဲ့တယ်လို့ သိရပါတယ်။
ပျဉ်းခုံကြီးရွာသားနှစ်ဦးဟာ ဆိုင်ကယ်တစ်စီးနဲ့ ဝယ်စလီဆေးရုံနားဖြတ်သွားစဉ် ပစ်ခတ်ခံ ရတာပါ။
ပစ်ခတ်မှုကြောင့် ဆိုင်ကယ်နောက်မှာလိုက်ပါလာတဲ့ ချင်းအမျိုးသား U Thian Zei Thang (၃၅နှစ်)ရဲ့ ညာဘက်ရင်အုံ ထိမှန်ပြီး သွေးထွက်လွန်ကာ နေရာမှာတင် ပွဲချင်းပြီး သေဆုံးသွားပြီး ဆိုင်ကယ်မောင်းသူ အမျိုးသားကတော့ လက်တစ်ဖက်ကို ကျည်ဆန်ထိမှန်သွားတယ်လို့ ဒေသခံတွေက ပြောပါတယ်။
သေဆုံးသူရဲ့အလောင်းကို ကလေးမြို့ကာယကံမေတ္တာ လူမှုကူညီမှုအသင်းက လာရောက် သယ်ဆောင်ပေးကြပြီး ကုတင် ၁၀၀ တပ်မတော်ဆေးရုံက ရင်ခွဲရုံကို ပို့ဆောင်ခဲ့တယ်လို့ ကာယကံမေတ္တာလူမှုကူညီရေးအသင်းရဲ့တာဝန်ခံက ပြောပါတယ်။
ဓာတ်ပုံ-ကာယကံမေတ္တာ
မွန်ပြည်နယ်၊ ကျိုက်ထိုမြို့နယ်၊ ဝင်းကလောကျေးရွာလမ်းဆုံရှိ စစ်ကောင်စီဂိတ်စခန်းကို အောက်တိုဘာ ၁ ရက်နေ့ မနက် ၅ နာရီလောက်မှာ KNLA ပူးပေါင်းတပ်ဖွဲ့က ဝင်ရောက်စီးနင်းခဲ့တယ်လို့ သထုံခရိုင် PDF တာဝန်ခံက ဒီဗွီဘီကို ပြောပါတယ်။
အဲဒီစစ်ကောင်စီဂိတ်စခန်းကို ကရင်အမျိုးသားလွတ်မြောက်ရေးတပ်မတော် (KNLA)၊ ကျိုက်ထိုတော်လှန်ရေးအင်အားစု (KRF) ပူးပေါင်းတပ်ဖွဲ့က ဒရုန်းနဲ့ တိုက်ခိုက်ပြီးနောက် ဝင်ရောက် စီးနင်းခဲ့တာပါ။
အဲဒီတိုက်ခိုက်မှုအတွင်း စစ်ကောင်စီတပ်သားတွေ ထွက်ပြေးသွားတဲ့အတွက် ဂိတ်စခန်းတခုလုံးကို KNLA ပူးပေါင်းတပ်ဖွဲ့ဝင် ဝင်ရောက်စီးနင်းရှာဖွေခဲ့တယ်လို့ သထုံခရိုင် PDF တာဝန်ခံက ဆိုပါတယ်။
စစ်ကောင်စီတပ်သားတွေ ထွက်ပြေးသွားတဲ့အတွက် ဂိတ်စခန်းထဲမှာ ကျန်ရှိခဲ့တဲ့ ဆိုလာ ၂ ချပ်အပါအဝင် အသုံးအဆောင် ပစ္စည်းတချို့ကို KNLA ပူးပေါင်းတပ်ဖွဲ့က သိမ်းဆည်းရမိခဲ့တာပါ။
စစ်ကောင်စီဂိတ်စခန်း ဝင်ရောက်စီးနင်းခံရပြီးနောက် စစ်ကောင်စီ လက်အောက်ခံ ခမရ (၂) တပ်ရင်းနဲ့ အမှတ် (၆၀၂) ဒုံးတပ်ရင်းတွေကနေ လက်နက်ကြီးတွေ ရမ်းသမ်းပစ်ခတ်တိုက်ခိုက်ပေမယ့် KNLA ပူးပေါင်းအဖွဲ့က ထိခိုက်မှု တစုံတရာ မရှိဘဲ ဆုတ်ခွာနိုင်ခဲ့ပါတယ်။
စစ်ကောင်စီ ဝင်းကလောဂိတ်စခန်းဟာ စစ်ကောင်စီတပ်ဖွဲ့ဝင် ၁၅ ယောက်နီးပါး လာရောက် ကင်းချနေထိုင်နေတဲ့ ဂိတ်စခန်းတခုလည်း ဖြစ်ပါတယ်။
ပြီးခဲ့တဲ့ စက်တင်ဘာ ၃၀ ရက်နေ့ကလည်း ကျိုက်ထိုမြို့နယ်၊ မုပ္ပလင်လမ်းဆုံမှာရှိတဲ့ စစ်ကောင်စီဂိတ်စခန်းကို KNLA ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီး အဲဒီတိုက်ခိုက်မှုအတွင်း စစ်ကောင်စီဘက်က ၂ ဦး သေဆုံးထားပါတယ်။
